كيف تتعامل مع ضيفة ثقيلة

12:27 PM July, 12 2021

سودانيز اون لاين
صباح حسين طه-
مكتبتى
رابط مختصر

نحن السودانيينعندنا عادات قديمة مرتبطة بثقافة العايلة الممتدة والقبيلة
في جزء منها هي عاداتجميلة لأنها بتجسد التراحم بين أفراد المجتمع القريب منهم والبعيد
لكن الضار فيها أصبح أكتر من المفيد
لا سيما خاصة عندما نحاول ممارسة نفس العادات في دول المهاجر
مثل التحشر في حياة الآخرين الخاصة ومراقبة سلوكهم وفرض ما لا يطيقونه عليهم
في هذا الإطار صديقة لي طيبة جداً زارتها قريبة ليها (بنت عمها)
أتت هذه القريبة من السودان لزيارة بنتها في إمريكا
شاءت الأقدار أن تحدث مشاكل بين هذه القريبة وزوج البنت
لأن زوج البنت راجل سيء كما تقول ويعامل زوجته معاملة غير كريمة
وصلت لدرجة طرده لأمها وفرض عليها مقاطعة أمها والبنت راضخة له بالكامل
قررت هذه الأم الإقامة مع صديقتي (لأنها بنت عمها) حتى تحاول مساندة البنت من على البعد
مشكلة صديقتي أن هذه القريبة تقيم معهم الآن 11 شهر ولا يبدو أن لها الرغبة في المغادرة قريباً
تحدثت صديقتي مع الضيفة قريبتها عن ضرورة الرجوع للسودان والزمن كفيل بهداية بنتها أو زوج بنتها
الضيفة مصرة على البقاء ولكن في هذا تكلفة نفسية كبيرة على أسرة صديقتي
ومحتارة كيف تتخلص من هذه الضيفة الثقيلة (بنت عمها) وهي عارفة لو شكت لاهلها في السودان
الموضوع حيتوسع ويزيدوا فيه وتصبح حرابة بين أفراد العايلة

صباح إزاى الحال
أقترح أن يصبروا عليه الى حين إنتهاء الزيارة (مش الزيارة محكومة بفترة زمنية معينة؟)
وبكده ترجع نهائيا من غير حرج أو مشاكل على أن تحمل بهدايا وفيرة
ده طبعا فى حال لم تكن زيارتها multiple :)

آمل ان يكون كلامي معقولا.
تحياتي ،،

سلام
الموضوع بسيط .. تجلس مع بنتها
و تتكلم بصراحة انها المسؤولة عن امها
و رد الفعل بطرح الحل على ارض الواقع
كل مشاكلنا هي عدم تحمل المسؤولية
حتى مشاكل الوطن الكبير

غايتو كان قعدت ١١ شهر تكون بتها عملت ليها ورق لذلك قاعدة بى راحتا …….فى ناس ما بتحس وهى باين من هذا النوع ويمكن ده السبب الخلا راجل بتها ما استحمل وجودا ،
كتير من العادات مفروض تتغير لان اى شى فى الدنيا اتغير ، يعنى الام دى مفروض اذا ما وجه ليها سيد البيت دعوة اصلا ما تمشى ولاتقعد معاهم حتى لو كان بيت بتها و حتى لو قعدت ما تطول (من زار وخفا)
مشكلة السودانية الاولادهم فى المهاجر مفتكرين الحكاية زى السودان وماعارفين انو كل شى محسوب من غرف وادوات وطعام والخ ، المهم دى ام طبعا لازم يستحملوا ……البحير لما يكون ود ودخالتك او ود بت عمك اوبت خالة امك وتجيك فى غربة وتقعد معاك بالشهور لى علاج ولا لى سياحة دى التلامة بى عينا

