ولد الحسن الشمارنجي بشمارنج, في إحدى حواضر السودان. علاقته بالشمار إبتدأت في فترة مبكرة جدا. فهو يتحدث بمقدار حتى يركز طاقة الشمار وكان في شمارنج طالما يُبدي اللامبالاة حين يقع على كنز شمار معتبر (تزداد ضربات قلبه وتلمع عيناه خبثا), متظاهرا بالإستعجال ومصرحا بأنه لا وقت له لأي شمارات", زاهدا في القيل والقال وكثرة السؤال وإضاعة المال:
:)
Post: #2 Title: Re: أبو الحسن الشمارنجي Author: الشيخ سيد أحمد Date: 04-28-2021, 08:02 PM Parent: #1
سلام مازن مبارك عليك الشهر.
بالغت لكن- كده معناها الشرك قبض. دقست لكن لسه ما إتلحست:) نصيحتي ليك أعمل رايح من البوست ده- وأمشي مكان الحفلة ووريهم المكشم :)
كامل تضامني مع ابوالحسن الشمارنجي :)
Post: #3 Title: Re: أبو الحسن الشمارنجي Author: مازن سخاروف Date: 04-28-2021, 09:08 PM Parent: #2
وإنت إن شاء الله تبع ياتو خيانة؟ مروي ولا كريمي؟
:)
Post: #4 Title: Re: أبو الحسن الشمارنجي Author: الشيخ سيد أحمد Date: 04-28-2021, 09:19 PM Parent: #3
انا في رمضان رافض شغل اي مقصات.
للتذكير: الحفلة بي هناك والعشاء كوكتيل- انا غايتو زمان شلت صحني وقاعد اتفرج :(
هون عليك يا مازن- المداخلة الاولى للمزاح فقط- والمداخلة التانية عشان تلحق ليك صحن في الكوكتيل:)
Post: #5 Title: Re: أبو الحسن الشمارنجي Author: الشيخ سيد أحمد Date: 04-28-2021, 09:25 PM Parent: #4
والمداخلة التالتة دي يا مازن عشان ذكرت لي مروي وكريمي:) و بالمرة اشكرك على متابعة شخصي.
ماتنسى الحفلة والعشاء- عشان ماتبيت القوا في رمضان :)
Post: #6 Title: Re: أبو الحسن الشمارنجي Author: مازن سخاروف Date: 04-28-2021, 09:27 PM Parent: #4
عان ده كمان. هوّن شنو وشربطنح شنو.
انحنا هنا. العاوزنا يجينا. شفت العز ده كيف؟ :)
Post: #7 Title: Re: أبو الحسن الشمارنجي Author: الشيخ سيد أحمد Date: 04-28-2021, 09:34 PM Parent: #6
Quote: انحنا هنا. العاوزنا يجينا. شفت العز ده كيف؟ :)
عز شنو يا مازن مع (الحلو مر) القرب يكمل ده:)
غايتو كيتتك حامية الناس النوم :(
عليك الله رايك شنو في الحفلة ديك. انا اصر على انك دقست :) لكن برضو ممكن تعمل شغل حلو جدآ في البوست ده.
Post: #8 Title: Re: أبو الحسن الشمارنجي Author: مازن سخاروف Date: 04-28-2021, 09:47 PM Parent: #7
إنت خليك عميل مزدوج. وخش بهنا وأمرق ليهم راسك بهناك. زي جاكة كتشنر ديك . قال ليك "منسق إتصال",ولمن سخنت إتدس وعمل رايح وراح فيها غردون المسكين.
لكن عمولة ما بديك. من هسع حدستك.
Post: #9 Title: Re: أبو الحسن الشمارنجي Author: mohamed osman bakry Date: 04-28-2021, 10:01 PM Parent: #8
الدفتردار ما خاتي عليكم . انتو , الحبيب بورقيبة كان حزب امة
Post: #10 Title: Re: أبو الحسن الشمارنجي Author: الشيخ سيد أحمد Date: 04-28-2021, 10:07 PM Parent: #8
Quote: إنت خليك عميل مزدوج. وخش بهنا وأمرق ليهم راسك بهناك. زي جاكة كتشنر ديك . قال ليك "منسق إتصال",ولمن سخنت إتدس وعمل رايح وراح فيها غردون المسكين.
لكن عمولة ما بديك. من هسع حدستك.
