Post: #1
Title: لما الباب امُبارح دقا.
Author: shaheen shaheen
Date: 07-23-2021, 11:33 AM
Parent: #0
10:33 AM July, 23 2021 سودانيز اون لاين
shaheen shaheen-الخرطوم التى لا احبها.
مكتبتى
رابط مختصر
الى "نجوى كمبال" الحزينة فى منفاها الباريسى السعيد.
وهى تُحاول فى اصرار غبى , اختراع العجلة من جديد.
لا راحة فى الوطن الاساس .. لا راحة فى الوطن البديل !.
موعود تعيش فى الغربة يا بحار , هجين.
|
Post: #2
Title: Re: لما الباب امُبارح دقا.
Author: shaheen shaheen
Date: 07-23-2021, 12:10 PM
Parent: #1
1
لما الباب امُبارح دقا
بين كباية قهوة .. وصرخة شافع بال على نفسه , لباسه اتبلبل
اتذكرتِك
والكمسارى بيهرش فينى عشان الباقى
اتذكرتِك
لما النور فى الحِلة بيقطع .. والكتاحة تغبر بيتنا
اتذكرتِك
صوت الموية فى الحنفية زى صوت حِسك
كنتا بخت السفة صغيرة دون ما تلاحظى
وانتى بتكرهى ريحة خشمى لما اسِفّ
يعنى خلاص هاجرتى بعدتى فى امريكا !! .. ياااااه
كُنتى بتكرهى فى الضهرية نمشى كتير
تزعلى مرة .. ومرة بتصرخى .. مرة تصهينى
وانا بستهبل واضغط نهدك دون ما اقصد
- طبعاً قاصد يا مستهبل .
حوش جيرانا الفاضى .. فيهو حضنتِك
لما بنوهو .. اتذكرتِك
يوم خمسنا سيجارة بينسون .. طول اليوم قعدتى تكُحى
هل تتذكرى ؟ .. انا بتذكر
كُنتى قصيرة .. لمِن احضن , راسك كان بيكون فى بطنى !
هل ما زلتى لسه بعيوة ؟ .. ولاّ طولتى ؟
انا قصرنى الوجع الغالب
هل تتصورى بت يا روعة ؟
رغم قطار العمر الاوغل .. لسه بمارس قلة ادبى
وبعد سنين الغيبة الطالت , هل تتخيلى ؟
لما الباب امُبارح دقا
اتوقعتِك .
|
Post: #3
Title: Re: لما الباب امُبارح دقا.
Author: shaheen shaheen
Date: 07-23-2021, 10:17 PM
Parent: #2
2
هذا الكلام .. كلام غير مفهوم
ملعونة هذى الصحية مع صوت الاذان
الصيحة طالعة كما الفحيح
المُلك لله .. الرزق اصلاً شحيح
معقولة وشك زى قفاك ؟
مقلوبة
بـ الهوبة .. انعدلتا على الصراط المستقيم
يا تقول عديل
او تنخرس
هل انتا يا دكر البنات
وقت الهبوب ما بتنكسر ؟
شن مرقتك والناس نيام ؟
لـ مرقدك اعمل تمام
هذا زمانك يا مهازل
هذا زمان الانبطاح
فـ أترك نطاح الحيطة , يفتكروك عوير
لا فيك رِيالة .. لا سمعنا منك صوت ظُراط
فك تكة السروال
وتكتك
فـ القوانين فى التكية , برضو مُحتاجة لذكاء
داقش , تجد .. ولكل مُحتهدِ مصيبة .. او نصيب .. او وقعة فى البير الغريق
تمبل السلطان , ومخصى القصر , المحظية , والقوادة ام سِنة دهب
ديل اصدقاء
فـ اترك سلاحك عند باب القصر .. واربط حصانك , فى خشم باب العدو
ثم انصرف .. بعد الصلاة
هذا زمان الاصدقاء
كن مطمئن
اوعك تئن
اصطحب مرأتك , ومرضك , والعيال
نحو الهلاك
بعد التجشأ , والتمخط , والتبرز , والتسوك , والسعال
والبسملة
يبقى السؤال
يا لاوى بوزك مشمئز او مُنقهر
هل انتا يا دكر البنات
وقت الهبوب ما بتنكسر ؟
|
Post: #4
Title: Re: لما الباب امُبارح دقا.