سلام عليكم صاحبه البوست وضيوفها
ماداخل اطرح حل لكن نظره للموضوع من زاويه تانيه عن طبيعه العلاقات الاجتماعيه بين افراد الاسره الممتده وعلاقات النسب بين زمان والان
وانا بقرا فى البوست جا فى بالى مثل سودانى (النسيب عين شمس) ربما يعبر طبيعه العلاقه بين الام وزوج بنتها وقدر الاحترام والتقدير فى موروث مجتمعنا السودانى .ضرورى نستوعب الحاجات الجميله البتناسب مع العصر وتحفظ دفء العلاقات والخصوصيات لاسيما وانو امهات اليوم فى غالبهم بين متعلمه او حتى على الاقل متنوره بتوفر وسائط الاعلام راديو وتلفزيون لو ماكانت متعلمه
انقل مقال صحفى عن الموضوع

Quote: النسيب.. أمازال «عين شمس»؟! سحر محمد بشير - نشر في الانتباهة يوم 25 - 03 - 2012 علاقات النسب بشتى انواعها يسودها نوع من الحساسية بين أهل الزوج وأهل الزوجة ولكن علاقة النسيب «زوج البنت» بنسيبته «أم الزوجة» هي علاقة تمتاز بالاحترام والحياء لدرجة بعيدة فمازالت بعض المجتمعات في السودان تمتنع فيها النسيبة عن الأكل بحضرة نسيبها بل نراها مطرقة برأسها وهي تحادث نسيبها باعتبار النسيب «عين شمس» لا تسطيع أن تملأ عينها منه وعلى النقيض تمامًا هنالك بعض المجتمعات الارستقراطية زالت تلك الحواجز فيها بين النسيب ونسيبته وصار البساط أحمدي لدرجة التدخل في شؤون الأسرة الخاصة.. «البيت الكبير» أجرت استطلاعًا وسط فئات مختلفة من الجنسين لمعرفة رأيهم في تلك العلاقة كما ختمنا استطلاعنا برأي علم الاجتماع.. بداية افتتح لنا شرفة الحديث الأستاذ ياسر الفادني موظف بالقطاع الخاص حيث افادنا قائلاً: للزوج دور كبير في كسب ود اسرة زوجته فاحترامه لزوجته وتقديره لها يصب في تقدير النسيبة اما عدم تناولها للطعام معه نتج من الحياء والاحترام الشديد وعن ذات نفسي مازالت نسيبتي ترفض تناول الطعام بمعيتي في «صينية» واحدة وفي مرة حاولت أن أضحك معها فقلت لها «أنتي مابتاكلي معاي عشان لقمتك كبيرة وماعايزاني اشوفك» فاكتفت بالضحك ولم تغّير موقفها. حكت لي زميلتي قائلة: إن أم صديقتها أتت من البلد خصيصًا للاقامة مع ابنتها في فترة الوضوع وصديقتها تلك تقطن في شقة وشاءت الظروف أن انقطع التيار الكهربائي عن البناية وأم صديقتي لم تعتد على السخانة خاصة وأنها قادمة من إحدى الولايات التي تمتاز ببرودة الجو فلم تجد بديلاً عن النوم في البلكونة وعندما استيقظت في الصباح وجدت أن نسيبها ينام في السرير المقابل لها في ذات المكان فلم تنطق ببنت شفة وأكتفت بحزم حقائبها والعودة أدراجها لولايتها! الأستاذ جلى ابو إدريس من وكالة السودان للأنباء أفادنا بقوله: جبل الشعب السوداني بموروثات في معظمها تُعلي من شأن المرأة وتبوئها مقامًا يحفظ كرامتها ويجعلها مكان تقدير واحترام فزوج البنت لا يقابل نسيبته ولا يكلمها الا بعد الزواج وذلك من باب الحياء كما أنه لايأكل معها احترامًا