هههههههههههههههههه
وين مع الشرامة ديلك:) عندهم حراس على مضارب البوست:( انا لسه بقترح ضرورة مرورك على الحفلة وإظهار قدراتك. ما تخاف وما ترفع قزازك لأنو شايف مكيفك ماشغال- بدليل السخانة الخلتك تفتح بوست:) ما عايز منك اي عمولة -بس عايزك تركز لي على الزول داك- عارف نفسو- مافي زول قادر عليهو في منبر حبيبنا (بكري اب صلعة:)
Post: #11 Title: Re: أبو الحسن الشمارنجي Author: مازن سخاروف Date: 04-28-2021, 10:24 PM
يا عمك, إنت محامي نص كم. قدرات شنو وسخانة شنو. في فرق في السرعات.
أركن على جنب خلينا نعمل البوست. ما تبقى لايوق :)
Post: #12 Title: Re: أبو الحسن الشمارنجي Author: الشيخ سيد أحمد Date: 04-28-2021, 10:36 PM Parent: #11
Quote: يا عمك, إنت محامي نص كم. قدرات شنو وسخانة شنو. في فرق في السرعات.
أركن على جنب خلينا نعمل البوست. ما تبقى لايوق :)
ههههههههه
يعني خلاص اديتني بالباقي تسالي:(
بالمناسبة هو موضوع البوست شنو؟؟ اخر كسرة: ماتنسى الحفلة- جنبنا (مكوجي) شغلو نضيف:)
Post: #13 Title: Re: أبو الحسن الشمارنجي Author: مازن سخاروف Date: 04-28-2021, 11:29 PM Parent: #12
حاسي زي القاعد البتكلم مع حبوبتك. أنا في وادي وإنت في وادي. ومصر وحالف بدينك. بس ما معاك في الخط في الكلام القاعد ترمي فيهو, ولسبب بسيط.
أها لو قلت ليك من أمبارح آخر دخلة لي بهناك, شن قولك؟. ما تفترض إنو أي زول راسو خفيف زي المروحة.
البتعمل فيهو ده أبو حسن شمارنجي تو
Post: #14 Title: Re: أبو الحسن الشمارنجي Author: مازن سخاروف Date: 04-30-2021, 12:16 PM Parent: #13
(2): سفر التكوين
أبو الحسن نشأ وترعرع وفرهد على ضفاف الشمار. بيد أن عشقه لفنكهات النضمي, الذي عبر عنه الشاعر:
محير في خدارك لو قــَصة من شمارك تفرحني وووووتنسّيني همي
لم يكن عشقا عاديا لصنع الشمار ذاته, أو حتى في نقله لمن يليه وينتظره بفارغ الصبر. بل كان عشقا لصنع "لونية الشمار", وفي ذلك نكتة سيأتي ذكرها. كان عشقا حميميا "للزيادة "في الشمار. في نقل وتهيئة وتحديث الحالة الشمارية من خبر عادي إلى آفاق الفراغ الهائل للمشاطات. لونية الشمار حالة ذهنية للرجل الذي يهتم بتبهير التوافه وقد شغفته حبا. بالسعي لإضافة بصمته الخاصة على الشمار المحلي, فيصبح ببجدارة واستحقاق "شمار أبو الحسن".
Post: #15 Title: Re: أبو الحسن الشمارنجي Author: طلحة عبدالله Date: 04-30-2021, 09:13 PM Parent: #14
سلام يا سخاروف ورمضان كريم يا حبوب من وجهة نظري أنك زول ليهو ثقله في المنبر رغم حداثة عهده ومناوشتك المحببة (كما أعتقد) للدكتور سيف النصر الذي أكد أنه غير عاتب عليك ( كما فهمت) تمنح مشاركتك بعدا مثيرا ومطلوبا لتسخين برودة البورد وتحريك جموده الذي لا تخطئه بصيرة خصوصا مع الافراط في الكوبي بيست من الأخبار الطازجة والبايتة التى تضج بها الصفحة الأولى. غير أن انسياقك في الرد على بوستات محاولة اغتيال الشخصية أرى أنه تنازل لا يشبه مشاركاتك وتواجدك كعضو أثبت فعاليته من الوهلة الأولى نصيحتي ليك ان قبلتها مع كل الاحترام أعرض عن هذا وانسى. ................. أنت عندي من المرشحين لاعادة ألق المنبر
Post: #16 Title: Re: أبو الحسن الشمارنجي Author: مازن سخاروف Date: 04-30-2021, 11:15 PM Parent: #15
سلام ياطلحة,
رمضان كريم وتصوم وتفطر على خير. نصيحة من ذهب. أكبرها فيك. دعني أضعك في الصورة. البلد دي عندها مشكلة إنو الخيانة الناس والأجاويد بتقول ليك, سيبهم وأعرض عنهم, ديل ما بخجلوا. ده واحد من أسباب المشكلة في رأيي. مافي قصاص ومافي مواجهة تخلي شلة الأنس دي تفكر مية مرة قبل التعدي. لو أي فريق اعتقال غير قانوني لا يأمن على نفسه هل حيرجع أو لا حين يأتي لإعتقال رجل شريف, ولو أي فريق إغتيال شخصية وجد إنو مواجه برد الصاع صاعين, فسيفكر ألف مرة قبل الشروع في "تجاوزات" رخيصة.
