حمدوك والمحافير

05:30 AM December, 21 2021

سودانيز اون لاين
أبوبكر عباس-الإمارات
مكتبتى
رابط مختصر

بعد أن وصفته بعد الانقلاب بأنه خائن،
لكن برضو ما شائف ليهو بديل نهائياً
أول مرّة بالسودان يمسك الحكومة التنفيذية زول عندو خطة واضحة وقادر على تنفيذها،
لو لا دس المحافير والقراد الكثير من جيش ودعم سريع وأحزاب وسودانيزاونلاين وفيس،
كان عبر بينا

عليك الله، يا حمدوك، ما تمشي
"فالزمان مسغبة"

جعلي في ( والزمان مسغبة)
اخر خبر كان مجتمع مع الاجهزة الامنية
و امر بفتح كبري السلاح الطبي
كضب ولا جد ما معروف

من لديه معلومة يخبرنا ف ( الزمان مسغبة)

الخطة الواضحة دي داخل فيها القتل والاغتصاب المدور كل يوم دة؟

إذا لم تكن لي والزمان شرم برم ، فلا خير فيك والزمان ترللي

هلا اخلاص
بكون عمل كدا
داير يلقى حل عشان يجيب لينا الدولارات رب رب رب

يا ترللي إتّا
القتل والاغتصاب من تنافس القراد المسلح والأحزاب

حمدوكنا بتاع دولارات من بلاد برّة

يا بكّور حمدوك نفسيا كدا الناس ما بتقبله تاني و الشارع عموما اتجاوزه و اعتبره كانه غير موجود, التركيز على الأعداء الجد, هو سيسقط بسقوطهم
لكن حتى ذلك الحين متكيف انا من جرسة الكوز بتاع قناة طيبة من رجوع حمدوك و الغاؤه لقرارات البرهان العاملين بيها مناحة

فلنكن واقعين ومنصفين
حمدوك لا يستطيع فتح باب منزله الا باذن
من العسكر فهو سكرتير ادي البرهان وحميدتي
البرهان في بيانه الانقلابي الاول ذكر بالحرف الواحد انه يريد
رئيس وزراء ويعطيه الموجهات العامة ثم بناءا علي موجهات البرهان
فحمدوك كما يقول المصريين
رجل غلبان

Quote: القتل والاغتصاب من تنافس القراد المسلح والأحزاب

تم من عساكر جيش وشرطة
اللي بالمناسبة بتبعوا لوزارات الدفاع والداخلية المسؤول منهم رئيس الوزراء في باقي العالم
الأحزاب من متين بتستخدم السلاح عشان تقتل المتظاهرين؟!!!!
الليلة جبت خارجيات انت

الشارع رافضه
بكور بقول ما في بديل عشان الدولارات
والزمان مسغبة ، الدولارات دي ما جاءت
قبل الانقلاب ليه ؟ منتظرين بها شنو؟

غايتو الخواجات والعربان عملو لينا تمر الفكي
والزمان مسغبة

أعتقد انو العقدة الرئيسية أمام حمدوك والجميع هي ملف فض الإعتصام والشهداء عموماً،
لا أحد يستطيع طرح خارطة طريق عملية لحلها،
أي زول حا يجي ح يواجه بهذه المعضلة

هل في زول عندو حل لها؟

أنا داير أتجرأ وأطرح حل

بالله عليكم، أردموني بشويش
برضو كنت صاحبكم زمان ويا ما ونستكم

في داعي أعمل مقدمات ولفة طويلة وأدرّق، ولّ طوالي أكب المبادرة وما أخاف؟

حمدوك اعتقد انو لما تكون الحاضنة عسكرية بقدر ينفذ برنامجو (إن وُجد) بحزم وبدون ازعاج من الحاضنة المدنية
بناء على كراهية الشعب المفترضة للمكون المدني ممثلاً في الحرية والتغيير
وهو والبرهان وحميدتي ناسيين الجسم المدني الجماهيري البضم شباب الثورة الرافض لأي حكم عسكري على رأس السلطة

Quote: لكن برضو ما شايف ليهو بديل نهائياً

البديل سوف يحمل بذرة عدم استقرار البلد لو من اليسار او اليمين ...
أااااي حمدوك محسوب على اليسار لكن وجوده خلال
السنتين الماضيتين كرئيس للوزراء جعلت الثقة متوفرة
عند الطرفين ...

