الكاش بقلل النقاش

00:01 AM May, 13 2021

سودانيز اون لاين
توفيق عيسى مكي-
مكتبتى
رابط مختصر

في محادثة على واتساب بيني وصديق طفولة وصبا وجار من بيت المال
أهو الواحد مرات بيشارك بعض أصحابه جذء من همه
بالهظار قلت ليه ما تدين اخوك 100 دولار للشهر الجايي
قفل الخط
احترت
حسيت كأني أخطأت بهذا الهظار
جاتني بعد ساعة رسالة منه على الواتساب
فتحتها لقيتها تحويل محترم منه
وكلام مكتوب
الصباح امشي استلم التحويل ده وما دين وما بيننا قروش
مقصرين في حقك اعفي لينا
------------------------------------------------
مقدمة لابد منها
مؤسسة الشفافية للخدمات التجارية
اتولدت بهذا المنبر وترعرعت فيه وكبرت أيضا فيه
كلمة أمكن قالها Deng من خلال مشاغلاتنا انو ده شغل احتيال وما شابه
جعلتنا نقرر مستحيل نطلب أي عون مادي في هذا المنبر
وتحملت فوق طاقتي الصرف المهول حتى أصبحت صرح كبير
الحمد لله
--------------------------------------
كنت حريص جدا المشاركة في معرض التطبيقات ولكن كيف ومصاريفه العالية جدا
في نقاش حاد مع طاقم قناتنا عييرت كيف بتقول عندك قناة وانت لا تملك مسمار صغير
من أجهزة استديو تسجيل دعك من بث مباشر واتفض الاجتماع على كده
لدينا 13 تطبيق على الأجهزة الذكية جميعها ستخلق الإنتاج خلق كلها محتاجة قروش لتظهر
أقل واحد فيها بيكلف
خلصنا واحد بالجلالة دفعت فيه ما يعادل 2000 دولار وطلع مخستك غشاني الزول اعملوا تاني
اتعاقدت مع غيره بنفس المبلغ ونزلته في قوقل بلى ووقف على كده لأنه محتاج اعلانات وشغل تسويق احترافي
وجا من الله معرض التطبيقات
--------------------------------------------
مشيت الصباح استلمت التحويل استلمت نصه دولار والنصف الثاني بالسوداني عشان ما عندهم دولار
من مكان التحويل للخرطوم دفعت رسوم الاشتراك في المعرض وايجار جناح باجهزته
ومن هناك لشارع الجمهورية وبديت شراء أجهزة الاستديو
اشتريت كاميرا كالعادة طلعت ماسورة تاني اشتريت واحدة بضعف الأولى ضعفين
وكل الأجهزة اللازمة من أجهزة إضاءة وصوت ومايكات وكمية حاجات صغيرة لازمة لأي استديو تصوير قناة
صادف مع ذلك جاني في نفس الأيام دعم صغير من اشقائي الجميعهم في المهجر
واشتركنا في المعرض وكنا نجوم المعرض بلا منازع
خلعنا الناس بعملنا وبرامجنا وبرامجنا يكفي اشتغلنا يوم الختام 4 ساعات بث مباشر
بعدة كاميرات غطينا الحدث أكثر من الشركة الكبيرة الراعية الإعلام للمعرض
وحققنا الإعلان عن التطبيق بصورة ما كانت في حساباتنا
جناحنا كان عبارة زحمة ناس كتيرة عشرة من تيمنا العامل شغالين شرح بالساعات وعلى قدر
ما نشرح الناس تزيد لدرجة بعد الاقفال في الضلام الناس عايزة تعرف أكثر
---------------------------------
يعني خلاصة الكلام بحبة كاش عملنا انفجارات
طيب لو الكاش ده كان كتير كان حصل شنو

الكيزان في القروش شطار
عرفوا أهمية شغلنا
احتونا لفترة لسبب
نكون سببوبة يأكلوا منها
مستحيل تكون ما كوز شغل زي ده ينجح
لكن صمدنا بعد مرازاة شديدة لحين ثورة 19 ديسمبر
جو القحاته وبنفس الفهم ماشين ونحن برضو صامدين
لو انت ما حرية وتغيير لازم تطير
وصامدين لسه
بس 8 سنوات من الصرف لوحدي إيجارات ومرتبات ونثريات ولوازم شغل
كترت علي والله
في نتائج سمحة حصلت من شغلنا للسودان الحمد لله
ومستمرين وما حا نقيف واكيد زي ما قلت هنا عشرات المرات
جنيه ما دايره من زول انا ود قبائل ولي الف كرامة
عشان كلمة اتقالت عرضا خلاص قفلنا الباب ده بالضبة والمفتاح
لكن حبيت أوري انه بحبة كاش قدرنا نعمل شنو
والبيسأل عن الشفافية ليه ما انتشرت بسرعة
ده السبب
عدم الكاش
لكن بقليله الحمد لله مع السنين مشينا بعيد