Author: shaheen shaheen
Date: 07-25-2021, 08:57 PM
Parent: #3
3
الظاهر انها بتحبك
اهى ديك البت النطت جوه جنينتك سرقت
اهى ديك .. الدخلت سطح بحيرة نفسك سبحت
اتحدت عمق البير الفيك
من شَعرها مدت حبلها نزلت
اهى ديك .. القاعدة على الكرسى
البت اللابسة ايشارب اخضر
الماسكة فى يدها كباية
بتهزر وبتحكى حكاية
بتمر قدامك مخصوص
وتخلى حزن قلبك يضحك
الله بختك
الظاهر انها بتحبك
اهى ديك البت البتحبك
من خوف العالم بتدسك
الشالت من قلبك وجعك
والخطت عطرها فى حِجرك
الله بختك
|
Post: #5
Title: Re: لما الباب امُبارح دقا.
Author: shaheen shaheen
Date: 07-31-2021, 11:18 PM
اشمعنى من كل البنات اخترتا "فاطمة" ؟
وعلى الرصيف بتعدى الاف البنات
اشمعنى انتا على الرصيف مُستنى "فاطمة" ؟
خبطك زمانك فى قفاك
اشمعنى لما صرختا منه
صرختا "فااااطمة"
وكُتار خلاص الفارقوك
خلوك بدون قشة غريق
اشمعنى فى حرق الحشاء
حرقت حشاءك , ست البنات , الست "فاطمة"
ما الحكمة من سفرك براك ؟
من غير كتب , وبدون شنط
دون زاد
ودون الست "فاطمة"
ما المعنى من عبث الحياة ؟
وكُتار خلاص على صدرهم ياما بكيت
اشمعنى لما بتبكى حسه ؟
اشمعنى بس بتحن لـ "فاطمة " ؟ .
|
Post: #6
Title: Re: لما الباب امُبارح دقا.
Author: نعمات عماد
Date: 08-01-2021, 09:58 AM
Parent: #5
| Quote: ما المعنى من عبث الحياة ؟ |
ما هي ديا الحياة، ولادة و موت، حزن و فرح،
راحة و تعب، تديك و تاخد منك أحسن ما لديك.
مافيش جواب لي أشمعنى غير الحظ كدا.
أستاذ شاهين، تسلم يا أديب يا مبدع.
|
Post: #7
Title: Re: لما الباب امُبارح دقا.
Author: فرحات عباس
Date: 08-03-2021, 11:27 AM
Parent: #1
شاهين .. يا شاهين ... كن بخير في عوالمك المبدعة.. أخوك فرحات
|
Post: #8
Title: Re: لما الباب امُبارح دقا.
Author: shaheen shaheen
Date: 08-09-2021, 04:53 AM
Parent: #7
تحياتى ، وكل الشكر.
استاذة/ نعمات.
استاذ/ فرحات.
شكرا جزيلا.
|
Post: #9
Title: Re: لما الباب امُبارح دقا.
Author: shaheen shaheen
Date: 08-20-2021, 09:26 PM
Parent: #8
5
صباح الورد , يا وردة
صباح نادى
صباح الورد يا وردة
صباحِك حِلبة بالقرفة
صياح الديك
ومع صوتو الصباح يبدأ
صحيت من نومى صحصحتا
مُتفائل
و بـ عطر الامل فوحتا
فتحتا الباب
وفى وش النسيم صحتا
- صباح نادى.
اكلم اى زول ماشى
انادى عليك يا بهجة
تردى وانتى مبتهجة
اشوف وشِك
يزهزه ابتهاج ذاتى
صباحِاتك عسل صافى
صعوبات الحياة سهلة
ينط احباطى للماضى
وامواج الفرح تعلا
صياح الديك
ومع صوتو الصباح يبدأ
صباحِك حِلبة بالقرفة.
|
Post: #10
Title: Re: لما الباب امُبارح دقا.
