3 وزراء إتحاديين يرفضون التفتيش في الطائرة السعودية ويعودون لمكاتبهم

05:19 PM July, 06 2021

سودانيز اون لاين
Dr. Ahmed Amin-السودان - الخرطوم 2 - أبراج النيلين
مكتبتى
رابط مختصر

كشفت مصادر بمطار الخرطوم الدولي أن وزراء بالحكومة الانتقالية، رفضوا تفتيشهم أثناء صعودهم إلى طائرة الخطوط الجوية السعودية المتجهة إلى الرياض صباح أمس الاثنين.

وأكدت المصادر أن الوزراء قاطعوا الرحلة ورفضوا صعود الطائرة احتجاجاً على الخطوة التي اعتبروها تمثل إهانة لشخصيات دستورية.

وقالت إن الوفد الحكومي الذي يضم وزير المالية جبريل إبراهيم ووزير النفط جادين عبيد ووزيرالاستثمار الهادي محمد إبراهيم، عندما أرادوا الصعود الى الطائرة
طلب أفراد أمن الطائرة تفتيشهم،إلا أنهم رفضوا الخطوة، وغادروا المطار إلى مكاتبهم، وأعلنوا إلغاء الزيارة، إلا أنهم تراجعوا لاحقاً واستقلوا طائرة أخرى،
بعد تدخلات من السلطات السعودية، والتي خصصت لهم رحلة خاصة ظهر أمس الاثنين.

وتأتي زيارة الوزراء للمملكة تلبية لدعوة رسمية من الرياض،لمناقشة عدد من الموضوعات المشتركة بين البلدين.

المواكب

يكون شايلين فواكه من لبنان

الناس ديل بتلككو وحركات منهم
يعنى اول مره ليهم او لبعضهم كمسافرين دستوريين ؟
بهدين عادى يحله الموضوع ناس المراسم

Quote: يكون شايلين فواكه من لبنان

محشيه وى طازه

موقف قوي يحمد لهم، اظن من زمن نميري مافي دستوري اخد موقف بالقوة دي

مرة في مطار الملك عبد العزيز بجدة
تم تفتيش وزير جنوبي قادم من السودان
واتضح ان معه كمية كبيرة من حبوب الكبتاجون المخدرة
المهم في النهاية تم مصادرة الكمية
وتم إرجاع الوزير السودان في أول طائرة
ورغم ان العملية فيها قطع رأس
ولكن السلطات السعودية أفرجت عنه

برضو مرة تم القبض على قنصل نيجيريا بجدة
طبعا،سعادة القنصل لم يكن يحمل حبوب مخدرة
ولكن كان يقوم بتهريب أفارقة للحج بعربة السفارة

يتفتشوا طوالي، وخلاص،
دستوريين، في عينكم،
الدستوري الوحيد الجاء وفق ارادة شعبية كاسحة
هو حمدوك،
الباقيين ديل اشتغلوا مع الشعب بفكرة التلات ورقات،،

طبعا معاهم حق ومل الحق
خاصة ان التفتيش يتم عند مدخل الطائرة
قبل كدة وزير في النظام الكيزاني البائد في مطار القاهرة والعلاقات
كانت متوترة.... في البداية رفض الكوز ان يتم تفتيشه
في النهاية انا شفتو موقفنو باللباس الداخلي فقط ... وكرشو برة
والشخص البفتشه يسأله( انت برضو مش عايز تعترف انت مخبي الفلوس فين ؟)

لكن التفتيش اللى رفضوهو الجماعه ديل كان تفتسش شخصى ولا تفتيش الجهاز المحمول بالتيد داك

عاصم
الخطوط السعودية ومن زمن الكيزان الردىء بتقوم بتفتيش الركاب
تفتيش شخصي عند مدخل الطائرة.... يعني فوق السلم.... يتم تفتيش
جيوبك واي شىء في يدك .... شنطة صغيرة كيس ... علبة

ماشين يعملوا شنو في السعودية ؟ كل اسبوع اتنين أو تلاتة مسافرين
شنو الحكاية ؟ قصة دعوة دي ما أظن ، طفاسة منهم ساكت

الشيء غير المعتاد أن يتم تفتيش وزراء اتحاديين ذاهبين تلبيةً لدعوة رسمية من جهة رسمية خارجية. لكن هل انتو عندكم وزراء جد يعني؟ العالم الأسفل دا لا فرق بين وزيره وراعي ضانه (والله العظيم راعي ضانه أشرف من أي وزير فيهم). والسودان أصبح موبوءاً منذ عقود، فكيف يعامَل وزراءنا كباقي وزراء العالم الحقيقي؟ كلهم مشبوهون في الخارج.

