من أغرب الظواهِر التي حيّرت العلماء في عصرنا هذا ظاهرة الكرونا والتي شغلت كل الأوساط وعلي رأسها الوسط الطبي، وقبل أن يفيق العالم من ضربة الكرونا حملت لنا الأقمار الصناعية صور لمخلوق يبدو أنه من كوكب آخر حيّر بدوره جزارات السوق وملجات الخدآر والمعامل والمتاحف ؤ صفوف السينما والمطاعم والقهاوي، ؤ حيرت أفكاري معاك إنت .
قبال ما نبدأ البوست بتاعنا كدي نديكم صور هذا المخلوق عسى ولعلّ زول يعرفو، تعالوا معانا :...
زمان في حاجة إسما الجلِخ ؤ هسّع قالو في حاجة أسما الفسخ، من مدعاة حبوباتنا زمان يقولن الحر اليفسخك، وكحالة عامةً كِدا في اليوم الحار يقولك اليوم دا حرّو يفسخ، بمعني حرّو شديد ممكن يفسخ جِسمك . أما فسخ البنات اليومين ديّل فهو إستعمال مواد تغير لون البِشرة من السواد أو الخدار للبياض !!!، تبيّض فوقكن الجدادة يا بركة اللآ نام لا أكل الطعام، بيّضن زي ما دايرات وِ أتحنكشن زي ما دايرات بس أختن مِلحاتنا كُلو ولا بشتنة المِلحات .
في هذا البوست سوف نتعرض لظاهرة حنكشة المِلحات مع عرض بعض الصور ...
اصلو ناس الضهاري ديل ما بتقدمو .... و أخرونا معاهم .... ناس عطبره ما عايزين تتفصلو تريحونا ...... عصيدة و ملاح تقلية تفتح النفس و ترفع راسك قدام البشر المتقدمة يا وهم انت ...
ياخ ده شغل بتنا الشيف رانيا في كتشنر اولا التقدير و الاحترام للمبدعة رانيا...و ينوبك ثواب لمني فيها ٢٠١٢ عملت دبلوم معجنات و خبز و شكولاتة و ادارة مشاريع.. طبعا تميزي كان بإدخال الحاجات السودانية فقد ادخلت القونقليز و العرديب..و القضيم و اللالوب في حشوة الشكولاتة...و ادخلت الحلبة و التمر في حشوات المعجنات. . كما استخدمت قوالب الشكولاتة في عمل العصيدة و حشوتها بالتقلية و غيرها بحاول انزل شغل يا مدير زمانك فات
Quote: اصلو ناس الضهاري ديل ما بتقدمو .... و أخرونا معاهم .... ناس عطبره ما عايزين تتفصلو تريحونا ...... عصيدة و ملاح تقلية تفتح النفس و ترفع راسك قدام البشر المتقدمة يا وهم انت ...
فترنا يا ابو حسين ..
النوع البطفي النور شان ياكل التمره و ما يشوف السوس .. حيفهم ليك كلام زي ده كيفن !!!
Quote: ياخ ده شغل بتنا الشيف رانيا في كتشنر اولا التقدير و الاحترام للمبدعة رانيا...و ينوبك ثواب لمني فيها ٢٠١٢ عملت دبلوم معجنات و خبز و شكولاتة و ادارة مشاريع..
يا نمله ..
و ايه رايك كمان بتنا سوسن في كندا هنا معانا استاذة شكولاتة و عندها شهاده .. حاجيب ليكم رابط رانيا في الفيسبوك و الانستقرام و كذلك سوسن ..
حباب محجوب، دي عصيدو واللآ فيلم هندي !. قبل يومين كنت معزوم فطور رمضان ؤ من ضمن الإفطار كان في صحن بتاع مُلآح كول، أها قلت الليلة دي فرصة أضوقو، قمت شِلت لي معلقة ؤ كمدتها في خشمي، بصراحة طعمو عجبني لكن تب غلبني أتني اللُقمة ؤ وقفت عِن حدي ؤ وحاتكم الريحة لليوم التاني ما طشّت من خشمي . الغريب في الأمر إني بالليل شعرت برجفة في جسمي !، أها قمت قست السُكري لقيتو هابط شديد زي غُنا اليومين ديّل، طوالي إتهمت ملعقة الكول ...
