اليمين واليسار غطسو حجر البلد ...

07:48 AM October, 16 2021 سودانيز اون لاين
Salah Zubeir-UAE
مكتبتى
رابط مختصر

(adsbygoogle = window.adsbygoogle || []).push({});

أو اليسار واليمين ...
اللتنين إلى جهنم وساءت مصيرا ...

بلد ما عندها وجيع ...
يا رب أبلينا بي عسكري حاقد زي منغستو ...
يولع الفرن ويستفتح بي هجو وود الفكي

أنا والله محتار في الشكله دي سببا شنو ...
الناس ديل مختلفين حتى في من يدفن جنازة البحر دي ...

المدقسين كتااااار ....
كمبارس من اليمين موجودين في معسكر اليسار ...
وكمبارس من اليسار موجودين في معسكر اليمين ...
اللفه قرررربت ... وكلو مدقس حا يرجع لي معسكرو ...

هل البلد دي محتاجه لي شكلة أيديولوجيا و٧٠% من
شعبها لم يتعشو ليلة أمس ...؟؟؟!!!

أقسمبلاي البلد دي عدمة الزول الواعي ...
زماااان زمن الناس بتسافر بالقطر ...
وفي المحطات النائية القطر بيهدن وتسمع
الشفع الصغار جارين مع القطر ويكوركو
رغيفاااا ... رغيفاااا ... رغيفااااا ...
اليوم السودان عن بكرة أبيه يكورك
رغيفااااا ... رغيفااااا ... رغيفااااا ...
وود الفكي خايف علي سمعتو السياسية ...
وتربل إكس هجو عايز يبقى وزير تربية ...

تقول لي دي ما جنازة بحر ...

سياسيي الأحزاب و(سياسيي) العسكر ...
كلهم ناس زبااااله ...
هل البلد أولويتها الأولى العراك في من يحكم ومعلوم
إنها فترة إنتقالية وبعد سنتين المفروض يحكمها من
ينتخبه الشعب السوداني ... زي ما قال حمدوك أمس
ما يجري الآن هو معركة بين من يرغب في التحول
الديمقراطي (إنتخابات بعد سنتين) وفي من يريد
أن يحكم هبتلي ساي كدا ... ما أظن في سوداني
ما عارفن ...

ايوة ده الصراع كدة
وكلو سياسة ... الفي الاحزاب والفي الجيش
والبعملو فيهو العسكر هو سياسة مستغل فيها الجيش

صراع بين الداعمين وفير الداعمين للتحول الديمقراطي

إتفاقية جوبا ومن وقع عليها حكومة وحركات ومسارات
وضعو البلد في طريق التقسيم والتفتيت ...
ود الفكي شخصيا مسؤول عن تقسيم قحت وتفتيت
شارع قحت وتقسيم شركاء الحكم لي عسكر ومدنيين ...

حمدوك ليلة أمس شدد على الإلتزام بالوثيقة الدستورية
التي تقول بأن الحكم شراكة بين المدنيين والعسكر ...
وتقول بأن الحكومة يجب أن تشكل من التكنوقراط ...
دعوة الشارع بمدنية كاملة للدولة خروج عن الوثيقة ...
مدنية كاملة دي إلا بعد الإنتخابات ... عايزين يحكمنا
حزب البعث والناصريين والجمهوريين ؟ لعب عيال هو؟

بعدين وعلى حسب الوثيقة الدستورية المفروض الحكومة
تشكل من التكنوقراط ... تذهب حكومة المحاصصات
الحالية وتكوين حكومة تكنوقراط هو مطلب الوثيقة
الدستورية التي يجب الإلتزام بها ...

على حسب مخرجات خطاب حمدوك بالأمس ...
أرى مهمة الحكومة الحالية أو حكومة التكنوقراط إذا التزم
حمدوك بالوثيقة الدستورية في ما تبقى من الفترة الإنتقالية
هي :-
١ :- التركيز على التحضير للإنتخابات مفوضيات وقوانين ولوجستك ...
٢ :- التركيز على معاش الناس الذي بشر به حمدوك أمس بتوجه
اقتصاد البلد نحو التحسن ...
٣ :- المجلس التشريعي (المعين) و(المؤقت) للعمل على تشريع
قوانين ومستلزمات الإنتخابات ...
٣ :- الحوار والحوار فقط للوصول لفصل مسارات الشرق والشمال
والوسط عن إتفاقية جوبا وتعيين حكام الأقاليم كرافعة لتحسن
الوضع الحالي ...

حياك الله صلاح

العكة القايمة دي هي تمهيد لقرار تسريع الإنتخابات
وستكون تحت غطاء دولي حتى يقر ويعترف بها الكل.
فمن هي الجهة أو الحزب المنظم وجاهز للدخول للإنتخابات؟؟
عودة المؤتمر الوطني للمشاركة في السلطة وبنسبة أكبر من بقية المكونات
ولكن تحت مسمى آخر وبوجوه جديدة وسيكون المحرك لكل السياسات
يجلس خلف الستار ليدير المشهد وفقآ لرؤيته.
إنها فعلآ الفوضى الخلاقة.

