سعر الدولار و اسعار العملات الأجنبية اليوم الجمعة 13 اغسطس2021م في السوق السوداء
البرهان واردوغان يوقعان عدد من الاتفاقيات بين تركيا والسودان
وزارة التربية والتعليم تكشف عن الزي المدرسي الجديد لمرحله المتوسط
الحركة الإسلامية تهاجم الحكومة لقرارها تسليم عمر البشير

داليا الياس تكتب : زنقولا

أعتقد إنو مسألة معاداة الأجيال الحديثة وخلق معركة فى غير معترك معاهم ومحاولات الحجر على مزاجهم الخاص وميولهم وقناعاتهم غير مجدية وغير مواكبة على كافة الأصعدة .
لا حتنفع كأسلوب تربية داخل الأسر.... ولا كإصرار على فرض هيبة السلطة من جانب الجهات الرسمية والقوات النظامية.
حقو الناس تحاول تحتوى الشباب ديل وتهتم بى خياراتهم وتوظف التأثير الكبير الحاصل معاهم بدل تستخدم الردع والترهيب والمنع والحجر لأنو كل الدلائل أثبتت إنهم الجيل العنيد الراكب راس المستعد يعمل أى حاجة عشان ينتصر لى حلم التغيير والمواكبة ومزاجو الخاص.
فشنوووو....الشاب(خالد زنقولا) شئنا أم أبينا... كوركنا ولا سكتنا... شجبنا وأدنا وإستنكرنا ولا قبلنا على مضض... هو فنان صاحب لونية متعارف عليها عالمياً وعندو جمهور لايستهان به من أولادنا المحتاجين نصل معاهم لى نقطة تلاقى عشان الحياة تمشى متوازنة. والولد ده بالمناسبة ذكى وفاهم وشاطر وعندو أفق واسع ولباقة فى الحديث وحجج مقنعة ومهارات بشكل غير عادى.
فحقو نحن كأمهات وأباء نحاول نشارك أولادنا إهتماماتهم وندى نفسنا فرصة نسمعهم ونسمعوا ونؤمن إنو مستحيل أولادنا يكونوا نسخة مننا بحسب عجلة الحياة وحركة المجتمع والفطرة البشرية.
وياناس الشرطة المجتمعية... نصيحة من محبة.... ختوا الكورة واطة.... وحكاية تقعدوا تقبضوا الفنانين وماتطلعوا تصاريح وتصادروا العدة والساوند وتحاولوا تفرقوا الجماهير بالبمبان دى حركات (أرعة) بتدخلكم فى فتيل مع الفئة العمرية دى إنتو فى غِناً عنو.
ياخ بدل الجوطة والمشاكل وصراع الأجيال العقيم ده... ليه ما توظفوا أدوات التأثير دى بشكل إيجابى؟... ليه ماتحاولوا تخلوا زنقولا ده منصة للتوجيه والتوعية؟!! علماً بأنكم لو سمعتوا كلمات الراب البيقولها حتلقوها مليانة قيم وفيها عبارات جميلة. وكان على التى شيرت القلعو ولا رقادو فى الواطة.... تراهم أهلنا وشبابنا كل يوم بيقلعوا ويركزوا للبطان....وماشايفة رقاد الواطة فيهو مايعيب... الحكاية كلها إختلاف لغات وقضايا والإختلاف حق مشروع ما مفروض يبقى سبب خلاف ولا حرب ضروس فى وقت نحن محتاجين فيهو لكل مضامين وقيم التوافق.
فيااااا سعادتة اللواء عبد الرؤوف مدير جنايات ولاية الخرطوم.... فك الشباب ديل ورجع ليهم عدتهم خليهم يشوفوا شغلتهم لأنو عندك أولويات وملفات شائكة أكتر من تكريس المجهود ده كلو عشان تمنع فئة عمرية حساسة ومهمة من التفاعل مع فنان إصطفوهو وحبوهو وحيسمعوهو بمليون طريقة تانية بعيداً عن سلطتك فما تشيل وش القباحة لأنو البوليس ماناقص تفلتات أمنية وفجوة مجتمعية.
لقد خلق أبناءنا لزمان غير زماننا... ونحن ما من حقنا نستعبدهم عشان ولدناهم.... لو إتعاملنا بحسب القناعة دى صدقونى حنرتاح ونريحهم.... إدعاء المثالية ودفن الرؤوس فى الرمال ما حل لأى مشكلة محتاجة حوار وأدوات موضوعية ونظرة واقعية.... وكان على عيالنا محتاجين مننا كتيييير.... أهم من كوننا نمنعهم من حفلة ولا فنان.
Post: #4 Title: Re: داليا الياس تكتب زنقولا وتتطالب بحريته وا Author: Osama Mohammed Date: 08-14-2021, 00:07 AM Parent: #3
نتمنى يفرجو عنو لو لسة مقفول ...