حتي الكول حنكشوهو، ؤ عملوهو في شكل قلب كمان !!!، غايتو جِنِس وجع قلب !!!. بالله يا جماعة ورونا الكول دا قبل ما يهاجر إلي بلاد الفِرِنجة كيف كانت طريقة تناوله، هل كانت بالشوكة والسكين واللآ لهِط ساكت ؟، وأكان لهِط الزول بغسل إيدو بديتول واللآ بقشها في عراقيهو ؤ يشتِت ؟.
آسف جداً علي تأخير الردود نسبةً لمحدودية مداخلآتي ...
Quote: كِملت المواضيع سويتبهم بوست ؟ ده عيب مشاركة الاشياء السوفيستسكيدت دي مع عيال الضهاري .. ههههههههه ياخ ده شغل بتنا الشيف رانيا في كتشنر .. رانيا دارسة و متخصصه .. و عندها محاولات لاخراج الاطباق بصورة مختلفه لتشجيع كل الجنسيات لتجربتها ..
حباب رآنية لكن بشتنة مِلحاتنا ولا حبابا، كدي كلِما تعملنا إخراج لأُم شِعيّفة عشان نشوف التخصص، قال إخراج قال !!!، هي مِلحات واللآ عرس الزين ؟!...
Quote: اصلو ناس الضهاري ديل ما بتقدمو .... و أخرونا معاهم .... ناس عطبره ما عايزين تتفصلو تريحونا ...... عصيدة و ملاح تقلية تفتح النفس و ترفع راسك قدام البشر المتقدمة يا وهم انت ...
عِشان عمايلكم السودا دي واللعب بالتراث قرررنا ننفصل خاسةً إننا من زمان حسينا إنو الأمير شامينا عليه سوف نحتفظ بتراثنا وندافع عنه بإنفصالنا ولا نامت أعين الجبناء . الويكة في فتيل!!!، بالله دا أسلوب دا !!!، ؤ وزارة الثقافة والإعلام وآقفة تتفرج !!!، ما سقطت بعد وأصحى يا ترس ...
Quote: قبل يومين كنت معزوم فطور رمضان ؤ من ضمن الإفطار كان في صحن بتاع مُلآح كول، أها قلت الليلة دي فرصة أضوقو، قمت شِلت لي معلقة ؤ كمدتها في خشمي، بصراحة طعمو عجبني لكن تب غلبني أتني اللُقمة ؤ وقفت عِن حدي ؤ وحاتكم الريحة لليوم التاني ما طشّت من خشمي . الغريب في الأمر إني بالليل شعرت برجفة في جسمي !، أها قمت قست السُكري لقيتو هابط شديد زي غُنا اليومين ديّل، طوالي إتهمت ملعقة الكول ...
ايوى ده كول اصلى الفيهو الريحة العالية دى. تعرف طريقة تخميرة, صفق نبات اخضر بنمو علي اطراف الوديان, بورقو زى الملوخية, و بتخمر لمدة 3 اسابيع دون اضافة اى مادة. بعد الـ 3 اسابيع بفتحو الخمارة بكون استوى عجين زى عجين الزلابية, و بقعطوها زى رمية الزلابية و بشروها في شمس الله لمن تجف و بعد تسحن عند اللزوم.
_________ بينى و بينك ما تستهين بيها, ربما له فوائد مع السكرى. بالمناسبة النبات حقو زى السنمكة بس تفرزهم باللون. السنمكة اخضر مايل للغباش و الكول اخضر شديد.
Quote: هل كانت بالشوكة والسكين واللآ لهِط ساكت ؟، وأكان لهِط الزول بغسل إيدو بديتول واللآ بقشها في عراقيهو ؤ يشتِت ؟.
الهط ساكت يا مان. بتخيل شمس افريقيا بلعب دارفور.
