... هل أنا حساس أم حشاش ... !!!

03:45 AM November, 08 2021

سودانيز اون لاين
Sudany Agouz-TX-USA
مكتبتى
رابط مختصر

أحبائي الكرام رواد المنبر العام ..
في حوش بكري العالي المقام ..

لا أدري كيف أبدأ .. هل أنا حساس أم حشاش .. لكن .. زي ما بيقولوا فى المثل " للضرورة أحكام " ..
الظاهر مع العجز .. حصل الفلس .. والفلس ممكن يرمي الكلس .. ولازم من ضرب الجرس ..
لكن الجرسه حاصله .. نعمل شنو .. قلت فى نفسي .. أشوف أهلي اللي فى سودانيزأون لاين ..
إمكن يلينوا لي قليبي البقى ناشف زي الجيب الناشف .. ولو كان الكاشف عايش كان غنى للجيب الناشف ..
المهم وزي ما قلت .. أنا حأعمل نفسي حشاش عشان ما أرمي شبكتي إمكن تجيب شوية سمك كويسين ..
و هنا سوف أكتب مجال العمل الذي أعمله من المنزل .. كان بودي أن أرسل هذه الرساله باللغة الإنجليزيه ..
التي أستخدمها فى إرسال الإيميلات التي أرسلها لناس أمريكا .. والتى توضح نوع العمل باللغة الإنجليزيه ..
فارجو المعذره .. لأنني حاولت أن أكتبها بالإنجليزيه .. لقيت الكلام ماشي من اليمين للشمال بدلاً عن من
الشمال الى اليمين .. المهم ساكتب رسالتي التوسليه بالعربيه .. أرجو الدعاء لي بالتوفيق ..

طبعاً عمكم العجوز ما عندو شغل .. عشان كده بحاول العمل من المنزل .. وهذه هي رءوس المواضيع
التي أعمل بها ..
1) TONERS وهي الحبر الخاص بماكينات الطباعه " بالليزر " إلخ .. أرجو من أي شخص عايش
فى أمريكا من شمالها الى جنوبها .. أو من شرقها الى غربها .. فقط المطلوب هو موديل " البرنتر" .. أي
ماكينه الطباعه .. وبمجرد استلامي الإيميل الخاص بموديل البرنتر سوف أرسل له أو لها السعر على التو
بإذن الله ..عليكم شوفو " على التو " دي براها بيكم .. بالمناسبه حسه دي ما بتتلقي فى السوق ..!!!
2) الكهرباء .. هذا لللأحباء الساكنين بولاية تكساس الأمريكيه .. فأنا Consultant لواحده تعتبر من أكبر
الشركات التى تعمل فى الكهرباء بالنسبة للمنازل أو للمكاتب ( الأعمال الحره ..) .. فقط عندما استلم
المكالمه الهاتفيه أو الإيميل .. أعطي للشخص سعر الكيلووات Average Price .. ويعنى هذا السعر
الذي أعطيه هو سعر الكيلووات وبداخله ال Over Head Expenses لأن بعض الشركات يعطون
ال Net Price .. وعند استلام الفاتوره تضرب لفوق .. لأنهم يعطونهم السعر بدون إضافة المصاريف
الأخرى .. أما الشركه التى أعمل بها .. كل المصاريف محسوبه داخل السعر ..

3) مدرس للغة العربيه .. كنت مدرساً فى جامعة سام هيوستن .. المهم أي زول يعرف أي واحد داير
يتعلم عربي .. بس بالطبع يكون ساكن فى مدينة هيوستن تكساس .. بس يقول لينا عوووووك .. وهنا لا
أود أن أعرفكم مدى أهمية اللغة العربيه لأبنائنا .. ولاسيما هنا فى بلاد المهجر .. ياريت كل واحد يعلم
ولده أو بنته اللغة العربيه .. يارب ..

بس خلاص .. انتهى البيان ..
مع الشكر والتقدير للجميع ..
عمكم العجوز .. ارنست ارجانوس جبران
هيوستن تكساس ..
الإيميل: [email protected]

عمنا ارنست.. لعلك طيب .. وبى خير
يا سلام عليك يا ..حساس ارنست حساس...
المهم ... الزول العايز حبر او استشارتك .. كيف حيتواصل معاك
وهو .. ماعضو في المنبر؟
مشتاقين ياخ

الأخ الحبيب أحمد ياسين ..