Author: shaheen shaheen
Date: 08-28-2021, 10:49 AM
Parent: #9
6
اهلاً وسهلاً
اهلاً وسهلاً
انتا مين ؟
لما عاينتا فى مرآية
ما عرفتك
انتا مين , يا وش حزين ؟
عاملة ايه فيك السنين ؟
مركب تودى .. التوديك ما بتجيب
انتا مين ؟
يا زول مداقش فى دروب الهجرة
فى جيوب البنطلون شايل حنين
درباً بوديك .. البوديك ما بيجيب.
**
ضيعتا وشك يا غريب
ضيعتو فى زحمة رصيف
وصرختا فى الوش البديل
- منو انتا ؟ .. انا شايفك كتير.
انتا مين ؟
يا الماشى حفيان فى الطريق
شاكيك شوك درب المسير
وين الجناحين شان تطير ؟
لا راحة فى الوطن الاساس , لا راحة فى الوطن البديل !.
**
مكتوب عليك الاندهاش
مقسومة ليك سكة سفر
شنطك مستفة للرحيل ؟
موعود تكون فى الغربة يا بحار .. غريب
يا غربة فى الوطن الاساس , يا غربة الوطن البديل !.
**
وشك صرخ فيك
- انتا مين ؟.
رديت
- غريب , داير استريح.
وشك قفل باب وشو فى وشك
وبقيت براك
انسان وحيد .. مهجوم من الامطار .. حزين
موعود تكون فى الغربة يا بحار .. هجين.
|
Post: #11
Title: Re: لما الباب امُبارح دقا.
Author: صديق مهدى على
Date: 08-29-2021, 06:11 PM
Parent: #10
سلام شاهين
كلامك سمح وزين
بس حاجز السنين
وغياب العين
خلاك تركب قطار الهم
وتعاين من شباك
خيال وهم
فعلا ياهو قطار الهم
تكتب فيهو دون ورقة
ولا قلم
لان الحياة اصبحت سقم
مع اننا كلنا خلقنا من عدم
لذا يا شاهين مافى داعى
للندم
فالحياة ياها الحياة
كان فى بلد العرب
ولا بلد العجم
كل شئ انعدم
حتى الارض غطت
امم
يلا يا شاهين واصل
امكن تجد ست الاسم
وافقة قدام الباب
تنظم فى الكلم
البفرحك يخليك
تبتسم
فعلا يا شاهين
نظمك حكم
صديق مهدى على
|
Post: #12
Title: Re: لما الباب امُبارح دقا.
Author: أبوذر بابكر
Date: 08-29-2021, 06:34 PM
Parent: #1
شاهين
والنضمي المبين
تعرف من فترة وانا بشوف العنوان
ما عارف ليه حسيت انه غالبا يكون اغنية او ما شابه
هسي قلت ياخ النسلم علي شاهين
والله ما تتخيل ندمت قدر شنو اني جيت متأخر
يا سلام ياخ
هسي والله بالضبط
زي الزول المشى الحج
ممتلئا بك
حتى ثمالة الحبور
شكرا ياخ
فيا شاهين
انك لمن السمحين
|
Post: #13
Title: Re: لما الباب امُبارح دقا.
Author: صديق مهدى على
Date: 08-29-2021, 07:39 PM
Parent: #12
ابوذر
رايك شنو
فى اللوبان الضكر
وبكرى ابوبكر
وكل من قرر السفر
على مركب مطاطى
يصارع امواج البحر
والنسوة اللائى قطعن ايديهن
عند رؤية يوسف وقولن حاشا لله
هذا ملك ليس ببشر
فهذه الدنيا يااباذر
يوم لك ويوم عليك
اذا ظلمك الدهر
فهنيئا لك هذا السفر
يا اباذر
|
Post: #14
Title: Re: لما الباب امُبارح دقا.
