Post: #1
Title: ميلاد أول قصيدة في موقع (بكري) من تأليف الشيخ سيدأحمد وأبوذر أبوآمنه
Author: الشيخ سيد أحمد
Date: 07-04-2021, 08:35 PM
07:35 PM July, 04 2021 سودانيز اون لاين
الشيخ سيد أحمد-
مكتبتى
رابط مختصر
كانت عبارة عن (مجاراة) مع الشاعر ابوذر لقصيديته (أقوال القمر)
لكنه تلقف الفكرة ونظمها في ثوب قشيب.
الباب مفتوح ان كانت تحتاج الى تنقيح او زياده في ابياتها.
كسرة: خواض تعبت معاي تاني:)
|
Post: #2
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-04-2021, 08:38 PM
Parent: #1
قصيدة كان الفراق
لصاحبيها
الشيخ سيد احمد وابو ذر ابو أمنة
****************************
كان الفراق
حينما ازفت سويعات الرحيل
ونأيت يا ربيع العمر
وما استبقيت لي
غير آهات العويل
وكان العناق
حين تفتحت ازهار لقيانا
واخضرت الخطوات
فوق درب عشقنا الجميل
فلتمنحينا من صنوف الحب
أوتارآ لإغنية الفصول
أم تراك عقدت الصد والهجران
مثل عناد فرحنا العجول
من لي سواك
اذا رحلت طيوفك عن عوالم مهجتي
فالشوق يغمرني
والحب يكفيني
من غيث حسنك الهطول
ألتفت إليك لتعود انفاسي
محملة بذلك العبق الشفيف
من لي سواك
وحولي هذه البراحات البخيلة
يا سر أسراري ويا منبع النزيف
انا الان في مدائن وحشتي
امضي فيأسرني الضياع
عودي إلي
فما لي من دون عينيك دنيا
ولا لي في مناهج الدنيا متاع
عودي فلا يزال بخاطري همس
يبحث عن ضفاف لقيانا
عودي
فما للروح دونك مسكن
وكل ما في القلب يسكنه الضياع
|
Post: #3
Title: Re: ميلاد أول قصيدة في موقع (بكري) من تأليف الش
Author: Ahmed Yassin
Date: 07-04-2021, 09:27 PM
Parent: #2
لصاحبيها !!؟
لصاحبيها ؟؟؟؟
بقالة هي ولا ورشة تبريد وتكييف ؟
ياخي .. تأليف .. او ألفها ..او قام بتأليفها .
وبدون الشاعران.
لكن لصاحبيها دي اول مرة في تاريخي اسمعها
|
Post: #4
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-04-2021, 09:52 PM
Parent: #3
حياك الله موسيقارنا أحمد ياسين
| Quote: لكن لصاحبيها دي اول مرة في تاريخي اسمعها |
بالغت يا أحمد- ما شفت أغنية محمد الأمين(جيناكم يا حبايبنا)- بدأ مطلعها محمد الأمين وأكملها
(إسحاق الحلنقي).
اذا كان هذا حال العباقرة والفنانين بما فيهم (أبوذر) فما بالك بالعبد لله (قارض الشعر الجديد :)
أقرأ المقتبس التحت ده يا أحمدنا الذي ورد في صدر البوست:
Quote: كانت عبارة عن (مجاراة) مع الشاعر ابوذر لقصيدته (أقوال القمر)
لكنه تلقف الفكرة ونظمها في ثوب قشيب. |
كسرة: أحمد يا موسيقارنا- منتظرك تعمل لحن لهذه القصيدة ثنائية التأليف.
تعبتو معاي:)
|
Post: #5
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-04-2021, 09:55 PM
Parent: #4
واحد يصحي حبيبنا بكري اب صلعه:)
البوست ده مفروض يكون مشعلق فوق:)
|
Post: #6
Title: Re: ميلاد أول قصيدة في موقع (بكري) من تأليف الش
Author: Ahmed Yassin
Date: 07-04-2021, 10:14 PM
Parent: #5
استاذنا الشيخ
كتير الحلنقي بيكمل مطلع اي قصيدة وتقمص محمد الامين في "وعد النوار"
انا منبهر ومستمتع بالفكرة والقصيدة المشتركة بينك واباذر
وهي تعتبر مفاجاة ومكتملة من ناحية النظم والجرس الموسيقي
لكن انا بس ملاحظتي على ( لصاحبيها ) دي
|
Post: #7
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-04-2021, 10:39 PM
Parent: #6
الحقيقة يا احمدنا أن أبوذر تلقف الفكرة
وصاغ الكلمات بروحه الشاعرية.