سلام ~
الأخ حمد عبد الغفار كتب
"حمدوك اعتقد انو لما تكون الحاضنة عسكرية بقدر ينفذ برنامجو (إن وُجد) بحزم وبدون ازعاج من الحاضنة المدنية
بناء على كراهية الشعب المفترضة للمكون المدني ممثلاً في الحرية والتغيير
وهو والبرهان وحميدتي ناسيين الجسم المدني الجماهيري البضم شباب الثورة الرافض لأي حكم عسكري على رأس السلطة"

أتفق معاك تماما أخ حمد ، حمدوك جاى من الجهات المرسلاه ببرنامج (الكارثة) عشان كدا الشفيع خضر -الداعم الأول للإنقلاب - شايل وساطاته ولافى "ستقع الكارثة ، لقد وقعت الكارثة).
الفكرة إنه البلد تكون فى حالة زى الحاصل فى السودان دا (حصل فى تشيلى زمان) ، والشعب يقاوم والعسكر يقتل ويغرق ويخفى ويقوم بكل الجرائم وحمدوك كل المطلوب منه يصمت وينفذ الخطة الإقتصادية التدميرية المرسومة.
* ما بيقدر فى بلد زى السودان بشعبه الصامد وتعدد مليشيات القتلة ، أضافة لانعدام الذكاء كان من جهة حمدوك كان شلته.

الاخت هدي كيفك
الرجاء توضيح الماخذ علي برنامج حمدوك الاقتصادي
والبديل له.

سلام~
ممكن يا دكتورة تشوفى فكرة برنامج حمدوك فى البوست المرفق دا:
https://sudaneseonline.com/board/510/msg/1637807482.html

طيب يا الحبيبة
اغير السؤال لانه ما ظهر من برنامج حمدوك للان
لازيطابق مدرسة شيكاغو او نقول لم يظهر كله
البرنامج ال لتدعو له انتو شنو؟

الاسئلة دي عشان نصل لحلول نتفق عليها
ما غير
مع كل الاحترام

علي ارض الواقع افرزت سياسات الحكومات
مزيداً من الفقر ، لم يتوقف نهب الثروات بواسطة
الجهات المتنفذة وقد حاولت استغلال ما تم من فك
الحظر لمصلحتها ، الجماهير التي زاد لها البدوي
المرتبات لم تستفد شئ فقد ابتلع السوق الزيادة.

البحث عن حل لا يتجاهل الدولي ولا المحلي

Quote: في داعي أعمل مقدمات ولفة طويلة وأدرّق، ولّ طوالي أكب المبادرة وما أخاف؟

إبراهيم الشيخ أمس في قناة الجزيرة رش حلو للقضية دي بدون ما يخاف.
إنت ما أخوف من إبراهيم الشيخ ولا حلك حيكون أشنا من الطريقة القدم بيها إبراهيم الشيخ الحل.

نزل الرابط يا حافظ بشير

سلام~
كتبتى يا دكتورة
"اغير السؤال لانه ما ظهر من برنامج حمدوك للان
لازيطابق مدرسة شيكاغو او نقول لم يظهر كله
البرنامج ال لتدعو له انتو شنو؟

الاسئلة دي عشان نصل لحلول نتفق عليها
ما غير "

برنامج حمدوك زى ما كتب الأخ حمد فوق - عايز الإنقلاب "الكارثة" ويبعد الحاضنة المدنية ويشتغل على تنفيذ برنامجه (المرسل بيه) كاملا- لأنه زى ما كتبتى ما ظهر كله ..
ما عرفت قصدك شنو ب”إنتو" أنا بس زى زيك أقرأ وأبحث وأحلل وأكون رأى ، إحتمال يكون مختلف أو متفق مع رأى الغير - أنا كل همى مصلحة عامة الشعب السودانى ، لأنه زى ما إنتى عارفة الشايفنه نحن من حياة فوق الإحتمال هناك الأصعب منها .

*حأواصل يا دكتورة هناك لم القى شوية وقت فى البوست المرفق وأطرح رأى .
——
أما حول دكتور البدوى وزيادته للمرتبات "للبعض" ما كان سليم إطلاقا- الحل تثبيت الأسعار ، لأنه الحصل بمجرد السمع بزيادة المرتبات الأسعار طارت السماء رغما عن أنها نفس البضائع الكان المدفوع فيها قبل الزيادة.
وتانى شئ الدولار (الأصبح سلعة) سعره يزيد السوق يطير (وبرضه تكون البضاعة سعرها قبل الزيادة)
سعر الدولار ينخفض - البضاعة قاعدة فى سعرها الزائد نفسه!
*ملاحظة الرب رب زى ما أغلب الناس عارفة قروش مزورة

شكراً هدهدالحبيبة

يا دكتورة
عملت إضافة فى البوست الآخر عشان ما ألخبط لدكتور بكرى فكرته فى البوست تبعه.