Author: shaheen shaheen
Date: 09-03-2021, 10:35 AM
Parent: #13
تحياتى استاذ/ صديق.
لك منى كل التقدير والمحبة.
شكرا ، شكراجزيلا.
*
استاذ/ أبوذر.
منحتنى وسام اقدل به واتباهى.
واتمنى من الله ان اكون بحجم كلماتك الجميلة ، وان لا اخيب ظنك.
تحياتى يا مبدع.
|
Post: #15
Title: Re: لما الباب امُبارح دقا.
Author: shaheen shaheen
Date: 05-03-2022, 09:47 PM
Parent: #14
7
عندك مُجلات ميكى ؟
اكبر منى بـ سنتين
انا كنتا فى خامسة ابتدائى
وانتى فى سادسة ابتدائى
عايدة السنة
وظهرتى كـ الشيطانة يا شيطانة
فى نص الطريق
بين بيت ابوى والمدرسة
- يا حلبى يا ود يا سمح , عندك مجلات ميكى ؟.
اندهشتا من السؤال !
مشروع مثقف من زمان
**
وبدات علاقتنا المريبة
اديها (ميكى)
اخد (سمير)
تدينى (ميكى)
تاخد (سمير)
وبدات جوابات الغرام
بين المجلات فى الظهور
وبدأ اللهيب
تحضنى فى نص الطريق
وانا مندهش !
وتبوسنى فى الخشم الصغير
وانا مندهش !
وتخت ايديا على صدرها الناهد صغير
- اضغط هنا.
واضغط هناك , وانا مندهش !
وتفح فحيح
- اوعك تكلم زول.
مشروع مثقف من زمان
**
ايام تشيل .. ايام تخت
ايام تسر .. ايام تضر
فى الاربعين
وهى اكبر منى بـ سنتين
لقيتا فى حفلة عرس
اتغيرت .. اتبهدلت
وسمعتا قالوا اطلقت
واخوها مات
شقت زحام الحفلة جات
مدت ايديها فى صوت حزين
- يا حلبى يا ود يا سمح , عندك مجلات ميكى ؟.
بين الضحك نزلت دموع
وبكت
بكت شديد
وحضنتها
يا (ميكى) عيد ليها الصبا
يا (ميكى) عيد ليها الصبا
يا (ميكى) عيد ليها الصبا
خليها ترجع بت صغيرة
مليانة بـ قلة ادب , بـ شيطنة
يا (ميكى) وحياة الرسول
ما تخلى اقدام السنين
تطلع عليها وتهرسا
يا (ميكى) أأأأأأأأأخ .
|
Post: #16
Title: Re: لما الباب امُبارح دقا.
Author: يحي قباني
Date: 05-04-2022, 01:55 AM
Parent: #15
Quote:
20 عاما من العطاء و الصمود
Re: لما الباب امُبارح دقا. (Re: shaheen shaheen)
7
عندك مُجلات ميكى ؟
اكبر منى بـ سنتين
انا كنتا فى خامسة ابتدائى
وانتى فى سادسة ابتدائى
عايدة السنة
وظهرتى كـ الشيطانة يا شيطانة
فى نص الطريق
بين بيت ابوى والمدرسة
- يا حلبى يا ود يا سمح , عندك مجلات ميكى ؟.
اندهشتا من السؤال !
مشروع مثقف من زمان
**
وبدات علاقتنا المريبة
اديها (ميكى)
اخد (سمير)
تدينى (ميكى)
تاخد (سمير)
وبدات جوابات الغرام
بين المجلات فى الظهور
وبدأ اللهيب
تحضنى فى نص الطريق
وانا مندهش !
وتبوسنى فى الخشم الصغير
وانا مندهش !
وتخت ايديا على صدرها الناهد صغير
- اضغط هنا.
واضغط هناك , وانا مندهش !
وتفح فحيح
- اوعك تكلم زول.
