Post: #2 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:15 PM Parent: #1
سند وما أدراك ما سند. إهداء خاص إلى دفع الله الأصيل.
Post: #3 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:22 PM Parent: #2
عميد الفن- الف رحمة ونور عليك.
Post: #4 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:26 PM Parent: #3
بلابل الغناء. إهداء خاص إلى قبة
Post: #5 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:30 PM Parent: #4
الأستاذ صديق أحمد. إهداء خاص إلى :
كمال عباس- عادل أمين-معاوية محمد- أبوحسين- جلالدونا.
Post: #6 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:34 PM Parent: #5
موسيقار القلوب- محمد وردي
إهداء خاص إلى:
أحمد ياسين- ترهاقا- علي عبدالوهاب- كبر- عبدالحميد البرنس.
Post: #7 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:37 PM Parent: #6
ملك الطرب والتطريب - الجابري.
إهداء خاص إلى :
بريمة- محمد أحمد عمر- عمر التاج-حبيبنا (هيثم غالي)- محمد حيدر المشرف.
Post: #8 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 09:41 PM Parent: #7
الذري ابراهيم عوض. إهداء خاص إلى:
محمد المرتضى حامد-muntsir-حيدر قاسم- الحاج حمد الحاج- طلحة عبدالله.
Post: #9 Title: Re: كوكتيل أنغام وأشعار... Author: علي عبدالوهاب عثمان Date: 06-13-2021, 10:54 PM Parent: #8
حبيبنا الشيخ تحياتي بوست رائع جداً .. جمعت الدرر في مكان واحد ياسلام .. آخ آخ يا زمن ... ليت الشباب يعود يوماً
تحياتي يا جميل
يا ريت كمان محمد كرم الله .. عشان نحلق بعيد
Post: #10 Title: Re: كوكتيل أنغام وأشعار... Author: الشيخ سيد أحمد Date: 06-13-2021, 11:23 PM Parent: #9
حياك الله استاذنا الجليل علي عبدالوهاب.
لسه شباب يا اساذنا - عينا بارده :)
إتفضل حبيبنا الكروان محمد كرم الله.
Post: #11 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 00:04 AM Parent: #10
Post: #12 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 00:10 AM Parent: #11
Post: #13 Title: Re: كوكتيل أنغام وأشعار... Author: Ahmed Yassin Date: 06-14-2021, 01:35 AM Parent: #12
هديتك مقبولة يا الشيخ وممتعة للحد للمعلم (محمد عثمان كجراي) معلم المدارس الابتدائية عارف يا الشيخ الاغتية دي كتبها في اوائل الستينات في الجنوب وهي تقطر رومانسية".ارتعاشانك بتحكي قصة احلامك معايا" كلام زي دا ..كيف قدر وردي ان يوظف ليهو لحن عجيب ومقدمة موسيقية غير عادية والاعجب ان وردي غناها بطبقة صوت(وسيطة) وبهدوء طبقة متوسطة.. دا ذكاء ما بتوصف
Post: #14 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 01:50 AM Parent: #13
Quote: .ارتعاشانك بتحكي قصة احلامك معايا"
يا سلام يا أحمد.
اكتر حته فيها تطريب لمن يقول: كل خفقة في قلبي نغمة تحكي ليك شوقي وهواي. والأجمل لمن يكون عايز يجيب زمنو يا أحمد ويقول (آآآآه نغمة )
وردي عبارة عن حالة إبداع وجمال وروعة غريبة متفردة - ممتع للحد البعيد.
شاكر مرورك حبيبنا
Post: #15 Title: Re: كوكتيل أنغام وأشعار... Author: Ahmed Yassin Date: 06-14-2021, 03:16 AM Parent: #14
نحن الشاكرين اهداءاتك المنوعة وما تنسى انك اهديتنا( الاغنية الحسناء) الاعطانا وردي فيها شحنة هادئة من الرومانتيك والحب في عالمه السحري الشفيف ومن عبقرية وردي انه في ( مافي داعي ) في الكوبليه الاخير ختم الاغنية بايقاع راقص جميل خفيف فيهو حوار مهفهف متبادل بين الكمنجة والاكورديون عشنا فى دنيا الصبابا والسعادة فتحنا بابا بهجة الدنيا وشبابا إبتساماتك حبابا
أحمد ياسين- ترهاقا- علي عبدالوهاب- كبر- عبدالحميد البرنس.