(عضم) القصيدة كان عبارة عن مجاراة
وهكذا تطورت الفكرة الى ان صارت بهذا الشكل.
رأيك يعتبر أول رأي نقدي للنص المشترك.
كسرة: يا أحمد النص نحاول ان نضعه على عتبة التلحين إن أمكن:)
واحد يصحي (ترهاقا)- قلت ليكم تعبتو معاي :)
|
Post: #8
Title: Re: ميلاد أول قصيدة في موقع (بكري) من تأليف الش
Author: Ahmed Yassin
Date: 07-05-2021, 00:04 AM
Parent: #7
ممكن تتلحن بايقاع "الفالس" الغنوا بيهو ناس احمد المصطفى وحسن عطية
ودا ايقاع ثلاثة ازمنة ..ضرب( 3/4) وفيهو شبه بسيط من المردوم.
النص موجود واللحن والتوزيع حيخلص.. مين المطرب؟
او مين حيأدي الاغنية؟ نشوف صاحبنا وحبيبنا وزميلنا الفنان الجميل حمزة سليمان العوض
|
Post: #10
Title: Re: ميلاد أول قصيدة في موقع (بكري) من تأليف الش
Author: أبوذر بابكر
Date: 07-05-2021, 04:47 AM
Parent: #3
ازيك يا موسيقار
تعرف يا ابو حميد
الموضوع كله كان عبارة عن دعابة
الشيخ كان بكاوي ويشاغل في الجماعة ناس أسامة الخواض
وقال ليهم انا شاعر
كتب لي كلام قال انه مجاراة
كلام الشيخ طبعا كان شوية خلل في الميزان والايداع الداخلي
انا شلت كلامه وعملت ليه سمكرة
هههههههه
نجر ساي وصناعة والله
والله ما اخدت اكتر من عشرة دقائق
هههههههه
بقينا زي الحلنقي آخر أيامه
ممكن ينجر ويصنع ليك قصيدة خلال دقائق
انا القلت قصة "لصاحبيها" دي
قلت ليك الموضوع كان عبارة عن طرافة
المهم حبيبنا الشيخ مشروع شاعر
الشوايقة ديل يا ابو حميد اي زول فيهم شاعر بالفطرة
زى ناس الجزيرة اي زول ممكن عادي يغني ويطربك ويعمل ليك حفلة
|
Post: #9
Title: Re: ميلاد أول قصيدة في موقع (بكري) من تأليف الش
Author: أبوذر بابكر
Date: 07-05-2021, 04:38 AM
Parent: #1
هههههههههه
نفذت التهديد يعني يا الشيخ
اصلك ما تسكت ليهم
|
Post: #11
Title: Re: ميلاد أول قصيدة في موقع (بكري) من تأليف الش
Author: زهير عثمان حمد
Date: 07-05-2021, 06:33 AM
Parent: #9
الاخوة الشيخ وأباذر
الاكرام الاعزاء متعكما بالعافية
عمل جدير بالاهتمام وعليه ممكن أن يكون بداية لديوان شعر كامل مشترك بينكم
بالتوفيق أخواني
|
Post: #12
Title: Re: ميلاد أول قصيدة في موقع (بكري) من تأليف الش
Author: Ahmed Yassin
Date: 07-05-2021, 07:52 AM
Parent: #11
الشيخ وابوذر وشركاهما
احلى الاشياء بتكون بدايتها صدفة او طرفة او هظار
ابوذر معروف وبنعرفه من زمان ..لكن المفاجأة في شيخو دا
قلنا الشوايقة حنينيين لكن ناس الشعبية ديل ما عندهم شعراء كتير
طلع منهم الكابلي .اذا افترضتا انه من الشعبية.
