***** قصة السيدة الكنغولية (داليا الطاهر) *****

***** قصة السيدة الكنغولية (داليا الطاهر) *****


03-30-2021, 07:51 PM


  » http://sudaneseonline.com/cgi-bin/sdb/2bb.cgi?seq=msg&board=510&msg=1617130281&rn=10


Post: #1
Title: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 07:51 PM
Parent: #0

07:51 PM March, 30 2021

سودانيز اون لاين
ABUHUSSEIN-السعودية الرياض
مكتبتى
رابط مختصر



على صفحتها في الفيس بوك كتبت الصحفية داليا الطاهر :-
Quote: قصة السيدة الكنغولية

أتاحت منطقة اعتصام القيادة الفرصة للشباب السودانيين للتعرف عن قرب، جمعت فنانين من مختلف ضروب الفن ولاعبي كرة وفريشه وطلاب وكل سوداني .
أصحاب هذه القصة ساحة الاعتصام كانت ميلاد لمجموعتهم الفنية، فيهم من تعارفوا خارجها قبل سنوات، لكن الاعتصام كان أرض لميلاد احلام ومشاريع خططوا لها.
وجدوا ضالتهم في إعلان لشبكة تبث عبر يوتيوب اسمها MESTV تبحث عن مواهب جديدة في التمثيل، تواصلوا معهم.
طلبت الشبكة نماذج اعمال، شرع الشباب في إنتاج فلم يحكي عن مأساة المرأة الأفريقية. ولحسن حظهم وسوء حظ صحافة الاستسهال نشر فلمهم بتاريخ ٢٣ مارس والآن موجود على يوتوب.
طيب الحصل شنو وكيف القصة وصلت الصحافة والشرطة دخلها شنو؟
تم التجهيز والإعداد وإرسال سكربت الفلم، وتمت الموافقة عليه من قبل أصحاب المنصة. قام الفريق باختيار الطاقم، وخلال الإعداد والبروفات، بحسب احد الشباب خلال البروفات تم استبعاد المرشحة للبطولة واستبدالها بأخرى، مما دفعها للاستعانة بأحد معارفها نافذ في احد القوات النظامية.
ليخرج خبر الانتباهة و بعد يومين تتحرك مباحث الولاية و تلقي القبض على طاقم الفلم بالكامل. وتخضعهم للتحقيق وتحول أجهزتهم الرقمية (كاميرات هواتف ولابتوب) الي المعامل الجنائية للفحص.
أين السيدة الكنغولية؟
لا وجود لسيدة كنغولية وصلت السودان في الأساس.
المقبوضين ٩ شباب وشابات. جميعهم ٨ سودانيين وشابه إثيوبية أو ارترية ظهرت في الفلم لقطة واحدة بائعة شاي.
هولاء الشباب كل من مر بأرض اعتصام القيادة يعرفهم، فهم عازفين و مصورين ومغنيين، كانوا في منصة( ريقي ايفري وير) بأرض الاعتصام.

-
لم تقم صحيفة الانتباهة ولا المواقع الإلكترونية التي تابعت القصة، بواجبها الصحفي بالكامل واستسهلت الأمر.
صباح أمس احد محرري موقع الجماهير ارسل خبر يحمل تصريح رسمي لمسؤول بالشرطة عن موضوع الكنغولية، ديسك الأخبار حجز الخبر لمزيد من التدقيق والبحث، وتوصل في آخر الأمر إلى تأجيل النشر، رغم احتجاج المحرر. تمسك قسم الأخبار برفضه. فالصحافة المتانية أفضل لمستقبل المهنة والمتلقي من ألف سبق صحفي.

