ما بنحزن يا كابلي ولا بنبكي

08:03 AM December, 03 2021

سودانيز اون لاين
أبوذر بابكر-
مكتبتى
رابط مختصر

بالعكس والله
سعيدين وفرحانين

مش بالموت ولا بالفراق
الموت حقيقة الحياة الوحيدة
وكل كائن حي مآله ومصيره للموت

سعيدين وفرحانين
انه في كون هائل وشاسع اسمه كابلي
كون مليان تفرد وجمال وسماحة وإبداع
تفرد في كل شي واي شي
جمال مطلق
سماحة تكفي الدنيا وما عليها
وإبداع حقيقي

كابلي المطرب
كابلي المؤدي
كابلي المثقف الموسوعي
كابلي الملحن
كابلي الشاعر
كابلي عاشق التراث
كابلي الإنسان
كابلي السوداني كامل السودانية
كابلي المعنى

سعيدين وفرحانين
اننا عشنا وشفنا وسمعنا وطربنا وسعدنا واستمتعنا بالكابلي
سعيدين وفرحانين
اننا بنقدر نفاخر بيك ونباهي بيك

امش

دربك اخدر بإذن الله
ومأواك وموئلك أعلى الفراديس
مع خلق الله البحبهم الله
اكيد الله الكريم بحبك يا عبد الكريم
عشان انت بتحب الناس
وعشان نحن بنحبك

انت فينا كبير
وريدنا ليك كتير

والقومة ليك
المحبة ليك
والشكر ليك

امش يا زول يا سمح

بتحتفي بيك الملائكة

ويباركك الخالق

-يتبع-

يشدو عبد الكريم
تحس بان روحك انعطنت في طرب مذاب

يغني فصيح الكلام
يحلق احساسك ويعرج إلى ما بعد سماء السمو الثامنة
حيث سدرة منتهى التجلي

يغني اشعاره
تسربلك عذوبة غريبة لا متناهية
وتتحاوطك تعابير ليس كمثلها شيء
وكأنه بغني ليك انت بس

يغني لغيره
تستحضر أرواح العظماء
حسن عطية والشفيع وخليل والتاج

يغني تراثنا البديع
تشعر وكأن دمك تحول لجذور واتمدد في جسد الأرض
واتوحد مع الحاردلو والصادق ود آمنة وشغبة وبنونة ورقية بت امام ود حبوبة

ينضم ويحكي ويقول
تنفتح قدام عيونك ومسامعك موسوعات محتشدة بالمعرفة والجمال والمعاني

تعاين ليهو ساي بعيونك
وتشوف قدامك زول
أنيق ورقيق
جميل ونبيل
وقور وصبور
بادي وهادي
وسيم وقسيم

ياهو عبد الكريم

عبد الكريم
الخالق اداه صوتين
باص عميق
وباريتون انيق

ممكن تسمع الصوتين مع بعض
مش في اغنية واحدة
ولا في مقطع واحد
ولا حتى في جملة لحنية واحدة

لكن ممكن تسمع الصوتين في كلمة واحدة فقط

يا لهذا التجلي
يا لهذا التفرد

اللهم يا رحيم
جاك عبد الكريم
فاسكنه أعالي النعيم