مرحب حبابك الشيخ ...

Quote: فمن هي الجهة أو الحزب المنظم وجاهز للدخول للإنتخابات؟؟ عودة المؤتمر الوطني للمشاركة في السلطة وبنسبة أكبر من بقية المكونات

٥ سنوات ما نظمت وجهزت رقبتك كحزب أكيد ما فيك فايده للمشاركه ...
البلد فيها اكتر من ١٠٠ حزب ... تفتكر كلهم أحزاب حقيقية ... المؤتمر
الوطني محروم من دخول الإنتخابات ... نتيجة الإنتخابات مسؤول
عنها الشعب السوداني فقط (ليست مسؤولية أي حاكم او سياسي)
بالتالي إذا إختار الشعب إبليس شخصيا فهذي هي الديمقراطية ...
المهم تشتغل لجنة التفكيك في سلب الكيزان القروش الممكن تشتري
بيها مساكين البلد ... لسع الوقت متوفر ...

Quote: يا رب أبلينا بي عسكري حاقد زي منغستو ... يولع الفرن ويستفتح بي هجو وود الفكي ...

يسار شنو و يمين شنو يا قريبك ياخ! ايه رايك الاتنين اتحاديين, وكمان الجاكومي برضو اتحادي
شفت الكوميديا السياسية دي

كزول مفكر وبعد تفكير دائم توصلت إلى أن مشكلة قيام الدولة مرّة أخرى هو وجود حميدتي.وقواته.

Quote: يسار شنو و يمين شنو يا قريبك ياخ! ايه رايك الاتنين اتحاديين, وكمان الجاكومي برضو اتحادي شفت الكوميديا السياسية دي

هههههه يا خوي إتحادي دي سقاله عشان
توصلم وتأمن ليهم (مستقبل) سياسي ...
التلاته واضح إنهم أساتذة إنتهازية ولاعبين
لصالح ورقم بس ...

تحياتي الحبيب صلاح شكر يا جميل
متابع البوست
لأنك تكتب من داخل الوطن ومعايش الوضع
واشعر في كتابتك الحيادية وأولوية الوطن

تحياتي واصل

Quote: كزول مفكر

شيخي ... دحين ما أديتا جك مويه ... 😃
يا زول أكان فكرتا ول ما فكرتا ياكا شيخنا وسيدنا ...

ياتو يسار ويمين والبلد فاكة
الحكومة والاحزاب وكل الناس دي كلها مغيبة
عشنا وشفنا الجاكومي متصدر الطاولة والمشهد في القاعة

Quote: لأنك تكتب من داخل الوطن ومعايش الوضع واشعر في كتابتك الحيادية وأولوية الوطن

تصدق وتامن بالله يا شيخ علي ... مافي أي حيادية ...
نحن حزب الأغلبية الغير منتمية لأي من فرق الدافوري
الموجودة على الملعب حاليا ... لا أظن بأن التحشيد
والتحشيد المضاد سوف يجلب أي شرعية لهذه الفرق ...
هسي لو دققت النظر في خطاب حمدوك أمس بتلقاهو
واقف الوقفة الصحيحة التي تنتظرها الأغلبية الغير
منتمية ... عضم ضهر خطاب حمدوك هو التشديد
على الإلتزام بالوثيقة الدستورية ... تصدق الكثيرين
جدا لا يعلمون بأن الوثيقة تؤمن الوصول لإنتخابات
عامة بعد سنتين من الآن وتفرض الوثيقة قيام
حكومة تكنوقراط بعيدة عن المحاصصات الحزبية ...
طبعا الكلام دا ما حا يعجب الكثيرين خاصة الركبو
في الوظائف الوزارية والحكومية بالمحاصصات
ومن يدعمهم من الأحزاب والتحالفات ...
وصدقني من بكرة سوف يظهر أعداء الوثيقة
الدستورية وهاك يا ورجغه لامن القيامة تقوم ...

إزيك يا أحمد يا فنان ...
طلتك هنا تفرح ياخي ...
قرفنا سياسة ياخي ... ما تشوف
لينا بوست استراحي نغسل فيهو
عفن السياسة دا ...

ازيك يا صلاح زبير
الله يفرح قلبك ياخي
الكاشف بى ايقاع النوبة ايقاع الدراويش وصف حالنا و قال
صارت حياتى مقسمة ؛؛؛ نص في الارض نص في السما
ونحن يا ابوصلاح يزداد ويكبر حبنا البلد ....ابوصلاح الكبير قال:
كيف الامة تعشق بلاكا ؛؛؛ يا مراهم جروحا ... و يا مِلكا و ملاكا

النت دا ما فكوهو !