--
رابط الفلم
https://youtu.be/8c092zUJQkIhttps://youtu.be/8c092zUJQkI
#طلس_الكنغولية
#الجماهير
#داليا_الطاهر |#Dalia_Eltahir

Post: #2
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 07:54 PM
Parent: #1

و ايضا :-
Quote: نشرت صحيفة الانتباهة ٢٤ مارس الجاري، وصول سيدة أعمال كنغولية وفريق تصوير بغرض تصوير افلام إباحية، آثار الخبر جدل كبير. عادت أمس الأول ٢٨ مارس بعض المواقع الإلكترونية ونشرت أن الشرطة ألقت القبض على سيدة الأعمال الكنغولية وفريق التصوير وباشرت التحقيق.
من خلال عمليات بحث وتقصي توصلت إلى، إن الانتباهة و المواقع الإلكترونية وقعت في فخ كبير.
من نصبوه نافذين في أجهزة القانون وضحيته الآن ٩ شباب فنانين. ولم تصل الخرطوم اي سيدة أعمال كنغولية، والشرطة لم تلقي القبض على أي سيدة كنغولية،
الموقوفين في حراسات الشرطة وتحديدا المباحث هم ٩ فنانين شباب.

📌نتابع ونحكي قصتهم، ولماذا تم احتجازهم في الأساس؟ .

هكذا 👆بدأ الزميل عباس محمد سرده للتفاصيل التى صاحبت خبر الكنغولية المثير للمشاعر والاخلاق قبل الجدل. وبالفعل اوضح القصة كاملة من الالف للياء بتفاصيلها واسماء من بهتوا بها وهم ابطال الفيلم المذكور كما تابعتم فى البوست السابق .
ورغما عن ذلك تجد من يشكك فى صدق حديثه الذى اتى بتفاصيل واسماء ويصدق خبر الانتكاسة الذى بنى على اعتبار ما سيكون واطلق هكذا دون اى تفاصيل تؤكد صدقه من عدمه .!
فما بال هؤلاء ..!!
شكرا عباس محمد الصحفي الشجاع والمبادر لكشف الحقائق فى وقت آثرت فيه بعض الصحف والمواقف الاستسهال والكذب حتى فارق الناس احترامهم للصحافة..

#داليا_الطاهر |#Dalia_Eltahir

Post: #3
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 07:57 PM
Parent: #2

و كذلك :-
Quote: كتب عباس محمد:

الشرطة أطلقت سراح الشباب بالضمان لحين صدور تقرير الأدلة الجنائية. ومدير المباحث في الولاية ابلغهم انهم سيعقدوا مؤتمرا صحفيا بعد صدور التقرير.
وان توقيفهم كان غرضه الحماية وأنهم غير مستهدفين من جهة نظامية .
الشباب سلموا الشرطة جميع الأجهزة وشرائح الذاكرة كتب الرقمية والهواتف كمان، و نسخة من التصوير للفلم المعروض على يوتيوب خام (كمان).
بعد اكتمال الإجراءات كلها الشباب حيعملوا مؤتمر صحفي وحيتخذوا إجراءات قانونية تجاه الجهات التي اتهمتهم ولفقت تجاههم أخبار عارية عن الصحة حسبما أبلغني أحدهم .
📌 بين جميع الموقوفين لا توجد أي سيدة أعمال أجنبية.. الأجنبية الوحيدة شابة كومبارس تعمل في بيع الشاي ظهرت في لقطة الفلم وأفرج عنها. المهتم يراجع الفلم على يوتيوب
الأهم جدا البلاغات المدونة كلها تحت المواد ٧٧ و ٦٦ و ٦٩. ويقول ليك (دعارة) راجع أنواع البلاغات صورة مرفقة.

#طلس_الكنغولبة

Post: #4
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 07:59 PM
Parent: #3

و برضو :-
Quote: وكيل النيابة في بلاغ فبركات الانتباهة هو عبدالرحيم الخير!!

نعم حافظ صاحب بلاغ ويني عمر ايام النظام البائد هل تذكرونه ؟
هل ورد على بالكم الآن انها معركة حقيقية بين النظام البائد بكذبه وتدليسه وفبركاته وبمعاونه منسوبيه داخل اجهزة الدولة وبين الثورة بقيمها واخلاقياتها وانتصارها للخير فى النفوس ..
النظام البائد Vs الثورة
من ينتصر ؟
هل يقدر النظام البائد عبر منسوبيه فى الاجهزة العدلية والنيابية من تسويف البلاغ وممطالته حتى يتراكم عليه غبار النسيان ام تنتصر قيم الثورة فى اعلاء قيمها وانحيازها للعدالة فى كشف الحقائق وإنصاف المظلومين..
نتابع عن كثب وسأوافيكم بالمستجدات..

