افضل شركة تحويلات مالية ليست ويسترن يونيون ، هى شركة :-

12:47 PM March, 16 2021

سودانيز اون لاين
النصرى أمين-كالغرى, كندا
مكتبتى
رابط مختصر

TransferWise
التى غيرت اسمها الأسبوع الماضي الىWise
التفاصيل نهاية اليوم

انا بتعامل مع الشركة دى لى كم سنة و داسى الموضوع من الناس لشء فى نفس يعقوب
لكن سودانا الحبيب يستاهل كل خير ..
الشركة لا تتعامل بالكاش .فقط من حساب لحساب برسوم بسيطة جدا

حاليا معظم دول العالم ضمن شبكة الشركة للاسف السعودية و السودان الشغيغ ليسوا فى القائمة

سلام النصرى
1. لا تتعامل بالكاش.. بالبنك فقط .. وستن يونيون تتعامل بالاتنين. (معظم السودانيين ما عندهم حسابات بنك)
2. خدماتها لا تشمل السودان.. وستن يونيون تشمل السودان.
3. زمن استلام التحويل غير معلن لهذه الشركة.. وستن يونيون فى 15 دقيقة

طيب كيف تكون افضل.؟

افضل يا محمد لانها ارخص و لان تحويل الحساب للحساب افضل من جهجهة الكاش.

عندهم ميزات كتيرة ، مثلا انا ممكن يكون عندى حساب بنكى بالاسترلينى ، اى زول فى انجلترا ممكن يودع فى الحساب ده بدون رسوم .

صدقنى الشركة دى احسن من ويسترن يونيون خاصة للناس المنظمة فى تحويلاتهم كوش ناس الكواسير و التحويلات العاجلة.
الويسترن يونيون للناس الكشا مشا ؛ لكن (شركتى ) للناس القيافة و رايقه

انا الحين قبل اسبوعين رسلت مبلغ لبورتسودان.. بتطبيق وسترن يونيون فى التلفون.. وانا ماشى فى الشارع
الزول مشى واحد من مكاتب وستن يونيون فى المدينة وبعد شوية ناس وستن يونيون رسلوا لى إشعار انه زولك استلم القروش.. كل دا ب 7 دولار فقط

بعدين لو شفت سودانى (من ناس جوة) فايق ورايق ادينى خبر وعندى ليك دولار

طيب يا محمد انا رسلت مبلغ صغير بالويسترن يونيون قبل اسبوع ولغاية هذه اللحظة ما تم الاستلام.

المستلم لازم يمشى البنك قبل صلاة الفجر عشان يستلم بعد العصر و كمية ضخمة من الفورمات ده كله عشان تنزل فى حسابه ...
عذاب قبورة عديل ..
بعد الناس المقصودة بالرايقه هم ناس امريكا و كندا

نعم صدقت يا النصرى.. والمشكلة دى فى الخرطوم فقط.. الأخ فى بورتسودان قال فى وكلاء وسترن يونيون (ما بنك).. عندهم مكاتب وخاتين لافتات وسترن يونيون الصفراء.. ولما يجى دورك يخيروك
بين جنيه ودولار. وهذا شرط الحصول على التوكيل اعتقد.. وما فى أى فورمات.. وراهم الرقم فى الموبايل والبطاقة فقط ووقع بالإستلم واستلم القروش .
ناس الوكالات و(موظفين) بالخرطوم غاشين الناس ومعذبينهم بنفس الأساليب الفاسدة القديمة عشان يشغلوا الدولار فى السوق الأسود.. وتكون سمعت بحادثة وكالة مول عفراء قبل اسبوعين. السودانيين اللى هنا
فى أمريكا لو إتصلوا بال head quarters وسترن يونيون يسحبوا منهم الترخيص.. والكالات التانية يوقفوا العبث دا.. وكالات وسترن يونيون فى العالم كله ما فيها الوسخ دا.

عليكم بي دهب شيل منها تحويل ومنها تمويل لقراصنة الكاريبي الصواميل

انا برضو رسلت بالوسترن يونيون من اسبوع. قالوا ليها تستلمها
من بنك الخرطوم لانهم حولوها هناك!! ليه؟ ما في رد قالو ليها
دي السياسة الجديدة.. اتخيل.
لحدي اللحظة ما استلموا والله.
وزير ماليتنا كوووووز والموظفين الاتهامات بتحوم حولهم انهم
جزء من المشكلة والبنك في ذات نفسه اماراتي.. عليك الله دي
حالة بلد بعد رفع العقوبات الاقتصادية عنها!
نستاهل ونستااااااهل.. تاني ما ح احول لا ببنك لا قرف.
الويسترن يونيون ح ارسلهم عشان يعرفوا وكيلهم في الخرطوم
شغال كيف..
الفيديو دا قبيل النهار..