مشروع مثقف من زمان
**
ايام تشيل .. ايام تخت
ايام تسر .. ايام تضر
فى الاربعين
وهى اكبر منى بـ سنتين
لقيتا فى حفلة عرس
اتغيرت .. اتبهدلت
وسمعتا قالوا اطلقت
واخوها مات
شقت زحام الحفلة جات
مدت ايديها فى صوت حزين
- يا حلبى يا ود يا سمح , عندك مجلات ميكى ؟.
بين الضحك نزلت دموع
وبكت
بكت شديد
وحضنتها
يا (ميكى) عيد ليها الصبا
يا (ميكى) عيد ليها الصبا
يا (ميكى) عيد ليها الصبا
خليها ترجع بت صغيرة
مليانة بـ قلة ادب , بـ شيطنة
يا (ميكى) وحياة الرسول
ما تخلى اقدام السنين
تطلع عليها وتهرسا
يا (ميكى) أأأأأأأأأخ |
و حاة الله و كتاب الله يا شاهين انت زول مسكون .. بيريود ..
قف ..
طلعت زيتنا بما كتبت اعلاه ..
|
Post: #17
Title: Re: لما الباب امُبارح دقا.
Author: يحي قباني
Date: 05-04-2022, 01:58 AM
Parent: #16
و بمناسبة (الباب الامبارح دقا) ..
اهديك ..
أنا ماشي
راجع لي بيوت
تفتح لي ادُق
أو ما ادُق
من غير تقول
الزول منو
ولا حتى عَلْ الداعي خير
لا مالك الجابك شنو
لي بيوت بجيهم أي يوم
إن جيتا ليل
إن جيت دغش
طوالي ادُفْر الباب واخُش
حمّيد
|
Post: #18
Title: Re: لما الباب امُبارح دقا.
Author: أبوبكر عباس
Date: 05-04-2022, 03:04 AM
Parent: #17
نردد كمان كلام حبيبتك؛
يا حلبي يا ود يا سمح
|
Post: #27
Title: Re: لما الباب امُبارح دقا.
Author: Haytham Ghaly
Date: 05-23-2022, 05:57 AM
Parent: #15
Quote: وبدات علاقتنا المريبة
اديها (ميكى)
اخد (سمير)
تدينى (ميكى)
تاخد (سمير)
وبدات جوابات الغرام
بين المجلات فى الظهور
وبدأ اللهيب |
الحاجة دي تقريباً حصلت مع معظم اجيال السبعينات والستينات الناس القبل الموبايلات
كانت الحياة حلوة لها طعم ورائحة
يديك العافية يا استاذنا واديبنا شاهين
واصل وما تقيف
|
Post: #19
Title: Re: لما الباب امُبارح دقا.
Author: امير الامين حسن
Date: 05-04-2022, 03:53 AM
Parent: #1
هذه كتابات لا تُقرأ سريعا
بل تتلمظ ببطء حتي يسري
جمالها فى الدواخل
شكرا شاهين
|
Post: #20
Title: Re: لما الباب امُبارح دقا.
Author: Amira Hussien
Date: 05-04-2022, 05:05 AM
Parent: #1
يا سلااام …
|
Post: #21
Title: Re: لما الباب امُبارح دقا.
Author: shaheen shaheen
Date: 05-07-2022, 09:54 AM
Parent: #20
تحياتى وتقديرى.
*
تشكرات مهندس / يحيى قباني.
وتقدير على اهداء "حميد".
*
شكرا د. ابوبكر عباس.
*
كتر خيرك كتير استاذ / امير الامين.
*
مودتى استاذة / اميرة حسين.
|
Post: #22
Title: Re: لما الباب امُبارح دقا.
Author: shaheen shaheen
Date: 05-15-2022, 06:35 PM
Parent: #21
8
وشوش
يا عمى بياع الوشوش
الدنيا عيد , والعيد سعيد
ما عندى ليك يا عم قروش
بدلنى , هاك وشى الاليف
ادينى وش شيطان مخيف
عايز اعيش بين الوحوش
العندو وشين بستريح
والعندو خمسة بكون مريح
ما قدرتا
فى الريح بنكسر.
|
Post: #23
Title: Re: لما الباب امُبارح دقا.