#داليا_الطاهر |#Dalia_Eltahir

Post: #5
Title: Re: ***** قصة السيدة الكنغولية (داليا الطاهر) *****
Author: HAIDER ALZAIN
Date: 03-30-2021, 08:02 PM
Parent: #3

Quote: الأهم جدا البلاغات المدونة كلها تحت المواد ٧٧ و ٦٦ و ٦٩. ويقول ليك (دعارة) راجع أنواع البلاغات صورة مرفقة.


ما شايف صور مرفقة لكن امر القبض والبلاغات كانوا متين ! بعد نشر خبر الصحفية والا قبله ؟

Post: #6
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 08:43 PM
Parent: #5

اهو دي يا الطريفي :-


Post: #7
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-30-2021, 09:08 PM
Parent: #6



Post: #8
Title: Re: ***** قصة السيدة الكنغولية (داليا الطاهر) *****
Author: Asim Ali
Date: 03-30-2021, 09:12 PM
Parent: #6

سلام عليكم
ماعارف ليه الناس ماوقفت عند اقل شىء جنسيه السيده المزغعومه قبل كل شىء .فمهام زى دى تحتاج شخصيه اقل شىء شخصيه تعرف التواصل والمحادثه بلغه متداوله فى البلد الهدف (الانجليزيه او حتى عربيه مكسره) تسهل الاندماج والاتصالات واحتاروا جنسيه لغاتا بين الفرنسيه والهولنديه (حسب الكونقو كينشاسا او برازافيل).
طبعا خلاف عدم اعتياد مجتمعات المنطقه على ثقافه اشاعه الاباحيه كصناعه منشوره ومتداوله عبر وسائط باختلاف ورقيه او الكترونيه رغم ان الجنس فى كثير من مجتمعات افريقيا ومنتشر كسلوك ضمن العلاقات خارج اطار الزواج او الدعاره كمهنه

Post: #9
Title: Re: ***** قصة السيدة الكنغولية (داليا الطاهر) *****
Author: HAIDER ALZAIN
Date: 03-30-2021, 09:18 PM
Parent: #6


مافي تاريخ ظاهر في الصورة دي كان ما اكون عمشَت
لكن بسال عشان اعرف نقطة انه المباحث والنيابة إتحركت بعد نشر خبر الانتباهة..
لانه الخبر بيقول دعارة وعمل ثقافي!

يعني النيابة عندنا بتقبض وبعدين توفق اوضاعها و تبتزاك بالقانون الا كيف ؟!

Post: #10
Title: Re: ***** قصة السيدة الكنغولية (داليا الطاهر) *****
Author: يحي قباني
Date: 03-30-2021, 09:26 PM
Parent: #9


Post: #11
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 03-30-2021, 10:00 PM

