Post: #1
Title: ظهور بايع تمباك جبرة في القنوات العالمية لحظة الاشتباكات مع الدواعش
Author: Osman Musa
Date: 10-07-2021, 07:22 AM
Parent: #0
06:22 AM October, 07 2021 سودانيز اون لاين
Osman Musa-
مكتبتى
رابط مختصر
أثار بائع “تُمباك” الدهشة في أوساط مواقع التواصل الاجتماعي في السودان، بظهوره وهو يمارس عمله في تعبئة وبيع أكياس “العماري” للزبائن عند محازاة طوق أمني أثناء اشتباك القوات الأمنية السودانية مع خلايا إرهابية بضاحية جبرة بالخرطوم. و كتبت صفحات على فيسبوك ” شهرة عالمية نالها صاحب طبلية بمنطقة جبرة جنوبي الخرطوم، حيث واصل (ود مجوك للعماري الممتاز) خدماته في بيع التبغ او ما يعرف بـ”التمباك”رغم احتدام الاشتباك مع الارهابيين المتواجدين بالمنطقة. هذا و قد نقلت عدسات الكاميرا لقنوات عالمية شهيرة طبلية ودمجوك للعماري، ليصبح من اشهر محلات بيع العماري الممتاز بالسودان. وأثار المشهد دهشة وتندر مستخدمي منصات التواصل وجاءت التعليقات “خلية إرهابية ورصاص وطوق أمني حول المكان، لسان حال ود مجوك للعماري الممتاز انتو اشتغلو شغلكم ونحنا بنشتغل شغلنا” . و علق آخر ” ودمجوك اخذ سفه واتفرج بمزاج”، فيما استنكر البعض عدم اللامبالاة من قبل المواطنيين والتحوط بالابتعاد أثناء المداهمات الأمنية التي تعتبر ساحة معركة قابلة لإلحاق الضرر البشري والمادي في مساحة الاشتباكات”. الخرطوم (كوش نيوز)
التفاصيل هنا: https://www.alnilin.com/13212239.htmhttps://www.alnilin.com/13212239.htm
|
Post: #2
Title: Re: ظهور بايع تمباك جبرة في القنوات العالمية �
Author: اخلاص عبدالرحمن المشرف
Date: 10-07-2021, 10:10 AM
Parent: #1
وصلني ان ناس ام درمان ركبو
الباصات لجبرة ومعاهم تسالي وفشار
لزوم الشمار.
|
Post: #3
Title: Re: ظهور بايع تمباك جبرة في القنوات العالمية �
Author: Hatim Alhwary
Date: 10-07-2021, 10:15 AM
Parent: #2
,دا اكبر دليل انو المواطنين فاهمين وناقشين انها مجرد مسرحية بل اصبح مسلسل يومي كل يوم حلقة والفرجة مجاني
|
Post: #4
Title: Re: ظهور بايع تمباك جبرة في القنوات العالمية �
Author: Osman Musa
Date: 10-07-2021, 10:30 AM
Parent: #3
لا لا الموضوع جد .
مع الهيصة المقصودة دي مطاليق الدنيا كلهم اتلمو في البلد .
بعض الناس بقولوا ديل جماعة شيخ عبدالحي .
نظام تحصل دربكة في الفترة.
|
Post: #5
Title: Re: ظهور بايع تمباك جبرة في القنوات العالمية �
Author: Biraima M Adam
Date: 10-07-2021, 01:22 PM
Parent: #4
هههاي! طبلية: ود مجوك للعماري الممتاز ..
العبار دينق .. نفر
بريمة
|
Post: #6
Title: Re: ظهور بايع تمباك جبرة في القنوات العالمية �
Author: محمد محمد قاضي
Date: 10-07-2021, 02:28 PM
Parent: #1
واحد إسمه عمر عبد العزيز كان تعليقه 👇
Quote: يدعو جهاز الأمن الوطني جميع المواطنين لحضور فعالية
مداهمة خلية نايمة جديدة (داعش) بجبرة اليوم - الزمان من 12 م إلي 6 م
الأماكن محدودة كما ينوه يوجد أماكن للأسر أحجز مقعدك عشان ما يحكو
ليك القصة بعدين وأهم شيء صور لايف وأعمل لايك وشير |
فعلا شعب واعي ومعلم وأربعين مليون سياسي 😅😅😅
|
Post: #7
Title: Re: ظهور بايع تمباك جبرة في القنوات العالمية �
Author: أبوذر بابكر
Date: 10-07-2021, 07:05 PM
Parent: #1
راعي ال "ود عماري" يستاهل الاشادة
ود عماري من مكيفات وملذات الجنة
طلاق بالتلاتة جنة الخلد دي
ان بقى ما فيها وارد الفاشر ابو زكريا
هدا طرفي منها
|
Post: #8
Title: Re: ظهور بايع تمباك جبرة في القنوات العالمية �
Author: Osman Musa
Date: 10-07-2021, 07:39 PM
Parent: #7
يا ابوذر
سلام
وما تحلف .