وتقديرًا للنسب الذي بينهم فللنسب مكانة خاصة في السودان فيشعر أهل الزوجة أن احترامهم لزوج ابنتهم من باب تقديرهم لابنتهم وفي كثير من الأسر يصبح زوج البنت اقرب لوالدي زوجته من بعض أبنائهم فيستشار في كثير من الأمور. عبدالله عبد المنعم تاجر بسوق بحري كان له رأي مختلف بعض الشيء حيث قال في إفادته: النسيب عندنا في الريف مازال محتفظًا بمكانته لدرجة قد تصل لتهديد أحدهم بالفضح أمام نسيبته مثلاً حال لم يستجب لطلباتنا والتي غالبًا ماتكون بسيطة.. لكن قبل بضعة أشهر كنت برفقة أحد أصدقائي مجاملة له في زواج صديقه وأثناء الحفل كانت هنالك امرأة متوسطة العمر ترقص وتزغرد وتمسك بيد العروس تارة وبيد العريس تارة أخرى وعرفت فيما بعد أنها أم العروس!! فتعجبت جدًا لأننا مازلنا متمسكين بمقولة «النسيب عين شمس ». م . ع أوجز افادته في عبارات قائلاً: نسيبتي أنا بالنسبة لها الدجاجة التي تبيض ذهبًا وقد ضقت من طلباتها التي لا تنتهي وتدخلها المستمر في حياتي وبشكل سافر وأفكر الآن جديًا في فراق ابنتها اذا لم تكف عن ما هي عليه. ختمنا جولتنا بافادة الأستاذ محمد عبد الرحمن أستاذ علم الاجتماع بجامعة الخرطوم والذي قال في افادته: يكون الاحترام للنسيب باعتباره وافدًا جديدًا ومازال المجتمع الريفي متمسكًا بعاداته وتقاليده وقيمه ولكن هنالك عوامل أثرت على شكل العلاقة واسهمت في تغيير العادات عمومًا مثل الانفتاح على العالم الخارجي وشكل الاتصالات وبصورة أخرى نجد أن تعقيدات الحياة والجري وراء استكمال متطلباتها أدت الى تحرير الناس من كثير من القيم وانخفاض درجات الضبط الاجتماعي والذي يعد أقوى من الضابط الرسمي وكان يعاقب كل من ينجرف عن العادات المتوارثة.. فصعوبة الحياة نفسها اضافة الى العولمة جعلت المجتمع متساهلاً حيال بعض التقاليد وأصبح جل المجتمع ينظر للعلاقات الجديدة بما فيها الزواج ينظرون اليها باعتبارها علاقات شكلية سطحية سريعة ذات منفعة بالتالي انتفت قيمة الاحترام الزائد للنسيب وسادت روح الندية فأصبح أهل الزوجة يتحينون الفرص لزوج ابنتهم والعكس زوج الابنة يتحين الفرص لأهل زوجته وهذه من المعضلات التي تنتج عنها مشكلات قد تؤدي للطلاق والتفكك الأسري وتشرّد الأبناء، أما بالنسبة لتدخل النسيبة في حياة ابنتها فأقول إن الزواج لا يتحمل دخول طرف ثالث في العلاقة مهما كانت درجة القرابة ويجب أن تنحصر مشكلاتهما في اطارهما الخاص لأن كليهما أدرى بكيفية تعامله مع الطرف الآخر وغالبًا تدخل بعض أفراد الأسرة يؤدي لتشعيب المشكلات.

سلام استاذة صباح

Quote: كيف تتعامل مع ضيفة ثقيلة

دا وضع معقد و شائك و يجب التأقلم معه كما يتأقلم مريض السرطان
قولي لصاحبتك دي تحتسب بس

سلمات يا صباح

صديقتك طالما وافقت على استضافتها عليها ان تتحمل حتى النهاية
وعليها ان لاتُظهر ابداً اي شعور سلبي نحوها حتى يفرّج الله .

