بل وكل الوطن والمواطنين ليس من أولياتها وفي كل الأحوال هي كذلك سلطة كونتها الانتهازية والأنانية التحزب القبيح والغش وخداع الحمقى الذين حذرناهم من أول يوم للإنحراف لكن الحمق ليس له دواء
Post: #3 Title: Re: الخرطوم وسخانة ياناس تعالوا نتفاكر كيف تن Author: Nasr Date: 06-19-2021, 11:22 PM Parent: #2
وسخانة وسخ جد نكون لوبيات للخدمات الأساسية وأهمها النضافة والصحة العامة نضغط الحكومة لمزيد من الإنفاق في الصحة العامة حملات تبرعات بالمال والوقت في حملات النضافة
ما هو مصير لجنة كان قد كونها أسامة سيد أحمد وأمين النفيدي ضمن آخرين لنضافة العاصمة ؟؟
أفضل طريقة للنظافة بصورة مجدية هي عملية الفرز اليدوي لو تم فرز كل القمامة لأصناف كل خامة لوحدها ستتحول القمامة لشيء مفيد ذو عائد لأن كل نوع وصنف للقمامة حينما يكون مفروز عن غيره سيصبح ذو فائدة وخامة ذات استخدام صناعي والباقي سيكون سماد زراعي عضوي
البدوي وزير المالية ضاعف المرتبات لفئات وقطاعات خمسة أضعاف وإكثر وزاد لعامل النظافة ظعف واحد راتب موظف النظافة الشهري قد مصاريف ثلاثة يوم على الأكثر أو ما يعادل كلوا لحمة ضاني مع كيلو طماطم بعدين لماذا تبرعات؟!
لماذا والمعينين من وزراء ومعتمدنين بلديات عيونهم عشان يتبركوا بيهم!
Post: #7 Title: Re: الخرطوم وسخانة ياناس تعالوا نتفاكر كيف تن Author: Nasr Date: 06-19-2021, 11:38 PM Parent: #5
فرز الوساخة (إعادة التدوير) تجربة ناجحة في كثير من العالم ممكن نتعامل معاها النظافة دايرة قروش وبعد داك توعية صحية مكثفة دايرة شاحنات وجرارات ونوعية مختلفة من البيروقراطين البلدان النضيفة فيها عمال النضافة محترمين شديد خلونا من ضباط عهد الإنقاذ ديل جلدهم تخين شديد ومتصالحين شديد مع الوساخة
Post: #8 Title: Re: الخرطوم وسخانة ياناس تعالوا نتفاكر كيف تن Author: Asim Ali Date: 06-19-2021, 11:40 PM Parent: #5
ناس المحليه حضرو متاخرين قبل اسبوع لنظافه المجارى عشان الخريف طلعو الوسخ والتراب مكوم على طرف المجارى مش كان مفروض يكون معاهم عربيه يوضع فيها مايخرج من المجارى ام تترك لتعود مره اخرى للمجارى ؟. النظافه مشكله سلوك اجتماعى قبل مايكون مسئوليه دوله الدوله مقصره ما فى اى شك لكن المواطن ممكن يتصرف حتىلانو فى النهايه موضوع مرتبط بصحه بيئتو ومظهرو الخاص فى الحى واما المنزل
المشكلة مشكلة نخب. فتش عن النخب تجد المشكلة. السمكة تتعفن من رأسها.
وتلقاهم جوة المنتدى ده. كما خارجه. تلقى واحد همو كلو يعتل مقالات عن "الحزب الشيوعي وحالة التوهان السياسي". كأنو الحزب الشيوعي أصلا عندو زمن لرفاهية زي دي. وواحد تاني يتحدث عن "جده" كتشنر. وثالث يمجد اليونان بالغدو والآصال.
في رأيي السودان محتاج إلى مواجهات داخلية. ولا أعتقد أن المفاهمة بأخوي وأخوك ستؤدي إلى نتيجة.
Post: #10 Title: Re: الخرطوم وسخانة ياناس تعالوا نتفاكر كيف تن Author: Asim Ali Date: 06-20-2021, 00:01 AM Parent: #9
Quote: المشكلة مشكلة نخب. فتش عن النخب تجد المشكلة. السمكة تتعفن من رأسها.