قودوني إلى النور
بقلم الحائر أ م ع
_______________________

عاوز لي شورة مهببة ومافي مهببين أكتر من رواد البوست دة
أنا قاعد اتطوع في المنظمات كتير .. يعني كل ما ألقى روحي فاضي بدخل مواقع التطوع واقدم في الفرص المتاحة
وبشيلوني طوالي عشان أنا في شغلي متقدم رأسياً .. يعني مركز كويس ماشي في مجال واحد متخصص فيه ما مجدع مجهودي في المقابضة
الليلة جاني إيميل دعوة لي اجتماع بخصوص فرصة متاحة .. قلت دي واحدة من الفرص القدمت ليها قبل يومين لمن كنت فاضي قبل ما يلخمونا بنهاية العام الدراسي القرروها الاسبوع الجاي وخلونا نتجارى بين الامتحانات والتقارير
دخلت الاجتماع شاب جذاب اتونس معاي كتير وشغال لي أحكي لي عن نفسك وامكانياتك .. ياااا عمي هو أنا داير اخدمكم مجان وانت براك شايف البورتفوليو بتاعي ما تقعد تتصعلك علي بس أشروا لي على الشغل واقعدوا فراجة
شغال طبعاً دة لقاء تمهيدي وحيلتقي بيك المدير الفلاني لمدة ساعة وبعديها حأرجع ليك أنا تاني .. ديني أنااااا يا عمك أنا وراي نهاية سنة دراسية وما عندي زمن اتنفس ذاتو تقعد تقول لي اجتماعات وبتاع!!
صبرت ليه زي ربع ساعة كدة وبعديها قلت ليه معليش انا عندي محاضرات ممكن ارجع ليك لاحقاً ؟ قال لي لا لا ما ضروري خلاص بنرسل ليك إيميل فيه تفاصيل اللقاء مع المدير بس عاوز اتأكد من معلومة منك .. انت طلبت مرتب 3000 دولار؟
الله؟!! مرتب ودولار ديل شنو كمان! قلت ليه أيوة
هو أنا لاقي!! ما شغل اونلاين في وقت الفراغ .. أصلها المنظمات الطوعية دي كدة
سألني تاني متأكد من المبلغ؟
وحاة الله لا متأكد ولا متذكره ولا متذكر منظمتكم دي ذاتها شنو ولاقتني وين! قلت ليه أيوة متأكد
هسة جاني إيميل بلقاء مدير الشركة في الأيام الجاية ومفروض أعزل زمن وبتاع
أخدني الفضول شلت اسم الموقع الفي الأيميل ولصقته في المتصفح
أكااااااان تطلع شركة أمريكية وما منظمة طوعية .. وعندها فروع في دول كتيرة منها السعودية وإنه الوظيفة فل تايم وإنه الوصف الوظيفي بتاعها بكورك يا أحماااااااد ياهو دة تخصصك بالكربون
وحاااااااة الله ما متذكر إنه موقع الشركة دة لاقاني في أي مكان ولا متذكر إني قدمت للوظيفة دي بالذات .. مرات بقعد أدوس ساي في linkedin لمن القى الخيار بتاع easy apply أقول انا خسران شنو!
دي حكمة واحد عريبي زميلنا في الجامعة بس ما يقعد مع بت دقيقتين إلا يقدم ورقه .. تقول ليه يا عمك ياخي ما قلنا ليك ما تتواسخ لكن مهد للموضوع شوية ما بتنفع الطلاشة دي يوم بتجيك كارثة يقول ليك حياتكم دي كلها سمعتولكم بي شحاداً كسرو له قرعته! يا أدوك يا قالو لك الله كريم
أها نرجع لي موضوعنا الشغلة دي النصيحة حقتي تب وامكانياتي بتسدها وتدفق وهي ما شغلة ساهلة نهائي أنا شفت لبناني هنا شغالها بي 27 ألف ريال
أخرخر؟ اتجرس واقول ليهم أنا والله كنت قايلها شغلة بسيطة؟
وهل بقبلوا الخرخرة بعد كتبت المبلغ بي نفسي بحسب روايتهم .. أنا وحااااة الله ما متذكر .. وكمان بعد سألني مرتين؟
وكان رفضوا أنعل أبو خاشها وارضى عشان دي وظيفتي البحبها بدل التدريس وإني حأكون شغال مع امريكان في شركة أمريكية ممكن ترسلني أي دولة تانية بدل أقعد تحت رحمة العقالات

المهم في انتظار آراءكم المهببة يا مهببين وانا ذاتي كان ما مهبب زيكم أقعد أدوّس في الأزرار من طرف!!!
لا تبخلوا بنصائحكم اللي غالباً ما حأشتغل بيها

المعذب أ. م. ع

Post: #12
Title: Re: ***** قصة السيدة الكنغولية (داليا الطاهر) *****
Author: محمد البشرى الخضر
Date: 03-30-2021, 10:26 PM
Parent: #11