إن شاء الله نت بحري بس

هههههههااااي ...
٢٥ يوم بعيد عن النت ... دي نعمه لا تحدها حدود ...
حباب الطريفي ...

جنس فقاره 😹😹

منغستو شنو اها جانا ابرهة كبير الابارهة ذاتو
ولع بحري وما جاورها

الله يرحم ويغفر ويعفو عن عمتي حوا بت التوم الزبير ...
عمتي الفاضله الكريمه فقدناها صباح الجمعه بعد معاناة
مع المرض والمستشفيات والدكاترة والإضرابات والعصيان ...

لازال عنوان هذا البوست المكتوب يوم ١٦/١٠ قبل الانقلاب
بي ٩ يوم ساري المفعول ويوصف ما يجري بدقة ...

غايتو زووووط (يا قول ...) عالمي من حمدوك
لي قبيلة اليسار ... يلا ... الرد... الرد ... الرد بالسد ...

كل الدلائل والأحداث تؤكد بأن عدم الإستقرار السياسي
والأمني والإقتصادي والإجتماعي يتواصل بجهد أبناء الوطن
من اليمين واليسار وشركاءهم ...
اليمين مسنود من قادة الجيش أو لجنة البشير الأمنية
(هرشه ساي من نعمات) وتحالف الحركات المسلحة وشارعهم
الرابض في أطراف المدن الثلاث (الوحدة والسلام وجنوب
الحزام) ... الصدفة وحدها ساقتني أمس بين سوق ٦ وسوق
ليبيا ... الحياة هنا أكثر من عادية زحام حد الإشباع يتسوقون ...
وفي وسط المدن الثلاث قيامة الثورة حدها السما ...
اليسار بقيادة الشيوعي وواجهاته الهلامية وهم أكثر إحترافية
في إنتاج الأزمات والفوضى والفتنة ممارسا أكبر عملية إستغفال
وإستهبال سياسي لم يسبقه عليها أحد ... وأخر همومه هو
استقرار هذا البلد سياسيا واقتصاديا وأمنيا ...
لن تنعم هذه البلاد بلإستقرار ولو دان الحكم لليمين وأقصى
اليسار أو دان لليسار ليقصي اليمين ... الإقصاء هو المصيبة
التي سوف تغتس حجر البلد ... والبلد ما فضل فيها عمل سياسي
لم يستعمل لتجنيب البلاد الحرب الأهلية ... مرحبا بكم
في جهنم وساءت مصيرا ...

Quote: كزول مفكر وبعد تفكير دائم توصلت إلى أن مشكلة قيام الدولة مرّة أخرى هو وجود حميدتي.وقواته.

عشرة لمبات طفت مرهـ واحدهـ باقيلك إستنارتك فضل فيها شيء ...
Blackout

والله يا ود الزبير كلامك مو سمح إلا المساواة في الظلم عدالة ...
وكان بقيت قاصد باليمين حزب الأمة والإتحادي تكون بالغت ...
البلد دي ما فيها يمين غير الكيزان والكيزان في دكة البدلاء منتظرين الزمن الإضافي لحسم القيم ...
كلام الشيخ سيد أحمد ما ترميه الواطه ...
واصل ...

Quote: البلد دي ما فيها يمين غير الكيزان

هههههههههه
إتا قايل الوداكم الخور منو؟!!!!!
ديل عيالكم ... الولدوهم وإتربو في كنفكم ...
شخصيا قاعد أخجل ليكم ساعة يقولو قبضو
تحت عنقريب البشير ملايين الدولارات واليوروهات ...
الشي سحارة حبوبتو وداها وين؟ كانت نفعتو ...
هسع يمينك دا نودي وين؟ ....
هاك دا كلام كوز ضميرو نضيف :-

