Post: #1
Title: الحويج --- تاني الاتنين وتالت التلاتة
Author: أبوذر بابكر
Date: 08-20-2021, 10:18 AM
09:18 AM August, 20 2021 سودانيز اون لاين
أبوذر بابكر-
مكتبتى
رابط مختصر
المبدع المنسي
المطرب المغيب
صاحب الصوت والأداء الأليف
محمد الحويج
ما لقيت وصف لصوت وأداء الحويج غير الالفة
تحس بقرب شديد منه وانت بتسمع
وتغمرك الفة فياضة في حضرة صوته
الحويج من مواليد العام ١٩٢٥ بالمكنية غرب شندي
بعد ما قرا الخلوة في المكنية حاضرة العمراب
وقرا الوسطى في عطبرة
جا العاصمة والتحق بمهنة التمريض
ولكن روحه الوثابة وطموحه العريض خلاه يسافر القاهرة ويلتحق بالأزهر
وتزامن سفره ووجوده في القاهرة مع وجود سيد خليفة الكان سافر لنفس الغرض
وسبحان الله الاتنين قررو يتركو الازهر ويتجهو لدراسة الموسيقى
الخويج في المعهد الإيطالي وسيد في معهد فؤاد الأول
وبعد رجوع الحويج اشتغل في وزارة الاعلام وكان في فترة مدير تحرير مجلة الإذاعة والتلفزيون أيام ما كان رئيس تحريرها الفيتوري
اشهر عمل فني للحويج هو اغنية "امل" أو "كلمة منك حلوة" زي ما اشتهرت
ودي الثنائية النادرة مع عثمان حسين، من كلمات قرشي محمد حسن
وأغنية "مين احلى من حبيبتي مين" كلمات عبد المنعم عبد الحي
وأغنية على ربي امدرمان وغيرها من أغنيات ما كتيرة، وقلة اعمال الحويج ليها سببين اتنين
انشغاله بالصحافة والإعلام ثم المرض والرحيل السريع من الدنيا في يوليو ١٩٦٤
الحويج تاني اتنين في غار الثنائية الجميلة والفريدة مع عثمان حسين
والما تكررت تاني
وتالت التلاتة في ثلاثي العاصمة
السني الضوي وإبراهيم ابو دية ومحمد الحويج
وحياة المحبة كلمات محمد يوسف موسى
وبعد وفاة الحويج قرر ثنائي العاصمة يخلو الغناء نهائيا
لولا تدخل عثمان حسين وعلي شمو وآخرين
نسال الله الغفران والقبول والرحمة للحويج
|
Post: #2
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-20-2021, 04:46 PM
Parent: #1
كتير من الناس ما بعرفو
انه محمد الحويج بروح ومهنية الصحفي والاعلامي
وبإحساس وتذوق الفنان
هو الاكنشف موهبة اسحق الحنلقي في كتابة الشعر الغنائي
وهو القدمو للقراء وتنبأ ليه بشأن عظيم
وهو برضو القدم محمد يوسف موسى
|
Post: #3
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-20-2021, 06:31 PM
Parent: #1
بتمنى زول يهدينا اغنية الحويج ذات الطعم الأليف والمختلف
مين احلى من حبيبتي مين
مباشرة تحس فيها نكهة عبد المنعم عبد الحي
زي ما في اغنية عبيد الطيب، يا روحي سلام عليك
برضها كلمات عبد المنعم عبد الحي
بصمة طعم الشاعر دائما بتكون واحدة
ما عارف مين ملحن اغنية احلى من حبيبتي
لكين أكاد أجزم انها تلحين برعي
برضو بصمة الملحن
|
Post: #4
Title: Re: الحويج --- تاني الاتنين وتالت التلاتة
Author: Ahmed Yassin
Date: 08-22-2021, 03:50 PM
Parent: #3
اييييييييه
| Quote: كين أكاد أجزم انها تلحين برعي |
صطبعا برعي .. والكلام لي قرشي محمد حسن
صوت يتماهى ويتماشى ويحاكي ويقترب من صوت (رمضان حسن) بس
صوت الحويج هو صوت شجن
السنى الضوي من يوم فراق الحويج لم يفارقه الحزن ودمعته اصبحت اقرب
|
Post: #5
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-22-2021, 06:12 PM
Parent: #4
والله يا احمد
طعم برعي تضوقو من علي بعد ملايين السنين الضوئية للسمع
دي البصمة ولا بلاش
وياما في بصمات
زي ما عند وردي
تسمع والله مشتاقين عند عثمان مصطفى
طوالي يسكنك ويتخللك وردي
وتحس كأنه هو البغني
نرجع ل الحويج
الحويج فات سريع جدا يا احمد قبل ما يقول الداير يقولو
زي فوتة سرور وكرومة
زي فوتة مصطفى وعميري
زي فوتة محمود ونادر
يا الله
|
Post: #6
Title: Re: الحويج --- تاني الاتنين وتالت التلاتة
Author: Ahmed Yassin
Date: 08-22-2021, 06:22 PM
Parent: #5
الحويج يا اباذر فات وعمره ( 38 ) سنة .....مشروع كبير لم يكتمل
زي فوات سرور وكرومة اساطين الغناء. كما قلت انت يا ابوذر
بصمة برعي وبصمات حسن الخواض و عربي ..واكورديون وهبة
بصمة صوت الحويج فيهو نداوة محمد ودالفكي.. والشفيع..
انسان وفنان تلك المناطق.
|
Post: #7
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-22-2021, 06:50 PM
Parent: #6
كل المبدعين ديل يا احمد بلا استثناء
ما فيهم واحد تم الخمسين سنة في عمره
وبالرغم من كدا
شوف حجم ونوع ومعنى العطاء عندهم
يا سبحان الخالق
|
Post: #8
Title: Re: الحويج --- تاني الاتنين وتالت التلاتة
Author: Ahmed Yassin
Date: 08-23-2021, 07:05 AM
Parent: #7
للامل والسلوى
هنا اوضح ما يكون صوت الحويج الدافىء الحاني والحنين.. يظهر حتى لو كان بين مجموعة غنائية
مثلا .. صوت( هادية طلسم ) الصوت الالطو المسنكب في اغنية ( يا طير الجنة ) يكون اكثر وضوحا
بكل جمالياته وقوته ونقائه
|
Post: #9
Title: Re: الحويج --- تاني الاتنين وتالت التلاتة
Author: محمد عثمان
Date: 08-23-2021, 08:06 AM
Parent: #8
و نقول سلااام.....
|
Post: #11
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-23-2021, 10:27 AM
Parent: #9
سلام وتقدير يا محمد عثمان
واشواق والله ليك
ولحضورك السمح
ان شاء الله انت طيب وبخير ياخ
زمن طويل ما شفناك
|
Post: #10
Title: Re: الحويج --- تاني الاتنين وتالت التلاتة
Author: أبوذر بابكر
Date: 08-23-2021, 10:24 AM
Parent: #8
في بعض المرات
ممكن تشوف الصوت قدامك
تستعمل حاسة الشوف بدل حاسة السمع
زي لما تسمع صوت الجابري ومنى الخير
|
|