تجربة أول زيارة لى الى دبى.. قصة قصيرة جداً مع أخوات سودانيات!

12:51 PM May, 05 2021

سودانيز اون لاين
Abureesh-أمريكا
مكتبتى
رابط مختصر

كنت نازل فى أبوظبى وناسنا هناك عزمونى غدا جماعى فى دبى.. أدونى العنوان وكان حديقة عامة نسيت اسمها.. وقبل وقت كافى تحركت بالبص، لأن المسافة بين أبوظبى ودبى
حوالى ساعتين. طرق واسعة وجميلة ونظيفة ما شاء الله، والإستراحات على جانبى الطريق فيها الكفتيريات والمطاعم.. لو الإماراتيين اجتهدوا شوية كان بقى زى طريق الخرطوم مدنى.
وصلت المحطة فى وقت كويس برضو واستقليت التاكسى.. أديت العنوان للسواق الهندى.. قراهو وقال لى.. معلوم مدير! ثم انطلق.. بعد حوالى ربع ساعة أو أكتر شوية وصلنا الحديقة..
الحديقة كبيرة وفيها ممرات معوجة وتعرجات.. والناس ما تديك الدرب.. قاعدين كيمان كيمان.. وأنا أمشى وألف أصلو ما لقيت جماعتى.. فى الاخر شفت اتنين سودانيات ماشيات
قدامى.. بس حمدت الله ومشيت بسرعة شوية لغاية ما حصلتهم.. من سرعتى فى المشى هم حسوا وقالوا الزول دا مستعجل نزح ليه. لكن ما فتهم.. وقلت ليهم الحم دو لله اللقيتكم. والله لافى
قريب من نص ساعة.. إتخلعوا خلعة شديدة قالوا الزول دا مجنون واللا شنو.. زحوا منى بعيـد زاتو.. وتانى لحقتهم ليك بسؤال قربوا يكوركو ويجروا لو ما كنت لابس جلابية وعمة.. قلت
ليهم الجماعة قاعدين وين أنا لفيت طويل خلاص لما فترت، وما لاقيتهم.. أنا محمد عثمان!! هنا بقى أطبقت عليهم الحيرة وما عرفوا يقولوا أى حاجة.. يعاينوا لبعض ويعاينولى..
بعد شوية حسيت بأن الموضوع كله غلط.. أعتذرت ليهم وإنسحبت.. طلعوا ما ناسى.. طبعا أنا جديد فى الإمارات والسودانيين برضهم مرات يعزموا أصدقاءهم وانت لا تعرفهم. المشكلة
كانت إنو السودانيين فى المدينة الواحدة فى أمريكا، خصوصا المدن الصغيرة يمشوا كلهم مع بعض للحدائق.. ما تلق فى شلة هنا وشلة هنا.. عشان كدا أول ما تشوف عمة واللا توب
من بعد ميل تعرف انو الجماعة هناك.. عكس الإمارات.. فى اليوم داك شفت مجموعات مختلفة من السودانيين وكل جماعة فى مكان مختلف.

غالبا السبب یعود للعدد. عدد السودانیین فی دبی كبیر و فی امریكا علی قلتهم موزعین فی مناطق كثیرة كما ان دبی نفسها مدینة صغیرة یسهل ان یجتمع كل سودانیوها بمكان واحد بعكس امریكا الممتدة ذات الحدائق العامة الكثیرة المنتشرة فی كل حی.

سنة كم الكلام المافيهو موبايل ده

نفس السؤال اللي فكرت فيه أنا يا جعفر
اخونا ابو الريش طائر مرتحل مواكب لتكنولوجيا الاتصالات ، معقول ما فكر في الحاجة دي

جعفـر وحيدر.. فى زول جاب سيرة الموبايل؟

المقصود يا حبيب يكون هناك تنسيق بالموبايل حتى لا تدخل في هذه الدوامة

Quote: المقصود يا حبيب يكون هناك تنسيق بالموبايل حتى لا تدخل في هذه الدوامة

كيف افترضت أنه لم يكن تنسيق؟

أنا يا حبيب كتبت إنهم أدونى العنوان.. والمجموعة دى عندى ارقام بعضها.. ما حأواصل وأخلى الباقى لذكائك الذى لا أشك فيه.. لكن سؤال عابر..
هل حصل إتصلت بمجوعة.. واحد واحد ولم يرد عليك أحد وحين التقيتهم عرفت أنهم كانوا فى حفلة أو فى كورة أو يرحبون بضيوف ويوزعون الطعام.. أو أى شئ من هذا القبيل؟
الذى يقفز للنتائج كمن يقفز الى بحيرة لا يعرف قرارها. أما الذى يفترض أشياء دون أن بذل أقل مجهود فى الإستفسار والتأكد، يكون رجل غاية الذكاء ما شاء الله خصوصا لو إفتراضه ضرب.