Quote: سقوطنا.. نحن الاسلاميين هممت ان اكتب هذا المقال بعنوان: سقوط الاسلاميين. تململ ضميري.. وقال.. من تريد أن تخدع؟ تحاول أن تعزل نفسك وتعفيها من المسؤولية.. مسؤولية تدمير السودان.. ومسؤولية محو قبولية المجتمع السوداني لفكرة التوجه الإسلامي.. لفكرة بناء المجتمع السوداني على تعاليم الاسلام! يا رجل. كن صادقا مع الله.. ومع نفسك.. ومع الآخرين. فعدلت عما هممت به اولا.. وعزمت على ما هو الصدق. وفي واقع الأمر ما حدث لنا نحن الاسلاميين يصعب وصفه ووصف تأثيره على كل إسلامي صادق. وفي تقديري ان الذي حدث كفيل بأن يحدث أزمة نفسية عميقة.. وحيرة.. وحسرة لكل من كان صادقا في انتماءه للحركة. اما الذين كانوا يتخذون انتماءهم للحركة مطية لجمع متاع الدنيا وتحصيل المال والعقار والاستمتاع بشهوة السلطة. فهؤلاء لا يشعرون بأن هناك كارثة وقعت.. وان هناك خزي وخذلان اصاب الحركة الإسلامية وقضي على مبررات وجودها تماما. هذا الصنف من الاسلاميين هم الذين لا يرون فيما حدث الا ان سلطتهم التي كانوا يتمرغون في نعيمها قد سلبت منهم وانتزعت انتزاعا. هؤلاء هم الذين يملأون هذه الأيام مواقع التواصل الاجتماعي بالكذب الصراح.. بالاشاعات المغرضة بالمقالات الهابطة..وتلفيق التهم للشي عيين والبعثيين والآخرين والسخرية من رئيس الوزراء الرجل المهذب الذي احترمه الأجانب ولم يحترموه هم وهم أبناء الوطن؟! كل ذلك وأكثر منه اقدم عليه إسلاميون تلزمهم تعاليم دينهم ان يتعاملوا مع الآخرين بالادب الذي كان يتعامل به رسول الله صلى الله عليه وسلم مع الآخرين في مكة والجزيرة العربية. جاء في كتاب الشفا في التعريف بحقوق المصطفى للقاضي عياض ان الرسول كان يبسط وجهه للعدو والكافر. ولم يؤثر عنه صلى الله عليه وسلم انه اساء الي احد قط مشركا او غير ذلك. وكلنا نحن الاسلاميون نحفظ عن ظهر قلب قوله تعالى لقد كان لكم في رسول الله أسوة حسنة لمن كان يرجو الله واليوم الاخر وذكر الله كثيرا. ومن يتأمل مقالات الطيب مصطفى واسحق فضل الله أو حلقات حسين خوجلي في قناته او كتابات عبد الرحمن الزومة لا يجد الا الافتئات على الآخرين والسخرية منهم والتقليل من شأنهم وكل ذلك مناقض لما يجب أن يتحلى به الإسلامي من أخلاق في التعامل مع الآخرين. سقطنا نحن الاسلاميين لأننا لم نرد بالاستيلاء على السلطة الا الغلبة السياسية والحمية للجماعة وليس للدين. ولو كان الامر كله لوجه الله لكانت العاقبة غير ما نرى الان من كراهية طبقات المجتمع السوداني لنا. ويعجب المراقب لافعال كثير من الاسلاميين في الاسابيع والايام التي سبقت مسيرة الثلاثين من يونيو. فقد كان هناك ما يشبه السلوك الهستيري المندفع لتعطيل المسيرة وافسادها بشتى الأساليب الممكنة. إسحق فضل الله يكتب عن انقلاب مؤكد ووشيك. بل يكتب كمطلع على الغيب ويقول الجيش استلم وخلاص قبل الثلاثين من يونيو بعدة ايام. ويعقد محمد علي الجزولي قبل يوم واحد تقريبا مؤتمرا صحفيا يحذر فيه من َانقلاب يدبره الشيوعيون بدعم من دولة مجاورة ويبالغ في تعمد الكذب ويقسم على ذلك بالله! أليس هذا مما يحير العقلاء. اتدرون لماذا كل هذا السعار المجنون؟ لأنهم يعرفون لو ان المسيرة خرجت فسوف تكشف عن الحجم الجماهيري الهائل المؤيد للثورة. وهم لا يريدون ان يعرف العالم هذه الحقيقة. ولانهم لا يرغبون في مواجهة نقيض هذه الحقيقة وهي اننا نحن الاسلاميين فقدنا كل تأييد في المجتمع السوداني. وفكرة ان الشيوعيون يدبرون لانقلاب بدعم من دولة مجاورة فكرة في غاية الشذوذ والغربة. فكيف يفعل الشيوعيون ذلك وهم مكون اساسي وفعال في كل تشكيلات الثورة. ولولا ان يبغضني الكثير ن لقلت بل هم المكون ذو الفعالية الأساسية في قيادة الثورة. رضينا نحن الاسلاميون ام أبينا. ومن الخطل ان ينكر الإنسان حقائق ماثلة للعيان على أرض الواقع. ومما يؤسف له ان كثيرين من الاسلاميين ما زال يسعى للترويج لنفسه والحصول على كسب تأييد الآخرين بالحط من قدر الشيوعيون ومد ألسنتهم وكتاباتهم إليهم بالسوء. وهذا نهج من السلوك يأنف منه الشرفاء. ولو عقد المنصفون مقارنة بين ما فعله الاسلاميون بالسودان وما فعله الشيوعيون لبدا الشيوعيون وكأنهم ملائكة. . ونحن هنا لا نتحدث عن فكر الشيوعيون وعقيدتهم ولا عن فكر الاسلاميين وعقيدتهم. نتحدث عن صنيع هؤلاء وهؤلاء. وربما كان أكثر ما يؤخذ على الشيوعيون مذبحة بيت الضيافة. الحدث الذي ربما حظي باكبرقدر من التضخيم الاعلامي بتعمد ملحوظ من خصوم الشيوعيون ولا سيما الاسلاميون. والمقتلة التي وقعت في بيت الضيافة ليست أكثر بشاعة من مجزرة الثامن والعشرين من رمضان. والشيوعيون اصدروا عدة بيانات وتوضيحات ينكرون فية مسؤوليتهم عن المجزرة. ومجزرة الثمن والعشرين من رمضان تباهي على عثمان محمد طه في انهم قتلوهم في يوم واحد. وعدد الذين قتلوا في بيت الضيافة على أرجح الأقوال تسعة عشرة عسكريا.وليس هناك مدنيين. انظر كم من المدنيين تلطخت بدمائهم ايدينا نحن الاسلاميين. كم قتلوا في معسكر تجنيد العيلفون. كم قتلوا في مظاهرات سبتمبر ٢٠١٣؟ كم قتلوا في ثورة ديسمبر ٢٠١٨؟ كم قتلوا في فض الاعتصام؟ كم قتلوا تحت التعذيب.؟ لا أعتقد أن هناك وجه مقارنة. وفوق ذلك فإن مذبحة بيت الضيافة وانقلاب ١٩ يوليو يحيط بهما كثير من الشكوك والمغالطات. وابحثوا معي عن تقرير القاضي حسن علوب. هل نهب الشيوعيون المال العام كما فعل الإسلاميون؟ هل جاء الشيوعيون برئيس للبلاد اطلق اشقاءه وزوجته في البلاد ففعلوا ما فعلوا؟ هل بدد الشيوعيون مليارات الدولارات في مشاريع فاشلة مثل سد مروى.؟ هل خان الشيوعيون الوجود التاريخي للسودان بالضلوع في فصل جزء حبيب من الوطن مثل الجنوب؟ هل حكم الشيوعيون ثلاثين عاما ثم اخفقوا في إدارة البلاد واعتدوا على حرمات الشعب السوداني سجنا وتشريدا وقتلا ومصادرة للحريات؟ بمنطق العدل والانصاف وبمعايير الوطنية فالشيوعيون افضل من الاسلاميين. ومن لا يقبل هذا الكلام فعليه ان يراجع كفاءته في تقييم الأمور. ومع ان الذي حاق بنا نحن الاسلاميين من سقوط وتردي وفشل وانهيار بسبب الثورة العارمة ضدنا كان كافيا لان يدفع النخبة المثقفة من قيادات الاسلاميين لأن تتأمل في أسباب فشل التجربة وتوثق بالتحليل الموضوعي لهذه الاسباب فإن شيئا من ذلك لم يحدث وطفق كثير من الاسلاميين منذ سقوط النظام يكيدون للثورة باساليب مستهجنة لا تليق بمن يحسب انه إسلامي. وليس بخاف على احد انه حتى الخلافات والخصومات السياسية وغيرها لها أخلاقيات وضوابط واعراف يتوجب على كل الأطراف الحرص عليها. وقد فات على الاسلاميين ادراك الموقف الصحيح الذي يتوجب على الجماعة اتخاذه عقب سقوط نظام حكمهم وعقب إدانة كل طوائف المجتمع لهم. لقد كان الامثل لهم ان يعترفوا بما اقترفوه من جناية على الشعب والوطن وان يقبلوا ان تدار البلاد بمن اختارهم الشعب احتراما لاختيار الشعب. ولكنهم لم يفعلوا ذلك بالرغم من أن الفكر الإسلامي ملئ بمعاني التوبة والرجوع وعدم الصرار على الذنب. سوف ينقضي زمن غير يسير حتى يتمكن اول إسلامي قادم على إعادة مكانة التوجه الاسلامي في نفوس الناس. سيحزن الإمام حسن البنا في قبره اذا علم ان الفكرة التي دفع حياته ثمنا لها قد باعها الاخوان المسلمون في السودان بثمن بخس من أجل عرض دنيوي زائل.

