السودانيين الامريكان والضغط على الإدارة الامريكية لاتخاذ إجراءات ضد الانقلاب

عندي مقترح للاخوة والاخوات السودانيين الامريكان..

وهو أننا نوقع عريضة ( كلنا ) بالالتزام بعدم التصويت لأي مرشح ديمقراطي في كافة المستويات الولائية والفيدرالية

ما لم تقم إدارة بايدن باتخاذ إجراءات واضحة ضد الانقلاب العسكري

ـ والتخلي عن قصة دعم الشراكة ـ

انحنا بأعدادنا القليلة ممكن نكون ما داك الصوت الانتخابي القوي زي بعض الجاليات الأخرى ـ

لكن أهو شيء خير من لا شيء

وإقالة بلينكن زاتو ـ

الما في شنو ؟؟

طبعاً ما حا يقيلوهو عشانا ـ لكن أهو نكون وصلنا صوتنا على الأقل على أداءه الخارجية المخجل في موضوع السودان

يجب أن توصل الجالية السودانية الامريكية حالة عدم الرضا عن أداء الخارجية الامريكية ووزير الخارجية انتوني بلينكن في أزمة السودان لأرفع المستويات في الإدارة الامريكية

عسى ولعل

الكونغرس أعتقد ما قصر في طرح مشروع القرار بإدانة الانقلاب العسكري في السودان

ومقترح فرض العقوبات على الضالعين في الانقلاب..

العلة هي هذا الأنتوني بلينكن وسخف ما يسمى بالجهود الدبلوماسية التي لم تقدم ولم تؤخر

الجالية السودانية الامريكية واضح من خلال الأحداث والفعاليات الأخيرة أنها جالية نشطة في الاهتمام بقضايا السودان

فقط ينقصنا تحديد وتوحيد مطالبنا بدقة ـ 1، 2 ، 3

انحنا ما عندنا لوبي يعمل لصالحنا..

زي اللوبيهات التي تخدم مصالح دول عديدة في المنطقة..

فلنكن انحنا زاتنا بأصواتنا الانتخابية لوبي ووسيلة ضغط

صحي أعدادنا ما كبيرة لكن بشوية تنظيم وتوحيد للجهود ممكن صوتنا يوصل

alright ؟؟

كدي أخليكم الآن اسمعوا العـــرص وزير الخارجية السعودي ده بيقول في شنو



الذي يقول أن تنحي البرهان ليس مطروحاً للنقاش حتى وسط الأحزاب السياسية في السودان

تطلع منو انت زاتك يا جربوع عشان تحدد لينا حاجاتنا ..

الواحد قرب يتلفظ والله

تحياتى Elhadi.

إقتراح تمام وياهو الشغل البينفع

فى بوست هنا إفترعه الأخ هاشم هباني بنفس المعنى
يا ريت الناس تشتغل سريع مع الموت الحااار الحاصل فى السودان وإستعجال الإنقلابين على تثبيت نفسهم

https://sudaneseonline.com/board/510/msg/%d8%a7%d9%86%d9%87%d8%a7-%28-%d8%b0%d8%a7%d8%aa-%d8%a7%d9%84%d8%b3%d9%81%d8%a7%d8%b1%d8%a7%d8%aa%29...-%21-1636291507.html

يا إلهى من كذب وإجرام هذا السعودى - لازم الناس فى واشنطون دى سى تعمل مظاهرة وتمشى على سفارتهم وما تخليه إلى أن يقدم إعتذارا وتصحيحا كاملا لتزويره هذا.
كأن السودان وشعبه مجرد تابع للدول دى - الأمريكان بدل يشوفوا رأى السودانين لافين يوم على المصريين ،الأمارتين، السعودين وغيرهم.

الهادي سلامات..

Quote: انحنا ما عندنا لوبي يعمل لصالحنا.. زي اللوبيهات التي تخدم مصالح دول عديدة في المنطقة.. فلنكن انحنا زاتنا بأصواتنا الانتخابية لوبي ووسيلة ضغط صحي أعدادنا ما كبيرة لكن بشوية تنظيم وتوحيد للجهود ممكن صوتنا يوصل

نحن شغالين في صعيد اجراء جلسة خاصة ناسنا Black Cacus California
وساعين شديد لجلسة استماع Congressional Black Cacus زي المرة
الفاتت. وبرضو ساعين نعمل الفية للسودانين من كل الولايات نجتمع
في يوم الجلسة دي قدام الكونغرس مع مسيرة معتتتتتتبرة للسفارات
الداعمة الانقلابيين..
يدينكم معانا يا هادي..