الزول الوحيد الكان صادق معانا في المنبر ده
هو أستاذنا خضر الطيب
حسبها معاي سودان ووطنا ولازم نجتهد ليه
حتى صار من على البعد مستشارنا وشورتنا
وسيد الحوش الما قصر داعمنا نروج لانشطتنا
عشان هو عارف الحوش ملان فكر متنوع مفيد
وكل واحد حا يجي يوموا يقدم ما يفيد بلدنا

داخلين على مرحلة حرجة جدا
كل المطلوب
ادعوا لينا نخطيها

طالما ربنا موجود مافي عوجة حا تجينا

أساسا الجهات الرسمية جادعين طوبتهم من كم سنة
ولو ما كان اعتمدنا على نفسنا ما كان مشينا خطوة واحدة لقدام
المهم ...
بعد اشتركنا في معرض التطبيقات الافتتحوا وكيل وزارة المالية
اتصلت بي دفعتي في الجامعة وبت حلتي انه وكيل المالية طلب منها تتصل
بينا ونوريه احتياجاتنا شنو والممكن يتقدم لينا شنو وحسب كلامها انه هي والوكيل
اتعينو في يوم واحد وهو زول كويس داير يخدم البلد قمت عملت ملف تعريفي عننا
وعن شغلنا ووصلنا وين وملف بيحوي برنامجنا الاقتصادي الطموح
وانا مقتنع الدولة ما بتقدم شئ إلا تكون واحد من الايدلوجية الحاكمة السودان بيكون
بره الحسابات دي الكيزان رازيناهم زمان فهمونا دي عملي وبعدنا المهم قلت عشان دفعتي
وهي ما شاء الله زولة ناشطة وكفاءة الف في المية بحكم الزمالة واقفة معانا
اها مرت شهرين لا حس لا خبر مع العلم استلم الملف بتاعنا يوم وصلتو ليهم في الوزارة قال
حا يراجعوا في البيت ويفيدنا
طبعا زي ده كتير بيمر علينا بنتخت في المواقف دي قصبا عننا وبنكون عارفين النتيجة سلفا
لكن بنقدم البيطلب مننا عشان ما ندي ثقرة يكون العيب مننا أننا قصرنا ما شرحنا وضعنا
الكيزان والقحاته واحد إلا تكون واحد منهم عشان تتقدم ليك مساعدة غير كده إلا تعمل البنعمله
وهو نعتمد على نفسنا وندفع ضريبة وطن غالية عشان بلدنا
بنقول غاليه عشان بنضحي باساسيات حياة عشان نوصل رسالتنا نحن في زمن لغته الكاش فقط
ما عندك انت حا تتبخر
اشرح أكتر مثلا الشهر الفات مصاريف شغلنا وصلت 800 الف جنيه دفعتها من مالي الخاص
عشان نقدر نستمر دفعتها وانا سعيد بقدم حاجة ليها قيمتها لوطني
شوفوا خلال 8 سنوات بنكون صرفنا كم في بداياتنا كنت بشتغل من عشرة صباحا لثلاثة صباحا
بين سوق أمدرمان وتوزيع بضائع باقي اليوم عشان أوفر الإيجارات والمرتبات وقتها كان معاي شباب
واعي وقوي تحملوا المسؤلية وفرغوني أوفر كاش عشان امول أنشطتهم وقدروا خلقوا حاجات مهمة
اليوم متسندين عليها زي بنك المعلومات والقروبات والانتشار في سماء الإعلام السوداني
فعلا الكاش بقلل النقاش

انا بحكي عن تجارب حقيقية عشان الناس البعدنا
يستفيدوا منها ووصولنا ما كان ساهل

سلام يا توفيق,

تجربة جيدة وتستحق الإشادة. وتنتزع الإعجاب.

شكلها كدة إنو في ناس منتظرنك تفلس, لا قدر الله, وحتلقى مية سمسار يقول ليك بييييييع. وساعتها حيرموها ليك في الواطة. ويخلوك تبكي بدل الدموع دما.

ما نتحدث عنه هو المافيا الإقتصادية.

في غابة الرأسمالية مشروعك ده يفترض أجعص بنك حيديك تمويل. لكن في غابة الرأسمالية السودانية, حتى قوانين الرأسمالية العادية لا تسري.

قلت كاقتراح ممكن أساعدك في الحدود: إستشارة فنية تخليك على الأقل تشتري نضيف (من برة) بدل الأجهزة البتطلع ماسورة. لكن استدركت لأنو من تجاربي, العمل على الطريقة "السودانية" متعب وليس
straightforward
على الإطلاق.

لكي لا نسيئ الفهم, البقصدو هو الشخصية الذكورية السودانية. فلو عندك إتنين شركاء, نادرا ما تلقاهم من عينة زول مستقل فعلا. تكون عاوز تعمل إجراء عادي وتلقى الزوجة مثلا دخلت على الخط.
وتلقى نفسك شغال مع نيران صديقة خلف الكواليس. ده صداع من قلب البيئة, إضافة إلى وغير المشاكل الموجودة أصلا في السوق: القوى العكسية, صعوبة الحصول على التمويل, إلخ.

فاااااا. ربنا يعينك بس.