اصلا الشيخ من يوم ما قال لاسامة: كلام عثمان م.صالح دا ماشعر
ووين القافية والوزن والموسيقى عرفت انه اب رويس دا ما هين
|
Post: #13
Title: Re: ميلاد أول قصيدة في موقع (بكري) من تأليف الش
Author: أبوذر بابكر
Date: 07-05-2021, 08:02 AM
Parent: #12
دي قصيدة الشيخ
اتفاهمو فيها براكم
انا غايتو سويت العلي
هههههههه
**********************
يا ملتقانا في سويعات الرحيل
ويا ربيع العمر حين تأتلق البشارة بالمجئ
إمنحينا من صنوف الحب
أوتارآ لإغنية الفصول
أم تراك قد عقدت الصد والهجران
يا بوح الحروف.
من لي اذا رحلت طيوفك في معالم لوعتي
فالشوق يغمرني وانت بجانبي
ألتفت إليك لتعود انفاسي محملة بذلك العبق الشفيف
من لي وحولي هذي البراحات المديدة
يا سر أسراري ويا نوح اليراع
انا في مدائن وحشتي امضي فيأسرني الضياع
عودي إلي فما لي من دوحة اخرى تماثلك الأناقة والبهاء
عودي فلا يزال بخاطري همس وكلمات واحرف حيرى
تفتش عن سطور تبتغي ذاك الرواء
|
Post: #14
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-05-2021, 12:49 PM
Parent: #13
أحيي المعجبين والنقاد :)
الحقيقة الفكرة كانت وليدة اللحظة وإتكأت على المجاراة
لكن بفهم مختلف او بفكرة مغايرة.
حسنآ فعل الشاعر الرقيق (ابوذر) بالتشذيب وإضافة إيقاع
موسيقي للكلمات وبث فيها من شاعريته روحآ وأنفاس جديدة لتخرج بهذه الصورة- وهو ما يؤكد
أن الإلتفاف حول فكرة محددة ومحاولة بسطها كعمل ليست بالصعوبة التي تضعها في
عتبة المستحيل.
لازلت أنتظر رأي حبيبنا (الخواض) الذي حاول قتل موهبتي في مهدها :).
كسرة: ننتظر آراء الأعزاء الآتيه أسماؤهم:
محمد المرتضى
ابوجهينه
دفع الله الأصيل
النذير بيرو
عبدالحميد البرنس
ابوحسين
muntsir
عمر التاج
ودالبشرى
قباني
اخلاص
حافظ بشير
كمال عباس
د.ياسر
تسنيم
ترهاقا
حيدرنا
علي عبدالوهاب
عادل امين
هؤلاء ما اسعفتني الذاكرة بذكرهم الآن.وللأسماء بقية
لا تحاولوا قتل المواهب:)
كسرة: هذه الكلمات سأحاول ترجمتها الى لحن
من خلال الموسيقار (أحمد ياسين) ومشاركة الموسيقار(ترهاقا)
حتى تكتمل أركانها من خلال أداء غنائي لأحد الفنانين.
كسرة أخيرة: وين الموصلي- واحد يصحي الزول ده يا جماعه
منتظرين رأيو وإسهامه في اللحن برضو.
ساعود.
|
Post: #15
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-05-2021, 12:56 PM
Parent: #14
حياك الله أخونا زهير
Quote:
الاخوة الشيخ وأباذر
الاكرام الاعزاء متعكما بالعافية
عمل جدير بالاهتمام وعليه ممكن أن يكون بداية لديوان شعر كامل مشترك بينكم
بالتوفيق أخواني |
شكرآ نبيلآ لك يا رجل.
لكن أظنها (طلقة واحده في الماسورة :)
إلا أن العزاء في إطلاقها هنا في موقع حبيبنا (بكري أب صلعه) وسط الأخوان والأصدقاء
وعلى الملأ - وهي صرخة في وادي حبيبنا (الخواض) الملئ بجميل العبارة وحلو الأفكار.