Quote: عليكم بي دهب شيل منها تحويل ومنها تمويل لقراصنة الكاريبي الصواميل

سلام منتصر
دهب شيل و شركات صومالية كثيرة موجودة بحولو بنسبة 5% من قبل 20 سنة, بس الوضع الان الناس بتتكلم عن دعم الحكومة عن طريق البنوك بالطرق الرسمية.
هل ناس الخارج و البنوك و الحكومة في الداخل up to the challenge to sustain this process
و نكون قدمنا خدمة لهذا البلد الذى يغنى فيه بعض الناس بتجارة العملة؟

يا اخوانا النصرى ومعتصم

الباندامك دا فى خرطوم الجن دى بس.. الأقاليم عادى تستلم فورا.. المواطنين فى الخرطوم ما عندهم أى قيمة إنسانية.. لا عند الحكومة التى تستخدم الرصاص وتقتلهم كلما رفعوا صوتهم عليها، ولا حتى عند الأفندية.

Quote: الباندامك دا فى خرطوم الجن دى بس

طالما في الخرطوم بس معناتها لسع
ما وصل مرحلة الباندامك و لا حتي وصل
مرحلة الإبيدامك , ممكن يكون يا دوب
في مرحلة الإندامك

معذرة على التأخير فى الرد
جرى و طيران الايام دى .

اهلا منتصر
دهبشيل شركة عملاقة فى عالم التحويلات وهى صومالية الصنع
لكن رغم انتشارها الفظيع فى كل العالم الا تعاملاتها كلها بالكاش .
عندنا فى كندا لديهم (وكيل او مكتب) فى معظم المدن الكندية ، اسعارهم "كعبة" جدا و لا يتعامل معهم الا المضطر .
انا تركت التعامل معهم من زمن طويل بسبب المشقة فى الذهاب الى مكتبهم فى الطرف الاخر فى المدينة و سوء سعر الصرف بتاعهم .

اهلا معتصم

انا زولى استلم بعد (ولادة) عن طريق الويسترن يونيون ، كانت تجربة قاسية لا أظن انى مستعد لتكرارها مالم يحدث تغيير فعلى فى عملية الاستلام.
الكوز جبريل ليس فى مصلحته تخريب الاقتصاد دعما للمشروع الحضارى .
لدى قناعة شخصية انه مجتهد فى خدمة الدولة لانه طموحه الشخصى أقوى من انتماءه للتنظيم المجرم .
من مصلحته يخدم البلد وليس تخريبها ، و اتمنى اكون على حق لانه الكوز ما عنده ضمان.

الكيزان ظهروا امثال المصرى امين ههههها

ديل افضل ناس واظن الاداره سودانيه ،، مكانبوم في بريطانيا

altras
التحويل عن طريق ابلكيشن وبدفعو كاش او بنكي

والله النصري من ما وصلنا هنا التحويل عن طريق الصوماليين رخيصين جدا والاستلام فى السودان بالامريكي كاش ولا يوجد تاخير اللهم الا يصادف يوم الجمعة في السودان أو إجازة فى السودان

سلام يا نصري
بعيدا عن موضوع البوست
بطارية العقارب دى اسمها
scorpion black light
اسعارها تتراوح من 15 دولار لى 80 دولار
و متوفرة فى امازون

اهلا معاوية
الترس شركة سودانية كاملة الدسم ، هم زبائنى من زمان لدرجة بقيت اعرف بعض الموظفين بالاسم فى مكتبهم فى لندن و اتكلمت مرة مع المدير
شغلهم سمح و نضيف و سريع لكن المشكلة اسعارهم مرات كتيرة ظالمة و لاتعكس السعر الحقيقى.
المشكلة الأكبر لأنها شركة بريطانيا و ليس لها حساب بنك فى كندا و أمريكا لا تقبل سوى الكرديت كارد
بقولوا انهم بقبلوا ال Debit Card لكن فى الواقع الخدمة غير متوفرة عند جميع انواع ال debit card ، انا مثلا حسابى مع بنك × و الديبت كارد غير مقبول عند الترس.

