Quote: لكن يا ود الأصيل دي سرقة . كونك تسحب الحاجات بدون تشاور صاحب الحاجة. دي بلطجة على الحقوق . احتمال هو محتاج لحاجاتو لمقاتو الشخصية. وانت عارف اسعار السماد عالميا ارتفت ارتفاع جنوني. بعدين دا سماد اصلي وفريش. بتخيل لي سرقاتكم دي محرمة . حاول اسأل ليك عالم متخصص في حاجات الخلاء
|
☆صدقت يا عصمان؛ موهن عروبنا ديل ما تشوفن
كدي موش يختفو ثورة، يلحسو الكحل من جوة ود
العين.أها بمناسبة الشنطة في الكتف و العيشة ختف:
▪ حدانا في سوق تمبول عمك المادح محمس طارو
تب و نازل ليك مديح و الجماعة عيال ود جويلي كمبلو
و عرضو و الإيقاع آخذٌ في التسارع.. و الخطوة قلبت
موجة ورا ورا ، و عمك المادح عين مع المدحة و عين
مع النقطة.. شايفا في الواطة مالية الطاقية لامن
ملفضة فا يلا داير يكلفت المدحة ينهيها عشان
يدنقر يخم و يتخارج .. يبقى مترواح علي أهلو .
☆ يلا في الأثناء حصل تحول دراماتيكي؛
يلا يجي ليك بتاع {9} طويلة يختف الطاقية
بي نقطتا و يشتت و يلا عمك المادح جدع طارو
متل هنووك و قام صوف فاكي ليك البيرق ورا
النشال ساكيه بين الرواكيب لامن نفسو قام و ما
لحقو ..جاء راجع بخفي حنين و شال طارو
واصل مديح سي جديد قال يلقط حق ملاحو. و
هو في عز هذا الوضع النفساني المتازم .. يلا يجي
ليك شويفع و يشحدو: "يا عمو عليك الله كان ما مدحت
لي "شفيع الأمة" عمك بقرفتو ديك نهر الشافع و قاللو:
ياخي قوم لف ؛ بالله عليك هي دي أمة تستاهل
يشفعو ليها البختفو طواقي المداح!!