النخب والمثقفاتيه ديل قاعدين فى ابراجهم العاجيه منفصلين عن واقع المجتمع والمجتمع ذاتو ماشغال بيهم مجتمع احيانا -ببساطه- تجد فيهو وعى يتجاوز اوهام النخب النخب حافظين كتب وبيسمعو فيها لكن ماقادرين يخلقو حاله توائم وملائمه مناسبه بين ثقافه الكتب والواقع الحى على الارض
Post: #11 Title: Re: الخرطوم وسخانة ياناس تعالوا نتفاكر كيف تن Author: Nasr Date: 06-20-2021, 04:55 AM Parent: #9
يا مازن
Quote: المشكلة مشكلة نخب. فتش عن النخب تجد المشكلة. السمكة تتعفن من رأسها.
وتلقاهم جوة المنتدى ده. كما خارجه. تلقى واحد همو كلو يعتل مقالات عن "الحزب الشيوعي وحالة التوهان السياسي". كأنو الحزب الشيوعي أصلا عندو زمن لرفاهية زي دي.
ركز معانا شوية الكلام هنا عن وساخة العاصمة والتفاكر لحلها كلامك دا خليه في بوستيه جاهز ليك هناك للحوار المفيد والبناء وما حنقصر في تعتيل المقالات التي تنتقد الحزب الشيوعي وأي حزب آخر يصارع في حلبة السياسة السودانية
مشكلة الخرطوم هناك من يكرهها. ضحايا الحروب والنازحين من الداخل واللاجئين والقادمين من وراء الحدود. البعض يتعامل معها كغنيمة والبعض كعدو. وطبعاً البيروقراطيين والحرامية.
Post: #13 Title: Re: الخرطوم وسخانة ياناس تعالوا نتفاكر كيف تن Author: adil amin Date: 06-20-2021, 05:16 AM Parent: #12
رجع الاقاليم والحكم الاقليمي اللامركزي باسس جديدة ومرجعية دستور 1973 وقوانين 1974 ويحكم الاقاليم ابناءها بترجع الخدمات الاساسية والضرورية في الاقاليم الخمسة %80 من الناس في الخرطوم برجعةو اقاليمهم المستقرة والمنتجة وبخلو الخرطوم دي لي ناسا الفاشلين مشكلة الخرطوم هي مشكلة الدولة المركزية البتخدم الخارج اللئيم الدمرت الاقاليم والمشاريع وجات كومت كل السودان في الخرطوم جيب السياسي النظيف بالانتخابات زي زمن الانجليز اولا بتنظف الخرطوم والاقاليم كمان بالله ثلث الشعب السوداني مكوم في الخرطوم حاصل فارغ مع ناس حمدوك والجنرالات وخالد سلك والبعثيين والشيوعيين والناصريين والكيزان والسلفيين وهلمجرا "الاقليات المشوهة "
https://top4top.io/
Post: #14 Title: Re: الخرطوم وسخانة ياناس تعالوا نتفاكر كيف تن Author: Nasr Date: 06-20-2021, 08:27 AM Parent: #13
كم مرة حكيت محادثتي مع ضابط أداري كان مسؤول عن النظافة في مدينتنا قال أن الربط اليومي من الضرائب 11 مليون جنيه قلت ليه بنصها بخلي بلدنا تلمع زي المراية قال لكن الصرف علي الخدمات ما أولوية سألته الاولوية شنو؟؟؟ قال الأمن والخدمات أها الضرائب البتشيلها الحكومة من المواطنيين كان ما أتصرفت في الخدمات الخرطوم ولا أي مدينة ما حتنضف حتي لو السودانيين بقوا عشاق نضافة عديل كدا
Post: #15 Title: Re: الخرطوم وسخانة ياناس تعالوا نتفاكر كيف تن Author: مازن سخاروف Date: 06-20-2021, 09:34 AM Parent: #14
Quote: النخب والمثقفاتيه ديل قاعدين فى ابراجهم العاجيه منفصلين عن واقع المجتمع. والمجتمع ذاتو ماشغال بيهم مجتمع احيانا -ببساطه- تجد فيهو وعى يتجاوز اوهام النخب النخب حافظين كتب وبيسمعو فيها. لكن ماقادرين يخلقو حاله توائم وملائمه مناسبه بين ثقافه الكتب والواقع الحى على الارض
سلامات عاصم, إذا هم جزء من المشكلة فلن أعترض على مجمل كلامك, والا فهو تناقض. معظم النخب كذلك -منعزلين ومنفصمين أو مناديب استعمار وهؤلاء الأشد سوءً, فمتفقين. لكن هناك شيئ من امل في نهاية النفق - من الأقلية من النخب التي تؤمن أنها جزء من الحل (بالعلم وليس بالنفخ). تقديري إنو هذه الأقلية النخبوية يجيب أن توري الأغلبية "المرض" الطفا نور منو. لأنو الأغلبية النخبوية تعمل لإدامة المصالح الإستعمارية. عقلية برجوازية طفيلية تتعامل بمنطق إنو السودان بقرة وأهل السودان (بما فيهم الأقلية النخب التي هي جزء من الحل) ماسكنها ليهم من قرونها عشان هم يحلبوا.