دكتور حيـدر، I believe you are smarter than that

سلام أبوالريش غايتو ما تزعل مني لكن البخش ليك في بوستك ويكتب شي ما يصادف هواك تزمزموا زمزمة شيخ العرب أب سن للقال الله ينعلك يا ابليس بعد طلع واحد قال ليه شيخ العرب مالو زرزرك كده قال ليه ما خابر والله زمزمني زمزمة التقول إبليس ود عمو

Quote: سلام أبوالريش غايتو ما تزعل مني لكن البخش ليك في بوستك ويكتب شي ما يصادف هواك تزمزموا زمزمة شيخ العرب

أشرح يا منتصـر.. كلامك هذا ماذا تعنى به.. ما صادف هواى كيف؟
أنا قدمت نصيحة لأخ عزيز لما رأيته يفترض أمور خاطئة ثم يبنى عليها النصائح. أنا نزلت يا دوب من التاكسى، وماشى جوة الحديقة واتصلت مرتين ومافى زول رد.. ولأن الحديقة محصورة مهما كانت كبيرة ممكن تلقى
ناسك بشوية تفتيش.. بعدين الخلانى محدد أكتر مع الدكتور هو لأنه لم يكن الوحيد.. وقبله أخ أخر قال نفس الكلام.. هنا كان لابد من الرد قبل أن يجى تالت ورابع وخامس.. وأنت تعلم حال البورد.

تعرف يا ابوالريش انا عندي استنتاج انه دراستك وتعمقك في الهندسة خلت انك زول واحد زايد واحد اتنين وأي لت ولا عجن خارج الموضوع زي بتاعنا ده برفع كثافتك 😂 تعرف أول مرة انا شفتك كان في فرجينيا كانت لو ما خانتني الذاكرة أربعينية رحيل جون قرنق وكنت عملت مداخلة وضايقوك بحجة ضيق الوكت والقصة دي ضايقتك أنا عرفتك زول جادي واي خروج عن النص يضايقك ما عارفك متذكر الموقف ده ولا لا لكن رغم كده بجي أهابشك مرات في بوستاتك 😂

الذاكرة خربة لكن مناسبات زى دى نادراً ما تتنسى.. الذى أتذكره هو انى حضرت محاضرة الشهيد جون قرنق فى Crystal City فى فرجينيا قبل سنوات كتيرة.. ممكن عام 2005 لا أدرى. ولكن لم
أقدم سؤال حينها ولكن سلمت على قرنق وكان قاعد ومعه المجموعة ناس منصور خالد.. والحرس الشخصى كان الأستاذ هاشم بدر الدين. لكن لا أذكر حضرت اربعينية قرنق.

انا بتذكر فيها الاستاذه أسماء جات داخله وكل الناس وقفت وحيتها إلا السفير السوداني وبتذكر زول قال لي ده أبوالريش معانا في سودانيز اونلاين قد أكون مخطئ

الشجعني على الدخول هنا ...منتصر
والله قال كلام حصل لي فعلا مع ابوريش
( الزول بخش بوستاتك وكتب شىء ما على هواك )
عشان اثبت ان كلام منتصر صاح..
دخلت بوست( هدي عربي ) غنت للكاشف ابريش قال انها غنت بمستوى
لا يقل عن الكاشف .انا بكل بساطة علقت وقلت يستحيل وقلت ان اصعب
اغنية سودانية بلزماتها الموسيقية هي للكاشف
تخيلوا ابوريش دا كتب شنو؟ وتعليقه ورده علي كان كيف؟
قال لي (انت جاي تستعرض معرفتك الموسيقية)
حقيقة انا اتفاجأت انه صدر منه هذا الكلام المؤلم
ودا كلام ما حقيقي خالص. بالعكس ما بحاول اكتب بى لغة موسيقية بحتة
وما حصل يوم نزلت فيديو او اوديو وقلت عمل من اعمالي ..او انا فعلت وعملت وو