مطر عز النزيف عيد شهيد

08:58 AM May, 16 2021

سودانيز اون لاين
حسن كجروس-USA
مكتبتى
رابط مختصر

ياغربة الزول المكتف بالظروف
يوم ودع البلد المشلهته
بين صلاتها وبين معاناة الصفوف
يا محنة البلد المجهجهة
بين رغيفها وبين ملاقاة الضيوف
يا وجعة البلد البتصرخ
من دقونها ومن مقصات الكتوف
بلدا تشيل الليل مشحتفة للنهار
والخوف يلم الضلمة يرحل للكهوف.
بلدا بتيبس ريقها في عز الخريف
برقا يخادع البذرة بي موية الرهاب
نص الهجير ما در ضرعك من عزوف.
والمطرة ما عافت مضاجعة السحاب
لكن رويحة القمحة خاصمت الجروف.
وانهد حيل الساقية فارقت الضفاف
واتمد رمل التيهة في ضهر السراب.
نشفت حبيبة الموية في العين التشوف.
يا ضيعة البلد البتصرخ
من دقونها ومن مقصات الكتوف
ما انشق زمزم لي جناها مع الهجير.
مطر الدقون ما بل لي كنداكة جوف.
كضابة يا نفس الرعود الفارغة
خداعة يا لمع الصقور الفي الكتوف.
مسكينة هي الصبرت علي وجع المخاض
لكن وجيها شبع كفوف.
ومحنانة يا بلدا مشلهتة
بين صلاتها وبين معاناة الصفوف
لي متين تلف الساقية في قيفة الرهاب.
في كل عيد شايلين شهيدنا علي الكتوف
حسن كجروس
٢٩ رمضان