الحل؟ مواجهات ومن العمق بين النخب الأغلبية الذين هم جزء من المشكلة والأقلية الذين هم جزء من الحل.
Quote: ركز معانا شوية الكلام هنا عن وساخة العاصمة والتفاكر لحلها كلامك دا خليه في بوستيه جاهز ليك هناك للحوار المفيد والبناء
سلامات نصر, مع كل احترامي شايف إنو تحصيل حصال ومزيد من وقت السودان الضائع. الواحد لا يتدخل إلا في "الكضب الكبار": تزوير التاريخ, وإشانة السمعة مثلا. العاصمة في رأيي كما بقية السودان مشكلة سياسات وأولويات: وليس صدفة أن تكون البيئة السودانية مجهدة ومستنزفة للبني آدم: سواء في اتساخ الشوارع أو قبلها تلوث مياه الشرب.
Post: #16 Title: Re: الخرطوم وسخانة ياناس تعالوا نتفاكر كيف تن Author: ولياب Date: 06-20-2021, 10:35 AM Parent: #15
مع التحية نظافة العاصمة مسؤولية الجميع (المواطن + الحكومة) المسيرات الهادرة التي تخرج في مظاهرات يا ريت لو عملوها مرة واحدةوتطلع بنفس الكثافة الجماهيرية وكل واحد فيهم لو إلتقط ورقة ورقتين كيس كيسين وتكون هناك مجموعة تحمل أكياس نفايات توضع فيها الملتقط وتجمع الأكياس في مكان وتأتي دور الحكومة في توفير عربة النفايات للترحيل .* سيزيد الطين بلة مع موسم الخريف الذي على الأبواب .
Post: #17 Title: Re: الخرطوم وسخانة ياناس تعالوا نتفاكر كيف تن Author: adil amin Date: 06-20-2021, 10:54 AM Parent: #16
نظفو الخرطوم من المفنقسين الخمسة ديل اولا https://top4top.io/ جيل اكتوبر المزيف الشوه ثورة الشباب
Post: #18 Title: Re: الخرطوم وسخانة ياناس تعالوا نتفاكر كيف تن Author: علي عبدالوهاب عثمان Date: 06-20-2021, 11:20 AM Parent: #17
عمار امبس سيرناقمي .. كيف الحبيب يا الحبيب عمار نحن فقط ناس تجمعات ونسة اعتصام وتجمعات في قروب قريتنا تجمع أمام المحلية في البرقيق صيوان وفرش وشاي وقهوة ويمكن كوتشينة كمان ما نقصر مؤتمرات تخيل في دنقلا احتفال قبل فترة ( بيوم المرور العربي ) خطابات وكراسي وثيره في الصف الأول وعرض عسكري لشرطة المرور اسبوع البيئة العالمي
ناس مظاهر فقط .. تحياتي الحبيب عمار جرب مرة كده شاهد فناة الشمالية ( دنقلا ) نشرة الاخبار المسائية تستغرب من القاعات والاجتماعات والندوات الورش .. وجازولين الزراعة والسماد والدواء ... لا خبر لا حس
تحياتي الحبيب عمار ..