في السياق هنا, بالنسبة لإغتيال الشخصية, فعندي الإنضباط بأن أعزف عن الذهاب إلى بيوت سوئهم طوعا. دي نقطة ضعفهم حين يقرؤونك مجبرين ولا تقرؤهم باختيارك. I deal with them on my terms, to the extent to which ROE, the rules of engagement are defined, and or applied.
لكنهم فيما أخطه من نافذتي أتعامل معهم وفق قواعد الإشتباك. سيكون عليهم منا ما يستحقون. إلا لو صاحب الموقع ثبـّت إنها هنا بالقبيلة, فسيقال لهم مثلما قال المرحوم نقد, سعيدة وبخيتة عليكم. أما دون هذا فبيننا وبينهم
دم لا يجففه لا الرمل ولا الصلوات
من ناحية أخرى فالتزامي بقواعد الإشتباك أيضا تحفيز لـ "الأغلبية الصامتة" أن كفى سلبية. دافع عن طوبتك في الصف.
ويا سيدي شكرا لحسن ظنك. الكتابة سلطان العقل. لكن أبو الحسن الشمارنجي وشلته البائسة, عقليته عقلية مدير حوش صغير في البندر (ولا حتى حاكورة). سيظل يحمل فكر القبيلي الذي يضمن مصالحه بالفتن وإشعال الحرائق.
الرسالة التي أريد إيصالها له أن تلك الحرائق ستكون مكلفة لمشعلها.
تسلم على كلمة حق في زمن الرجال بتدفن فيهو دقن.
سخاروف
Post: #17 Title: Re: أبو الحسن الشمارنجي Author: طلحة عبدالله Date: 04-30-2021, 11:58 PM Parent: #16
والله يا مازن يا أخوي وللحق نصحتك وأنا أولى بالنصيحة فلو كنت مكانك لاقدمت على ما أقدمت عليه وما حصل خليت حقي، رافعا شعار الكبير عندي الله وأرجو أن لا يعتمد هذا مني كتحريض بقدر ما هو نقد ذات ما اكتر (ان استقامت العبارة) قصدي ليك ما تنشغل كتير بالمناوشات والتراشقات الجانبية على حساب انتاجك وأفكارك هنا. وانت أولى بتقدير موقفك بالتأكيد ........ من ناحية فعال فعال خالص والله.
Post: #18 Title: Re: أبو الحسن الشمارنجي Author: مازن سخاروف Date: 05-01-2021, 05:48 AM Parent: #17
(3) سفر النشوء و"الإرتقاء" نشأ أبو الحسن بين حواري وأزقة شمارنج حاملا ولعا استثنائيا بـ "تصليح" الشمار. يطلع عليه الصباح مهموما بالشمار الجديد:
لو كان ليا من حبهان خبرك قِوالة وقدري يكون طبعي الفراغ عطالة ووووأنا الفي نهاري غرقان نذالة خليك شماري معايا وووأنا الطالع سِقالة
كدَأبِ آل شمارنج, يتحور أبو الحسن في الضوء كثعبان يتفسخ تحت مقلة النهار. يجمع بلا كلل أو ملل رحيق الشمار كشغالة نشطة في خلية نحل. مثلما يجمع "النقادة" الجلود في زمان مضى, والخردواتية في زمان أقرب قطع الحديد, كان أبو الحسن الشمارنجي يمشي بين الناس مرهفا أذنيه ليلتقط رزق اليوم من القيل والقال. يشقى في حرفته التي اختارها لنفسه طائعا مختارا ودون تدخل من أحد. يشهق بعمق. ذلك الصدر المعلول بثقل متاعه من خمائر النفس, ضيقا حرجا كمن يصعّد في السماء. والمأزوم بمسؤولية تصديرها من بعد "المعالجة" (نشوء و"ارتقاء", أي تحسين الشمار) إلى الناس في صورة زفارة ثقافية.