غايتو بعد استقالة حمدوك إلا نشوف ولد
السير روبرت هاو آخر حاكم إنجليزي عام للسودان ...
لن يرضى الشعب السوداني المنقسم لي
١١٦ حزب و٩٠ حركة مسلحة واكتر من
٢٠ فريق جيش في الخدمة ومئات معاش
وحيين ... لن يرضى الشعب بترشيح
أيا من هؤلاء ولن يرضى هؤلاء ببعضهم
البعض ... ودقي يا مزيكا ...

كب بح

الإبعاد ... الإقصاء ... الإستئصال ...
قحت١ إنتصرت في أبريل ٢٠١٩ على الإسلاميين
ونجحت في ابعادهم عن السلطة والمشاركة في
الحياة السياسية بالقانون الذي أصدرته ... وابرمت
معاهدة مع العسكر للتحالف والمشاركة في الحكم ...
انقلب العسكر على قحت١ وتم إقصاءهم وإستئصالهم
من الحكم في اكتوبر٢١ ...
قحت١ إنقسمت بعد إنقلاب البرهان إلى قحت١
التي تمثل الأحزاب الشمالية ومعظمها يسارية او
يسار الاحزاب اليمينية ...وإلى قحت٢ التي
تمثل حركات اتفاقية جوبا وبعض المتسلقين
والانتهازيين من شخصيات شمالية لا وزن لها ...
لم تنجح محاولات العسكر في شيطنة قحت١
ولكنهم نجحوا في جذب قحت٢ في سعيهم
لإيجاد حاضنة مدنية ولم يفلحو في ذلك ...
قحت١ نشطت في شيطنة قحت٢ وعملت على
إقصاءهم والحاقهم بالاسلاميين ولم تنجح بعد ...
ظهرت قحت٣ التغيير الجذري أو الحزب الشيوعي
السوداني وحلفائه من بعض لجان المقاومة وبعض
النقابات وبعض منظمات المجتمع المدني التي
يسيطر عليها الشيوعيين ...
قحت٣ مافي زول مالي عينم سواء قحت١ أو قحت٢
أو العسكر ... قحت٣ تعمل على إقصاء كل من في
الساحة بي عساكرم ليدين الحكم للسكرتير السياسي
للحزب الشيوعي السوداني ...
الإستقرار السياسي هو المفتاح للاستقرار الاقتصادي
والأمني والاجتماعي ... وساذج وحالم ومتخلف من
يسعى للحكم سياسيا في ظل إبعاد وإقصاء وإستئصال
خصومه ... البلد دي واسعا شديد وممكن تتحمل عشرة
مرات قدر تعداد سودانيي اليوم ... الخلاف الفكري
العقائدي موجود في كل دول العالم ولم نرى كمية
العداوة بين هذه العقائد في هذه الدول زي جبل العداوة
الذي يعاني منه السودان ... إنها السذاجة والتخلف
ومحدودية الفكر ...

Quote: الإستقرار السياسي هو المفتاح للاستقرار الاقتصادي والأمني والاجتماعي ... وساذج وحالم ومتخلف من يسعى للحكم سياسيا في ظل إبعاد وإقصاء وإستئصال خصومه ... البلد دي واسعا شديد وممكن تتحمل عشرة مرات قدر تعداد سودانيي اليوم ... الخلاف الفكري العقائدي موجود في كل دول العالم ولم نرى كمية العداوة بين هذه العقائد في هذه الدول زي جبل العداوة الذي يعاني منه السودان ... إنها السذاجة والتخلف ومحدودية الفكر ...

زمان يا ود الزبيـر زمن المراهقة الواحد حقيقة كان بيفتكر بل ومقتنع انه اذكي ناس السودانيين
واقوي زول حايكون سوداني واشجع واحد سوداني الخ الخ
وما اتفوق علينا الخواجة الا لانه ساعده ابليس واعانه باختراع العجلة ..

لكن حقيقة بعد التلات سنوات الفاتت دي فعلاً اقتنعت بالغباء والسذاجة والانتهازية والتخلف وحب الذات البنعيش فيها كشعب يحتل ذيل أي قائمة من الإنجازات ممكن تخطر على بالك..
يآخي الواحد والله بقى كاره ذاته عديل فيما يخص هذا الشعب الغبي..
اعتقد انه الامر دا ما ممكن يحله ويفض سامره غير كتشنر او جناب الباب العالي
لانه شعب قياداته عجيبة جداً لا تثقف وتصارح وتنبهل الا للأجنبي والخواجة..
يآخي اول مرة اشوف بلد الصغيرة والكبيرة فيها يمشوا ويتجارووا فيها لسفراء الدول والمنظمات والخارج.
ويصرحوا بيها ويكتبوها بالخط العريض في أي محفل كمان.
عشان كدة مافي دولة ولا قيادة دولة بتحترم السودانيين وبتلقى ولا رئيس بيزور السودان ماف
لانه ما محتاج بالتلفون تلقى البيستدعوه ما يصدق وفت يجري كان لامير والا كان لسفير ولا خفير
والأعجب وبكل بجاحة بتلقى احزاب وقيادات ساكنة وعايشة ومتجنسة في القاهرة وغيرها وتدير امورها من هناكـ