اقبل ياخ وبعد اول سنة شهور اطلب علاوة
(رسل الهيستوري بتاع اللنكات العفصتها خلال الشهر الفات)

Post: #13
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 03-31-2021, 07:50 AM
Parent: #12

والله يا محمد عمري ما احترت زي ما انا محتار هسة
وظيفة الأحلام مافي أي شك
بل هي السبب الأساسي في إني بقضي أغلب وقتي في التطوع عشان بس أمارس وظيفتي البحبها
حاجة كدة الزول ممكن يبدع ويتجدع فيها بدل القرف والرتابة بتاعة وظيفتي الحالية اللي ما فيها أمان وظيفي بي تعريفة .. طوال السنين الفاتت دي كنت بوادع زملائي البتجيهم ايميلات إنهاء التعاقد بسبب الإحلال ومرات ساي كدة .. دة غير المجزرة السنوية بتاعة عقدوا ! أقصد جددوا ؟ كل السنة الناس تقعد تضرب في الاحتمالات وتلقط في الشمارات حيجددوا لينا ولا لأ

نعم أي حرف مكتوب في متطلباتها موجود عندي وموثق بالشهادات المهنية والخبرة العملية والممارسة اليومية .. لكن I am not special ما عبقري زماني
وزي ما وصلت الشورت لست أكيد وصلوا معاي عشرات من مختلف أنحاء العالم. وفي حاجات كتيرة بفتقدها زي مهارات التواصل مثلاً والايتيكيت وردود الفعل الراقية واللغة الانجليزية الظابطة. لذلك اعتقد إنه السبب الوحيد الممكن يخليهم يشيلوني دوناً عن المعلمين هو الراتب المنخفض
لكن في نفس الوقت أنا بفتح الشاشة بطلع ليهم مشاريع كتيرة أنا شغالها عن نفس الحاجة الدايرينها وهسة مدورة وبتخدم ناس كتيرين .. يعني بدل يقعدوا يقيسوا كفاءتي بالخيال وهل خبراتي بتكفي للوظيفة ولا لأ بشوفوا الوظيفة نفسها قدامهم وبقدروا يقيسوها ويعرف مستقبل أنظمتهم في يدي .. بمعنى أنا ما حأجي زي الشوام والمصريين بالبدل الغالية والشعر المفرود واعتمد على الحنك في الإقناع .. جاييهم كنظام شغال أكتر من زول قاعد قدامهم. بالتالي شايف إنه دي فرصة مثالية لي طلب راتب عالي ممكن ما تتكرر تاني.
أنا لو مسؤول التوظيف بتحمس للشغله جاهز قدامي على الطبيعة أكتر من المكتوب على الورق
مرات أقول أصلاً مافي أي ضمان إنهم يشيلوني حتى بالراتب دة فالمانع شنو أطلب زيادة! ما هو كدة كدة مافي ضمان
ومرات أقول أفضل اديهم احساس إني راجل ملتزم بي كلمتي وأقبل بالراتب وأقعد في عسى ولعل
حيرة من أمها

Post: #14
Title: Re: ***** قصة السيدة الكنغولية (داليا الطاهر) *****
Author: HAIDER ALZAIN
Date: 03-31-2021, 08:28 AM
Parent: #13

اذا اللبناني شغالها ب 27 الفخلي يرسلوا ليك العرض مكتوب وبعدين ارفض. قول ليهم مبلغكم ناقص زيرو...
كان قالوا ليك في المقابلة قلت 3000 اتحجج بالاكسنت واختلاف الثقافات ؛) )

المهم ما تقبل فرق قدر دا

Post: #15
Title: Re: ***** قصة السيدة الكنغولية (داليا الطاهر) *****
Author: HAIDER ALZAIN
Date: 03-31-2021, 08:32 AM
Parent: #14

بس اتاكد من حاجة مهمة.. هل الشركة فعلاً امريكية والا كنغولية !!