والتعامل مع الضيوف غير المرغوب فيهم ورد فى سورة الاحزاب فى قوله تعالى :

Quote: يَا أَيُّهَا الَّذِينَ آمَنُوا لَا تَدْخُلُوا بُيُوتَ النَّبِيِّ إِلَّا أَن يُؤْذَنَ لَكُمْ إِلَىٰ طَعَامٍ غَيْرَ نَاظِرِينَ إِنَاهُ وَلَٰكِنْ إِذَا دُعِيتُمْ فَادْخُلُوا فَإِذَا طَعِمْتُمْ فَانتَشِرُوا وَلَا مُسْتَأْنِسِينَ لِحَدِيثٍ ۚ إِنَّ ذَٰلِكُمْ كَانَ يُؤْذِي النَّبِيَّ فَيَسْتَحْيِي مِنكُمْ ۖ وَاللَّهُ لَا يَسْتَحْيِي مِنَ الْحَقِّ ۚ 53

وآداب دخول بيوت النبي صلى الله عليه وسلم فى :
- الدعوة لتناول الطعام .
- الالتزام بالمواعيد بحيث لايكون : قبل الطعام ( غير ناظرين اناه ) اي : منتظرين حتى احضار الطعام .
الانتشار والذهاب بعد الطعام بدون الجلوس والونسة بعد الطعام ( ورحم الله عبداً زار وخفّ )

عاوز اعلق في نقاط ان شاء الله تسعدنا
رزانة الكلمة ونقول كلام طيب
ابتداءا زوج البنت هذا ليس كفو
سئ وحتى لو كانت ام البنت سئية
فليس من كريم الاخلاق ان يحرمها
من ابنتها ومن الاقامة معها مهما كانت
الدوافع والواضح انه شخص بخيل
وسئ الخلق.
بالنسبة لبنت عم المراة والتي هي صديقتك
ليس هناك ما يدعوها للتبرم ولكن
علاما يبدو أنها بدات تلاقي عدم
رضا من زوجها هي الاخرى لتواجد
هذه المراة عندها.
والامر الاهم هو ان يترك امر هذه
المراة للعقلاء من الاهل وهم من يجب
عليهم ايصال رسالة لها بالمغادرة
والعودة ادراجها وسيكون الطلب هنا
مقبول ام من صديقتي سيكون الامر
صعبا، وحتى لو حدث ان تم دعوتها
لمغادرة المنزل فعليها ان تقبل
ذلك وقد قبلته من ابنتها ان كان ذلك
برضاءه او بغير رضاها.
فاذا حدث ان تم ابلاغها المغادرة
فعليها تحمل ذلك وعذر صديقتك

بالنسبة لبنت عم المراة والتي هي صديقتك
ليس هناك ما يدعوها للتبرم

بيوت الغرب ممحوقة ا احمد .و في حاجات كتيرة
زي التامين و لو لا قدر الله حصل ليها حاجة المضيفة
المسكينة بتدخل في سين وجيم..و كويس انك انتبهت
لزوجها الماليه اي دخل في تحمل مسؤولية ست كبيرة
و بنتها في القرب...بالمناسبة هذة ليست ضيفة هذة مقيمة
الواضح ما فاضح تتكلم مع صاحبة المسؤولية....
و اخير الزيارة للغرب ليها مدة محددة..هل هي بصورة
غير شرعية....

اذا كان راجلها هنا في السودان
الناس يحرشوه عشان يتزوج فيها
يوم تسمع الراجل عاوز يعرس
والله لو ادوها شقة في البيت الأبيض ما تقعد فيها
عندنا واحد مرتو مشت زيارة لي بتها
اها مددوا الزيارة كم مرة
عمك لمن زهج هنا قرر يتزوج
الحاجة سمعت
وبعد يومين شرفت السودان
قال زيارة قال