خليهم يفتشوهم، ويعملوا فيهم العايزينو.

نحن اشتهرنا بأن كبار المهربين هم مسؤولونا ووزراؤنا، الغريب شنو؟ فاكرين إنكم دولة ذات سيادة واستقلالية ونديد للدول الأخرى. لسه بعيد عليكم.

Quote: يتفتشوا طوالي، وخلاص، دستوريين، في عينكم، الدستوري الوحيد الجاء وفق ارادة شعبية كاسحة هو حمدوك، الباقيين ديل اشتغلوا مع الشعب بفكرة التلات ورقات،،

و المرء حيث يضع نفسه ...
إن وضعها ... إتضعت ..
و إن رفعها ... إرتفعت ...

و العبرة بالخواتيم ...
خواتيم الموقف ....
إعتذار رسمي و طيارة مخصوصة لنقلهم ... بلا تفتيش ..

والسعودية بتكون دايرة مرتزقة رخيسين لحربها الخاسرة في اليمن
وخليل عنده مرتزقة مع السراج في ليبيا
وميناوي مع حفتر
ديل الوزرا البفرضهم حمدوك بي المحاصصة بدون محكمة دستورية وفيش
ولازال السودان داير في فلك الانقاذ والدول التي تهين السودان والسودانيين الان وهي خمسة دول

سلام محمد سليمان ولو عندهم عزة نفس مسافرين بالخطوط السعودية ليه ما يسافروا بي بدر ولا تاركو ليه ما

Quote: يتفتشوا طوالي، وخلاص، دستوريين، في عينكم، الدستوري الوحيد الجاء وفق ارادة شعبية كاسحة هو حمدوك، الباقيين ديل اشتغلوا مع الشعب بفكرة التلات ورقات،،

نكتة دستوريين دي حلوة
دستوريين بتاعين الساعة كم
الانتخبهم منو في السودان من الاساس
والحوامة لازمت شنو
مش ادوهم اقليم دارفور بي مخرجات سيرك جوبا
خلاس موارد دارفور اكبر من كل دول الخليج وقدر مساحة فرنسا
بمشو يشحدو زي ناس المركز الرخيسين ليه ؟؟؟
جيبو الصين بس في سنة بتعمل دارفور دي اغني اقليم في العالم وعلي ضمانتي بس
فعلا البلدو مع قرعة ما بخليها
ومفروض خلاس يستلم اقليم دارفور ابناءه الاذكياء عبدالواحد نور وموسي هلال و كل من يرفض الوضع المشين ده
وبي الانتخابات فقط عشان نشوف الشعب عايز مين ..

لو كان فى (نفق) كان إتحلت
بس مافى !

الأخ د. احمد
سلام
دستوريين بتاع شنو؟
هم خلاص كنكشوا في الوزارات زي كنكشة الكيزان .
الناس ديل وزراء فترة انتقالية بس . يعني Volunteers
يعني متطوعيين ساكت.
ومن حق سكيوريتي الرحلة يفتشهم . والتفتيش لسلامتهم
في دا الزمن العجيب .
بعدين اصغر طفل في أي مكان في العالم عارف كمية
الدهب البيتهرب عبر مطار الخرطوم .
يعني طالما سمعة المطار بي دي الصورة لابد أن يشمل
التفتيش العامة وزير على خفير .
التحية للسكيورريتية .