الكلام واضح قاليك وفيها ما تشتهون .
بس هناك بكون عندو اسم تاني. وحق الجنة بكون عالي الجودة .
|
Post: #9
Title: Re: ظهور بايع تمباك جبرة في القنوات العالمية �
Author: أبوذر بابكر
Date: 10-07-2021, 07:44 PM
Parent: #8
كلامك صاح طبعا
ما لاعين رأت ولا اذن سمعت ولا خطر على قلب بشر
وكمان نضيف عليها
ولا جا في بال خرمان
هههههه
انا كلامي بس امعانا في تقدير المدعو ود عماري
سلطان سلاطين الكيف
|
Post: #10
Title: Re: ظهور بايع تمباك جبرة في القنوات العالمية �
Author: Osman Musa
Date: 10-07-2021, 08:07 PM
الأخ ابوذر
سلام
طبعا نسبة الناس البسفوا بين اهلنا الامريكان نسبة ماها شوية .
وعندهم تمباك مستورد بعض منو من دول الكاريبي.
بيجي في حقة صغيرة شكلها زي علبة الورنيش.
والرياضيين اكتر ناس بسفوا ما عارف السبب .
يوم يا ابوذر جانا زبون في المحل الزبون من الثاوث بسف.
شاف واحد أخونا سوداني جديد لنج معاو كيس تمباك السودان
قام سالو. دا تمباك ؟
قالو نعم .
قالو ممكن اجرب بتاع السودان ؟
طوالي مدالو الكيس .
زولك دردم سفة ماكنة.
والله مافي دقيقتين إلا زولك برك في الأرضية.
واط واط واط.
قاليهو( زيس شييت از لايك كراك. )
ههههههه
يا ابوذر حاجات السودان كلها مختلفة.
اصلية وما فيها نص نص .
ياخ عليك الله تعالى شوف الويكة دي .
تتمني رمضان يكون كل تلاتة شهور عشان التقلية.
ربك يصلح حال السودان ويكفينا شر البرهان وشمس الدين وترك والكيزان.
ويرقد التمباك والبرتكان.
|
Post: #11
Title: Re: ظهور بايع تمباك جبرة في القنوات العالمية �
Author: أبوذر بابكر
Date: 10-07-2021, 08:41 PM
Parent: #10
والله يا عثمان في نوع اخير منو الكراك
بالذات حقت الصباحية
انت عارف الاسكندنافيين برضو جنهم تمباك
فيهم النوع البسف تحت لسانو داك ويقعد يلغلغ
النحكي ليك كمان القصة دي
زمان كلما امش القاهرة
بالليل بمش اقعد في مقهى "ريش" في وسط البلد
وبجيب ال "استيلا"
يوم قاعد اشوف ليك واحد خواجه شاب جر الكرسي وقعد معاي
عرفتو من شكلو ما انجليزي
ولامن نضم معاي بالانجليزي اتأكدت انو ما انجليزي
زولك طوالي سبحان الله خش فيني
قال لي انت من وين
قلت ليهو انا من أفريقيا السمراء
قعد يضحك، قال لي من وين يعني تحديدا
قلت ليهو من السودان الشقيق
تصدق قال لي والله انا عرفتك بالشكل ساي انك سوداني
عشان كدا معليش جيت قعدت معاك
المهم ما أطول ليك القصة
زولنا طلع من ألمانيا الشرقية، الكلام دا كان سنة ٨٧ قبل ما غورباتشوف السجم يبوظ الدنيا
طلع انو اصحابو كلهم من الطلبة السودانيين الكانو هناك
المهم يا زول انا طوالي صفقت لي عمك مكرم الجرسون صاحبي
وطلبنا الذي منو
بعد شويه كان اشوف ليك زولي دخل ايدو في جيبو ومرق الكيس الما بغباني
تمباك العتبة داك
وقعد يدردم في السفة
جماعتنا في برلين الشرقية اتاريهم بوظو جنا الخواجات علي اهلو
نسيت بس ما سالتو كان جرب ام فت فت ولا لا
ناسنا مسلطين
|
Post: #12
Title: Re: ظهور بايع تمباك جبرة في القنوات العالمية �
Author: Osman Musa
Date: 10-08-2021, 07:57 AM
Parent: #11
عزيزنا ابوذر
جماعتنا في الحكومة ما عندهم أي احساس انو هم عايشين
في جنة مليانة خيرات ومحتاجة شوية دعاية وتسويق وإدارة.
اصحابك يهود نيويورك عارفين أسرار أرضنا ناقشنها سرابة سرابة وتقنت تقنت
وسد سد و فدان فدان.
عندهم خريطة للدهب وخرطة للقطن وخرطة للشمام.
تخيل انو اغنية شتلة قرير في الفجر نبحن بوابير
كتبها يهودي تاجر توابل عاش في الثلاثينات في كريمة.
ومات عمرو 30 سنة .
شد حيلك نعملينا كونترات صادر مع عيال بنجامين.
انشاءالله ترمس.
يا ابوذر ناس البرهان ما واعين. الله يقطعهم.
|
|