حاجات ما تشوفها الا في السودان ... يستحق القراءة

08:56 PM August, 28 2021

سودانيز اون لاين
عادل شقاوة-UK
مكتبتى
رابط مختصر

شوفوا كلام الراجل دا ؛ كلام في المليان ؟

.المقال للصحفي بابكر سلك.
.__ يستحق القراءة. ...



.. ونبداء نقرأ ونصحح؟
✯ يا ناس
✯ ليه شوارعنا وسخانه؟؟؟؟
✯ ليه حلتنا وفرقاننا وسخانه؟؟؟
✯ ليه شوارع زلطنا محفره ومعفنه؟؟؟
✯ ليه ضبابيننا تقول يا ليل يا نيل يا ليل
✯ ليه باعوضنا بقى ما يحترمنا؟؟؟
✯ ليه أزقتنا بؤر للأمراض والأوبئه؟؟؟؟
✯ ليه مطاعمنا مقرفه؟؟؟؟
✯ ليه أسواقنا تقرف الزول البجيها؟؟؟؟
✯ ليه قمصانا نضيفه وملابسنا الداخليه كرتونيه اللون والملمس؟؟؟؟
✯ ليه فى الشتا ده تركب الحافله تندم انك ركبتها؟؟؟؟
✯ ليه بلاليعنا قرفت حتى القعونج مننا؟؟؟
✯ ليه جزارتنا تشبه شعاراتنا؟؟؟؟
✯ ليه ريحة المستشفى عندنا تجبر المرض يقفل نخرينو؟؟؟
✯ ليه حمامات المدارس لا يدخلها إلا المجبر؟؟؟
✯ المجبر شديد
✯ ليه الحمامات العامه إذا أجبرتك الظروف بالقروش تخشها تمرق تطرش سنه ونص وتفقد سوائل؟؟؟؟
✯ ما تقولوا لى الحكومة
✯ ده سلوك فردى وجماعى
✯ سلوكنا بطال شديد
✯ ننضف البيت ونوسخ الشارع بوسخ البيت
✯ نستحمى لتفيض البلاعه فى الشارع
✯نفتح مطعم ونكشح موية الغسيل فى الظلط
✯ نستعمل الحمامات العامه بدون وعى وبدون إكتراث وبدون إحساس بمشاعر من يستعملها بعدنا
✯ ونتف فى السلم
✯ وده شى مقرف ومؤلم
✯ نفرش الخضار فى الأرض
✯ ورجليننا تحوم حوله بكثافة
✯ وصاحب الخضار قاعد مشتح رجلينو والخضار بيناتن ونحن نشترى
✯ كمان نقول ليهو جيب الطماطمايه اللى ورا دييييييييييك
✯ نهتم بالمظهر الخارجى وملابسنا الداخليه تكسف
✯ الداخلية هي التى تعبر عن الواقع وعن حالنا
✯ تعالوا نعترف
✯ سلوكنا شين شديد
✯ عدم إحساسنا بالآخرين مشكله
✯ عدم إحساسنا بالآخرين يقودنا لنبركن غلط
✯ لنملأ الطريق أذى
✯ لنضايق بعضنا البعض
✯ الواحد يصلح بيتو
✯ يكب الأنقاض والدراب فى الشارع
✯ يؤذى عربات الناس
✯ كرور يعتر لى زول عجوز ممكن يكسر مخروقتو
✯ وكسرة المخروقه للزول الكبير عندنا
✯ هى تمهيدى الموت
✯ وما ح تصدقونى لو قلت ليكم
✯ فى ناس بيشفطوا السبتن تانك حقهم بالليل فى الشارع
✯ لابخافوا الله
✯ ولا بخافوا محليه
✯ ولا بخافوا مرض
✯ ولا بخافوا ناس الحله
✯ فى الدنيا دى لاقاكم زول بكب السايفون فى الشارع بين بيوت الناس؟؟؟
✯ ديل نحنا
✯ محتاجين تغيير سلوك
✯ محتاجين شماعة الحكومه دى نخليها شويه بالنسبة لى نضافتنا وقيافتنا وإختيار مكان تفنا لى سفتنا
✯ فالحكومة ما عندها دخل فى سفتنا
✯ الحكومة بى سفتها براها
✯ بتعرف تسف بتين ومن وين
✯ بتسف بالدس
✯ والغريبه نحنا عارفنها بتسف لكن عاملين رايحين
✯ وبتعرف تتف سفتها وين
✯ لكن نحنا سفتنا حقو ما نتفها فى سلمنا وفى مكتبنا وفى حافلتنا
✯ معقولة زول يكتب تذكار جوه الطيارة!!!!
✯ تذكار من صديق قسم السيد من أبناء ال....؟
✯ ياخ معقول؟!!
✯ تعالوا نعترف بى قصورنا عشان نغير سلوكنا
✯ سلوكنا همجى
✯ حتى المثقف فينا
✯ سلوكو همجى
✯ دكتور فلان إستاذ فى الجامعه
✯ وهو فى عربيتو ممكن يجدع ليك كريستالة البيبسى بعد يشفطها فى الشارع عااااااااادى
✯ وينها الثقافة يا دكتور؟؟؟
✯ القلم ما بزيل بلم
✯ نحنا كعبين شديد
✯ والغريبة لما زول فى كافتيريا يضايقو الزكام ، فيييييييييييط .. يديك ليها جوه الساندوتش
✯ ولا بهموا شى
✯ والأغرب إنك تأكل عادى
✯ والغريبة البديك بااااااااع فى حنانك
✯ تمشى وين ما تعرف
✯ هو شبع وإنبسط
✯ ما بهمو باع دى تعمل فيك شنو
✯ محتاجين كورسات سلوك مكثفة
✯ شركة زين عملت تعرفة جديدة للإنترنت.. عادي ما هم زاتو بشترو النت من بره والدولار زائد ونحن النت قاعدين نستعملوا في الفارغة..
الانترنت في كل دول العالم بحسب بحساب التحميل و نحن هنا ممكن تجيك في اليوم 600 صورة مكرره و 300 فيديو مكرر و مافيهو فائدة غير السخرية و الفتوشوب.
✯ يجب تحديد الاولويات في كل شي.
✯ 1% فقط يستخدم الانترنت من اجل الفائدة.