تسمح لي يا الشيخ اعيد اهداء مافي داعي بالتسجيل حقي ده و اضيف رقبتي للمُهدى اليهم ؟
Post: #18 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 05:41 AM Parent: #17
Quote: نحن الشاكرين اهداءاتك المنوعة وما تنسى انك اهديتنا( الاغنية الحسناء) الاعطانا وردي فيها شحنة هادئة من الرومانتيك والحب في عالمه السحري الشفيف ومن عبقرية وردي انه في ( مافي داعي ) في الكوبليه الاخير ختم الاغنية بايقاع راقص جميل خفيف فيهو حوار مهفهف متبادل بين الكمنجة والاكورديون عشنا فى دنيا الصبابا والسعادة فتحنا بابا بهجة الدنيا وشبابا إبتساماتك حبابا
أحمد يا حبيبنا.
زاوية شوفك عجيبة ياخي- فتلت لينا رقبتنا ومسامعنا زاتو:)
جميل انت ياخي.
Post: #19 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 05:54 AM Parent: #18
أبوذر يا حبوب
تحيات طيبات.
Quote: تحياتي يا الشيخ
عليك الله نزل اغنية الزول المبدع النعام ادم
مقسوم لي مقدر
كلمات خضر محمود
واهديها لي براااااي
ههههههه
دي اغنية عجيبة جدا وما عادية وما اظن الناس فكرو ليها كويس
والله ممكن تالف فيها مجلد مش كتاب
حاضرين يا حبيبنا.
لكن الأغنية دي بالتحديد محتاج لي مترجم :)
بالله شفت الحتة البيقول فيها: الكرش الفدع عرجونو جرجر مابدوهو من الناس محجر.
وللناطقين بغيرها :) (الكرشه أو الكرش) نوع فاره من التمر.
ولا كمان يا ابوذر لامن قال: يقوقي دباسو فوق كروقو زمر من الطير وقف حراسو شمر. دي ما لوحة راسا عديييل يا ابوذر. طلعت زول نقااااي واضانك مشنفة للغنا السمح يا ابوذر:)
أحسنت الإختيار فعلآ.
إهداء خاص جدآ لك يا أبوذر.
Post: #20 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 06:01 AM Parent: #19
Quote: تسمح لي يا الشيخ اعيد اهداء مافي داعي بالتسجيل حقي ده و اضيف رقبتي للمُهدى اليهم ؟
مش الشيخ السيرو علي اغنية الشيخ سيرو، كلمات حبوبتنا ام برعة بت الفحل
هسي انت السيرتنا وزفيتنا
الأغنية دي يا الشيخ انا بإذن الله داير اعمل ليها دراسة وتحليل مش في المفردات والمعاني وبس، لكن في طريقة النظم نفسها وفكرة استلاف البيئة واسقاطها في التوصيف
شغل خضر محمود دا يا الشيخ شي عبقري عديل والله
ما عارف فات كيف علي ناس محجوب كرار وكدكي وطارق عباس
الناس الفارزة الشي وبحللو ويتفكرو في إبداعات منحنى النيل كلها
شكرا ياخ على الاهداء التريان ورويان
Post: #22 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 12:30 PM Parent: #21
Quote: الأغنية دي يا الشيخ انا بإذن الله داير اعمل ليها دراسة وتحليل مش في المفردات والمعاني وبس، لكن في طريقة النظم نفسها وفكرة استلاف البيئة واسقاطها في التوصيف
يا ريت يا ابوذر تلقى الوقت وتكتب لنا عنها بي فهمك الجميل ده.
Quote: ما عارف فات كيف علي ناس محجوب كرار وكدكي وطارق عباس
كمان نضيف لهم (الحسينابي)- انت عارف يا ابوذر مرة استضافوا الحسينابي عشان يتكلم عن المرهف (عبدالله محمد خير) - ياخي تحدث بفهم ووعي عجيب - خليك من أواصر القربى بين بعضهم رؤيته في اشعار (عبدالله محمد خير) تخليك تقرأ قصائده وتسمع لي صديق بي فهم تاني.