يآخي فعلاً دي بلد في شاشة

يا الطريفي ترانا ندعو وننبه وبنكورك بي طول حسنا
للرأفة بهذا الشعب العظيم ... الأيدولوجيا المتناحرة
في شوارع المدن السودانية زادت هذا الشعب شقاءا
ومسغبة ... اشمعنا دون شعوب الأرض دي كلها تظهر
عندنا هذه السرطانات التي لا فكاك منها ...
السياسة عندنا في السودان مهنة من لا مهنة له ...
أغلبهم سماسرة وعطاله وفاقد تربوي وصائدي الرزق
الساهل ... الطبقة السياسية في كل بلدان العالم معروف
كيفية الإنتماء لها والتدرج فيها حتى وصول قمتها ...
عندنا الطبقة السياسية أفرادها يقفزون بالزانة يا وقع
في النعيم يا جهنم ... بتعرف سوق الملجا ... يا تضرب
معاك يا ما تضرب ... دي ياها الطبقة السياسية بتاعتنا ...
طلعنا ما بنعرف نعيش ونحيا زي بقية خلق الله ...
فاقدين بوصلة الحياة تماما ...

يا صلاح اولا اعذرنى..شفت العنوان وجيت نازل هنا طوالى للتعليق على العنوان..

Quote: هل هي أم المعارك بين اليمين واليسار

أم المعارك انتهت فى وقت محدد.. ولكن هذه يمكن أن تسمى داحس والعبراء.. والتنظيمين ديل كل واحد وجوده مرتبط بوجود الاخر.. يعنى لو مافى كيزان الشيوعيين ينتهوا تانى يوم
والعكس بالعكس. كل واحد منهم نشاطاته السياسية مبنية على محاربة الطرف الاخر.. ما عندهم شئ إيجابى يقدموه..

الله يشيلهم الإتنين زى ما ختاهم

ودالزبير
ماقولت خبير
وين الوثيقة
وامنية البشير
وناس الحرية والتغير
جوهم شباب ثوار
وطنية وضمير
ما بعرفوا غير التغير
تجي تقول لي
يمين ويسار عضير
ديل اكل عليهم
الدهر وشرب
ياود الزبير

أها .. اصلك ما تستبعد او تستغرب بعدين إذا وجدت هذا ال صديق مهدي في يوم من الأيام متحكر في استديو شاشة غشاشة ويتم تعريفه بالخبيــر اللوجستي..

ما تستغرب لكن اعرف انه في رمة من رممم بيوتات حزب الأمة والانصار بقى حكومة.

Quote: يا صلاح اولا اعذرنى..شفت العنوان وجيت نازل هنا طوالى للتعليق على العنوان..

هلا باشمهندس ابوالريش ...
يامراحب بك في كل زمان ومكان ... وفعلا هي
داحس والغبراء واختفاء أحدهم بتكتل التاني ...
في الزيفه دي عليك الله كتر لينا من فيديوهات
النانو الممتعه حد الإشباع ...

Quote: اصلك ما تستبعد او تستغرب بعدين إذا وجدت هذا ال صديق مهدي في يوم من الأيام متحكر في استديو شاشة غشاشة ويتم تعريفه بالخبيــر اللوجستي

يا الطريفي ياخي ارفع يدك عن هذا المناضل
العتيد والعتيق والخبير الأريزونابي الذي بايع
ال المهدي بحكم النشأة وبايع البشير ليقضي
إجازته بالنيل الأبيض بدون شوشرة ... وهاهو
الآن بكسر تلج لأولاد الشيوعيين أكان يلقى
ليهو كده كخبير اريزونابي اصطراطيجي ...

Quote: السياسة عندنا في السودان مهنة من لا مهنة له ... أغلبهم سماسرة وعطاله وفاقد تربوي وصائدي الرزق الساهل ... الطبقة السياسية في كل بلدان العالم معروف كيفية الإنتماء لها والتدرج فيها حتى وصول قمتها ... عندنا الطبقة السياسية أفرادها يقفزون بالزانة يا وقع في النعيم يا جهنم ... بتعرف سوق الملجا ... يا تضرب معاك يا ما تضرب ... دي ياها الطبقة السياسية بتاعتنا ... طلعنا ما بنعرف نعيش ونحيا زي بقية خلق الله ... فاقدين بوصلة الحياة تماما ...

حبيبنا الجميل صلاح الزبير تحياتي
يا سلام .. لخصت الموضوع تماماً بدون اي رتوش
ولا اذهب بعيداً من اقاربي من ينطبق عليهم هذه الحالة
أمس كنا في نفس الكلام ولكن صياغتك للموضوع متماسك وجميل
قال احد الاخوان في جلسة قهوة (( بدل الاغتراب والبهدلة والكفيل والرسوم كان الواحد بقى كوز
زي قريبي ولدنا ....... كافوري وسليت ولاندكروزر))

كلام من ذهب الحبيب صلاح .. اسلوبك رائع في التعبير
بس ما عرفت شنو (( الملجا ))

تحياتي الحبيب صلاح واصل

Quote: الإستقرار السياسي هو المفتاح للاستقرار الاقتصادي والأمني والاجتماعي

محتاجين لإستقرار عقلى أولاً.. الباقى ملحوق

سلام ابوصلاح
بوستيك ده لو غيرت العنوان و شلت مداخلات 2021, ممكن يأكل خريفين بعد الان و يكون لسه فاليد.