Post: #19 Title: Re: الخرطوم وسخانة ياناس تعالوا نتفاكر كيف تن Author: Asim Ali Date: 06-20-2021, 11:27 AM Parent: #16
الناس لو بتتذكر ايام ذروه الثوريه وحملات (حنبنيهو) كان ايام السبت ايام نظافه فى الاحياء بل وجمع تبرعات لاصلاحات اجزء من اطر(تلتوار) الشوارع الرئيسه اختفت تماما حمله حنبتيهو مع انشغال اللجان بمشكل ااخرى غاز وعيش ..الخ . وين منظمات البئع ؟ من كم يوم ظهرت منظمه دايره تجمع بلاستيك من النيل تمام حاجه كويسه لكن انتو كنتو وين وحتكونو وين المجتمع داير ثقافه حمع النفايات مفروزه ودايرين توعيه وتثقيف عن انتاج الغاز الحيوى من النفايات وثقافه تدوير النفابات غند الدوله مفقوده المشكله منظمات البيئه زى اغلب الممظمات مجرد لمه مجتمعات مخمليه بعيده عن المجتمعات المستهدفه بس مجرد ظواهر اعلاميه
Post: #20 Title: Re: الخرطوم وسخانة ياناس تعالوا نتفاكر كيف تن Author: منتصر عبد الباسط Date: 06-20-2021, 11:48 AM Parent: #15
زمان في بدايات الثمانينات من القرن الماضي حين كنا صبيان في المرحلة الابتدائية كنت أخرج من البيت في الصباح الباكر أو أقترب من الباب وأنظر للشارع في مدينتي الصغيرة فأجد عمال النظافة يكنسون في الشوارع والأزقة وهناك براميل للأوساخ في في كل ناصية وكان الذين يكنسون من ذات البلدة من مختلف مكونات السكان وبعضهم أقرباء لي بالدرجة الثانية أو الثالثة ولا يتخرجون من ممارسة المهنة واغلبهم أمييون لم يدرسوا في مدرسة أها الحصل بعد داك شنو ! جاء المجرمون الكيزان وحلولوا بخبثهم غالب المجتمع خريجو جامعات ومدارس علمتهم تلك المدارس على الكسل والأنانية وكيف يكون مجرد قطيع الواحد منهم بليد ومدعي ومضر من حيث لا يعلم وغير قادر على ممارسة العمل الجماعي معناتو المشكلة في تلك المؤسسات التعليمية لابد من مواجهته ومعرفة أدوائها وما هو دوائها وكيفية تبديله واصلاحها بمؤسسات تعليمية عملية ذات أهداف وغايات ذات فائدة
لتعزيز ثقافة النظافة ,,,, تحريك وسائل المخاطبة الجماهيرية المختلفة وعمل حملة اعلامية تعم كل الاجهزة الاعلامية المرئية والمسموعة وكذلك وسائل التواصل الاجتماعي ,,, ادخال دروس توعوية في المناهج الدراسية عن النظافة وفرضها في المدارس بمختلف مراحلها المساجد الكنائس وكل دور العبادة الخ
الحكومة قلنا تنجاهل 0لان ده ما من اولويات و مع ذلك نعمل على الضغط لسن قوانين رادعة بخصوص مخالفات النظافة والاشتراطات الصحية وجبر ضباط الصحة للقيام بدورهم الذي يتقاضوا عليه رواتب مستقطع من معائش الناس هم والضباط الاداريين
قبل فترة يا عمار انا اقترحت حل تؤجروا قلاب.. وتلموا فيه القمامة ومعاها المياه الأسنة.. وتدفقوه أما القصر المجمهورى.. هذه هى اللغة الوحيدة التى يفهمها الحكام.
Post: #26 Title: Re: الخرطوم وسخانة ياناس تعالوا نتفاكر كيف تن Author: Asim Ali Date: 06-20-2021, 10:05 PM Parent: #24
Quote:
الان ناتي لمربط الفرس واهم ما في الموضع كيف نعمل على نظافة العاصمة بأقل تكلفة ممكن وده البطلب نعالجه جميعا لانه المتوافر حاليا
بلاسف الحل كان متاح عبر لجان المقاومه (الان) مسئوليه لجان التغيير والخدمات من خلال تطوير حمله النظافه تخت اطار (حنبنيهو) لجان التغيير هى ادوات الخطاب والحشد الجماهيرى لانجاز خطوه زى دى.
