أتمنى ان يلغى مؤتمر باريس

08:21 AM May, 14 2021

سودانيز اون لاين
Abureesh-أمريكا
مكتبتى
رابط مختصر

رئيس حكومة لا سلطة له فى تعببن وفدِ. مجرد تعيين وفد يمثل حكومته التى يرأسها ويختار
افراد من رجال الأعمال مستعينا بمستشاريه. حكومة بهذا الضعف لن تستطيع ادارة الأموال..
ومن الخير السودان ان يلغى هذا المؤتمر او يؤجل حتى نعرف who's the boss

مشروع تصفير العداد للانقاذ الجديده
فك حصار سياسى واقتصلدى واعفاء ديون
لكن الشعب والبلد برا القصه

السلام عليكم
المستفيد من تصفير العداد الشعب السوداني
اما ان الكيزان مستفيدين ف الكيزان ذهبوا
اياكم وخطأ فرض الحصار ف رجال الحكم
اي حكم لا يتأثرون لا بعقوبات ولا حصار


المؤتمر نفسه ملكلك وهم عاوزين سبب لابقاء
الديون ( ماكرون يريدنا ضمن النطاق الفرانكوفونية).
بعد ذهاب دبي وسيطرةً حميدتي صرنا ثمرة سهل
قطافها وتمت الناقصة ب مني اركو مناوئ.

Quote: المستفيد من تصفير العداد الشعب السوداني اما ان الكيزان مستفيدين ف الكيزان ذهبوا اياكم وخطأ فرض الحصار ف رجال الحكم اي حكم لا يتأثرون لا بعقوبات ولا حصار

سلام عليكم

Quote: لو حمدوك ما رشحوهو الكيزان وزير ماليه هل كان حيكون جزء من المشهد بعد الثوره ؟ حتى لما ظهر ما اترشح للماليه اللمعتو للناس ليه ؟ . الناس عشمانه فيهو وقالو فيهو فايده ك(رئيس وزراء) عمل شنو ؟ اقل شىء يفرمل التردى لكن التردى فى كل شىء ماشى بعجله تزايديه عدم قدره على السيطره كمسئول على الفوضى الاداريه الحاصله حتى وصلنا لوضع اشبه باللادوله واسئله كتيره كلها تشير انو خازوق كيزانى بامتياز جا يؤدى دور مرسوم ولايخرج عن النص مهما انقلبت الدنيا تحت حمايه وسيطره العسكر

“المستفيد من تصفير العداد الشعب السوداني
اما ان الكيزان مستفيدين ف الكيزان ذهبوا
اياكم وخطأ فرض الحصار ف رجال الحكم
اي حكم لا يتأثرون لا بعقوبات ولا حصا”



يمثلني
شكرا دكتورة

نسينا نعيد
عيدكم مبارك وكل سنة انتم والسودان بخير

شكراً ود الشيخ

Quote: نسينا نعيد عيدكم مبارك وكل سنة انتم والسودان بخير

يا سلاااام عليك دكتورة.. اخدتى جائزة السبق وبقيتى اخير مننا. العيد مبارك عليك وعلى كل من حولك.
والقادمة على أحسن ما تتمنون.

طبعا ما فى وجه مقارنة بين حكومة على عثمان والبشير والحكومة الحالية.. الجهل أحسن من الإجرام. لكن
النقد البناء مطلوب دائما ولا نعين الحاكم عشان يربى لينا الدكتاتور الجواهو.. وأى واحد فينا فيه دكتاتور مكبوت لو لقى فرصة يمرق..
حتى فرعون الناس اطاعوه عشان كدا تفرعن.. استفز قومه فأطاعوه.

بوست من 2017 عن عدم توقع اى اثر ايجابى لقرارات اوباما الخاصه بالحظر
السبب
فى اى عهد
القضيه مش البيتقدم ليك من امتيازات وتسهيلات اعفاء ديون او منح قروض او ...الخ
القضيه هى صلاحيه البيئه السياسيه والاقتصاديه و(التاداريه/التنفيذيه) والامنيه لاداه وتحقيق انجازات
ما لم تحسم مشاكل داخليه معوقه لمسار الانتقال - الكل يعلمها - يصبح من العسير توقع اى انجاز او تحسن


Re: رفع الحظر - هل يعنينا ؟؟Re: رفع الحظر - هل يعنينا ؟؟

Quote: رفع الجطر ....يعنينا ...عند *ذهاب الانقاذ من المشهد السياسى *ابعاد الانقاذ من الفضاءات الاقتصاديه والاجتماعيه تطهيرها من سموم الفقر والفرقه والصراعات وجميع اشكال التمييز. . . عندها يخلو لنا وجه الوطن لتبداء مسيره الاصلاح و التنميه والتقدم