ديل عاملين زي النيلين، الأزرق والأبيض ويتلاقو في مقرن التفرد والابداع، ويهدو لينا النيل
الاتنين ديل هم اية الجمال البقت بين كرمة وكريمة
بدل سعاد
هههههه
Post: #24 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 01:48 PM Parent: #23
تعرف يا ابوذر من إكراميات المرهف (عبدالله محمد خير) شريان الشمال. حسب ما علمنا بأنه كان له دور كبير في حشد الدعم للطريق. كان لا هسه تلقانا انا و (هيثم غالي ) نرمي في الصاجات في قوز اب ضلوع :) رجل كان قلبو على البلد وناسها البسيطين. الله يرحمو ويحسن إليه.
أخونا وحبيبنا زميل البورد (حسين أحمد حسين) تناول سيرة (النجيفي) بطريقة أكتر من رائعة- إستخدم فيها لغة أنيقة جدآ وكانت الأفكار مرتبة ومنسقة جدآ. لكن ما نلومه على (حسين) هو قلة مشاركاته- يا ريت يجينا ويكتب لنا عن (خضر محمود).
تسلم ابوذر على فتح النفاج الجميل ده.
Post: #25 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 01:57 PM Parent: #24
الأنيق معز عمر بخيت. إهداء إلى: اسامه الخواض-ابوجهينه-حافظ بشير-بدري الياس- معروف حمدين-عباس محمود- عصام علي. هشام عبادي.
Post: #27 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 02:58 PM Parent: #26
ابوذر يا حبيب
هههههههه
Quote: معليش يا حبيبنا الشيخ
لفينا ليك مسار الاهداءات الندية
آزول أنضم ساكت:) - هو البورد في عضمو مو ياهو ونسة اخوان ولمة حبان. ما لفيت البوست ابدآ - بالعكس فتحت لنا نفاج سمح بالحيل. نحن لا هسه مافتحنا صفحة ناس (الحبيب) ولا تناولنا مناحتو المبكية- ولا غشينا (حميد) وإتوهطنا في المشرع وشربنا من قهوة (علي) - ولا عرجنا على جبل البركل وسمعنا (عاطف خيري) وغنينا مع (عبدالعظيم منصور). ياخي نفاجك ده يا ابوذر أوله جمال وأوسطه حنين وآخره فيض من الجمال.
تسلم ياخي.
Post: #28 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 06:28 PM Parent: #27
صاحب المزاج الرايق
الإهداء إلى:
إخلاص المشرف- حيدر حسن ميرغني- عارف ناشد- محمجوب عبدالله- صلاح زبير. حسن فرح- ودالبشرى- ودالباوقة.
Post: #29 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 06:34 PM Parent: #28
لو سمحت كمان اهدي لينا اغنية بكرة تتعلم من الايام للقامة الفنان محمد الامين او اذا ما لقيت البلابل : الشاغلين فؤداي تايهين فايقين ...
Post: #34 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 10:05 PM Parent: #33
Quote: ليه..تهدي عمر التاج مرتين؟ وكمان الجابري وعثمان حسين؟؟!!
ههههههه عمر التاج (مرزق) ياخي. حتى في الغنا طلع مرزوق :)
نعيد الصياغة لتشملك في كل هذه الإهداءات يا حبيبنا أحمد ياسين.
Post: #35 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 10:25 PM Parent: #34
ترهاقا يا حبيب
Quote: شكرا حبيبنا الشيخ وإختيار موفق من بيت الكلاوي
ممتن لقبولك الإهداء وسعدت انها أعجبتك.
انت عارف يا ترهاقا- انا احيانآ بكون مركز مع الموسيقى الخلفية- انا ما عارف انتو بتسموها شنو ناس المزيكة- لكن في حاجات كده بتكون خلف اللحن الأساسي لا هي (لزمة ) ولا هي (صولو -صولة). أديك مثل- محمد الأمين عندو أغنية (وحياة إبتسامتك)- (تسجيل قديم ) مطلع الاغنية بعدما يكملو الجملة الاساسية حاول ركزو هنا يا ترهاقا انت واحمد ياسين ..بتلقى (الفاتح حسين) عامل شغل اقل ما يوصف انو رائع. أنا ماعارف انهم متفقين عليها ولا أحيانا بيكون في إرتجال وإحساس فقط من العازف.