___________ الصابون ده لكشرى, وين بضيعو مع الكول.
Post: #39 Title: Re: حنكشة المِلحات ... Author: احمد يوسف (خور جهنم) Date: 04-24-2021, 07:32 AM Parent: #38
ود المدير .. حبابك و حباب ضيوفك .. كدا اديني فرصة في محجوب الذي اصبح حنكوش و نسى اهم مرحلة في من مراحل تصنيع الكول. متفق معاك في انه صفق نبات اخضر ينمو على اطراف الوديان .. يتم توريقه مثل الخضرة .. و يفرم بالفرامة اليدوية بتاعت زماااان ديك. طريقة التخمير .. يتم وضع هذا الصفق المفروم في داخل "قلة/برمة/زير". المهم حاجة من فخار .. و يدفن داخل الارض .. و طبعا درجة الحرارة تعجبك .. ٤٥ درجة و ما فوق. قبل ان يتم اخراج هذه الخلطة من داخل الارض .. يتم ذبح خروف و تستخرج منه الامعاء فقط .. و باقي الخروف كله .. يوضع في ماعون كبير و يضاف اليه البهارات و يترك طوال اليوم يغلي .. عشان تكون النتيجة كمية بسيطة من "الشوربة" الدسمة جدا. نسبة لرائحة تلك الاوراق .. بسبب التخمير .. لا يتم اخراجها من الارض الا منتصف الليل .. و من ثم يضاف اليها "الشوربة" المركزة تلك .. و تخلط جيدا ثم يتم صنع اجزاء صغيرة .. مثل اللقيمات .. و توضع في "برش" و تعرض للشمس عشان تجف. ........ ملاحظة.. نبات الكول لا تاكله البهائم لان طعمه مر شديد. معلومة ثانية .. يقولون ان الزول البيأكل الكول .. السحر و الكجور و الكواديك ما بتمشي فيهو. ....... اي زول عنده "ارضي" او مشتبه في ذلك .. تقع الكول
ياخ ده شغل بتنا الشيف رانيا في كتشنر اولا التقدير و الاحترام للمبدعة رانيا...و ينوبك ثواب لمني فيها ٢٠١٢ عملت دبلوم معجنات و خبز و شكولاتة و ادارة مشاريع.. طبعا تميزي كان بإدخال الحاجات السودانية فقد ادخلت القونقليز و العرديب..و القضيم و اللالوب في حشوة الشكولاتة...و ادخلت الحلبة و التمر في حشوات المعجنات. . كما استخدمت قوالب الشكولاتة في عمل العصيدة و حشوتها بالتقلية و غيرها بحاول انزل شغل يا مدير زمانك فات
نملة يا حبيب رمضان كريم .
أها عليكم الله شوفوا نفر الصوآطة دي !!!، الدخّل الشكولآتة مع العرديب والقنقليز شِنو !!!، غايتو جِنِس بشتنة !!! في الأصل هي محاولآت من الغرب لطمس هويتنا بأيدي أبناء الوطن . هآك أُم بُقبُق دي...
النوع البطفي النور شان ياكل التمره و ما يشوف السوس .. حيفهم ليك كلام زي ده كيفن !!!
إنت في دي، واللآ نملة القال عندو تميّز !!!.
والله يا قباني خالتي عاشآ الله يرحما، كانت عارفاني بريد التمُر شديد، أها بعد أنا سكنت الخرتوم كانت حد ما تلقالآ زول ماشي البندر ترسل لي معاهو كرتونة تمر، وكِت التمر يكمل ؤ يفضل في قعر الكرتونة المسوّس والمليان دود وأنا تجيني الخًرمًة أدخّل الكرتونة في اللوضة وأطفي النور وأقع فيهو درش لا بشوّف دود لا بشوّف سوسة ...
Quote: و ايه رايك كمان بتنا سوسن في كندا هنا معانا استاذة شكولاتة و عندها شهاده .. حاجيب ليكم رابط رانيا في الفيسبوك و الانستقرام و كذلك سوسن ..
يا زول سوسن درِبا أخدر اتلِت ؤ تعجن في الشكولآتة علي كيفا، نشجعا ؤ نقيف من خلفها إمتثالاً للمثل البقول أنا وإبن عمي علي الغريب بس حنكشة مِلحاتنا دي ما بنرضاها ...
Quote: الواحد أكان شارك بغناء اغنيـة بإحساسه وفلسفته وحسب رؤيته وببصمته تشيلو حاله زي اللكنو كفر ومرق برة الملة وتشبكونا بشتن التراث.. والببشتن العصيدة ويدخل الملحات في فتيـل ضيـق يطلعوهو مبدع ومبتـكر .. غايتو!
عآد شِن نقول في مُدآح الرسول يا ود الزين عينُن في المسيّد ؤ يبيتو عِن جآد السِيّد !!!. عندي إحساس إنو بدايات الحنكشة كانت من هنا، لذلك يجب البحث عن هذه اليد الغريبة التي بدأت العبث بموروثاتنا ...