هل خرجت الانقاذ بكل اذيالها اذرعها من المشهد ام ما زالت لجنتها الامنيه موجوده بقوه ؟؟

Quote: مشروع تصفير العداد للانقاذ الجديده فك حصار سياسى واقتصلدى واعفاء ديون لكن الشعب والبلد برا القصه

غايتو ده اغرب كلام اقراهو فى حياتي
اعفاء الديون مع رفع الحصار و الشطب من قائمة الارهاب
اهم تلاتة خطوات لتأسيس و بناء اقتصاد سوداني فاعل
براك شوف الفضيحة الوقعت فيها البنوك فى تعملا مع بنوك العالم
تخلّف شديد و تأخر عن الطفرة فى النظام المصرفي
حبّة تحويلات ساكت قوّمت النفس
لا حول و لا قوة الا بالله

الاستقرار السياسي ورضا الشعب عن الحكومة
وهذا يكون بتمثيلها لتطلعات قطاع واسع.
تحقيق هذا الامر يتوجب اجراء اصلاح عدلي
وقيام انتخابات بكل مستلزماتها ، او علي اقل
تقدير وجود المجلس التشريعي وجهاز رقابي
مالي ، لجنة ازالة التمكين تعتبر معضلة حقيقية
فهي تزيل بعض الغبن الا ان وجودها يلقي بشبه
في مجمل المسار العدلي.
ان تحدد فترة زمنية تنجز فيها لجنة ازالة التمكين
مهامها وتبدأ الهئيات
العدلية بعد تنظيف الجهاز من الشوائب قد توفر
هذه الاجراءات بيئة استثمار وتنمية

كتب ابوريش هادما المبعد على الجميع

Quote: رئيس حكومة لا سلطة له فى تعببن وفدِ. مجرد تعيين وفد يمثل حكومته التى يرأسها ويختار افراد من رجال الأعمال مستعينا بمستشاريه. حكومة بهذا الضعف لن تستطيع ادارة الأموال.. ومن الخير السودان ان يلغى هذا المؤتمر او يؤجل حتى نعرف who's the boss

ثم عاد و كتب

Quote: النقد البناء مطلوب دائما

هسّى وينو النقد البنّاء فى كلامك ده
الوفد ده مقسّم كيمان كوم الحكومة تم تعيينو فى كوم تانى دعوات من الحكومة الفرنسية حكومة حمدوك ما عندها دخل فيهو و ده على راسو الاصم و ألاء
فى كوم تالت بتاع رجال اعمال و اقتصاد و برضو ده شغل الحكومة الفرنسية ما السودانية
كل العملتو الحكومة جمعت الترشيحات دى فى كشف واحد و ارسلتو للسفارة
مسألة الواحد يدعك عينو من النوم و يلقى ليهو حاجة فى الواتس و يبنى عليها موقف
و يجى يهرينا بيهو هنا لا وصف له الا السذاجة او الغرض السيئ
قال بنّاء قال

الغرابه فى شنو ؟
من المداخله التانيه نعيد الكلام
الخطوات التلاته مافى اى فايده ليهم فى بيئه سياسيه واقتصاديه واداريه وامنيه غير صالحه ومهياه
تريتيب البيت الداخلى اهم
لو تم اعفاء الديون زختو مال قارون برضو فى مشاكل داخليه ما اتحسمت اقلاها الفساد

تاااااااانى

Quote: الخطوات التلاته مافى اى فايده ليهم فى بيئه سياسيه واقتصاديه واداريه وامنيه غير صالحه ومهياه تريتيب البيت الداخلى اهم لو تم اعفاء الديون زختو مال قارون برضو فى مشاكل داخليه ما اتحسمت اقلاها الفساد

الكلام هنا عن اقتصاد بلد واقع فى حفرة
و المؤتمر ده جا بعد اهم انجازين فى تاريخ السودان منذ عهد الدولة الكوشية
و هما رفع الحصار و العقوبات و الشطب من قائمة الارهاب
مسألة انك تربطا بى بيئة داخلية و تصفا بى انها غير صالحة ما مجدية مع اختلافي الشديد معاك فى هذا التوصيف
يعنى خلاص عشان البيئة غير صالحة نقعد نرّبع ايدينا ولّ الفهم شنو
لا تبخسوا الناس اشيائهم
لا حول و لا ققوة الا بالله

