العدل تتجه لتقديم مقترح لإلغاء تحفظات الحكومة على مواد تخالف شريعة الإسلام بـ(سيداو)

09:57 PM May, 18 2021

سودانيز اون لاين
عمر التاج-KHT
مكتبتى
رابط مختصر

الخرطوم: الرآية نيوز
كشفت مصادر وفق (الجريدة) أن وزارة العدل ستتقدم بمقترح لالغاء تحفظات الحكومة على 3 مواد في اتفاقية (سيداو) في اجتماع المجلسين.
وكان عدد من الوزراء اعترضوا على المادة 2 باتفاقية سيداو، وذكرت المصادر أن وزير العدل يرى أن التحفظات تتعارض مع الحقوق.
وكان مجمع الفقه الإسلامي بالسودان، قد أعلن في بيان له الاسبوع الماضي : “الحكم الشرعي عدم جواز التوقيع أو المُصادقة على اتفاقية سيداو، ولو مع التحفظ”.

شيء عجيب!
ما أصلو لو عملوا كدا فعلا
فهل هم يعون شنو مساواة المرأة بالرجل؟؟
التي تتضمن المساواة الاقتصادية
كالميراث وهنا تعارض مع الدين في شأن
أسرى وتعدى صارخ
وكذلك ضياع حق المرأة في نفقة الزوج عليها
وعلى عيالها
وكذلك في مسألة الزواج ووجوب موافقة الولي
وحضوره عند زواج الفتاة بخلاف الرجل
وأمور أخري
وطبعا الكيزان من مصلحتهم أن يتولي اليسار
وزارة العدل ليحقق اليسار للكيزان كل أمانيهم
من إستفزازات وهبالات لا يحسنها أحد كما يحسنها
اليسار السوداني بالصورة التي تثير كل غرائز
وشهوات الكيزان

يرجعو لي دستور 1973 وقوانين 1974 ويخلو الشرمطة.....

وإنت معترض على المساواة الإقتصادية يعني عشان عاوز المراة تقعد مادة يديها لنفقة الزوج عليها.!

عموماً الناكرها بيكتب ويغرف اي كلام والسلام للفتنة وإنت بتجي تتمه بلغو متل هيك حديث..!

Quote: فهل هم يعون شنو مساواة المرأة بالرجل؟؟

اصلاً مفترض يكونو متساوين في الحقوق والواجبات

بس ما تكون من ناس ناقصة عقل ودين هههههههههه

بعدين الاتفاقية دي اصلاً ما حا تغير اي شيئ متعود عليهو المجتمع

يعني ما حا يزاككوك بالحلة عشان تطبقها تطبيق حرفي

كل الموضوع انو دي حقوق مدنية وعاااادي الحق المدني تمشي تتنازل عنو بمحض ارادتك او رضوخاً لعقيدة

فااا ما تخموا الناس ساي

مسألة الزواج ما فيها اي تغيير ياهو العقد وياها القسيمة كل المطلوب هو تسجيل الارتباط دا في السجل المدني او اياً كان من دواوين الحكومة

وحالياً المغتربين الساقو اولادهم برة البلد بعملو الحاجة دي لانو قسيمتك البديك ليها المأذون غير معتمدة

لازم تمشي تطلع قسيمة جديييدة ومختلفة من السلطة القضائية عشان تتوثق في الخارجية وبعدها سفارة البلد المقصودة

الاختلاف فقط في انو زمان الا تكون مسافر عشان تضطر تعمل كدا

حالياً بعد سيداو المسألة بقت لكل الناس مسافر او غير مسافر


اسع دا شي كعب

Quote: بعدين الاتفاقية دي اصلاً ما حا تغير اي شيئ متعود عليهو المجتمع يعني ما حا يزاككوك بالحلة عشان تطبقها تطبيق حرفي

المصادقة على الاتفاقية بيلزمك تغيير دستورك عديل كده وتخت وتنفذ بنود الاتفاقية بالقانون .. في اكثر من كدة يا هيثم؟

انت يا عمر التاج
العينك منو في البنك
المافون الزبير ام زوجته سعاد

Quote: مسألة الزواج ما فيها اي تغيير ياهو العقد وياها القسيمة كل المطلوب هو تسجيل الارتباط دا في السجل المدني او اياً كان من دواوين الحكومة

