اللجوء للقضاء الفرنسي لملاحقة عبد الفتاح البرهان حال قدومه لفرنسا

09:03 AM April, 30 2021

سودانيز اون لاين
Elhadi-
مكتبتى
رابط مختصر

السودانيين في فرنسا..

من أبناء دارفور ـ ضحايا الإبادة الجماعية في الإقليم

الزول ده قالوا جاي عليكم

وبرضو جريمة فض الاعتصام

أنا ما قانوني ـ

لكن في القضاء الفرنسي والأوروبي متسع لتحقيق العدالة التي عزت في السودان

جهزوا دعاويكم من أسي

وأغمروا بها ساحات المحاكم الفرنسية والأوروبية

الزول ده ملفو في مجال جرائم الحرب والجرائم ضد الإنسانية يجعل منو هدف سهل للغاية لملاحقته قانونياً وقضائياً حال عبوره البحر الأبيض المتوسط وتحليقه في المجال الجوي الأوروبي

أنا ما عارف الحكومة الفرنسية كيف حا تستطيع تكييف استقبال هذا المجرم على أراضيها

وتوفير الحماية له حال تمت ملاحقته قضائياً ووجود دعاوى ضده أمام القضاء الفرنسي والأوروبي

فهو بجرائمه المتعددة يوفر سانحة خصبة لجمعيات وناشطين حقوق الإنسان لإحراج الحكومة الفرنسية وربما حتى التراجع عن فكرة استقباله

ما تضيعوا الفرصة دي !

عبد الفتاح البرهان وعمر البشير الاتنين ما في بيناتهم فرق !

فكلاهما مجرمي حرب..

والكان بينطبق على عمر البشير ممكن ينطبق برضو على عبد الفتاح البرهان

جريمة فض الاعتصام..

احتمال نبيل أديب والحكومة السودانية يكونوا ما شايفنها جريمة ترقى لمصاف جرائم الحرب والجرائم ضد الإنسانية..

لكن لا أعتقد أن القضاء الفرنسي والأوروبي والرأي العام يمكن أن ينظر لها بنفس سبهللية القضاء السوداني والحكومة السودانية والراي العام السوداني..

وبعدين اعتراف الكباشي موجود وموثق

أما الجرائم المرتكبة في دارفور فديك أساساً قاعدة من زمان لسة ما اتقفلت لأنو البشير ما اتسلم

وواحدة من أسباب عدم تسليم البشير للمحكمة الجنائية عشان ما يورط ناس البرهان ديل

وإسرائيل ممكن توفر حماية للبرهان في ساحات السياسة

ولكن ليس في سوح المحاكم !

وليس أمام القضاء..

لأنو القضاء داك سلطة براهو ما عندو علاقة بي ماكرون شايف شنو

ما هدا ساركوزي الشهر الفات زاتو دخل السجن..

الجالية السودانية في فرنسا..

واللي كان عندها دور بارز ومهم في حراك ثورة ديسمبر من خلال تنظيم التظاهرات الحاشدة والصاخبة

مدعوة برضو لعدم تفويت سانحة قدوم المجرم عبد الفتاح البرهان لفرنسا

لتنظيم الاحتجاجات والتظاهرات ضد استقبال وشرعنة هذا المجرم والملطخة أياديه القذرة بدماء الأبرياء

عبد الفتاح البرهان استبق مؤتمر باريس بتجميد موضوع القاعدة الروسية في شرق السودان

بينما يظل ملف حالة حقوق الإنسان وتقديم الجناة للعدالة على حاله من التسويف والمماطلة..

فإذا الناس عاوزة تحرك الملف ده عليهم بمحاصرة البرهان وملاحقته قضائياً وقانونياً حيثما ذهب..

انحنا كشعب سوداني والفضل في ده طبعاً يرجع لوثيقة كورنثيا !!

إنتقلنا من رئيس مطارد (عمر البشير) لرئيس مطارد آخر هو البرهان !

وعشان تعرفوا الحقيقة دي ـ عبد الفتاح البرهان ده ليهو سنتين من ما وضعته (وثيقة كورنثيا) رئيس للبلاد لحدي أسي ما قطع البحر الأبيض المتوسط ده

سلام يا الهادي

Quote: الزول ده ملفو في مجال جرائم الحرب والجرائم ضد الإنسانية يجعل منو هدف سهل للغاية لملاحقته قانونياً وقضائياً حال عبوره البحر الأبيض المتوسط وتحليقه في المجال الجوي الأوروبي

إذا كانت هناك حاجة صلبة وثابتة في مجال جرائم الحرب والجرائم ضد الإنسانية ضد البرهان أرجو ذكرها، مع المصادر.

مفروض الناشطين القاعدين في أوروبا وفرنسا على وجه الخصوص

البدء في تحرك عملي في هذا الاتجاه..

عشان نوصل رأينا على الأقل..

أخونا الدكتور معتصم أقرع والشباب

يدكم وهمتكم

لاحظت أنك تجاهلت مداخلتي وطلبي منك يا الهادي!!!