✯ عشان نمشى مع الزمن
✯ عشان ما نبقى محن نمحن الزمن ذاتو.....

👆ياريت لو نعمم الحاجة دي في كل القروبات ونعمل بداية للتصحيح عسى ولعل تفيد وتكون فعلا مثار نقاش لكل السودانين للتغير والتصحيحوخلونا نبداء بانفسنا ونسال نفسنا الاسئلة دي ونصحح اخطائنا.
.
كلام واقعي وصحيح .. تعالوا نبدأ بانفسنا وشوية ح نلقى الشغلة اتعممت وما يهمنا ح نلاقي ناس تحبطنا بس ما ح نشتغل بيهم والتغيير عايز وقت هي مسألة وقت ما اكتر والعمل ده بالمناسبة عليه اجر عظيم من الله فقط نحتسب الاجر عند الله وده اكبر دافع .. شكرا لكم جميعا كاتبا ومعلقا.
ارجو. نشره في كل مكان وتعميمه

الاجابه بسيطه وواضحه
الواحد لو حتى فى موقع موقع مسئول بيشتغل لنفسو ومصلحتو ومصالح الناس البتنفعو
لكن مافى زول بيفكر يعمل حاجه لمجتمعو
او لبلدو
او منفعه عامه فى العموم
كل زول يقول ياروحى
انا ومن بعدى الطوفان
عادى مافى ااستغراب
السودان كدا وحيكون كدا
لو ما اتغير الناس واتعدلت امخاخهم البلد مابتيتقدم
قال تعالى: إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ ..صدق الله العظيم