جوطة الحواس *** ميسي و بيكاسو و ياني

09:33 AM July, 06 2021

سودانيز اون لاين
أبوذر بابكر-
مكتبتى
رابط مختصر

العنوان هو النسخة السودانية من فوضى حواس احلام مستغانمي

فوضى حواس عجيبة وغريبة زى ما قالت السيدة أحلام
لكن أظنها فوضى جميلة وممتعة حد الوله والذوبان فى المتعة اللانهائية

الحواس الخمسة هي ملاعق الروح البتغرف بيها من بره منها ومن جوه فيها
والحواس هي السلالم البتطلع بيها الأشياء ليك وتعتلي رأس بيت قلب ومأذنة مهجتك وتأذن فى اقاليمك وتنادي

تشوف ميسي وهو بلعب كورة السجم دى لكن فجأة شوف العين يتحول ل اضانك وتحس تماما انك زى البتسمع فى صوت ابوداود مع عود برعي وهم بتلو في ما تيسر لهم من

زرعوك في قلبي يا من كساني شجون

وطوالي تتلغي فيك حاسة البصر والشوف وتبقي سمع

والله جد

تشوف كمان لوحة ل بيكاسو أو سلفادور دالي
تعاين كدااااا وفجأة تضوق ليك طعم قهوة خفيفة وتشم ريحة ال -دوا قهوة- طاقه

ويتحول الشوف لى ضواقه
وغالبا كمان يمكن تتمطق هههههه
هو أساسا الإسبان ديل أصلهم ناس ما عاديين وطعمهم ونكهتهم حاجه مختلفة عن باقي البشر فى هذا الكوكب العجيب
ابدا من سيرفانتس مرورا ب لوركا وصولا ل خوليو ايجلاسياس و إنيستا.

تكون مغمض عيونك وانت تسمع فى أولاد حاج الماحي

صلي يا حبور للنبي المنصور
المدثري ليهو زاد حسري

اليا الفي المدثر دي لابد منها طبعا عشان يستقيم التنغيم

هنا كمان حاسة الشوف عندك مباشرة تسرق المشهد من اضنيك وتشوف قدامك حاج الماحي شخصيا وهو يمتطي جمله

يا ربي سائلك تقبلي مطلب
تدينى جملا كبيني واصهب

مدو القصير وماهو المشقلب
واصهب بشارى طايع مؤدب

صدرا مفجج في شوفتو ترغب
سرجا سنارى محكوم مذهب
والفروة مرعز اتنيها واركب
فوقو ان رفعت من حينو جلب
قلت يا سلامه اقبل وقبقب
ينسف دوايرو بيناتا يلعب
وليهو المسافه تنصر وتقرب
تسمع مشيهو رجليهو طبطب
بي زمزميتو والزاد محقب
ان ردت تاكل وان ردت تشرب
والماحي فوقو بي مدحو يطرب

ده في سمح الوصفو

ونفس إلى فى كل عبقريات حاج الماحي
حاج الماحي ساكن الكاسنجر
والبخلى الكاس تنجر فعلا ويسكرنا ب روائعه العالية

ونفس الشقلبه كمان وبهدلة الحواس بتحصل وانت تسمع في ياني وهو يعتلي قمة اولمب الآلهة فى أثينا

تسمع المزيكا لكن يتحول السمع لى طعم كسرة بملاح بامية مفروكة

ومعاها شطة خدرا

والدنيا خريف

طوالي تحس انه دمك لونه بقي اخدر

والله جد

غايتو الحواس

الله يستر بس