Post: #1
Title: من أجل تنمية القطاع الزراعي والحيواني لابد من تدريب العمالة
Author: بدرالدين بابكر مصطفى
Date: 06-03-2021, 07:37 AM
07:37 AM June, 03 2021 سودانيز اون لاين
بدرالدين بابكر مصطفى-مكة المكرمة
مكتبتى
رابط مختصر
أي مجال في السودان يحتاج لي تدريب العمالة وبصورة عاجلة جداً، أما في مجال الإنتاج الزراعي والحيواني الأمر يحتاج وقفة وثورة عديل
أي زول في مجال الزراعة أو في مجال تربية الحيوان بغرض الألبان أو اللحوم أو أي شي آخر، يعاني معاناة كبيرة جداً مع العمالة،
وفي رأيي إن المشكلة رقم (1) التي تواجه هذا القطاع هي مشكلة العمالة..
|
Post: #2
Title: Re: من أجل تنمية القطاع الزراعي والحيواني لاب
Author: بدرالدين بابكر مصطفى
Date: 06-03-2021, 07:37 AM
Parent: #1
غالباً العامل السوداني انه غير مستقر، ممكن يجيك الليلة ويمشي بعد شهر أو شهرين، ولا يلتزم بأي اتفاق، غير أمين، بالذات في موضوع العمل،
نشيط جداً إذا انت موجود، وإذا غبت عنه لأي ظروف لا يهتم كثيراً بالعمل، وممكن يضرك أكتر مما ينفعك
الشي التاني كل ما اكتسبه من المهنة اكتسبه نتيجة ممارسته السابقة، أي لم تقم أي جهة بتدريبه أو تأهيله، وإذا واجهته أي مشكلة ح يتصرف معاها وفق تجربته السابقة وإذا لم تواجهه فقد لا يجد لها حلاً،
في بعض العمال بجي يشتغل عشان يطلع مصاريف لي حاجة معينة، عندو سماية أو مسافر الدهب أو داير يسدد دين، يعني غرضه ليس العمل وإنما داير يحل مشكلة معينة متى ما انحلت ح يخلي الشغل ويمشي.
|
Post: #3
Title: Re: من أجل تنمية القطاع الزراعي والحيواني لاب
Author: بدرالدين بابكر مصطفى
Date: 06-03-2021, 07:38 AM
Parent: #2
أتمنى أن تقوم جهة ما بتدريب متخصص لأي عامل في القطاع الزراعي والحيواني، مثلاً تدريب عامل زراعي وحتى التدريب نفسه يكون متخصص ومحدد بدقة، وتمنح للعامل بطاقة تحدد تخصصه شنو بالضبط، مثلاً: المهنة: مزارع، التخصص شنو؟ مزارع خضروات، بساتين، محاصيل، غابات .. وهكذا
أو في مجال تربية الحيوان، متخصص في شنو بالضبط: أبقار/ جمال/ خيول/ ضأن/ ماعز/ حمير والإنتاج شنو (لحوم/ألبان/ جلود)
|
Post: #4
Title: Re: من أجل تنمية القطاع الزراعي والحيواني لاب
Author: بدرالدين بابكر مصطفى
Date: 06-03-2021, 07:39 AM
Parent: #3
وأتمنى تتعمل قاعدة بيانات لكل العمالة في السودان، وبصفة خاصة العمالة في المجالين ديل لأنهم إياهم رأس حربتنا وإذا أردنا الخروج من نفقنا المظلم لابد من الاهتمام بموضوع الإنتاج الزراعي والحيواني،
في قاعدة البيانات يتم تسجيل بيانات كل العمالة في كل القطاعات، مثلاً انا عندي مزرعة أو عندي مصنع، محتاج لي عامل اخش في الموقع وألقى بيانات لآلاف العمال أشوف العامل الممكن يناسبني واقوم بالاتصال به واتفق معه،
ويصدر عقد ملزم للطرفين مباشرة من الموقع وبإشراف الجهة المعنية وأشيل عقدي وأقابل العامل ونوقع على العقد ويستلم عمله معاي،
وقاعدة البيانات دي نفسها تشمل feedback عن أي عامل، عشان اعرف منو الحرامي ومنو الكسلان ومنو الكويس ومنو الما قاعد يلتزم ويتم عمل تقييم شهري لكل عامل من خلال إفادات الناس الاشتغل معاهم..
عشان أي عامل يعرف إنه تعامله ح يأثر على معايشه..
|
|