لا ما نربع يدينا
وهنا دور الحكومه
المره الفاتت فى موضوع احداث 29 رمضان مكرر قلت عينك فى الفيل تطعن فى ضلو حمدوك مالو ..نقصد برهان عديل
طيب المره دى لما انا قلت البيئه الداخليه ماتم اصلاحها دى مسئوليه حمدوك كرئيس وزراء ومروض يتوجه نقد لحمدوك وحكومتو عن نردى الاوضاع فيما يليه مسئوليات عشانماتقول لى دى مسئوليه فلان او علان العسكر -بكل شرائحهم جيش وشرطه- الشق الامنى مسئوليتهم وجانب عدلى مسئوليه القضاء والنيابه ومسئوليه اداره وحكم مسئوليه حمدوك
يبقى لما اتكلمت مش يبقى كلامى غريب
لكن الغريب الناس تتجاهل او تتغاضى قد ضعف الحكومه وتقصيرها طوال سنتين داخليا (والحال يغنى عن الاستفهام) واى كلام كلام ونقد يبقى مامقبل فى حق حكومه حمدوك كانها معصومه
واذا كان حمدوك دورو خارجى او اقتصادى فقط الافضل كان يكون وزير ماليه وتخطيط اقتصادى مع وزاره تانيه التعاون الدولى وممثل خاص لحكومه الانتقال خارجيا عشان يكون فى رئيس وزراء عندو جانب من اهتمامو للملفات الداخليه (الاصبحت كلها فى يد العسكر)
.
حكومه امورها جايطه وشغلها قاصر
عندك اقرب مثال اليوم فى تشاد حكومه الانتقال قدمت برنامجها للجمعيه الوطنيه (البرلمان) لاجازه برنامجها رغم انو سابقا كان فى حديث عن حل البرلمان لكن (ربما) لاعتبارات توازن سياسى بعد الاحتجات اللى تلت تشكيل المجلس العسكرى فى حكومه الانتقال هناك .
المهم

برنامج الحكومه
جشم تشريعى رقابى منفصل عن الجسم التنفيذى البيشكل مع السيادى الجسم البديل للمجهه الرقابيه على الاداء والتشريعيه
لسه مامعروف الاقتصاد فى يد منو ؟
ماممكن اقتصاد مافيا النظام البائد لسه مسيطر زمامعروف الجزء اللى ماطالتو يد لجنه ازاله التمكين قدر شنو ؟
يعنى ماحدث من تلالاته خطوات اقتصاديا لصالح فئه محدوده ونسبه ضيئله من الشعب يستفيد بالجزء الاكبر من عائد الاقتصاد مع تلقى باقى الشعب الفتات مالم يحدث اصلاح قانونى فى العلاقات صاحب العمل والعاملين (بالمعنى الواسع) ومن جهه العلاقه بين الدوله والمنتج(خاصه المزارعين) وتفعيل عمل الحهات الرقابيه
وفق القانون
الى اخره من اصلاح داخلى ما حصل فيهو شىء ايجابى طوال سنتين بل العكس

Quote: مسألة الواحد يدعك عينو من النوم و يلقى ليهو حاجة فى الواتس و يبنى عليها موقف و يجى يهرينا بيهو هنا لا وصف له الا السذاجة او الغرض السيئ قال بنّاء قال

يا جلادونا دا اسلوب ترد ليه على من يخالف الرأى؟.. انت رايك فطير وخواطر فجة ما فيها فكر.. طيب
انا اقصد اختك قدام المراية بس عشان تشوف مفارقة الموضوعية توصل وين. قول رايك بدون ما تسخف آراء محاورك.
كيف يعنى الواحد يدعك عينه من النوم.. ولو فرضنا جدلا دا صاح موش أحسن من الزول البيطلع من الحمام بآراء عبقرية جديدة؟
التزم الموضوعية تلقى الناس موضوعيين معاك.. السخف لا يحتاج الى كفاءات ولا الى ذكاء ولا الى طاقة حتى.
رأيى ان حمدوك يفتقر لممارسة السلطة التى وهبته اياها الوثيقة الدستورية.. لذاك عاوزين نعرف من هو الرئيس خلف الكواليس.
وحتى ذلك الحين يجب وقف أى ديون جديدة لأننا بذلك سنعطى فرصة الكيزان لينهبوها ويعرفون كيف ينهبون.. وسنترك 60 مليار جديد ديون للجيل القادم.
تختلف مع الرأى دا مرحبا هذا حقك.. ولكن من فضلك أبعد من الاستهزاء لانه سيعود اليك.