ينفتل من نهاره من بعد أن يفسخ جلده إلى طور "التحسين", مستغرقا حتى الثمالة في فلفلة وتحمئة التوابل في صاج "القوالات". وتغيب عليه الشمس وهو لا يزال عاملا بهمة ومثابرة في سباق محموم لتحسين "الصنعة". في المُضيّ قدما في معالجة مكوّنات أقل من اعتيادية من طيف المنقول من كلام الناس. ثم بكل صبر وأناة و"تجرد" الرجل الوهمي في المجتمعات السودانية. الرجل الذي يستمرئ جذب الناس إلى مجالس لواكة الكلام بلذة منقطعة النظير. بتقديم "صحن" شمار استثنائي "مصلح" إلى "المستهلك".
Post: #19 Title: Re: أبو الحسن الشمارنجي Author: adil amin Date: 05-01-2021, 06:51 AM Parent: #18
كويس يا مازن حياك الله انا معاك ما مع التانيين لكن الفارات وشلة المزرعة البليدة ما بجوك بي جاي امشي لي عديل وريه المكشن بلا بصل ديل قاعدين في المملكة بي فيزة قرد .... اول ما تجيب سيرة الملك سلمان بولولو لي بكري الحقنا الزول ده بجيب لينا هوا ما تشتغل بيهم حدد افكارك ورؤيتك وامشي عديل فيها اقعد في البورد بي عقلك مش بي عقلهم ديل خرررفو ما عارفين لحدي الهسة الفرق شنو بين الكتابة في المنابر الحرة والكتابة في المسنجر عندي لاركس ليهم موديل 2021 انتظر بعد العيد كان ما رقدت ابو الحصين ده في التجاني الماحي
Post: #20 Title: Re: أبو الحسن الشمارنجي Author: مازن سخاروف Date: 05-01-2021, 01:14 PM Parent: #19
سلامات عادل,
ما تشيل هم. زي ما قلنا قواعد الإشتباك واضحة. خليهم يخشوا ويمرقوا. حفلتهم دي "محفوظ في علب". عشان فرز المنافقين العاوزين يعملوا فيها دعاة فضيلة. عندي مواعيد تسليم تتطاقش. نجي نشوف بعد العيد كان ربنا مد في العمر. نعمل تمام, كلنا سالمين, كلنا تامين وجرد. أجمل حاجة الفرز المبكر لفصائل البحر رايق والقعوي متضايق. إن شالله بس يركزوا.
ياخي المنبر ده أثبت إنو في أقلية تعد على الأصابع لسع عندها ضمير. لكن لسع تقاطع الرؤى عاوز استماع جيد وتفاهم على حد أدنى.
لاركسك حبابو ألف. أرمي قدام بس.
Post: #21 Title: Re: أبو الحسن الشمارنجي Author: سيف النصر محي الدين Date: 05-01-2021, 03:02 PM Parent: #20
دائما ما تعجبت من انزلاق "الانتلجنسيا" السودانية الى استخدام التنميط الموروث واعادة انتاجه بدون اي اعمال للتفكير النقدي. هسه المشاطة دي كعضو في طبقة اجتماعية مسحوقة ذنبها شنو عشان تضرب بيها المثل في حتة الشمار دي؟ مش ممكن تكون في مشاطة بروفيشنال بتدخل تعمل شغلها وتمرق بدون اي شمشرة او شمارات؟
Post: #22 Title: Re: أبو الحسن الشمارنجي Author: خضر الطيب Date: 05-01-2021, 03:42 PM Parent: #21
Quote: ديل قاعدين في المملكة بي فيزة قرد ....
و انت يا عدولي يا بطة قاعد في اليمن مع الحوثيين بدرجة سفير فوق العادة ؟ما ياها نفس فيزة السجم ثم وين يا الغزال الفوق في السلم ههههههه
Post: #23 Title: Re: أبو الحسن الشمارنجي Author: مازن سخاروف Date: 05-01-2021, 06:28 PM Parent: #22
سيف النصر,
في مشكلة إنك أحيانا بتتذاكى بأكتر من أسلوب. اقتراحك في رأيي, يسمى deviation argument أو "حرف الموضوع". أي إقحام موضوع جانبي لحرف واختطاف الموضوع الأصلي. عاوز تعمل قضية إجتماعية وهمية من المشاط.؟ قادر الله. الوهمية ليست في الإقتراح, ولكن قد تكون في مأربك.
لكل مقام مقال يا هذا.