برضو عجبتني فكرة طرحت (Barcode) ح اخت فيها
لنك الجنجويد منظمة ارهابية و اوزعه لاصحابنا و
جيراننا وزملائنا الامريكان وغيرهم.. وفيها كمان توقيعاتهم
لممثلينا في المجلسين عن حال السودان والحراك.
قصة المليونيات في السودان ابدددن ما ح تجيب نتائج
في اوضاع الاحتلال دي. السودانيين في الارض و في
خط المواجهة قدموا ارواحهم واتحملوا تجفيف السوق
والغلاء الفاحش لللسلع وارهقوا المحتلين عصيان وتتريس.
افتكر التحرك الخارجي هو اجدي خاصة هنا في امريكا
لما الصوت (الواحد) للناخب بقي فعلاااااا مهم..
الردة مستحيييييييلة.

الانتخابات النصفية للسيطرة على الكونغرس ستكون في العام القادم 2022

وهي انتخابات يتوقع أن تأتي محتدمة للغاية بالنظر لكون الفارق في مجلس الشيوخ هو صوت واحد فقط ( صوت نائبة الرئيس كمالا هاريس ) لتساوي الحزبين بي 50 مقعد لكل حزب

وكذك تضاءل الفارق في مجلس النواب بين الحزبين الديمقراطي والجمهوري خلال الانتخابات الرئاسية الماضية

لذلك سيكون الحزبين محتاجين لأي أصوات مهما كانت قليلة ـ لكنها قد تكون مؤثرة..

في على سبيل المثال فرجينيا التي يتمركز فيها عدد مقدر من السودانيين جرت فيها قبل أيام انتخابات حاكم الولاية التي اسفرت عن فوز مرشح الحزب الجمهوري بالمنصب بعد سنوات من سيطرة الديمقراط على المنصب، وبفارق نحو 63 ألف صوت أو نحوها..

وفي نيوجرسي كذلك ( إحدى الولايات التي تصوت باستمرار للديمقراط ) حقق الديمقراط فوزاً ضئيل وباهت بفارق لم يتجاوز العشرين ألف صوت ـ نيوجرسي دي ممكن يكون فيها كم سوداني ؟؟

مما يشير بوضوح لأن المعركة القادمة خلال الانتخابات النصفية ستكون معركة محتدمة للغاية

لذلك علينا أن ندخل للعبة السياسية من بابها الواسع ـ ومطالبة إدارة بايدن بوضوح باتخاذ مواقف أكثر صرامة تجاه الانقلاب في السودان

الأخ معتصم إدريس تحياتي..

كلام كويس يا معتصم ومجهود مقدر جداً منكم..

مع قناعتي انو الكونغرس ما داير شغل كتير ـ فهم يبدو متعاطفين جداً مع الشعب السوداني ومواقفهم التي عبروا ويعبروا عنها على الدوام هي مواقف قوية وصارمة

المشكلة يا معتصم في تقديري تمكن في موقف الإدارة الامريكية ـ وبالتحديد في وزارة الخارجية وفي انتوني بلينكن واللي واضح انهم مركزين على الجهود الدبلوماسية وعلى إعطاء مساحة للحل لدول في الإقليم مواقفها معروفة سلفاً وهي داعمة بلا مواربة للعسكر والمليشيات زي السعودية والإمارات ـ وهم أساس في المشكلة ـ ودونك تصريحات وزير الخارجية السعودي أعلاه..

عندك يا معتصم على سبيل المثال زي السيد جيفري فليتمان ده ـ كان في السودان ومجرد مغادرته للسودان حصل الانقلاب

طيب انت كنت بتعمل شنو في السودان ؟؟

وشنو لازمة اللقاء لفليتمان مع البرهان ـ و ( حميدتي ) معاً ؟؟؟ هل فليتمان كدبلوماسي لا يعلم مغزى هذه الأشياء ؟؟

ألم تجد الإدارة الامريكية في هذا الفشل سبباً كافياً لإقالة فليتمان وإقصاءه عن ملف السودان ؟؟

سلامات الهادي
مشروع قرار الكونغرس وصل وين؟

Quote: سلامات الهادي مشروع قرار الكونغرس وصل وين؟

مشروع القرار تم إحالته للجنة الشئون الخارجية بمجلس النواب لإقراره

ولكنه على أي حال لن يكون قرار ملزم قانوناً للإدارة الامريكية يا محمد ولن يعرض على الرئيس بايدن للتوقيع ليصبح قانون نافذ تلتزم به الإدارة الامريكية..

ولكنه يعبر فقط عن توافق المجلسين ( مجلس النواب ومجلس الشيوخ ) ووجهة نظر الكونغرس بمجلسيه بشأن ما يجري في السودان

ولذلك أنا أنظر إليه كوسيلة أخرى من وسائل الضغط ليس إلا..

يرفع للأهمية القصوى وضرورة الإسراع فى العمل
الشعب السودانى الصامد عايش فى سجن كبير وعزلة عن العالم |

يرفع للضرورة..