ترقب العمل الفني القادم ان شاء الله بعد ان ينتهي الموسيقييين من اللحن وتقدم للغناء.
كسرة: بالله يا زهير هسه كلامنا ده مش أحسن من قصائد زي (كضااابه- ومن ووب علي من ناس النظام)
|
Post: #16
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-05-2021, 01:42 PM
Parent: #15
أحمد يا حبيبنا
| Quote: الشيخ وابوذر وشركاهمااحلى الاشياء بتكون بدايتها صدفة او طرفة او هظارابوذر معروف وبنعرفه من زمان ..لكن المفاجأة في شيخو داقلنا الشوايقة حنينيين لكن ناس الشعبية ديل ما عندهم شعراء كتيرطلع منهم الكابلي .اذا افترضتا انه من الشعبية. |
ههههههه ياخي الشعبية يا أحمد طلعت كابلي من جيل العمالقة وكمان أخرجت الصديقة والجارة (نهلة) المغنية في عهد ما مع (عقد الجلاد) - تصدق يا أحمد الشعبية دي كانت سكنوملتجأ إلى الراحل (حميد) بإعتبار خاله (الحاج ود طه) يسكن ذلك الحي الجميل.
لكن من تالا الترابلة ديل كمان قصتهم بلونية مختلفه - يعني ممكن تكون قاعد بتشرب في كباية شاي وتكون حبوبتكقاعدة (تضفر) في برش في منتصف النهار والجو في سكون عجيب- تبدأ تسمع الهمهمات التي تتحول إلى ألحانمع كلام بالرغم من بساطته الا انه مموسق ومنظوم بشكل شاعري للغاية.
| Quote: اصلا الشيخ من يوم ما قال لاسامة: كلام عثمان م.صالح دا ماشعرووين القافية والوزن والموسيقى عرفت انه اب رويس دا ما هين |
هههههههههههه عثمان محمد صالح كاتب (مجتهد) يا أحمد- لكن نصه الأخير لم أجد فيه ذلك النفس الشاعري في النص- اعتقد أن تساؤلي لم يعجب البعض ولكنه رأي من محب ومتابع للشعر كلما ظللتنا غمامة الوقت ومنحتنا بعضآ من زخاتها.
كسرة: يا أحمد منتظرين جهد منك في موضوع اللحن.ح يكون أول عمل مكتمل الأركان يكتب ويلحن ومن ثم يؤدى على موقع بكري اب صلعه.
|
Post: #17
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-05-2021, 01:47 PM
Parent: #16
Quote: دي قصيدة الشيخ
اتفاهمو فيها براكم
انا غايتو سويت العلي
هههههههه |
ما قصرت با ابوذر.
كدي حاول راجع النص مرة تانية وشوف اذا محتاج لي اي تنقيح.
قلت ليك تعبو معاي الجماعه:)
|
Post: #18
Title: Re: ميلاد أول قصيدة في موقع (بكري) من تأليف الش
Author: Ahmed Yassin
Date: 07-05-2021, 02:05 PM
Parent: #17
اها.. واللحن والتوزيع حيكون مشترك مع الاساتذة الكبار الموصلي.. ترهاقا...عزيز خطاب...ناذر الخليفة
الاداء : حيكون طبعا لفنان شاب معروف ومشهور جدا ومحبوب
|
Post: #19
Title: Re: ميلاد أول قصيدة في موقع (بكري) من تأليف الش
Author: الشيخ سيد أحمد
Date: 07-05-2021, 04:03 PM
Parent: #18
Quote: اها.. واللحن والتوزيع حيكون مشترك مع الاساتذة الكبار الموصلي.. ترهاقا...عزيز خطاب...ناذر الخليفة
الاداء : حيكون طبعا لفنان شاب معروف ومشهور جدا ومحبوب |
يا سلام يا أحمدنا- كلام مشجع جدآ.
النشوف رأي النقاد بعدين:)
وين الاعزاء:
حسين احمد حسين
عارف ناشد
بدرالدين الامير
محمد المشرف
عباس محمود
اصبر ليهم يا احمد- بس العمل ده يكمل ح اغير رقم تلفوني زاتو.
تعبو معاي:)
|
|