مواطن متعذب ومتضرر يكتب لحمدوك

06:49 AM August, 24 2021

سودانيز اون لاين
زهير ابو الزهراء-السودان
مكتبتى
رابط مختصر

السيد رئيس وزراء ثورة ديسمبر المجيدة
والسيد وزير الطاقة لثورة ديسمبر المجيدة
تحية طيبة وبعد /
الموضوع :
قطوعات الكهرباء المميته لكل شئ

إن عجلة الإنتاج والتنمية والنماء والاستقرار في كل الدول المحترمة تتمحور في إستقرار الكهرباء..
مثلا في دولة الإمارات العربية المتحدة
قطعت الكهرباء عن مبنى سكني يتكون من عشرة طوابق والخلل في كيبول رئيسي يتطلب العمل به يومان /قامت الدولة بتوفير مولد كهربائي للبناية مع إستمرار أعمال الصيانه والاعتذار الرسمي لسكان البناية.

سيدي الرئيس نحن الآن نعامل معاملة لا تليق بكائن حي في القرن ال21
تقطع الكهرباء عن القطاعات السكنية والصناعية وعن المرافق الصحية ودور العبادة والمرافق التعليميه بمعنى أصح تتوقف الحياة!!
ويتوقف كل شئ
8ساعات حسام يتوقف نبض السودان عن العمل في شتى المجالات دون أدنى مبررات منطقيه
ونحن الذين مللنا مبرراتكم الواهية واعذاركم المتكررة والتي في الاخر تعلق على عاتق فشلكم في إدارة ملف الكهرباء..

عندما قمتم بمشروع القومة للسودان كان من أولوياتها صيانه قطاع الكهرباء حسب منشورات مكتب فخامتكم..

ولكنا تفأجنا بأستمرار وتردي لا مثيل له..

عزيزي الوزير جادين..
هل تعلم أننا كشعب صبور صبرنا على هذا التدهور المريع في قطاعك الذي ترأسه كوزير
ولكن بلغ السيل الذبى و أستنفذنا كل المبررات
التي كنا نقدمها لأنفسنا ولعامة الناس...

سيدي الرئيس.. أن كنت لاتعلم أن السودان عامة في هذا الفصل من السنه يعاني من الذباب والباعوض والاثنين يعتبران من نواقل الامراض
نحن الآن نعاني الذباب نهاراً والباعوض ليلاً
مما يترتب على ذلك تكليف جيب المواطن المزيد من الضغوطات وفاوتير فحوصات و ورشتات لا طاقه له بها..

سيدي الوزير..
نحن زهجنا والله.. زهجنا.. نقوم من الصباح نمشي الورش المصانع السوق المؤسسات الكهرباء قاطعه
نرجع بيوتنا عشان عينا تغمض دقائق الكهرباء قاطعه..
عشان نراجع دروس ولا نجهز لشغل بكرة ولا نقرأ الكهرباء قاطعه..

سيدي الوزير..
مناظر النساء والأطفال والكهول جالسين في شوارع الأحياء لتنسم بعض الهواء وهروبا من جحيم البيوت الميته مناظر تقطع القلب وتورث الحسرة..

مناظر المرضى بالمستشفيات.. شايلين قسطراتهم وحايمين حاجه توجع القلب
ومناظر العنابر والناس شغالة بي الهبابات
حاجه تكتل بالمغسه..
و الطامه الكبرى مرضى العناية المكثفه
الذين تتوقف حياتهم بتوقف الأجهزة الطبيه.

نحن كشعب سوداني نعلم أن شركتكم الغير محترمة تسمى الشركة السودانية للكهرباء وتعتمد طريقه الدفع المقدم يعني قروشنا عندها وخدمه مافي..
ولطالما الشركة السودانية لتوزيع الكهرباء هي خاضعة لقانون الشركات منذ العام 2010م وتنطبق عليها كل الشروط القانونية في تقديم الخدمة للمشتركين من ناحية الحقوق والواجبات.

ولطالما تعبنا من مناشدتكم.. وفترنا من وعودوكم الكاذبة.. ونفذ صبرنا من تقل دمكم
ورخامتكم في التعامل مع القضايا التي تهم المواطن وأي مسؤول رابط ليه مولد ينور قرية كامله..

أنا كمواطن سوداني ومعي مجموعه كبيرة من المواطنين لقد عزمنا مقاضات شركتكم الغير جديرة بالأحترام والمسؤولية تجاه مشتركيها وعملائها..

والباب مفتوح لكل مواطن سوداني أن يسلك طريق القانون.. تجاه حقوقه المهضومه والمدفوعه مقدما للشركة السودانية لقطع الكهرباء..

اقلاها نشوف البلد فيها قانون ولا ونسه ساي..

مواطن سوداني متعذب ومتضرر :

يوسف الدوش

أولاً نبارك لك الإستجابه من سيد الحوش وعاشت الزهراء ماجده وكنداكة حفظها الله وغر بها اعينكم ...

ثانياً:
دا مواطن كوز جبان وكمان معتت كان وين لمن الكيزان قاعدين وكان ممكن يشتكيهم ...


محمد حمزة يستلف لسان حال القحاطه للدفاع عن الفشل والتردي البادي للعيان ...

القطوعات تفتقد حتى الى مبدا العداله حتى فى الضرر والى تطبيق جدوله واضحهوغادله عشان نحس فى مشكله جاده لكن شغل الخرمجه دا شغل اذى وضر وزياده لمعاناة البشر لا اكثر

سلام محمد حمزة

Quote: ثانياً: دا مواطن كوز جبان وكمان معتت كان وين لمن الكيزان قاعدين وكان ممكن يشتكيهم

دا مواطن عادي وكان قاعد موجود ويعاني من سؤ إمداد الكهرباء وسؤ غيرها من الخدمات في زمن الكيزان.
ولكنه لم يفكر في اللجوء للقضاء لأنه يعرف تماماً أن أي شكوى يتقدم بها قد تعود عليه بالضرر وقد يتعرض بسبب شكوته للتعذيب والإهانة من قبل الأمن وقد تتم مضايقته في عمله ومصدر رزقه.
الآن على الأقل يثق في الأجهزية العدلية وله بعض أمل في أن يجد العدالة.
او على الأقل هو مطمئن في أنه لن يتضرر بسبب مطالبته بحقوقه.

لك الله ايها المواطن المتعذب
رسالة من القلب الى القلب تحمل كثير من الاسى والالم
ولكن السيد رئيس الوزراء لا يسمع ولا يرى
حمدوك الشغلة اتحالت ليه عشان كدا ما يحلتفت ليك ايها المواطن المغلوب على امرك
حمدوك كهربتو ما بتقطع
حمدوك بيتو مافيو ضبان ولا بعوض
حمدوك لو مرض او مرض ليهو اي زول بيمشوا يتعالجوا في الامارات
حتى الفحوص الروتينية بيعملوها في الامارات
حمدوك مرتبو بالدولار وليس بالجنيه المنهار
وفي ناس معاشها تلاتة الف جنيه فقط لا غير
اقل بكتير من وجبة افطار السيد حمدوك
حمدوك لو عضيتو في عنقرتو ما حيحس بيك
حمدوك خلاص العساكر كتلو قلبو
وين روح الثورة يا حمدوك
وين تضحيات الشباب يا حمدوك

ربنا يعوضنا في ثورتنا ويخلف لينا احسن منها
آمين آمين آمين