Author: هدى ميرغنى
Date: 05-15-2022, 09:56 PM
Parent: #22
Quote: العندو وشين بستريح
والعندو خمسة بكون مريح |
تحياتى يا أستاذ شاهين~
كتابة عميقة شديد (مثقف عديل ،، مش مشروع مثقف من زمان😀)
*بخاف و أبعد بشدة من أصحاب الوشين خليهم يكونوا خمسة.
|
Post: #24
Title: Re: لما الباب امُبارح دقا.
Author: فرحات عباس
Date: 05-16-2022, 08:12 AM
Parent: #23
يا ود يا حلبي .. يا شفيف .. نحن بهذا الباب قاعدون ... لا تقطعنا
|
Post: #25
Title: Re: لما الباب امُبارح دقا.
Author: shaheen shaheen
Date: 05-21-2022, 07:49 AM
Parent: #24
تحياتى وتقديرى , استاذة / هدى ميرغنى.
*
لك مودتى استاذ / فرحات عباس.
|
Post: #26
Title: Re: لما الباب امُبارح دقا.
Author: عبدالمنعم الطيب حسن
Date: 05-21-2022, 10:31 AM
Parent: #25
بوست معلق فيهو فرحات عباس،
ادخل وانت مطنئن تجد الدرر
شكرا يا شاهين شاهين
ياحلبي يا ود يا سمح،
وتفح فحيح..
وتزح زحيح،
شكرا على الكتابة الموحية..
|
Post: #28
Title: Re: لما الباب امُبارح دقا.
Author: shaheen shaheen
Date: 07-30-2022, 09:09 PM
Parent: #26
9
خوف
طوفان الخوف غرق امنى
دسينى فى حُضنِك دسينى
يمكن فى حُضنِك خوفى يخاف , ما يرجع تانى يبارينى
جاييك فى نص الليل عصفور , بجناح مكسور
عايزين فى الليل يصطادونى
افتحى شباك حُضنِك ليا
شافع مهجوم من وسخ الدنيا , وغدر الليل
فى الليل يا ليل .. عايزين فى ليل يصطادونى
بت يا "فاطمة" , يا طرحة على الافراح طارحة
مُحتاج لحُضنِك , كلماتِك , ريحة عرقِك
مُحتاج من خوفى تدسينى
اوعك تقفلى شباك حُضنِك
اوعك يا "فاطمة" تبيعينى
الحل فى حُضنِك .. ضمينى
فى ركن الشارع منتظرين
عصفور مسكين
اوعك يا "فاطمة" تسيبينى
افتحى يا "فاطمة"
افتحى يا "فااااطمة" .. ودسينى
اااخ يا روح القلب اتأخرتى
على حافة شباكين نهدك
اولاد الكلب اصطادونى.
|
Post: #29
Title: Re: لما الباب امُبارح دقا.
Author: Abdelrahim Mohmed Salih
Date: 07-30-2022, 09:33 PM
Parent: #28
يا سلام يا شاهين يا اديب
كما علق امير الامين هذة كتابات لاتقرأ على عجل
عندك مجلات ميكى... فجرت انهار من وجد وشجن مقيم وما قيمه الشعر اصلا إن لم يوحد الناس فى مشاعرهم كما فعل ب اهل المنبر خلف الاطلسى..... اقوام اكلهم الحنين والأسى وغربه تحولت إلى مهجر وكلنا ذلك الرجل
....مواقيت الكلام سرها عجيب واعجب منه مواقيت التلقى....
شكرا اعرتنا لسانا وخاطرا
|
Post: #30
Title: Re: لما الباب امُبارح دقا.
Author: shaheen shaheen
Date: 08-03-2022, 03:20 PM
Parent: #29
خالص مودتى وتقديرى استاذ/ عبد المنعم الطيب حسن.
اين انت يا زميل ؟..واين كتاباتك وبوستاتك.
انشر علينا الحب فى زمن الكوليرا هذا.
