كان أبي

08:42 PM March, 30 2021

سودانيز اون لاين
إسحاق بله الأمين-KSA
مكتبتى
رابط مختصر

كان والدي رحمه الله ، لو شاف ليهو طفل شعره كتير "مغوف" ، يناديهو ، ويقول ليهو: تعال نحلق ليك شعرك ، وبديك " قرش" بعد الحلاقة. طبعا ده كان عرض مغري للأطفال ، لو رضى الطفل ، بحلق ليهو ، وبعد الحلاقة ، يمسح ليهو "صلعته" بالزيت ، ويملأ ليهو جيبو تمر ، ويديهو " "قرش" حسب الإتفاق ، و"القرش" ، كان ليهو قيمة ، رحم الله محمود ود "الحلال" كان يرفع صوت صوته ويصيح :
" الكلام قرش". وصاحبي الصادق ود أب شرا ، رحمه الله ، كان دائما يردد:
العندو "القرش" تحترمو القبايل لو كان " ريالتو" تسيل ، لا مؤاخذة.
وكان الأولاد "يشركوا" للطير ويأتوا به لوالدي فيشتريه منهم ، "الطيرة" الواحدة ب "تعريفة" ، و"التعريفة" برضو ، كانت ليها قيمة ، تشتري بيها عشرة تمرات قلاد ، وتجيب ليك أربع حبات حلاوة "دربس" ، و خمس حبات حلاوة "بلي".
كان عصام ود نمر ، ما زي باقي الأولاد ، يجي شايل ليهو ، طيرة ولا طيرتين ، كان يجي شايل الشوال مليان طير ، وعلى عدد الطير ، ياخد "قروشه".
كان والدي رحمه الله ، بعدما يشتري الطير ، يقوم يطيرو و"يفك أسره".
وكان رحمه الله ، بعد ما ننتهي من الأكل ، يلم باقي الأكل ، ويرفعه في الحيطة للطير ، ويملأ ليهو "علبة" موية لشراب الطير.
وكان رحمه الله، لامن يفتح الدكان ، في الصباح ، يشتت "العيش" للطير والحمام ، وكان عادي تشوف "الحمام" داخل الدكان ، مع أبوي ، ولو دخل أي زول تاني الدكان، طار الحمام.

الله يرحمه ويحسن اليه

اللهم آمين
جزاك الله خيراً.

له الرحمة والمغفرة

اللهم آمين
كتر خيرك أختي أميرة على ترحمك على روح الوالد.

الله يرحمك يا أبي.

أبوك قلبه فيه رحمة ويحب الخير للناس ننما حكيته هذا، وهذا عمل الصلاح..

عليه رحمة ونور..