حرب الإشاعات

06:00 AM March, 25 2021

سودانيز اون لاين
محمد أبوالعزائم أبوالريش-
مكتبتى
رابط مختصر

بعد إمتصاص صدمتهم الأولى وبعد ما استوعب الكيزان إنه السلطة ضاعت منهم بدأوا يرموا بعض الأخبار/ الإشاعات الخيبانة هنا وهناك ... وبعد ما تأكدوا إنه الثورة ما حتبطش بيهم زي ما كانوا بيبطشوا بالناس، الحكاية بقت منظمة ... إشاعات تضرب المواطن (بشكل أساسي الشباب) في دينهم وفي أخلاقهم وسلوكياتهم.
طبعاً ما نسوا يشتغلوا في معاش الناس، زي الدبلجة العبيطة الطلعت أمس بتقول إنه أثيوبيا وقفت إمداد الكهرباء، عشان كده الكهرباء حتكون للقطاع السكني ساعة واحدة في اليوم.

طبعاً الإشاعات الفكوها أثناء الإعتصام وشيطنة المعتصمين كانت شكل مبكر للمسألة دي، لكن وقتها كانوا بيحلموا إنه الحال يرجع زي ما كان ... الآن، بعد ما الثورة أصبحت واقع غصباً عنهم، شغالين بشكل ممنهج لضرب الحكومة المدنية ... وفي كل مرة يطلع لينا واحد يسمعنا نغمة (دي المدنية العايزينها؟).

إستفزاني، زي ما استفز كتيرين، مقال (المتصوحفة) هاجر سليمان الأخير في الإنتباهة القالت فيهو ((إنشاء موقع للجنس السوداني.. سيدة أعمال أجنبية بالخرطوم لتصوير أفلام إباحية)) ... ففكرت في رصد ومحاولة حصر الإشاعات القامت لشيطنة المواطن السوداني، سواء في الصحف أو في مواقع التواصل الإجتماعي.

طيب يا جماعة، أول إشاعة كانت شنو؟

سمعنا إنه تم فتح بلاغ في هاجر سليمان والإنتباهة.
هل من تأكيد أو نفي؟