لجان المقاومة كانوا راكبنها الكيزان عبر غواصاتهم مسكوها مربربة وفكوها عضم ! خلاص لا لجان مقاومة ولا خدمات ولا يحزنون الشباب قد أفسد الكيزان عقولهم عبر الوسائل على الأرض وعبر السوشل ميديا والجداد الالكتروني
Post: #28 Title: Re: الخرطوم وسخانة ياناس تعالوا نتفاكر كيف تن Author: Nasr Date: 06-21-2021, 03:43 AM Parent: #27
رواندا وعاصمتها كيقالي من أنضف مدن أفريقيا ولهم تجربة جميلة جديرة بالدراسة من قوقل
Quote: في الفترة ما بين الساعة الثامنة والحادية عشرة من يوم السبت الأخير في كل شهر، يتعين على كل أسرة رواندية أن تسهم بواحد على الأقل من أفرادها - يتراوح عمره ما بين 18 و65 عاما - ل كي يقوم بأعمال التنظيف أو التصليح أو الصيانة خارج المنزل.
وتشكل خدمة المجتمع على هذه الشاكلة، جزءا من الثقافة والتراث في رواندا، وقد أصبحت أمرا يُشجع على القيام به بشكل رسمي منذ عام 1998، وسُن قانون بشأنها قبل عشر سنوات.
Post: #29 Title: Re: الخرطوم وسخانة ياناس تعالوا نتفاكر كيف تن Author: Ali Alkanzi Date: 06-21-2021, 04:10 PM Parent: #28
اخ عمار تساؤل ممتاز لو اعقبه فعل او رد فعل
ما تمنيت في حياتي ان اكون مسئولا حكوميا ولكن في السنوات الاخيرة تمنيت لو عينت مسئول عن البيئة لاسواق العاصمة المثلثة وأنا لها لو انتدبوني ولا اريد لا راتب ولا سيارة ولا مخصصات ولكن مكتب اعمل من خلاله وسانظف الاسواق في بحر شهر لثلاثة اشهر وانا لها ان داعني والي الخرطوم لذلك يمكن مراسلتي بالواتساب عبر الهاتف 0912242448
بداية ,, الخرطوم من اجمل المدن العربية والافريقية تخطيطا ,,, لتبدء حملة تنظيف فعالة ,,, لا تكلف الدولة شيئا الخرطوم مقسم ما بين الاستثماري والدرجة الاولى والثانية والثالثة والاشلاقات الحكومية ثم تخبطيط القرى والعشوائيات لفنبدء من الاستثماري والدرجة الاولى ,, البنقسم ايضا للخرطوم القديمة (الخرطوم شرق , شارع الحرية , الخرطوم غرب , الخرطوم اثنين حي المطار , العمارات) الخرطوم الجديدة (النزهة, المجاهدين , جبرة الاستثمار , جنوب المدرعات, غزة , الطائف , المعمورة , الخ) الطابع العام ان اغلب هذه المناطق هي للطبقة الثرية والاستثمار العقاري ,,,, بعنى هنا العمل الطوعي بكون دور ثانوي وغير ناجح في المجهود اليدوي , لذا الدور هنا بكون للمساهمات الالزامية للملاك والسكان ,,, اها المناطق هذه ,, اولاً اقناعهم بان نظافة البيئة المستدامة تعنى لهم ارتفاع قمية عقاراتهم , ثم تقليل تكلفة الصيانة الدورية (يعنى ممكن ما تحتاج لطلاء لاكثر من 5 اعوام غير حماية الاثاثات من الغبار واشكالياته الصحية او التدميرية بالنسبة للاثاثات ,,, اذا تم الاقتناع بهذا ,,, يمكن الزام صاحب كل عقارات بازالة مخالفات المباني والصيانة المتراكمة حول عقاره , وسداد قيمة رصف محيط عقاره مع جواره فكل صاحب عقار اذا الزم بعمل انتر لوك قافل مع جاره (هذا العمل سيشكل اضافة لقيمة العقار اقتصاديا ) طبعا سيكون من واجب المحلية توفير مهندس مساحة لعمل خريطة كنتورية للاحياء لتفادي الانسياب ومجاري تصريف المياه , الخ) مع هذه المرحلة ايضا يتم ازالة التعديات على الشارع العام , وايضا الالزام بازالة التشجير