ممكن أعرف السبب؟؟

ياسر

مرحب أخونا ياسر الشريف..

البرهان كان ضابط برتبة كبيرة في الجيش أثناء النزاع الدموي في دارفور وأشرف على عمليات تجنيد المقاتلين في صفوف المليشيات وتزويدهم بالسلاح

بالإضافة لدوره في التنسيق بين الجيش وهؤلاء المقاتلين المحليين أو المليشيات..وده كلو موجود وموثق ويعلمه العالم وتعلمه الحركات المسلحة وأهالي دارفور..

وما تنسى كمان إنو كان رئيس المجلس العسكري الذي أمر وقام بتنفيذ مجزرة فض اعتصام القيادة العامة مما أدى لمقتل وجرح العشرات بالإضافة لمئات المفقودين منذ تنفيذ المجزرة.. باعتراف المجلس العسكري نفسها عشية المجزرة..

إذا لم يكن كل هذا كافياً لمسائلته فماذا تعتقد أنه يكفي ؟؟

أسر الشهداء والضحايا برضو

ومن خلال المسئولين عنهم أو ممثليهم..

أتمنى إنو برضو يكون عندهم صوت ودور في مطالبة العالم الحر بوقف مهزلة استقبال البرهان على أي وجه من الوجوه

يمكنهم توجيه رسالة للسفارة الفرنسية في الخرطوم

ونشرها في وسائل الإعلام..

تسلم يا الهادي وشكرا لك..

Quote: مرحب أخونا ياسر الشريف.. البرهان كان ضابط برتبة كبيرة في الجيش أثناء النزاع الدموي في دارفور وأشرف على عمليات تجنيد المقاتلين في صفوف المليشيات وتزويدهم بالسلاح بالإضافة لدوره في التنسيق بين الجيش وهؤلاء المقاتلين المحليين أو المليشيات..وده كلو موجود وموثق ويعلمه العالم وتعلمه الحركات المسلحة وأهالي دارفور.. وما تنسى كمان إنو كان رئيس المجلس العسكري الذي أمر وقام بتنفيذ مجزرة فض اعتصام القيادة العامة مما أدى لمقتل وجرح العشرات بالإضافة لمئات المفقودين منذ تنفيذ المجزرة.. باعتراف المجلس العسكري نفسها عشية المجزرة.. إذا لم يكن كل هذا كافياً لمسائلته فماذا تعتقد أنه يكفي ؟؟

أتمنى أن تتم مساءلة البرهان.
ولكن لا أعتقد أن كل الذي ذكرته كافيا لتأسيس مساءلة قانونية في فرنسا لرجل يتمتع بحصانة رئيس دولة، استطاع حتى الآن ادعاء الانحياز لثورة
الشعب السوداني، ويرأس مجلس سيادة الفترة الانتقالية.

ولكنها كانت كافية لتأسيس مساءلة قانونية للبشير وهو رئيس دولة وظل ملاحقاً بسببها لعديد السنوات

بل كان حتى رؤساء العالم الحر يتهربوا من ملاقاته أو التصوير معه ناهيك عن دعوته لحضور مؤتمرات

على كل على الناس أن تسعى لتخدم قضاياها بنفسها..

انحنا كمواطنين سودانيين مقتنعين تماماً انو البرهان مجرم وارتكب جرائم مروعة في حق الشعب السوداني (آخرها مجزرة فض اعتصام القيادة العامة) ومقتنعين تمام الاقتناع إنو إنو ليس من الملائم على الإطلاق دعوته لحضور مؤتمرات وخلافه..

وهو موجود في السلطة في السودان بحكم الأمر الواقع ونتاج لتواطوء قوى سياسية محلية وإقليمية متأمرة على الشعب السوداني و على ثورته..

ونتمنى أن تعلي الحكومة الفرنسية من شأن قضايا حقوق الإنسان وتتراجع عن استقبال هذا المجرم.. لأنو أساساً البرهان غرضو من المؤتمر ده حاجة واحدة بس وهي ( تكريس سلطته) والبحث عن مشروعية ودور له لا أكتر ولا أقل.. وهو غير معني بأي دعم يصل للشعب السوداني

وده ما سلوك جديد ـ ده العرف أو القانون السائد في هذه البلدان.. واعتقد انك تعلم وتعي ذلك جيداً..

Quote: ولكنها كانت كافية لتأسيس مساءلة قانونية للبشير وهو رئيس دولة وظل ملاحقاً بسببها لعديد السنوات

أمر القبض على البشير صدر من المحكمة الجنائية الدولية بعد أن أحيل إليها بقرار من مجلس الأمن الدولي، وبذا سقطت حصانته وظل هاربا من وجه العدالة الدولية. أما البرهان فيتمتع بحصانة رئيس دولة حتى الآن.

Quote: على كل على الناس أن تسعى لتخدم قضاياها بنفسها..

هذا بالضبط ما نريد أن نتحقق من إمكانية حدوثه. نرجو من القانونيين الإفادة. هل يمكن للسودانيين في فرنسا التقدم بمثل هذا الطلب؟

بقية مداخلتك لا خلاف لي معك فيها.