الحبيب علي عبدالوهاب ... التحيات الطيبات ...
الواحد يقوم يصدقك ويعمل فيها أديب لا يشق له غبار ...
كلامك يا علي بجيب لي الهوا من نواحي الرياض والعين ...

Quote: بس ما عرفت شنو (( الملجا ))

ود الجزارين حاج العوض كان فارش في سوق الملجا أمدرمان
الجقاجق والنيفه واللسان ... أولاد قلبا هم اعلم بما هو
سوق الملجا ... على حسب علمي السوق يحوي من لسان
التور لييين الاسبيرات المستعمله بتاعت اي حاجه ...

الهبيب محجوب ... حبابك ... حبابك ...
قتا لي نعمل للبوست Re كل حاجه ... فورميشن هبلتيشن ...الخ
دا كلو عشان ياكلو خريفين بس ... هههههه ... والله ما ظل
المسرح السياسي مليء بهؤلاء الارجوزات سوف يظل
عتودي (بوستيني) يرعى لسنوات قادمات مش خريفين بس ...

Quote: محتاجين لإستقرار عقلى أولاً.. الباقى ملحوق

تحياتي باش ابوالريش ...
اكره التبعية لأين كان... أتأسف جدا لما أشوف بروفيسور
ول دكتور يقول أنا شيوعي ول أخو مسلم لأني متأكد جدا
لا ماركس ولا حسن البنا ممكن يصلو الدرجة العلمية الوصلوها
هم ... حرية الفكر وعدم تقيده باتجاه معين بخليك تبدع عديييل كده ...
أذكياء هذا البلد الذين تم اختطافهم وهم لسع زغب الحواصل
من قبل عبيد الأيدولوجيا (شيوعي وكوز) ... الكثير من هؤلاء
الأذكياء يمتلكون عقليات تفوق ماركس وحسن البنا ... الشيء
المؤسف أن هؤلاء الأذكياء صارو أعضاء في قطيع الحزبين بعد
غسيل مخ مميز جدا تلقوهو وهم لسع صغار ... يعني هسع في
عاقل ممكن يقبل كلام زي دا (لا إله والحياة مادة) ...

قتا ليهو :-
شخصيا أشك بنسبة 99.999% في كل من يقدم
الدين على طبق سياسي بعد ٣٠ عام من سواقة
الكيزان للسودانيين بالخلا باسم الدين ...
قال لي :-
هل الدين يصلح او لا يصلح لمعالجة القضايا السياسية
قتا ليهو :-
دين الله ول دين حسن البنا ...؟!!!
دين الله ما عندنا فيهو كلام يصلح لأي زمان ومكان ...
دين حسن البنا جربناهو وشفناهو لا يصلح لمعالجة
قضايا أطفالنا مش سياستنا ....

أخونا صلاح كيفنك
خلاص قنعتوا من خيرا فيها؟

فعلا (اليمين واليسار غطسو حجر البلد ...)

تعرف يا صلاح أنا باقي لي السودانيينم ديل ياهم طينة واحدة... اكان بقى يمين والا يسار....

عشان كده الحال يا هو نفس الحال منذ أزل السياسة:...تحالفات وانفضاضات... مؤامرات ...لهث وراء المناصب...عدم الصدق..بيع الذمم..

نادرا من السيساسيين أو الأحزاب من خلا من هذه المثالب..

تحياتي لك ولضيوفك الظريفين..

مرحب حبابك دكتور ود الحسين ...
شرفتنا ونورتنا ربنا يزيدك من محاسنه ...

بالتأكيد لن يستطيع إنقلاب البرهان البقاء في السلطة هكذا
مكتوف اليدين طوال ال ١٠ أشهر السابقة والدنيا مولعه من
حوله إلى ما لا نهاية فلابد من الرحيل ... ولن يستطيع
إسلاميين حسن البنا حكم هذه البلاد مرة أخرى فالعاقل لا يلدغ
من الجحر مرتين ...
ولن يستطيع كائنا من كان حكم هذه البلاد بدون استقرار سياسي ...
ممكن تحكم زي ١٠ شهور البرهان دي مشلول اليدين وممكن
تقعد ١٠ سنة حاكم لا بهش لا بنش والبلد حالا واقف ... بدون
استقرار وتوافق سياسي مافي حكم حا يقيف على رجلينو ...
الكلام دا ليكم جت يا المنططين عينيكم ... يمين (كيزان) علي
يسار (شيوعيين) ... غطستو حجر البلد ... الله يغطس حجركم جت ...