طبعا إستعمال الكرديت كارد فى التحويلات مضر جدا و مؤذى لانه يعتبر cash advance غير انه بيخرب ال Credit score بطريقة فظيعة .
لكن فى النهاية الترس نموذج لبزنس سودانى ناجح لانه يعتمد على التكنلوجية بس لازم يهتموا اكتر بسعر الصرف .
مرات عندهم سعر صرف الجنيه الاسترليني مقارب جدا لسعر الدولار الأمريكي وهو شي غير منطقي.
من الأفضل ان يعقدوا نوع من الشراكة مع الحكومة السودانية بحيث يكونوا قناة رسمية التحويلات

معليش ما قصدت افط زول لكن مداخلة معاوية بخصوص الترس شدت انتباهي شديد.



محجوب يا هبيب
الصواميل ديل بالرغم من الخدمة الكبيرة القدموها لينا فى تسهيل عملية التحويل للسودان لزمن
طويل لكن كان لابد من انهاء خدمتهم فى السودان.
الناس ديل استغلاليين لابعد درجةو اظن عملوا مليارات الدولارات من شغلهم فى السودان.
حان الوقت ان يغادروا و يتركوا البزنس لاصحاب الارض .
اتوقع من السلطات فرض قيود كثيرة عليهم و تقييد حركتهم بافتراض وجود بديل مناسب

اهلا محمد عثمان
ربنا يحفظ اهلنا فى السودان
من جميع انواع الديميك

اهلا الشريف
غايتو نحن فى كندا الصواميل ديل دايما بيسلموا جنيه سودانى و دايما سعرهم ظالم
حتى تحويلاتهم لمصر نفس حركات الحبرتجية.
حان الوقت ليرحلوا من السودان و ابدالهم بخدمات سودانية مثل البنوك او ويسترن يونيون او شركات مثل الترس البريطانية.
الصواميل عملوا قروش كفاية و حان وقت الرحيل مع الشكر الجزيل للخدمات طوال فترة الإنقاذ

يا جلالدونا
انا جريت جرى على امازون افتش نور العقرب السوداء ولم اصل لنتيجة
الحق بسرعة باللنك نشوف الشمارات.

انشغلنا بالتعليقات و نسينا موضوع البوست
شركة Wise للتحويلات شركة عملاقة و خدماتها ممتازة جدا ...
الهدف الان اضافة اسم السودان لقائمة الدول فى شبكة خدماتها ، هذه مهمة ليست بالسهلة
تحتاج مجهود و تضافر للجهود .
انا راسلتهم ولم يصلنى رد بعد .

طيب كيف تتم الخدمة عند هذه الشركة.

إجراءات التسجيل قاسية شوية ؛ المطلوب بطاقة هوية حكومية و صور pdf لفاتورتين مثل فاتورة الكهرباء او كرديت كارد.

لمن بديت اسجل معاهم زهجت من الصرامة الشديدة فى عملية ال verification
و هددت بالشكوى لدى قسم privacy فى احدى الإدارات الكندية الحكومية ، موظف الشركة بلطف وضح لى ان الإجراء مهم لحماية العملاء و ليس الغرض منه الحصول على معلومات شخصية ، هم فقط دايرين يتاكدوا ان صاحب الحساب هو نفس الشخص الذى يدعى انه هو 😁.
اقتنعت بالحجة بتاعتهم و قدمت كل المستندات المطلوبة للتسجيل
بعد داك الامور سلسة جدا ...
حتى فتح التطبيق فى الموبايل لا يحتاح لباسورد ؛ فقط تحتاج ادخال رقم سرى من أربعة ارقام.

عند ارسال التحويل تحتاج لاسم المرسل و البلد و البنك و رقم الحساب واعتقد إل swift نمبر..
التحويل درجات لكن معظمهم يصل تانى يوم .
اما الرسوم تقريبا حوالى واحد الى اتنين فى المية
و سعر الصرف ممتاز جدا ..
انصح اى زول يفتح حساب معاهم و يا ريت لو عندى لينك كنت ممكن استفيد من ال referrals ديل

كدى يا استاذنا النصري اعفص هنا و ده فيديو يوضح خصائصها