قبل فترة في حلتنا هنا, ذهبت زولة من ذوى البشرة البيضاء الي عيادة (مجمع طبى) و قالت اللسكرتيرة, هى عايزة تقابل طبيب من ذوى البشرة البيضاء و يتحدث الانجليزية.
حسب عقليتها (علي ما اعتقد) انو الزول الابيض هو الكل في و الكل و لا تعترف بأشخاص من ذوى البشرات الاخرى في ان يكونو اى شئ.

عقلية البعض في السودان مثل تلك العقلية تماما.

لو اصلا تفتيش المسئولين الحكوميين يأتى بدواعى الشك في انهم مهربون فهذا دليل علي ان البلد مأزوم جدا و ليس فيه شخص واحد نضيف من الغفير الي رئيس الوزراء.

صدقت يا محجوب، جاني احساس هنا ان بعض التعليقات قرأت اسماء الوزراء أولا ثم علقت بناء عليها!

مفروض يخضعوا للتفتيش و!جراءات السلامة المتبعة والتى تسرى حتى على سواقين الطائرة ذاتهم والطاقم والمرافق وعلى اى حاجة حتدخل للطائرة.

عدم تفتيش ناس الحكومة ده هو زاتو الخلا البلد تهرب وتدخل اى حاجة٠

يتم تفتيش الشنط والتفتيش الشخصي وغيره في صالة المغادرة بواسطة موظفين هيئة الطيران المدني في العادة
وللاسف تقوم بعض خطوط الطيران بالتفتيش مره اخري كما ذكر الاخوان اعلاه قبل الدخول للطائرة وفي سلم الطائرة
وبواسطة موظفين اجانب جايين مخصوص مع الطائرة لهذا الغرض
في رسالة واضحة بعدم الاعتراف بسلطات هيئة الطيران السودانية
وهذا لايحدث الا في السودان وهو انتهاك لسيادة وكرامة المواطن السوداني
ويعتبر قمة الاساءة ان يتم تفتيش مواطن داخل بلده وبواسطة موظفين اجانب
وعدم الاعتراف بالتفتيش الذي تقوم به السلطات السودانية

وهذا ما حدث والقصة ماقصة وزير ولا غفير

Quote: يتم تفتيش الشنط والتفتيش الشخصي وغيره في صالة المغادرة بواسطة موظفين هيئة الطيران المدني في العادة وللاسف تقوم بعض خطوط الطيران بالتفتيش مره اخري كما ذكر الاخوان اعلاه قبل الدخول للطائرة وفي سلم الطائرة وبواسطة موظفين اجانب جايين مخصوص مع الطائرة لهذا الغرض في رسالة واضحة بعدم الاعتراف بسلطات هيئة الطيران السودانية وهذا لايحدث الا في السودان

في سنة 2002 كانت هنالك محاولة لإختطاف طائرة تابعة للخطوط الجوية السعودية أثناء رحلتها من الخرطوم إلى جدة.
المختطف عادل ناصر أحمد فرج سعودي الجنسية كان يحمل مسدس، أثبتت التحقيقات فيما بعد أنه تم تزويده بالسلاح بعد عبوره تفتيش السلامة في صالة المغادرة بمطار الخرطوم.
التحقيقات أثبتت تورط موظف من موظفي مطار الخرطوم في تهريب السلاح للمختطف بعد تخطيه إجراءات السلامة بصالة المقادرة وقبل صعوده للطائرة.

المسؤولون في الخطوط السعودية حملوا السلطات الأمنية في مطار الخرطوم المسؤولية في تمكن الخاطف من إدخال السلاح إلى الطائرة.
كما ذكر مسؤول في الخطوط الجوية السعودية أن الخطوط السعودية تلجأ لتوفير حراسات خاصة لتفتيش الركاب قبل صعودهم للطائرة في بعض المطارات، وأضااف بأن هذه الإجراءات الأمنية لم تكن متبعة في مطار الخرطوم.