*
د. عبد الرحيم محمد صالح.
شكرأً .. شكراً .. شكراً.
كتر خيرك كتير.
|
Post: #31
Title: Re: لما الباب امُبارح دقا.
Author: يحي قباني
Date: 08-04-2022, 00:35 AM
Parent: #30
Quote: بت يا "فاطمة" , يا طرحة على الافراح طارحة
مُحتاج لحُضنِك , كلماتِك , ريحة عرقِك
مُحتاج من خوفى تدسينى
اوعك تقفلى شباك حُضنِك
اوعك يا "فاطمة" تبيعينى
الحل فى حُضنِك .. ضمينى
فى ركن الشارع منتظرين
عصفور مسكين
اوعك يا "فاطمة" تسيبينى
افتحى يا "فاطمة"
افتحى يا "فااااطمة" .. ودسينى
اااخ يا روح القلب اتأخرتى
على حافة شباكين نهدك
اولاد الكلب اصطادونى. |
شاهين .. ايها الضُل الوريف في هجيع دنيانا الحر .. يا نبعنا الصافي بين انهار حياتنا العكرانه ..
بتغيب علينا كتير .. لكنك بتسخى لامن ترجع و تحِن علينا و تنفحنا بابداعاتك دي ..
اقول ليك شنو .. الله لا يحرمنا من قلمك المجنون ..
|
Post: #32
Title: Re: لما الباب امُبارح دقا.
Author: osama elkhawad
Date: 08-04-2022, 09:32 PM
Parent: #31
كتب ابوذر صديقنا على لساني ايضا:
Quote: والله ما تتخيل ندمت قدر شنو اني جيت متأخر
|
اهلا شاهين
طبعا لما الباب امبارح دقا تظل ايقونتك الشعرية وايضا احدى ايقونات الشعر السوداني،
لكن اشعارك الاخرى بها ظلال وريفة من اللغة الشعرية والخيال المجنّح.
سأعود ببعض التعليقات النقدية .
النفس الدرامي القصصي واضح جدا في كل الاشعار .
ساعود كان الله هوّن
|
Post: #33
Title: Re: لما الباب امُبارح دقا.
Author: osama elkhawad
Date: 08-05-2022, 04:16 PM
Parent: #32
صورة شعرية مدهشة:
في هذه الصورة الشاهينية التالية يخاف "الخوف":
Quote: يمكن فى حُضنِك خوفى يخاف ,
ما يرجع تانى يبارينى |
وفي الصورة الشعرية التالية المدهشة:
| Quote: وشك قفل باب وشو فى وشك |
نلاحظ اللعب المبدع على كلمة "وش".
ملاحظة اخيرة ان المبدع شاهين ارفق قصائده بصور تحاول اضافة معنى ما للنص المكتوب.
وهذا يتطلب فحصا نقديا آخر.
مع التقدير والتحية لاشعاره الرائعة.
|
Post: #34
Title: Re: لما الباب امُبارح دقا.
Author: shaheen shaheen
Date: 08-10-2022, 10:04 AM
Parent: #33
كل المودة مهندس/ قبانى.
تسلم كتير.
واتمنى ان اكون عند حسن ظنك على الدوام.
*
شرف لى تقديم رؤية نقدية منك استاذ/ الخواض.
بالنقد والتنبيه يتطور الناس.
فلا تحرمنى من اى ملاحظات مهما كانت قاسية.
شكراً .. شكراً .. شكراً , على راسى من فوق جميع تعليقاتك.
|
Post: #35
Title: Re: لما الباب امُبارح دقا.
Author: MOHAMMED ELSHEIKH
Date: 08-10-2022, 11:03 AM
Parent: #34
شاهين شاهين
ياود ياشين
بالله عليك
كت لابد وين؟؟
استمتع ومتع متعتنا
طلع وجعك
ماتبقى ضنين
شكرا كتيرا
|
Post: #36
Title: Re: لما الباب امُبارح دقا.