العشوائي امام المنزل , وهنا يمكن الاستعان بخبراء الارشاد الزراعي في نوعية الاشجار المسموح بزراعتها داخل وخارج المنازل مراعين فيها الاشتراطات الصحية والبيئية (لاحظ تجربة زراعة شجرة المؤتمر الوطني ودقن الباشا و ما سببته من اضرار) بل من الممكن الالزام بزرع اشجار فاكه (اصلا انت ساقيها موية وحترعاها) بعد الانتهاء من هذا العمل يكون لزاما على كل منطقة ان تعين مراقب نظافة يملك موتر للحركة ومراقبة الشوارع يوميا مع غرامات رادعة (سناتي لراتبه ومخصصاته) طبعا الاليات الكبيرة (عربات النفايات الضحمة مكلفة غير مشاكل الصيانة) , هنا ممكن يتم الاستعاضة بدلا عنها (بالتكتوك او حتى كارو الحمار) ,, فكل مربع او كم شارع يكون لها (تكتوك خاص بها) سواء شرائه بواسطة لجان الحي او استئجاره او التعاقد مع جهة توفر هذه الخدمة , لجمع النفايات يوميا من البيوت والمحلات , هنا ناس الصحة او من خلال التجربة اليومية ممكن الوصول لافضل واسهل الطرق لكيفية تجميع النفايات من البيوت يوميا ووضعها في اكياس ,,,) التكتك ياخذ المخلفات الى نقطة معينة في الحي يراعى فيها البعد من التجمع السكاني حيث تنتظرها عربات كبيرة لحمل النفايات (للمحرقة او كوشة الجبل) هذه الطريقة حتسهل ايضا في عملية فرز النفايات في التكتك وتسليم للىليات الكبيرة مفروزفة جهاز وده بكون استثمار (اذا تم تحريكه بصورة جيدة ممكن يكون تجميع النفايات مجانا مقابل فائدة هذه المخلفات ,,,
الشوارع التجارية في الاحياء الاستثمارية والدرحة الاولى ,, الزام كل صاحب محل او عمارة على الشارع ,, بنظافة الشارع يوميا (حتى ممكن غسله امام المحل) مع مراعاة المظهر العام من اللوحة الى اخر وازالة التعديات (ما ممكن يكون فاتح مغلق ومردم الرمله في الشارع والسيخ والطوب واكياس النايلون متجمع حولة وعامل لي مزيرة موية بها طحالب ,,,, غرامات رادعة ومراقبة يوميا // من المراقب القلنا يدو موتر ودفتر ايصالات اها من الغرامات دي بطلع لي راتب وقيمة موتر وقود وحوافز كمان (يعنى روتين الحكومة وضعف الرواتب دي تكون اتحلت)
Post: #33 Title: Re: الخرطوم وسخانة ياناس تعالوا نتفاكر كيف تن Author: Motawakil Ali Date: 06-23-2021, 02:20 PM Parent: #32
تحياتي أخي عمار
نظىافة البلدان من نظافة الإنسان
Post: #34 Title: Re: الخرطوم وسخانة ياناس تعالوا نتفاكر كيف تن Author: Ali Alkanzi Date: 06-23-2021, 02:50 PM Parent: #33
اخ عمار كلامك دا هو الفي بالي يساهم كل صاحب محل في نظافة الشارع المؤدي لمتجره كل الاسواق باختلاف انشطتها وانت تقول:
Quote: لشوارع التجارية في الاحياء الاستثمارية والدرحة الاولى ,, الزام كل صاحب محل او عمارة على الشارع ,, بنظافة الشارع يوميا (حتى ممكن غسله امام المحل) مع مراعاة المظهر العام من اللوحة الى اخر وازالة التعديات (ما ممكن يكون فاتح مغلق ومردم الرمله في الشارع والسيخ والطوب واكياس النايلون متجمع حولة وعامل لي مزيرة موية بها طحالب ,,,, غرامات رادعة ومراقبة يوميا // من المراقب القلنا يدو موتر ودفتر ايصالات اها من الغرامات دي بطلع لي راتب وقيمة موتر وقود وحوافز كمان (يعنى روتين الحكومة وضعف الرواتب دي تكون اتحلت)