*استقالة حمدوك تعيد تمدد الانقلاب في المساحات التي انحسر عنها.*
.
.
*كتب ماهر ابوالجوخ:*

إستحوذ خبر إعتزام رئيس الوزراء دكتور عبدالله حمدوك الذي بثته وكالة رويترز مساء الثلاثاء 21 ديسمبر 20201م تقديم إستقالته في غضون ساعات على إهتمام المتابعين للمشهد السياسي السوداني، نظراً للتداعيات المترتبة على حدوثه.
بشكل ملخص فإن إستقالة رئيس الوزراء دكتور عبدالله حمدوك عند حدوثها وقبولها فالنتيجة المترتبة عليها هي إعادة تمدد إنقلاب 25 أكتوبر مرة أخرى في المساحات التي إنحسر عنها وتققهر منها، حينها سيتحرك الإنقلاب وعناصره لإستعادة السيطرة على مواضع سيطرتهم التي فقدوها لترتفع نسبة سيطرتهم على كل مفاصل الدولة ومؤسساتها المتناقصة يوماً بعد يوم لتعود سيطرتهم المطلقة على مؤسسات الدولة.
فعشية نشر (رويتزز) لخبر إعتزام رئيس الوزراء تقديم إستقالته في غضون ساعات، أصدر حمدوك قرار بإنهاء تكليف كل من مدير للهيئة العامة للإذاعة والتلفزيون، والمكلف بتسيير مهام مدير البنك الزراعي الصادرين عن السلطة الإنقلابية بعد 25 أكتوبر الماضي. طبقاً لتلك القرارات تمت إعادة مدير الأذاعة والتلفزيون المقال من الإنقلابيين الاستاذ لقمان أحمد لموقعه، وتمت تسمية بدرالدين عبدالله احمد العباس لتسيير مهام المدير العام للبنك الزراعي.
عند إستعادة الإنقلابيون للسيطرة المطلقة على مفاصل فإن السيناريو الأرجح هو وجنوحهم للعنف لفرض الأمر الواقع لتهيئة المشهد لشمولية وديكتاتورية جديدة تحكم بالحديد والنار تقضي على الأخضر واليابس، فإن أحد الفرضيات المزعجة هو إحتمال مضي المشهد بخطى متسارعة صوب إنهيار أكبر بإنزلاق البلاد في أتون صراع عنيف في إطار ممارسة العنف والعنف المضاد بين الفرقاء المختلفين.
في تقديري أن خلاصة التبعات المترتبة والمتوقعة لسيناريو إستقالة حمدوك بعد قبولها ستجعل النصر على إنقلاب 25 أكتوبر الذي يلوح في الأفق يبتعد رويداً رويداً ويجعل مشوار (النصر) ذلك أطول وأقسي، ولذلك فإن حصيلة هذا المآل والمسار لهذا السيناريو واضحة للعيان ونتائجها لا تحتاج لكثير عناء بأن الثورة لم تنتصر بتلك الإستقالة، وأن الإنقلاب هو الكاسب الأكبر من سيناريو (الإستقالة).

منقول

تحياتى

هاك الاعتزام دة

يا اخوانا داير لي بوست بتكلم عن نفس الموضوع وما فيه نساء عشان أفك الألفاظ الواقفة لي في حلقي دي


________
حمدوك؛ بتعرف تطير؟!!

وحات الله يا احدهم المدعو ا م ع
بقا ما عندك أى فرق من الهادي و عبد العظيم

حمدوك يمشي زول بارد وتعبان وكحيان
الناس إتغشوا فيه وحملوه فوق طاقته

حمدوك شغال يسلك للإنقلاب وعاوز يضغط على
الحراك الثوري بالقرارات القاعد يطلع فيها
كل يوم يرجع زول مرفود والناس تصفق وتقول حمدوك سحب البساط من العساكر
وهو لا سحب البساط ولا بيقدر
سكرتير الانقلاب دا افندي لا يجرء على مواجهة الانقلاب
اي قرار يتخذه بعد ما يتشاور مع العساكر
شغال شغله في تنزيل الانقلاب وتخفيف الضغط عن الانقلاب

عشان كدا اذا إستقال او استمر شغال سكرتير كله واحد
حمدوك بقى كرت محروق ومرحلته انتهت