Author: osama elkhawad
Date: 08-10-2022, 04:26 PM
Parent: #35
Quote: شرف لى تقديم رؤية نقدية منك استاذ/ الخواض.
بالنقد والتنبيه يتطور الناس.
فلا تحرمنى من اى ملاحظات مهما كانت قاسية.
شكراً .. شكراً .. شكراً , على راسى من فوق جميع تعليقاتك. |
اشكرك استاذ شاهين على الاطراء العالي القامة والذي هو بالتاكيد أقل من قامتي النقدية المتواضعة.
كنت أريد أن استأذنك في تحويل "لما الباب امبارح دقا" الى تسجيل صوتي عبر الفيديو.
وفي حال موافقتك على الاقتراح، فإما ان ترسل لي تسجيلا للقصيدة بصوتك،
أو أسجّلها بصوتي.
مع فائق التقدير.
|
Post: #37
Title: Re: لما الباب امُبارح دقا.
Author: shaheen shaheen
Date: 08-23-2022, 08:26 PM
Parent: #36
10
سلام
سلامُ عليكم
سلامُ علينا
سلامُ عليهم
منكم الينا .. ومنا اليهم
وحرباً تقيف
فـ يأتى الرغيف
وشفع حـ تلعب .. كيشة وحريف
رصاصكم بيلسع فى ضرع الخريف
وعايزين نعيش
نُحبُ الحياة .. نُحبُ النساء .. نُحبُ العطور
فلا تجعلونا زوادة قبور
نُحبُ الغداء .. نُحبُ العشاء .. نُحبُ الفطور
سلامُ .. وضوح .. كوعُ وبوعُ
سلام الحقوق
حق الحياة وحق المعاش .. وحق السعوط
ويوم الخميسِ , رقيص فى طهور
نُحبُ الخمور
نُحبُ الصلاة .. نُحبُ الزكاة .. نَحب الرسول
فلا تجعلونا زوادة قبور
سلامُ .. وضوح .. كوعُ وبوعُ
نَحب البحبوا سماية الوضوع
حروبهم حريق
نُحبُ الحياة
نَحب الهجيج
لان الهجيج , رفيق فى الطريق.
|
Post: #38
Title: Re: لما الباب امُبارح دقا.
Author: shaheen shaheen
Date: 08-23-2022, 08:31 PM
Parent: #37
مودتى وتحياتى باشمهندس / محمد الشيخ.
تشكراتى.
*
Quote: كنت أريد أن استأذنك في تحويل "لما الباب امبارح دقا" الى تسجيل صوتي عبر الفيديو.
وفي حال موافقتك على الاقتراح، فإما ان ترسل لي تسجيلا للقصيدة بصوتك،
أو أسجّلها بصوتي. |
من دواعى سرورى بكل تأكيد استاذ / الخواض.
افضل بصوتك لو تكرمت.
|
Post: #39
Title: Re: لما الباب امُبارح دقا.
Author: محمد حيدر المشرف
Date: 08-24-2022, 12:58 PM
Parent: #1
طبعاً قاصد يا مستهبل .
|
Post: #40
Title: Re: لما الباب امُبارح دقا.
Author: نزار عبد الوهاب
Date: 08-24-2022, 01:56 PM
Parent: #1
سلام وتحية واحترم ...
أولجتنا من حيث لا ندري باب السهل الممتنع ...
وقليل من يجيد ما قلّ ودلّ ... شكراً جميلاً ايها الممعن في أدبه ...
تغريدة ...
كتيرون هم من كانت أولى تجاربهم من ميكي وسمير وماجد ... 
|
Post: #41
Title: Re: لما الباب امُبارح دقا.
Author: osama elkhawad
Date: 08-24-2022, 07:08 PM
Parent: #40
Quote: من دواعى سرورى بكل تأكيد استاذ / الخواض.
افضل بصوتك لو تكرمت. |
شكرا استاذنا شاهين على الموافقة.
انها مبادرة تكريم لصوتك الشعري الرائع .
أرجو ان اوّفق في هذه التجربة الجديدة .
|
|