تحياتي
Post: #24 Title: Re: أبو الحسن الشمارنجي Author: adil amin Date: 05-02-2021, 07:50 AM Parent: #23
Quote: و انت يا عدولي يا بطة قاعد في اليمن مع الحوثيين بدرجة سفير فوق العادة ؟ما ياها نفس فيزة السجم ثم وين يا الغزال الفوق في السلم ههههههه
وين يا خضر ...هسة انت مالك بالله عليكم شوفو ده كمان اهل الميتة صبرو ابوالحصين والجيران كفرو تقول بلمكم في تلاوة لتجويد سورة النمل في رمضان يا كوز البلاستيك انا قاعد بي فيزة نسر عابر للقارات ما بي كفيل .... وانت قاعد في قطر بي فيزة بطة والبطة وعي والنسر وعي ووضحنا الفرق في البورد ده زمااان مالك ومالهم اقعد ساكت في قطر بتاعتك دي زي التانيين يعجبك زول يلم الناس في بوست لاغتيال الشخصية والردح والنميمة الاسفيرية و حكمة ربك لقيت الخواض كمان تعال مارق لي بره في بوست زي ده لي زمن ما معطك ووديتك الاقامة الجبرية زي بريمة الراس بي الراس والرجال تموت متوافية كان ما رقدتكم كلكم في التجاني الماحي يا خضر... هسة مازن ده سوا ليكم شنو بفتح عناوين جادة وعنده رؤية واعادة سياغة للتاريخ والتاريخ وجهات نظر المشكلة شنو انا عندي تار قديم في البورد من 2001 2021 انت ابعد بس
Post: #25 Title: Re: أبو الحسن الشمارنجي Author: adil amin Date: 05-02-2021, 07:57 AM Parent: #24
Quote: سلامات عادل,
ما تشيل هم. زي ما قلنا قواعد الإشتباك واضحة. خليهم يخشوا ويمرقوا. حفلتهم دي "محفوظ في علب". عشان فرز المنافقين العاوزين يعملوا فيها دعاة فضيلة. عندي مواعيد تسليم تتطاقش. نجي نشوف بعد العيد كان ربنا مد في العمر. نعمل تمام, كلنا سالمين, كلنا تامين وجرد. أجمل حاجة الفرز المبكر لفصائل البحر رايق والقعوي متضايق. إن شالله بس يركزوا.
ياخي المنبر ده أثبت إنو في أقلية تعد على الأصابع لسع عندها ضمير. لكن لسع تقاطع الرؤى عاوز استماع جيد وتفاهم على حد أدنى.
لاركسك حبابو ألف. أرمي قدام بس.
تمام يا مازن ضقل بيهم بي مخك الشمال وامشي في رؤيتك الاستراتيجية الانت شايفا صاح ما شرط تلقي محاورين كتار هنا الزوار بي الطن من خارج البورد وعداد البوست اكبر دليل وعلي قدر اهل العزم تاتي العزائم شلة ابو الحصين دي ...مصابة بي الصمرقع ....اجارك الله ما عارفين يسوو شنو رايح ليهم درب زي ما قال د منصور خالد في مثل يمني بذيء يشبه حالتهم المخزية لا يجوز استخدامه في رمضان
Post: #26 Title: Re: أبو الحسن الشمارنجي Author: مازن سخاروف Date: 05-02-2021, 11:01 AM Parent: #25
أمسك مثلك عليك يا عادل. الدنيا رمضان :)
ما تشيل هم. معاك معلم.
Post: #27 Title: Re: أبو الحسن الشمارنجي Author: مازن سخاروف Date: 05-02-2021, 11:42 PM Parent: #26
(4) سفر التخييل
الذين يعرفونه وخبروا أساليبه عرفوا أنه امرؤ لا تلتقي عيناه أبدا بعيني محدثه. فهو يهرب من تطلع الآخرين إلى بحيرة الظلام تحت جفنيه. حيث تنغرز نافذتان للخبث الآدمي يحرص على تخبئته جيدا من فضول الآخرين. يحس أن قوته تكمن في تحصين نفسه من نظرهم إليه مباشرة. لأن في ذاك مجازفة بتوجيه ومضة من الضوء نحو أقبية روحه. "أبو الحسن!"
يتطلع مرغما إلى صينية الغداء. لماذا يزعجونه؟ إنه مشغول في عقله الباطن بترتيب حوارات ثنائية بينه وبين "قائمقام الشمار" في المنطقة: أبانا في وادي شمارنج. تجسد أمامنا أيها الإمام النضام. إمنحنا الحنك البعضّي, الذي سيجهجه باكات السامعين.
لماذا يتطفلون على خلوته؟ ألا يعرفون أن لديه التزاما "مهنيا" بتجميع الشمارات في صيغتها النهائية؟ في عمل اللمسات الأخيرة لـ"بروفة الإلقاء", واقفا أو قاعدا في موضع القلب من مجلس للشمار. منهمكا في تخييل الحدث كبطل أسطوري للفارغة.