Post: #1
Title: تكلفة وارباح خمسة فدان قطن (من أول لقطة )
Author: Osama Mohammed
Date: 10-18-2021, 08:57 AM
Parent: #0
معذرة الرجاء قراءة المداخلة التانية
|
Post: #2
Title: Re: تكلفة وارباح خمسة فدان قطن (من أول لقطة )
Author: Osama Mohammed
Date: 10-18-2021, 09:03 AM
Parent: #1
من صفحة الهادي ود البورت
الزول دة لو في طريقة تابعوه
سوداني وطني اصيل غيور ع البلد
اول من حذر بقفل ميناء بورتسودان وهروب اصحاب المال الي الموانئ المصرية
Quote: تكلفة وارباح خمسة فدان قطن (من أول لقطة )
المزارع بشرى الطيب أبوكندف
مكان الزراعة مشروع الرهد الزراعي القرية 33
تاريخ الزراعة 1/6/2021
تاريخ أول حصاد 10/10/2021
إيجار الأرض 150000
دسك 3صاجة 35000
دسك هرو 25000
طراد زراعة 12500
التقاوي 40كجم 30000
عملية الزراعة 20000
مبيد حشائش 20000
8جوال سماديوريا 130000
طراد أخضر 12500
الري 3 ريات 15000
إزالة حشائش 70000
مبيد حشري 30000
ضريبة أرض +موية30000
إنتاج اللقطة الأولى فقط 40قنطار بمعدل 8قنطار للفدان الواحد
تكلفة اللقيط 8000 للقطار
320000=
إجمالي التكلفة = 900000 جنية (تسعمائة مليون بالقديم)
سعر بيع القنطار = 45000جنيه
إجمالي العائد = 1800000جنيه (مليار وثمانمائة مليون جنيه بالقديم)
صافي الربح في اللقطة الأولى فقط = 900000 جنيه (تسعمائة مليون بالقديم)
#ملوحظة من بشرى :
دي لقطة أولى فقط وفي لقطة ثانية وثالثة متوقع يصل إنتاج الفدان لأكثر من 16قنطار (يعني لسه باقي ليهو تاني 8 قنطار لكل فدان )
...
بشرى اشتغل في الفول والقطن جزء كبير من العمليات الفلاحية بيدو والأرض اصلا حقتو ، يعني تكلفتو الجقيقية أقل كتير ، هو عملها وفقاُ لما سائد في القرية ،
طبعاً السودان هو البلد الوحيد الفيهو بعض صغار المزراعين مستثمرين أو جلابة بس وما بيهبشو الزراعة بيدهم كلها بيأجرو ليها عمال وعايزين ارباح كتيرة
...
دي تجربة مزراع مجتهد خدم أرضه بيدو .. أذا في تجارب تانية طبيعية عسكها بننقلها بلا أي تدخل ، بس ما تكون حالات شاذة أو واجهت مشاكل غير عادية
|
|
Post: #3
Title: Re: تكلفة وارباح خمسة فدان قطن (من أول لقطة )
Author: Nasr
Date: 10-18-2021, 05:35 PM
Parent: #2
المجد لكم يا بشري ويا ود البورت
دا الكلام البودي لقدام
دا البمرقنا من سنوات الدمار الكيزانية
|
Post: #4
Title: Re: تكلفة وارباح خمسة فدان قطن (من أول لقطة )
Author: Osama Mohammed
Date: 10-18-2021, 05:57 PM
Parent: #3
شكرا يا نصر ع الزيارة وجبر الخاطر.
البورد في طلقة سلبية مبالغة
ملان جنجويد وارهابيين وكيزان وسخانين
همهم ينغصو عيشة الناس ويبثو فيهم الاحباط .
ود البورت دة من اكثر الناس تفاؤلا
وانت ما شفت مجموعات المزارعين في الفيس والواتس ما شاء الله اخر تعاضد وتالف وكمان
اولما ما يشمو ريحة كوز بطردوه طوالي لانو بالجد كلام ماو صاح يخشو في اي حتة يحاولو يسوطوها
والله الناس ديل حيروني بس بقيت اتعامل معاهم ع اساس انهم ما سودانيين او مجانين.
الشباب اتجه للزراعة حتي عندنا في الشمالية لقيت الكانو دهابة معظمهم قلبو زراعة
في الشمالية في مناطق فااااااااااضية اسي الشباب وصلوها وبقت فيها كهرباء بالطاقة الشمسية .
لدي صديق رخمه الله هو البدأ لي مجموعنما الشغل دة .
وكمان الشباب البشتغل بالاجر يا سلام والله يفرحوك موش القاعدين في الخرطوم ومفتكرين الخرطوم محور الكون .
تحياتي واحترامي.
|
Post: #5
Title: Re: تكلفة وارباح خمسة فدان قطن (من أول لقطة )
Author: Nasr
Date: 10-18-2021, 06:07 PM
Parent: #4
تشكر يا اسامة
نتقاسم جميعا التفاؤل بمستقبل أخضر لوطننا الجميل السودان
هذا العام عام خير وبركة بإذن الله
أتمني أن تعطي الدولة الآراضي المستردة من الحرامية الكيزان
للشباب ليعمروها خضرة ونضار وجدلات عرس في الايادي
|
Post: #6
Title: Re: تكلفة وارباح خمسة فدان قطن (من أول لقطة )
Author: Osama Mohammed
Date: 10-18-2021, 06:12 PM
Parent: #5
Quote: أتمني أن تعطي الدولة الآراضي المستردة من الحرامية الكيزان
للشباب ليعمروها خضرة ونضار وجدلات عرس في الايادي |
دي اهم حاجة ...
ياخ علي كرتي ( كما اخبرني صديق سوداني امريكي من كوستي )
قلع اراضي ما عارف وين كدة من ربك بين جبلين ( بين جبلين)
اتخيل بين جبلين والله لمن قال لي كدة راسي ضرب ....
المهم الطاقة السلبية بتاعتهم دي خليها تنفعهم .
الزراعة جميلة وفي مرات فيها توفيق ومرات لا لكن لو صدفت
يعني زي الخمسة فدان دي ممكن تبدا بيها وبعدين الباقي هين.
|
Post: #7
Title: Re: تكلفة وارباح خمسة فدان قطن (من أول لقطة )
Author: Nasr
Date: 10-18-2021, 06:19 PM
الخمسة فدان بداية محترمة
وبلدنا دي الله ما كتر فيها غير الارض
تشتري تأجر تشارك تمول
كله ممكن
من الخمسة فدان تعمل رأسمال وخبرة وتتوسع أفقيا ورأسيا
قبل سنتين عملت لي مشروع في مساحة صغيرة
(أقل من فدان)
وأستثمرت فيه مداخراتي
ولكن الكرونا اللعينة بوظت الشغل
ما مشكلة، أصله البزنس كلو مش الزراعة بس فيه مخاطر
(في أمريكا نسبة خسارة البزنس الصغير في السنة الأولي أكثر من ٨٠ في المية)
برجع تاني إن شاء الله وبساهم ولو بشق تمرة في تعمير الأرض السودانية
|
|