ألاخ عمر وضيوفه ، لكم التحية
سؤال محيرني ، وبموجب المساواة المطلقة كما تقول سيداو هل يحق للمرأة ان تتزوج مثنى وثلاث ورباع مع الاحتفاظ بزوجها الأول ان ارادا ذلك كا يحدث في التعدد ؟؟؟
ان كان كذلك فما رأي المؤيدين لسيداو في تعدد الأزواج ، وان لم يكن كذلك فنحن امام أمرين :
تحريم التعدد كما في الكثير من النظم الأخرى ...
التحفظ عمليا على سيداو بإباحة التعدد وتسجيل ذلك رسميا وعليه علينا تحمل تبعات ذلك من ألزامات الإتفاقية ..
السؤال ليس من باب السخرية بل شربكة ما قدرت أفكها ..
تحياتي

محمد الزبير سلامات وعوافي وكل عام وانت بخير ومشتاقين

Quote: سؤال محيرني ، وبموجب المساواة المطلقة كما تقول سيداو هل يحق للمرأة ان تتزوج مثنى وثلاث ورباع مع الاحتفاظ بزوجها الأول ان ارادا ذلك كا يحدث في التعدد ؟؟؟

الشي البعرفو او فهمتو الاتفاقية ما حددت الحاجة دي وتركتها لعادات وتقاليد وعقائد الشعوب (او كما اعتقد .. بصراحة لاني ما متذكر انها تطرقت لامر التعدد)

لكن كرأي شخصي يا ود الزبير ومعليش عارفو حا يغضبكم جداً امر التعدد دا في زمنا الراهن دا بصراحة مفروض تلقائياً يتلغي او الناس تخليهو زاتو

الزمن اختلف ودي حقيقة اكيدة يعني نحن الان ما زي ما الناس كانت قبل 100 او 200 سنة ناهيك عن 1400 سنة

بعدين في نفس السورة التم فيها تحليل التعدد مثنى وثلاث ورباع برضو ربنا قال وان خفتم الا تعدلوا فواحدة وبعدها برضو قال ولن تعدلوا وان حرصتم

اذاً الشي البفهمو من خلال الايات دي انا بعتبر انو التعدد غير مستحب على الاقل دا لو كان ما حرام قياساً بتحريم الخمر

الخمر تحريمها جاء غير مباشر : يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (90)

وتم تحريمها لانها رجس من عمل الشيطان ووصانا الله ان نجتنبه

وفي موضوع التعدد نصحنا الله ان خفنا الا نعدل فواحدة .. واكد لنا باننا لن نعدل ولو حرصنا

من كل دا كرأي شخصي في الموضوع دا انو التعدد يعرض الانسان الى الظلم وان الله لا يحب الظالمين


اقول قولي هذا واستغفر الله لي ولكم ولعمر التاج اكسزاتلي

Quote: وعوافي وكل عام وانت بخير ومشتاقين

غالي الغالي
لك التحية ، وعيدكم مبارك وانت بخير وشوقنا اكتر يا جميل

Quote: بعدين في نفس السورة التم فيها تحليل التعدد مثنى وثلاث ورباع برضو ربنا قال وان خفتم الا تعدلوا فواحدة وبعدها برضو قال ولن تعدلوا وان حرصتم

يا الغالي بيني وبينك في ناس عندهم القدرة والشجاعة والعدل في كل شيئ والحاجة الماااااسة للتعدد ، ديل يظل طريقهم مفتوح والشرع لم يغلق الباب في وجههم .
لو فهمنا الاتفاقية كما اريد لها ودون افراغها من محتواها فلا يمكن ان يحدث التعدد دون خرق الاتفاق او المساواة التاااااامة بالسماح بتعدد الأزواج ودي الحتة الانا كنت عايزك تهبشها شوية ...
ولو تأملنا الآيات دي بتقول :

Quote: (وَلَن تَسۡتَطِیعُوۤا۟ أَن تَعۡدِلُوا۟ بَیۡنَ ٱلنِّسَاۤءِ وَلَوۡ حَرَصۡتُمۡۖ فَلَا تَمِیلُوا۟ كُلَّ ٱلۡمَیۡلِ فَتَذَرُوهَا كَٱلۡمُعَلَّقَةِۚ وَإِن تُصۡلِحُوا۟ وَتَتَّقُوا۟ فَإِنَّ ٱللَّهَ كَانَ غَفُورࣰا رَّحِیمࣰا) [سورة النساء 129