مطار يتم تهريب الذهب عبره وربما اشياء الخرى ولاشىء يخفى على اى الاخرين ولا اظن الفوضى دى مدعاه للثقه طالما الدوله عاجزه عن حسم الفوضى يلقى بشبهه تواطىء رسمى لظاهره التهريب
المسئول العايز يعمل فيها حنبلى اول شىء يكون فاعل فى حكومتو عشان تتحسم الفوضى دى
الوزراء التلاته هم اكثر الجهات صله وتاثر بالتهريب كظاهره
طبعا اى مخاوف تانى وارده
وعدم المجامله يفترض احترامها من المسئول قبل المواطن
لو تعرض لموقف زى دا وزير دوله من العالم الاول هل حيكون ليهو نفس رد الفعل (طالما كان مسافر على خطوط خلاف الناقل الزطنى)
يمكن الحادثه مدعاه لتذكيرهم بقيمه الناقل الوطنى كناقل حصرى للوفود والمسئولين

دي اولا اهانة بامن المطار والامن العام
نفترض ان حادثة المواطن السعودي وتهريب المسدس هي السبب
لهذا الاجراء والذي مستمر منذ التسعينات.. يعني ثلاثين سنة كعمر النظام البائد
طيب: لماذا لا يضعون اجهزة كاشفة للمعادن عند الصعود للطائرة؟؟
يمر الركاب منها بكل سهولة واحترام ...وسرعة لان عملية التفتيش الحالية تاخذ وقتا

سلام أحمد ياسين يا فنان

Quote: لان عملية التفتيش الحالية تاخذ وقتا

فعلاً طريقة التفتيش تأخذ وقت ومملة وفيها بعضاً من عدم الإحترام للمسافر.
ولكن رغم ذلك أغلب المسافرين بين السودان والسعودية يفضلون الخطوط السعودية رغم أن أسعار تذاكرها أعلى من الخطوط الأخرى.
ربما أن ذلك بسبب أن المسافر يشعر بالطمأنينة لإجراءات السلامة التي تتبعها الخطوط السعودية وفي سبيل ذلك يتحمل التفتيش عند باب الطائرة.

المسألة بالتأكيد فيها تشكيك بكفاءة أمن مطار الخرطوم ويتبع ذلك عدم إعتراف بكفاءة الدولة بكاملها، سواء قبلنا حادثة محاولة الإختطاف السابقة كتبرير ام لم نقبله.

أتفهم وجهة نظرك وأحترمها تماماً.
ولكني لم أستطع إحترام تصرف الوزراء الذين لم يتبنوا وجهة نظر مشابهة لوجهة نظرك.
فالسادة الوزراء لم يعترضوا على الإجراء ولم يدعوا كفاءة الدولة في توفير الأمن.
السادة الوزرا إعترضوا فقط على عدم إستثنائهم كدستوريين من إجراءت التفتيش على سلم الطائرة.
السادة الوزراء أقروا بأن التفتيش للمسافر العادي على سلم الطائرة أمر مقبول ولم ينتبهوا لما فيه من تشكيك في كفاءة أجهزنهم الأمنية.

حسناً فعلت الخطوط السعودية بعدم تراجعها عن تفتيشهم وتركتهم يلغوا رحلتهم على متن رحلتها المخصصة لعموم المسافرين.
ولو فعلت غير ذلك كانت لتكون إهانة بالغة لبقية الركاب وإنتقاص لحقهم في رحلة آمنة بفرضية أن تفتيش جميع الركاب ضروري لضمان سلامة الرحلة.

حسناً فعلت السعودية كدولة مستضيفة لسعادة السادة الوزراء في توفير رحلة خاصة لهم يتم فيها إستثناء جميع الركاب من إجراءات التفتيش.
بئس الموقف من الوزراء الذين قبلوا بالسفر على متن الرحلة الخاصة على نفس الخطوط ولم يكونوا مبدئيين في مقاطعة رحلات الخطوط السعودية.

Quote: أتفهم وجهة نظرك وأحترمها تماماً.

تفهمي وإحترامي لوجهة نظرك لا يعني أنني أتفق معها،
ولكن يعني أنني على الأقل أرى فيها وجه من وجوه الحق وأرى أنها تستند على مبدأ نبيل.
وذلك يختلف عن تصرف سعادة السادة الوزراء الذين جاء تصرفهم تعبير عن إهتمامهم بما هو ذاتي وشخصي وفي حدود ضيقة.