الشكر وكل الشكر لسؤالك عني يا أحمد ..
عمنا ارنست.. لعلك طيب .. وبى خير
يا سلام عليك يا ..حساس ارنست حساس...
المهم ... الزول العايز حبر او استشارتك .. كيف حيتواصل معاك
وهو .. ماعضو في المنبر؟
مشتاقين ياخ
الحمد لله أنا بخير ..
بالنسبة للتواصل .. لو رجعت الى رسالتي السابقة
ستجد في آخر الرساله الإيميل الخاص بي ..
مرة أخرى .. هذا هو الإيميل الخاص بي ..
[email protected]
بالطبع الذي يريد أن يتواصل معي لابد وأن يكون له
عنوان الإيميل الخاص به .. ولا إيه رأيك يا أحمد ..
أنا بانتظار ردكم بالإيميل .. إن شاء الله ..
الرب يبارك فى حياتكم ..
أخوكم وعمكم العجوز الغلبان ..
ارنست ارجانوس جبران ..

حبيبنا ونور قلبنا عمنا ارنست
الايميل بتاعك دا ..محمي protected
عشان كدة انا سالتك
الله يفتح عليك ويوفقك

الإبين الحبيب أحمد ياسين ..

شكراً جزيلاً لمحاولاتك ارسال الإيميل لشخصي الضعيق ..

أرجو ارسال إيميلك وأنا سوف أرسل لك الإيميل الخاص ..
بكل التفاصيل ..

مرة اخرى شكراً جزيلاً على مجهودك محاولاً التعرف
على مجالات العمل المختلفه .. هل أنت تقيم فى أمريكا .. ؟؟
أنا بانتظار عنوان الإيميل الخاص بك مع شكري وتقديري ..
الرب يبارك حياتك ..

عمك العجوز ..
ارنست ..

الجميل ارنست السوداني العجوز
تحياتي ياجميل ...
رسلت ليك الايميل في الخاص. .راجع الماسنجر يا حبيب
انا حاليا في الخليج

Quote: هل أنا حساس أم حشاش

سلام استاذنا الجميل ارنست ومرحب بعودتك
لما شفت العنوان اتذكرت نكتة واحد امل فيها مجضم الإنجليزي

سألو صاحبو: حساس بالانجليزي شنو
رد الراجل :sensitive

طيب حشاش؟

مااااااا
shen####ive

هل بالشاب العجوز الجميل
منور

كنت داير أقول sensitive أم shen####ive
بس الباشمهندس ود الشيخ سبقني .

يا هلا بيك وبود الشيخ .

الأخ الحبيب أحمد ياسين ..

شكراً جزيلاً لرسالتك الأخيره والتى علمت منها
أنك فى الخليج ..

بالطبع لا يمكن عمل طلبيات للخليج .. لأنني
أعمل من داخل أمريكا ..
أنا لا أعمل بالتصدير الآن .. فقط للطلبيات
التي من داخل أمريكا ..

مرة أخرى لكم جزيل الشكر والتقدير ..
عمكم العجوز ..
ارنست

حبيبنا ارنست
ارجع لاول مداخلتي ..حتعرف ان الطلب ما للخليج
وقلت ليك (ما اعضاء في المنبر) وطبعا ايميلك ما ظاهر
الحيتواصلوا معاك. داخل امريكا يا حبيب

الإبن الحبيب أحمد ياسين ..
حبيبنا ارنست
ارجع لاول مداخلتي ..حتعرف ان الطلب ما للخليج
وقلت ليك (ما اعضاء في المنبر) وطبعا ايميلك ما ظاهر
الحيتواصلوا معاك. داخل امريكا يا حبيب

لا أدري ماذا أقول لك .. أو كيف أشكرك ..
لأن الرب وحده عالم بظروفي الصعبه هذه الأيام ..
ولكن .. كأنما الرب أرسلك للمساعده ..

الرب يبارك فى حياتك وفى حياة أسرتك الغاليه ..
عمك العجوز الغلبان ..
ارنست ارجانوس جبران