Post: #36 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 10:40 PM Parent: #35
حياك الله علاء
Quote: الشيخ سيداحمد ياخ الف شكراً ليك على اهداءاتك المنوعة والتى ظهر من خلالها انك صاحب ذائقة فنية عالية ويكفيك دليلاً هذا الاهداء الرائع للمبدع صديق احمد .
الشكر ليكم انتو يا علاء وعلى دعواتكم لإبني (مؤيد) في فترة الحادث. ممتن جدآ إنو عجبك الاستاذ صديق. طبعآ يا علاء ناسنا القداااام قاعدين يختو (صديق أحمد) في الترتيب الثالث ما تسألني من الأول والتاني منو :) لكن فعلآ صديق أحمد وعبدالله محمد خير نقلو الإغنية الشايقية إلى مرحلة متطورة جدآ. وبمناسبة الطنبور يا علاء أهدي ليك صاحب الصوت الملائكي (محمد جبارة) أغنية في شكل لوحة مكتملة الألوان.
Post: #37 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 10:48 PM Parent: #36
Quote: لو سمحت كمان اهدي لينا اغنية بكرة تتعلم من الايام للقامة الفنان محمد الامين او اذا ما لقيت البلابل : الشاغلين فؤداي تايهين فايقين ...
نسمح ونص وخمسة -
ودالأمين -بتتعلم من الأيام (مع بكاء ودالأمين) : أداء مؤثر جدآ.
البلابل (الشاغلين فؤادي)
Post: #38 Title: Re: كوكتيل أنغام وأشعار... Author: الشيخ سيد أحمد Date: 06-14-2021, 11:00 PM Parent: #37
Quote: في حاجات كده بتكون خلف اللحن الأساسي لا هي (لزمة ) ولا هي (صولو -صولة).
لو الاغنية موزعة العازف بيكون محكوم بالنوتة الموزعة لا يقدر يمشي يمين ولا شمال أما في معظم الاغاني السوانية واللي 80% منها ما موزعة فالخلفيات الموسيقية كلها من إبداعات العازفين وفي بعض الاحيان بيكون شيء متفق عليه من خلال البروفات وبالمناسبة في أغاني كتيرة بيصلحوها ويعدلوها العازفين يعني نظام سمكرة والشكر يمشي لي حماد
Post: #40 Title: Re: كوكتيل أنغام وأشعار... Author: Ahmed Yassin Date: 06-15-2021, 08:03 AM Parent: #39
في السودان نفتقر الى ( التنويت ) والى التوزيع البلزم عازف ..ومحمد الامين اكثر واحد من حيث الدقة والالتزام في الاداء الموسيقي؟ العازفين عندنا بطبقوا نظام العزف السماعى وبسموهو نظام(الجقلره). بعدين حنجي نتكلم شوية عن "اﻹرتجال"(improvisation) ودا زاتو فن ...زي محمد الامين ارتجل الدوبيت في( زورق الالحان )
Post: #41 Title: Re: كوكتيل أنغام وأشعار... Author: الشيخ سيد أحمد Date: 06-15-2021, 02:11 PM Parent: #40
Quote: لو الاغنية موزعة العازف بيكون محكوم بالنوتة الموزعة لا يقدر يمشي يمين ولا شمال أما في معظم الاغاني السوانية واللي 80% منها ما موزعة فالخلفيات الموسيقية كلها من إبداعات العازفين
معناها افضل تكون مافي نوته -عشان يكون في ارتجال وابداع :) يعني ناس المرحوم (محمدية) و دخلاتو العجيبة دي كلها كانت إرتجال وقدرة ذاتية. ياخي معناها ناسنا روعتهم فطرية.
Post: #42 Title: Re: كوكتيل أنغام وأشعار... Author: الشيخ سيد أحمد Date: 06-15-2021, 02:15 PM Parent: #41
Quote: في السودان نفتقر الى ( التنويت ) والى التوزيع البلزم عازف ..ومحمد الامين اكثر واحد من حيث الدقة والالتزام في الاداء الموسيقي؟ العازفين عندنا بطبقوا نظام العزف السماعى وبسموهو نظام(الجقلره). بعدين حنجي نتكلم شوية عن "اﻹرتجال"(improvisation) ودا زاتو فن ...زي محمد الامين ارتجل الدوبيت في( زورق الالحان )
ايوه بالله يا أحمد. مرة مرة كده ادونا لقطة ثثقيفية كده عشان اقبض الجو على قبة:)