عشان باكر ما يجيبوك في الجرايد وتقعد تشبكنا انا ومنظمات طوعية واعتصامات وبتاع ؛)

Post: #16
Title: Re: ***** قصة السيدة الكنغولية (داليا الطاهر) *****
Author: Salah Zubeir
Date: 03-31-2021, 09:24 AM
Parent: #15

بوست إستقصائي مهمة كدا تعملوهو بيت بكا زي دا ...
إنتا يا أ.م.ع. غشامتك باينه ساعة رددو ليك سؤوال ال
٣ ألف دولار وتستحق عليها قرصه (في)* وركك ...
طيب ترجع تقول ليهم بقبل بي :-
٣ ألف دولار ك basic salary
1800$ monthly housing
500$ monthly health care
500$ monthly transportation
Education fees for 3 children
--------
--------
---------- إلخ
ممكن بالراحه ال ٣ تبقى ١٠ ... المافي شنو ...
وبي كدا تكون كبرتا في نظرن ... بس امسك في
ال ٣ ألف دي basic salary وما تفصح عن الباقي
لأمن تتأكد إنهم بقو عليك .... فهمتا يا جنا العوض ...

Post: #17
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 03-31-2021, 10:08 AM
Parent: #16

النصيحة يا حيدر اللبناني وش راغب علامة وشعر توم كروز النازل في الكتف داك ولهجة توم هانكز وبِدل جورج كلوني دة غير الابتسامة 24 ساعة والتعامل اللذيذ واحترام كل الناس من أجعص مدير لحدي البنغالي عامل النضافة .. جاي من امريكا وغالباً بكون عندو جنسية ومحنك الخواجات المسؤوولين عن الأنظمة بانجليزيه العجيب والآكسنت الما سائلة في أخوج خواجة
يعني مجرد وضع امكانياتي الفنية قصاد امكانياته ماااا بكفي الزول دة تاميها كاريزما وعلاقات واجتماعيات وحنك

أقسم بالله يا صلاح الزبير أنا ما عارفها ذاتها شركة وموقعهم دة أول مرة أشوفه في حياتي ولو ما اتكلموا معاي بي اسمي الكامل كنت بحلف ليك إني ما قدمت فيها ذاتو .. وهو لمن بسأل فيني 3000 دولار افتكرته زي الدعم البدوهو في بعض المنظمات الطوعية للناس البشتغلوا معاها .. هسة في منظمة بتحول لي 60 دولار شهرياً اسمها بدل تكلفة انترنت والناس البشتغلوا في الـ UN كمتطوعين في الحقل ما اونلاين بدوهم 2000 دولار في الشهر .. وحااااة الله ما قايلها راتب نهائي
لكن فكرتك ظااااااابطة .. بس انت حليتها لي بموضوع الراتب الأساسي دة
لكن انا ما طماع كان وصلوها لي 5 بزغرد :)

بالنسبة لي إنهم باقين علي ولا لأ غايتو إلا أمشي اطبزها بي صناجتي براي .. لكن الله أعلم! معقولة بتاع الـ HR يلاقيني ربع ساعة ويلاقيني المدير بعده ساعة ويقول لي أنا حأقابلك تاني بعد لقاء المدير لمدة ربع ساعة ويكونوا لسه ما باقين علي ؟!!!! ديل إلا يكونوا فاضين شغلة ساي :)
هل بنستر معاهم في معاينة الساعة دي؟ اللاااااااااااااهو أعلم :) أصلي ما مطمئن

Post: #18
Title: Re: ***** قصة السيدة الكنغولية (داليا الطاهر) *****
Author: محمد البشرى الخضر
Date: 03-31-2021, 10:45 AM
Parent: #17

والله يا احمد عبارة دا الشغل اللقيت نفسي فيه تستاهل التضحية! ياخي في زمن ان لم تعمل بما تحب فاحبب ما تعمل دي فرصة لا تعوض.
عموما نصيحة ود الزبير كويسة ناور بيها لكن ما لدرجة تكسر القيفة*
حاحي بيها شوية شوية لغاية ما تعبر وتنتصر😀
بالنسبة للمقابلة عادي اي مؤسسة على الاقل بتشورتلست اتنين لو ما تلاتة و البدجت بكون عامل حاسم في المفاضلة اذا تساووا في الناحية الفنية وعادي يكون في مرشح بعدك ممكن يكون اتفوق عليك بالجل و الكرافتة لكن انت بدجتك احسن، فا لو كسرت القيفة* برجعوا ليه.

