Post: #1
Title: ميسي قعد ولابورتا رجع وكومان لازم يفوت وسواريز يرجع
Author: أبوذر بابكر
Date: 05-22-2021, 05:21 PM
05:21 PM May, 22 2021 سودانيز اون لاين
أبوذر بابكر-
مكتبتى
رابط مختصر
اخيرا اخيرا
ذهب الوجل وابتلت الأرواح
ليونيل ميسي
أجمل واحرف واعرف واعزف واسحر وابدع من لعب الكورة
من نزول ادم ل نجيلة الارض والي اخر نفخة في صافرة من الصور
اسحر دي من ساحر يعني
هههههههه
لا يضاهيه في هذه الاسحرة الا ولدنا داك
المدعو رونالدينهو قدس الخالق سره
وبعد عودة رئيسنا الأصلي خوان لابورتا مافي عوجة تاني تب
وهذا المدعو رونالد كومان، قشة واحدة ساي في ارضية الكامب نو ما تعتر ليهو
الشغل الجاي ح يركز على رجعة سواريز
ان شاء الله بعد ما يشيل كأس الليغا الليلة مع الاتيليتوكاب
|
Post: #2
Title: Re: ميسي قعد ولابورتا رجع وكومان لازم يفوت وس�
Author: أبوذر بابكر
Date: 05-22-2021, 05:34 PM
Parent: #1
انا كنت عارف والله ومتاكد انه ميسي ما بفوت
يفوت يمش وين ويسوي شنو ومع منو ؟
برشلونة اصلا ما مجرد نادي رياضي ولا الكامب نو ده ملعب ل كرة القدم وغيرها
برشلونة معنى وروح وحياة وثقافة وفلسفة وجود وخلق وابداع
برشلونة قيمة إنسانية رفيعة في كل شي
مثال واحد بس:
في الوقت الكانت فيهو الأندية العظمي في الكوكب كله بتتسابق وتتنافس علي الفوز بعقود الإعلانات والدعاية بمئات الملايين
عشان تخت شعار شركة يانصيب ولا شوكولاتة على لبس اللاعبين وفي الملعب
برشلونة كان بخت شعار اليونسيف علي لبس اللاعبين
مش كده وبس
كان بدفع تبرع سنوي ثابت يمكن يعادل ميزانية دول والله لليونسيف
عشان يسعد ويعالج وينقذ ويحي الأطفال في كل العالم
برشلونة يوهان كرويف الاسطورة الخالدة
الخلا الدنيا وما فيها ومشى جاور في برشلونة وبقى حوار وشيخ حيران لغاية ما وصل درجة الاقطاب العلية وبقى غوث وغيث وبحر
وغيره كمان من السحرة الابرار
|
Post: #3
Title: Re: ميسي قعد ولابورتا رجع وكومان لازم يفوت وس�
Author: أبوذر بابكر
Date: 05-22-2021, 05:38 PM
Parent: #1
الزول اب وش زي "الكفر الجواني" ده
الاسمو كوومان ده
ما دايرنو يعني ما دايرنو
الكائن ده متأكد انو هولندي ؟
غالبا اهلو زماااان يكونو جو من البرتغال
ههههه
الكفر الجواني بعرفوها ناس يحي قباني ولي فوق
في العمر يعني
|
Post: #4
Title: Re: ميسي قعد ولابورتا رجع وكومان لازم يفوت وس�
Author: أبوذر بابكر
Date: 05-22-2021, 08:03 PM
Parent: #3
مبروك وبخيت عليك كاس الليغا يا سواريز
الفاز بالكأس ما اتلتيكو مدريد ولا دييغو سيميوني
بالجد الجاب الكأس لشمال العاصمة الإسبانية هو سواريز
جابها ليهم بعد ٧ سنين عجاف
من المرحلة رقم ١٤ انا راهنت وقلت انه اتلتيكو مدريد هو البطل السنة دي
لانه فيه البطل البعرف يجيب الأهداف
لا كوستا كان ممكن يحقق الشي دا ولا كورييا ولا غيرهم
سواريز وقع ليهم في جرح وفتح في برشلونة جرح
ولا عزاء ل كومان الاهبل
|
Post: #5
Title: Re: ميسي قعد ولابورتا رجع وكومان لازم يفوت وس�
Author: أبوذر بابكر
Date: 05-22-2021, 08:10 PM
Parent: #4
للناس الما عندهم اهتمام بكرة القدم العالمية
كومان المسك تدريب برشلونة هو الطرد وطفش لويس سواريز
وعاد خائبا عاضض علي الإبهام الموسم ده
عشان كده لازم وحتما يفوت ويتخارج
برشلونة ما فيه احقاد ولا أزمات نفسية شخصية
برشلونة بيت المحبة والابداع الانساني
ويا حليلك يا فرانك كيغارد ويا حليلك يا غوارديولا
|
Post: #6
Title: Re: ميسي قعد ولابورتا رجع وكومان لازم يفوت وس�
Author: ABUHUSSEIN
Date: 05-22-2021, 11:29 PM
Parent: #5
Quote: الزول اب وش زي "الكفر الجواني" ده
الاسمو كوومان ده
ما دايرنو يعني ما دايرنو
الكائن ده متأكد انو هولندي ؟
غالبا اهلو زماااان يكونو جو من البرتغال
ههههه
الكفر الجواني بعرفوها ناس يحي قباني ولي فوق
في العمر يعني |
اخونا ابوذر سلام
صدقت و الله في وصف البليد دا ياهو الكفر الجواني زاااااتو
و اثبت بلادتو من اول يوم جانا
سواريز رأس الحربا الوحيد اتخلص منو و لغاية الآن برشلونة بلعب بدون راس حربا
برشلونة ليه حوالي ١٠ سنوات مشكلتو الدفاع ما عمل فيه اي حاجة حتى خطتو بلعب بي ٣ في الدفاع ..... !!!!!!!!!
فريق يحرز في ٣٨ مباراة ٨٥ هدف بمعدل حوالي ٢.٢٥ هدف في كل مباراة
و تدخل مرماه ٣٨ هدف بمعدل هدف في كل مبارة ... ؟؟؟؟؟؟
مدرب فاااااااااااشل و هو سبب كل هزائم برشلونة ...
تحياتي
|
Post: #7
Title: Re: ميسي قعد ولابورتا رجع وكومان لازم يفوت وس�
Author: أبوذر بابكر
Date: 05-23-2021, 07:13 AM
Parent: #6
عليكم السلام يا أبا حسين
كومان ده بنفع مدافع بس زي ما كان زمان
ويخلوه للضربات الثابتة القوية
لكن ما عنده اي عقلية تدريبية ولا مرونة ولا فهم للاعبين
حتي وهو مدافع ما قدر يعرف مواطن الضعف في الفريق
وزي ما انت قلت مشكلة برشلونة كانت في الدفاع
من ما فات بويول وقبله فان بروكهورست والمكسيكي رفائيل ماركيز
لكن ما حيستمر اكيد
|
|