صديقتي النجمة

02:49 PM January, 07 2022

سودانيز اون لاين
الطيب الشيخ-الخرج ـ السعودية
مكتبتى
رابط مختصر

بث الهموم إلى النجوم!!!

النجمة ديك شايفنها
نجمة بتعاين لي شديد
عاين هناك علي ود تميم
واصعد مع بصرك بعيد

النجمة ديك انا بعرفها
كل ليلة بعد الناس تنوم
زي البتتكلم معاي
مرات بتضحك وتبتسم
ولا اظني بتخيل براي

قالت لي انت عرفتني
صنقرت وسط العنقريب
ونزلت شلت ابريق ابوي
غسلت عيني من النعاس
ضحكت علي

قلت ليها شكلك ما غريب
وشك دا يشبه وش امي
قُبال ما تغيب

ما قلت ليك قُبال كِدا
امي شالوها فوق العنقريب
جروا بيها كانوا رجال كُتار
لكن لمن جاء العنقريب
كان فاضي ما رجعت معاه

انا مرة قمت سالت أبوي
قبل هناك ما رد لي
جاوبني ابوى بي دمعة
اول مرة اشوفها
قال لي قوم املا الاباريق للصلاة
نتغدى شان نمشي الخلاء

وانا خفت خليت السؤال
كان سافرت نص النهار
جابوها بالعربية البيضاء
واتلموا فينا خلق كُتار

وكان بيتنا مليان بالضيوف
نسوان كُتار
واحدات صغار واحدات كبار
واحدات اشوفهن اول مرة
حايمات في الفريق

النجمة ذاتها بكت معاي
قالت لي خلاص اتغطى نوم
باكر بتمشي المدرسة
قلت ليها انتي طلعتي كيف

انا امي قالوا مشت بعيد
يمكن تكون شفتيها
او طلعت معاكم بهناك
كان لاقتك قولي ليها
انتي مشيتي وين

اتدلي لي اتونسي
قالت لي: لا.
انا بيتي عالي هناك شديد
عاينت تاني محلها
كانت صعيد العنقريب
وانا ما بحب العنقريب

قالت خلاص ارقد كفاك
انا بكره تاني كمان بجيك
انا بي النهار بمشي واغيب
قالت النهار حق الشمس
ونحن النجوم ننجم ننوم
وبالليل بنمرق تاني
عشان نضوى الناس الدروب

قلت ليها داير اطلع معاك
قالت لي: لا.
عاينت شفت العنقريب
حق امي مختوت بهناك
رقدن عليه نسوان سمان
واحدات اهلنا وما اهلنا
لمن الحريم اتفرقن
كسرن كراع العنقريب
جدعوه هناك ما صلحوهو

وانا كل ليل افضل اعاين في السماء
وارعى النجوم والناس تنوم
واحدين بيشخروا يزعجوا
يحموك لو لحظة غميض

وكل ام بتفقد طفلها
تغطيهو بي توبها التقيل
عشان السقط ما يمرضه
والدنيا كانت زي خريف
وكان الهبوب جايانا من جهة الصعيد

وانا راقد اتكرفس براي
ولا زول حداي
في عنقريب من غير لحاف
مرات انوم مراتٍ أخاف
مرات انوم بعد العشاء
ومرات براي اسهر شديد

وسؤالي شايلو معاي سنين
ما لقيت جواب

وسمعت نسوان ينضمن
قالن بخيتة سعيدة
كانت ميته هينه ولينه
في يوما سمح في يوم سعيد
واحدات دميعاتن جرن
وتانيات ولا هاميها شيء

ومرات اقول باكر تجي
الا الغياب طول شديد
يمكن مع النجمات هناك
ويمكن مشت ابعد بعيد

النجمة صاحبتي قالت لي
اصلو البيرحل ما بيعود
وقالت لي ما تسأل كتير
دا كلام كبير هسع عليك
باكر بتعرف كل شيء

والناس دي كلها في سفر
والليلة مازي يوم أمس
وكل زول بيجي الميعاد بيمش
حتى النجوم حتى الشمس
بيجي يوم تغيب ويجي يوم تمش