_____________
* دسكليمر:
كسر القيفة: تعبير لا معنى له وليد اللحظة من بنات افكاري ما في زول يسألني معناه شنو!

Post: #19
Title: Re: ***** قصة السيدة الكنغولية (داليا الطاهر) *****
Author: Ahmed Yassin
Date: 03-31-2021, 02:40 PM
Parent: #18

ابوحسين وشركاه
طبعا انا من فترة شفت ا. م. ع لابس بدلة كنغولية ؟

Post: #20
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 03-31-2021, 03:12 PM
Parent: #19

احمد ياسين زولكم دا فيه شبه شديد من حاتم إبراهيم

Post: #21
Title: Re: ***** قصة السيدة الكنغولية (داليا الطاهر) *****
Author: Ahmed Yassin
Date: 03-31-2021, 03:33 PM
Parent: #20

Quote: احمد ياسين زولكم دا فيه شبه شديد من حاتم إبراهيم

اهههههههه
بس صاحبنا دا اتخن من حاتم

Post: #22
Title: Re: ***** قصة السيدة الكنغولية (داليا الطاهر) *****
Author: MOHAMMED ELSHEIKH
Date: 03-31-2021, 03:57 PM
Parent: #21

نيابة الخرطوم شمال اصدرت بيان كذبت فيه الاشاعة

ابوحسين جيب البيان لو سمحت هنا من بوست بريمة
وتوقيع ود البشرى


"وكل ارضا تشرب ماءها"

Post: #23
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-01-2021, 08:56 AM
Parent: #22

Quote: بس صاحبنا دا اتخن من حاتم

في تطابق كبير في الجينات رغم الحرفنة البحاول يخلق بيها فارق .... 😂😂😂

Post: #24
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-01-2021, 09:09 AM
Parent: #23

و كتبت ايضا داليا الطاهر في صفحتها على الفيس :-
Quote: 📌نيابة الخرطوم شمال : أثبتت التحقيقات عدم وجود سيدة كنغولية و ما نشر في صحيفة الانتباهة شائعات.

📌نيابة الخرطوم شمال توجه بشطب الدعوة في مواجهة الفنانين الشباب، وتفتح دعوى ضد سيف الدولة عبد الواحد يتبع للمخابرات العامة بتهمة نشر أخبار كاذبة كونه قام بتمريرالخبر لصحيفة الانتباهة و نفس التهمة إلى الشابة سارة.

📌النيابة العامة : الأدلة الجنائية أثبتت عدم وجود أي مواد مخله أو تصوير لأفلام إباحية.

📌 نيابة الخرطوم شمال تمنح الإذن إلى أي متضرر من النشر بتقديم بلاغات

#طلس_الكنغولية
#داليا_الطاهر |#Dalia_Eltahir

Post: #25
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-01-2021, 09:17 AM
Parent: #24



Post: #26
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-01-2021, 09:20 AM
Parent: #25




Post: #27
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 04-01-2021, 10:11 AM
Parent: #26

Quote: في تطابق كبير في الجينات رغم الحرفنة البحاول يخلق بيها فارق
ياخي الموضوع دة حسمو المستنير زمان وانا اعترفت .. انت ياداب جاي تحلل وتستنتج



_________________
كنت عاوز اكتبها ليك المداخلة دي باليوزر التاني لكن داك حده مداخلة واحدة في اليوم

Post: #28
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 04-01-2021, 10:19 AM
Parent: #27