هسي المشكلة وين؟
اول شىء حجة صباح دي بتها كيف ترضى ليها انها تنطرد من بيت بتها؟
ثانيا.. بتها قاعدة تزورها ولا مقاطعاها مع زوجها الجعان وما بتلبي ليها احتياجاتها
ياتو بت في الدنيا دي ترضى المهانة لامها ....حتى لو البت نفسها بيتزي ما واضح
ضعفها وهوانها عند زوجها .
يعني المستضيفة جاية تشتكي بعد سنة تقريبا وحجة صباح بقت ثقيلة ؟؟!!!
وخايفة من كلام الناس؟ والعيلة والممتدة ووو .. في حين بتها ما خافت.
....
قاعدة وين حجة صباح دي جيبوها لي او وروني ساكنة وين... اصلا انا
حماتي السوكرة اللذيذة قاعدة معانا.ع على الاقل حجة صباح تقعد تونسها
حماتي دي بركة ووالله الحق نا بنفرط فيها لحظة

موضوع الضيافة ما بقدر اتكلم فيه لانو في اعتبارات كثيرة في الموضوع، لكن استغرب في البنت كيف ترضى طرد امها من بيتها! هذا الزوج لم يحترمها ما عارف كيف تقبل تستمر معاه في حياة تخلوا من الاحترام خليك من المحبة! واذا كان لها اطفال منه كيف ح يحترموها وهم يرونها تقبل طرد امها!

شكراً لكل من ىتداخل وواسى أو نصح وراجعة ليكم كلكم/ن
صاحبتي قالت لي يا صباح شابكننا في السودان
انتو هسة من غربتكم دي عملتوا شنو لمستقبل أولادكم في السودان
يحسسوك بإنك فاشلة عديل كدا
وما عارفننا حتى أوبر سقناه نساعد في رجالنا
لكن إلتزامات البلد دي عالية شديد وكمان تجيكي قريبتك ساكنة معاك 11 شهر
في بيت أصلوا ممحوق ترقدي الأولاد والبنات في نفس الغرفة
ولله أشهد لا صاحبتي بخيلة لا راجلها بخيل بس تعبوا من الضيافة الممتدة دي
البت شبه مقاطعة أمها عشان ما تفقد راجلها
والأم شخصيتها طاغية حتى على زوجها في السودان وأولادا
وقالت لو ما رجعت بتها لصوابها وحمتا من الراجل السكير دا ما حترجع
حتى لدرجة قالت ليها طلقيه بس البت رفضت
إتكلموا مع البت بطريقة غير مباشرة عشان تحل موضوع أمها
البت قالت أمها ما مفروض تقعد ولا يوم هنا لكنها ما بتقدر تقول ليها كدا
وبتتكلم معاها بالتلفون من وراء راجلا لكن بدون لا دي بتسمع لدي و لا الآخرى بتسمع ليها
صديقتي قالت ما حتقدر تقول لهذه القريبة الباردة أي حاجة وراجية الفرج من الله

صديقتي قالت ما حتقدر تقول لهذه القريبة الباردة أي حاجة
وراجية الفرج من الله

الصورة وضحت الحل عند زوج صديقتك يحسم الفوضى

وراجية الفرج من الله
!!!!!!!!!!
الله يدي الحجة طولة العمر

Quote: صديقتك طالما وافقت على استضافتها عليها ان تتحمل حتى النهاية وعليها ان لاتُظهر ابداً اي شعور سلبي نحوها حتى يفرّج الله

سلامات صباح ..

كلام علاء ده سليم ..

طالما ارتضت بالاستضافة و ما ختت اشياء واضحة من البداية .. و اتحملت 11 شهر .. الكم سنة الباقيات بعدوا سريع .. :)

الاشياء دي الواضح فيها ما فاضح لكن من البداية ..

احكي ليك قصة في موضوع الحسم الأولي ..

واحد صاحبنا زمان كتير الاسفار .. و عندنا صاحبا لينا كده سغيل في نظر زولنا البسافر كتير ده ..

اها صاحبنا المسفار .. رجع يوم من المانيا .. و لاقاهو زولنا السغيل و قال ليهو ..