Quote: (حُرِّمَتۡ عَلَیۡكُمۡ أُمَّهَـٰتُكُمۡ وَبَنَاتُكُمۡ وَأَخَوَ ٰ⁠تُكُمۡ وَعَمَّـٰتُكُمۡ وَخَـٰلَـٰتُكُمۡ وَبَنَاتُ ٱلۡأَخِ وَبَنَاتُ ٱلۡأُخۡتِ وَأُمَّهَـٰتُكُمُ ٱلَّـٰتِیۤ أَرۡضَعۡنَكُمۡ وَأَخَوَ ٰ⁠تُكُم مِّنَ ٱلرَّضَـٰعَةِ وَأُمَّهَـٰتُ نِسَاۤىِٕكُمۡ وَرَبَـٰۤىِٕبُكُمُ ٱلَّـٰتِی فِی حُجُورِكُم مِّن نِّسَاۤىِٕكُمُ ٱلَّـٰتِی دَخَلۡتُم بِهِنَّ فَإِن لَّمۡ تَكُونُوا۟ دَخَلۡتُم بِهِنَّ فَلَا جُنَاحَ عَلَیۡكُمۡ وَحَلَـٰۤىِٕلُ أَبۡنَاۤىِٕكُمُ ٱلَّذِینَ مِنۡ أَصۡلَـٰبِكُمۡ وَأَن تَجۡمَعُوا۟ بَیۡنَ ٱلۡأُخۡتَیۡنِ إِلَّا مَا قَدۡ سَلَفَۗ إِنَّ ٱللَّهَ كَانَ غَفُورࣰا رَّحِیمࣰا) [سورة النساء 23]

الآية الاولى بتقول فلا تميلوا ، والميل لا يحدث الا بين اثنين واكثر ، يعني لو واحدة نميل لي شنو ؟؟
وفي الثانية حدد تحريم الجمع بين الأختين وتحديد المحرمات مما يعني بداهة ان الجمع بين غير ما ذكر من المحرمات وغير الاخوات مباااااااااااااااااااح .
وعموما دا موضوع طويل ولكن الذي يهمنا هو ان الانفاقية تنص صراحة على تعديل القوانين الخاصة بالدول الموقعة لتتماشى مع المساواة التااااااااااااااااامة .
ودي معناها اما تحريم التعدد او اباحة تعدد الازواج ..
اي تحفظ او لولوة ومثول للواقع يعني الالتفاف حول الاتفاقية وافراغها من محتواها ، ودا الحيحصل حسب كلامك دا ...
سؤال ثاني :
هناك دول ومجتمعات تعطي المرأة العاملة أجازة وضوع وحمل وعدة وهذا حق اقره ، طيب وين حق الرجال وأين المساواة ؟؟
الأتفاقية نفسها معوجة وتقنن لعدم المساواة عندما تقنن لمثل هذه الاجازات ...
نحن نقول دعوا الغرب يطبق قناعاته ودعونا نطبق قناعاتنا ونتبادل المعرفة في المباح ونتعامل ونتعايش فيما يفيد البشرية .
اما فرض الرؤى والمعتقدات والعولمة الاجتماعية فلن تؤدي الا الى المزيد من التنافر والاستعمار الحديث ثم التمرد والصدام المتكرر ...
تحياتي

يا هيثم غالي
لك مني السلام اجزله ولكل المتداخلين
وعيد سعيد وعمر مديد في طاعة الله ان شاء الله
اراك تقول وقولك غير حق:

Quote: الخمر تحريمها جاء غير مباشر : يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (90) وتم تحريمها لانها رجس من عمل الشيطان ووصانا الله ان نجتنبه

يا اخوي الخمر حرمت عديل وليس بالتجنب
وفهم تحريمها يأتي من فهمنا لايات الله
والاجابة على قولي ربما نجدها عند الاخ عمار الشيعي
فامامهم وامامنا جعفر الصادق فسر القرآن بالقرآن وافهم الناس ان الخمر محرمة علينا
ليت الاخ عمار يتدخل
وإلا فانا لها قبل عودتي لقريتي التي لا يعمل فيها النت
لكم ودي

Quote: وإلا فانا لها قبل عودتي لقريتي التي لا يعمل فيها النت

يا كنزي عيدك مبارك
ياخي قريتك دي ين المقطوعة من الدنيا دي ، شيل معاك Internet bank
على غرار باوربانك ...
شكلك متخفي هناك وعندك دريبات
تحياتي

Quote: ويخلو الشرمطة.....

والله يا كبير لو خلي دي بسسس لكفونا شرهم وشر كفواتهم ...


هيثم يا غالي كدي اول بالتبادي وريني إنت مع سيداو أم مع الأيات القرآنيه البي تستشهد بيها ...
ومن ثم السلام عليكم والعيد يتبارك عليك ...


عمر التاج إزيييك الله يوقف جبارتك ويقوي ضراعك ...