المهم
قابلت الخواجة مدير مشروع الـ IT لمدة ساعة ووريتو الطفى النور منو
أديتو كمية من المعلومات والاستراتيجيات الما بعرفها .. ما قصدي أجهله لكن هو بسألني عن رأيي بقوم بقول ليه في طريقة أسهل وأكثر أماناً وهي كيت كيت كدة يقوم ينطط عيونه ويقول لي دقايق البتاعة دي أول مرة أسمع بيها ويفتح قوقل يفتشها
في النهاية قال لي انت زول creative شديد وخبراتك أعلى بي كتير من شغلنا اليومي المتكرر .. أنا شخصياً حألجأ ليك كتير عشان تضمن لينا حلولك الجديدة دي لكن نحن هنا بنأدي في مهام - واعذرني على اللفظ (دي قالها هو) - donkey work بنكرر نفس الحاجة مرات ومرات عشان كدة الشغل دة ممكن يكون فيه ظلم كبير ليك


أها كدة الموضوع نفّس خلاص ولا لسة فيه باقي أمل؟

Post: #29
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-01-2021, 11:01 AM
Parent: #28

Quote: ياخي الموضوع دة حسمو المستنير زمان وانا اعترفت .. انت ياداب جاي تحلل وتستنتج

انا ما عارف المستنير عمل شنو ... و ما عارفك انت اعترفت بي شنو ....
Quote: كنت عاوز اكتبها ليك المداخلة دي باليوزر التاني لكن داك حده مداخلة واحدة في اليوم

حصل خير ....

Post: #30
Title: Re: ***** قصة السيدة الكنغولية (داليا الطاهر) *****
Author: HAIDER ALZAIN
Date: 04-01-2021, 07:53 PM
Parent: #29



يعني نسقف على كدة والا كيف ؟

Post: #31
Title: Re: ***** قصة السيدة الكنغولية (داليا الطاهر) *****
Author: محمد البشرى الخضر
Date: 04-01-2021, 08:13 PM
Parent: #30

نفس يا الشليق! نفس يا العشا بلبن! اصلو فلسفتك دي ما بتخليها قايل رقبتك في سودانيز وبتغالط في عمر التاج!!
اها ياها زاتها قصة ما بنلقى احسن منك لكن البت عايزة تتم قرايتها! اداك ليها في يدك!

Post: #32
Title: Re: ***** قصة السيدة الكنغولية (داليا الطاهر) *****
Author: أحمد محمد عمر
Date: 04-01-2021, 08:40 PM
Parent: #31


وحاة الله ما غالطت لكن هو براهو متحسس
شابكني انت عارف المعلومات دي كيف؟ أنا شغال في الموضوع دة سنتين ما لاقتني!
قلت ليه لا لا بس أنا شغال فيه أكتر من كدة عشان كدة مريت بالحاجات دي

بتاع الآي تي قال لي عندنا معاينات تانية وغالباً الموضوع بياخد 3 أسابيع
وبتاع الـ HR اللاقاني بعدو قال لي يا إما الخميس الجاي يا إما بعدو بي شوية

يلا .. زي ما جات بجي غيرها
ويبقى الأمل
ظبطت ظبطت كان ما ظبطت يكون الخواجة فقد المنطق

Post: #33
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-02-2021, 01:36 AM
Parent: #32

Quote: يعني نسقف على كدة والا كيف ؟

لسه بدري يا الطريفي ....... 😂

Post: #34
Title: Re: ***** قصة السيدة الكنغولية (داليا الطاهر) *****
Author: جلالدونا
Date: 04-02-2021, 01:41 AM
Parent: #33

يعنى هسّى بريمة ده يخش وين

Post: #35
Title: Re: ***** قصة السيدة الكنغولية (داليا الطاهر) *****
Author: ABUHUSSEIN
Date: 04-02-2021, 05:46 AM
Parent: #34

Quote: يعنى هسّى بريمة ده يخش وين

صعب ياخ اقول ليك نحن عندنا صباح جمعة و الامة مجتمعة ... 🎶🎵🎶🎵