الله ياخي .. و الله لو كنت عارفك ماشي المانيا كان طلبت منك شي تجيبوا لي من هناك ..!!

صاحبنا رد عليو و قال: و الله لو كنت كلمتني ما كنت جبتها ليك ..


تحياتي للجميع ..

يا قباني ده ما سغيل ده مستنكح و ما اكثرهم

اللوتري دا موش قالوا عملوهو عشان السودانيين نسبة لعلاقة الاسرة الحميمية الممتدة
من الحبوبة للام للاحفاد والشفع حبوبتم تقعد في نصهم وتحكي ليهم حكاية فاطنة السمحة وعبدالكريم الكويس
والشفع يضحكوا والحبوبة تضحك وسيد البيت لمن يشوف الشفع غافلين يدي مرتو همزة لمن تنط ويقوم يقوليها اللوبة الت
والبيت كلو يموت بالضحك والانبساط
وبكرة حبوبة تحكي نفس الحكاية
.
دا كلوووو عملوهو عشان عادات المجتمع السوداني الجميلة دي تتسرب وسط المجتمع الامريكي
لتخفف عنه الضغوط اليومية
تقوموا اتوا ذاتم يا سودانيين تبقوا ازرط منهم
موش ول ما موش ؟

.
.
النسبيبة دي ما بعرف مكانتها وعزتها الا ناس صقيعة سلامة
امريكا فت طقة النيتي لله
صفحتنا وين جنبتنا وين
.
تحياتي صباح وضيوفك

النسبيبة دي ما بعرف مكانتها وعزتها الا ناس صقيعة سلامة

النسبة بتفرج مكانتها باحترامها لزوجها اولا
و رجال بناتها و زوجات اولادها...غير كدا
الميزان بيختل و زي ما قالو النسيب عين
الشمس..اي حجب للشمس فاتنتظر النسبة
كل انواع الطقس ماعدا الطقس المعتدل
الان البوست انتقل من ضيفة ثقيلة الي نسيبة
متسلطه و متجبرتا...و كيفية حسم الفوضى
من زوجها..زوجات اولادها..و ازواج بناتها.

نفرض القريبة و زوجها استحملوا ...الاولاد و البنات
المتكدسين في غرفة واحدة ...و حركة البيت المشلول
و البيئة السالفة دي كيف يتحلوا منها..و تحصيل العيال
العلمي و النفسي...هوي نحن ما عايشين في صقيعة سلامة

Quote: هوي نحن ما عايشين في صقيعة سلامة

حبيبنا عمر نملة
تحياتي
مداخلتي ليست جادة باي حال من الاحوال
.
فقط مجرد فاصل غنائي
.
ثم واصلوا عادي في معالجة الموضوع
وشكرا

بنتنا صباح
سلام عليك
يجب احترام وأكرام الضيف مهما طالت إقامة الضيف .
والاحترام والصبر على الضيف من الأشياء الحميدة.
ومهما كان ما ممكن وصف الضيف بالثقيل.
وعموم المهاجرين في البداية احتاجوا للمساعدة .
يا صباح صاحبتك لو بتهمك شديد وريها .
قولي ليها الغربة دي فيها امتحانات ساخنة ومحتاجة قوة تحمل
وبعدين ربنا بفرجها .
لازم صاحبتك تتقاسم الحلو و المر مع الضيفة.
ودي صفات السودانيين.
يشهد الله حنيت على الضيفة المسكينة.
والله لو كانت جمبي كان اكرمتها حد الكرم ما يقيف .
..
تحياتي بنتنا صباح

مداخلتي ليست جادة باي حال من الاحوال

مصدقك...القصد معيار النظر للقضية
يجب الوضع في الاعتبار ان الغرب
ما بيستحمل تحمل قضية زي دي
لمدة طويلة...المشكلة انو القضية
يظهر ما عندها حل قريب دا ان اتوجد
حل..ثم ثانيا المسكينة دي وعيالها كل
ذنبهم انهم اقرباء...