اسمعو اغانيه بدون نقد الزول خامي الجيل حقو كلو .. الوحيد الفيدوهات بتاعتو فوق المليون مشاهدة ....
بلد ما عاوزة تتصلح ابدا .... افهمو غناه قبلما يلفظكم الجيل القايم دة والله لا تلقو ارض ولا سما ... دايرين يدفنو راسهم في الرملة ويجلو الشباب ديل لكن ما بحصل بعون الله .
Post: #5 Title: Re: داليا الياس تكتب زنقولا وتتطالب بحريته وا Author: Asim Ali Date: 08-14-2021, 02:24 AM Parent: #4
يا اسامه البلددى فيها ناس دايره تقعد تنتقد وبس لانو ماعندها شىء غير لسانها الطويل وبس لكن ايجابيه وفهم وتواصل لخلق حد ادنى من الفهم وارضيه تواصل.
Post: #6 Title: Re: داليا الياس تكتب زنقولا وتتطالب بحريته وا Author: Osama Mohammed Date: 08-14-2021, 11:14 AM Parent: #5
تحياتي عاصم من نعم الله علي اني شغال تدريس للاسف مافي السودان لكن جايين قريب ان شاء الله المهم الحاجة دي خلتني قريب من الفئة العمرية 18-30 ياخ الناس ديل حياتهم كئيبة بشكل ما تتصورو بالذات ف السودان كمان ناس جيل الكيزان ديل المهم وكمان عندي اولادي او بناتي في طور المراهقة لازم الناس تسمعهم وتعرف مشاكلهم شنو غير كدة والله ما برحموكم لو قدرو ... الناس البتنتقد دي يوم ح تجيهم بونية في وشهم توريهم الطفا النور منو .
مودتي
مافي زول معبر الفئة دي وهم اسي بدو يكونو في ثقافتهم المستوحاة من انعدام الامن والفقر والعطالة والانغماس في المخدرات او ثقافتها .... الناس خايفة عشان كدة بتنتقد علي حسب رايي.
Post: #7 Title: Re: داليا الياس تكتب زنقولا وتتطالب بحريته وا Author: Asim Ali Date: 08-14-2021, 11:38 AM Parent: #6
Quote: من نعم الله علي اني شغال تدريس
مرحب اسامه نفس الحكايه معايش الشباب ديل من خلال العمل فى التدريس
Quote: مافي زول معبر الفئة دي وهم اسي بدو يكونو في ثقافتهم المستوحاة من انعدام الامن والفقر والعطالة والانغماس في المخدرات او ثقافتها
شباب محتاج تواصل وزول يسمع منهم ويثقو فيهو وبقدم نصيحه او توجيه بدون وصايه وقهر زى ماكان فى عهد الانقاذ الاسود شباب ذكى وطاقه تحتاج استيعاب وفتح مساحات تفريغ للطاقات ونفض الغبار عن الذكاء دا بعدها يظهر ابداعات فى مجالات كتيره
Post: #8 Title: Re: داليا الياس تكتب زنقولا وتتطالب بحريته وا Author: Osama Mohammed Date: 08-14-2021, 11:55 AM
يا عاصم بدل يسجنو بعضهم وينتقدوه احسن يعملو ليهم وحدة او كيان او منظمة مدعومة من الحكومة تتواصل معاهم . زمان في صحفي الله يرحمو كان كل يوم بنزل كاركاتير لي المرحوم الجان ( محمود عبد العزيز) في شكل حمار ومسميهو هناق وشغال نبز شديد المهم والله الناس بقت تسمع ليهو لانو مخالف راي الديناصورات بتاعين الزمن داك كمان لمن الكيزان جلدو محمود ( وبنفس القدر ابعاد او معاداة المرحوم مصطفى سيد احمد ووردي) دي بقتهم ايقونات ودرر للجيل اللي كان حينها بفتش ع نفسو اسي زنقولا دة كلامو ياهو مشاكل الشباب والافق الضيق اللي هم عايشين فيهو ح يقبضوه اليوم المليون ح تبقا مليونين متابع وحا يزيد عدد الناس البتسمعو زيما ما حصل للحبيب ايمن ماو ( الفرق انو ايمن ماو قرب ع الخمسين ودة في نهاية العشرينات او بداية التلاتينات .)
المهم نتمنى يفكوه ويشوفو حلول للشباب ديل قبلما يمسكو اي واحد فوق الخمسين وينفوه او يعدموه لو مسكو بدل الديناصورات الشايلين زمنهم وزمن غيرهم وما دايرين يتفكفكو بي الحسنة من حياتنا وحياة الشباب الفقير العاطل التعليمو الجامعي ما بأهلو لي وظيفة الا بالواسط.
الزول دا عندو رساله بطريقة اضانك وينا يقولك اهااا دي ويرفع يدو الشمال بي فوق لي رأسو ويمسك أضانو الشمال ... الزول دا عندو ادوات محتاجه توظيف لكن ما ظنيت في زول فاضي ليهو ....