شطحات اردولية (بالدراجي)

06:45 PM August, 04 2021

سودانيز اون لاين
عمر جبرونا-UK
مكتبتى
رابط مختصر

مهادن الزعيم

👈🏻 بعد جهد اخيرا السيد حاكم اقليم دارفور قرر انه يمشي دارفور ويحكم من هناك بعدما كان بحكم دارفور من الخرطوم اها اتعملت لجنة لاستقبال حاكم اقليم دارفور وقام السيد مبارك اردول بارسال رسالة لشركات التعدين وقال ليهم (اي شركة ترسل مليار بالقديم لواحد اسمه (صديق مساعد) في لجنة استقبال حاكم دارفور في ظرف 48 ساعة فقط لانو الزول دا مستعجل والله) وبما انو عدد الشركات 92 شركة فالربط المتوقع هو 92 مليار جنيه (بالقديم) وفعلا انتشرت في الفيسبوك صور لشيكات بذات المبلغ تحمل اسم (صديق مساعد) ولمن الموضوع عمل ضجة والناس بقت تتسآءل (القروش دي طلعت كيف والمحاسبة حاتكون كيف) طلع علينا اردول قائلا (دي م اول مرة نعمل كدا ... قبل كدا عملناها لدعم الجيش وهسه القروش دي مخصصة لمشاريع في دارفور ونحن يادوب فاعل خير ومنسق فقط بين مكتب مناوي وشركات التعدين) بعدها طلعت لجنة إستقبال حاكم دارفور وقالو (والله نحن ذاتو م عارفين القروش دي بتمشي وين ونحن م عندها بيها علاقة وميزانيتنا رفعناها واقل من المبلغ دا) المهم انو في قروش اندفعت (بالاكراه او الرضا الله اعلم) من شركات التعدين بتوجيه من (اردول) ونزلت في حساب (شخصي) لواحد اسمه (صديق مساعد) ودا كلو تصرف مريب في اموال الشعب السوداني دون ادنى حد المحاسبة والمراجعة (والاهم من كدا) لو الزول دا غنج بالقروش دي مافي جهة ح تقدر تحاسبه قانونيا اما لو حصل قدر الله ومات فالقروش دي ح تصبح ورثة شرعية لاولاده وممكن عادي يرفضو يرجعوها (ذي م حصل مع واحد كوز زمان كانو بختو القروش باسمه في لندن ولمن هو مات .. ولدو قال لناس الحكومة ماعندكم عندي قروش وديك المحكمة) يلا الحصل هسه في القروش دي ذي الحصل زمان (نفس الدواء لكن شركة تانية) ويحلنا الحلا بلة من الدوامة السخيفة دي ......
ملحق مع المنشور كل الصور والاسكرينات التي تدعم ذلك واوعي زول يسأل اردول لانو رده حايكون جاهز (انو دي عنصرية ضده) لانو دايما بكون شايل الرد دا في جيبو كل م يزنقوهو في فساد

حسبنا الله ونعم الوكيل

Quote: واوعي زول يسأل اردول لانو رده حايكون جاهز (انو دي عنصرية ضده)

يحلنا الحل بلة !!

دا كلوا كوم وحكومة حمدوك زيرو شفافية ، كوم تاني ...