الخرطوم حقت أبو مينو؟ .. والله صحي!

05:10 AM March, 14 2021

سودانيز اون لاين
Biraima M Adam-أمريكا الشمالية
مكتبتى
رابط مختصر

الخرطوم حقتنا .. كلنا .. والله صحي.

ولدي نظرية .. تقول "الأنسان يمد رجله محل راحته" .. هذه النظرية ساقتني إلي النظر إلي الأحياء الأثنية .. كحل للاختناق الحاصل في العاصمة نتيجة لتزاحم الناس في حيز ضيق.

مثلاً: الكلاكلة صنقعت .. أنا أعتبرها حي أثني نوبي .. تمشي هنا تستمتع بلهجات شمال السوداني .. والتركينج .. والطنبور .. .. أمشي أم درمان أمبده .. تجد أهل الجبال .. أمشي سوق ليبيا تلقي زغاوية كحيلة .. وهكذا

وأيضاً .. تكون هناك أحياء قومية .. مثل أب روف .. والعباسية .. والسجانة .. والثورات .. الأحياء القديمة .. لشعبنا الذي أنصهر في البوتقة القومية ..


بريمة

وأنتم عارفين .. النفوس جنود مجندة .. لو أطايبت العنقريب بشيل نفرين .. ولو تنافرت بحصل الطلاق .. البيت كله لا يسع الزوج وزوجته.

طايبوا النفوس ..

بريمة

يا أستاذ بريمة تحيات ياخي

تاريخياً الخرطوم أول من سكنها من ؟

هل هم الجموعية ؟

أم المحس ؟

أعتقد كلام دقلو الخرطوم حقت أبو منو ليست في سياقها الصحيح..لأنه ليس هناك من منع شخص من الدخول للخرطوم أو الخروج منها الاعتراض على الدخول بسلاح..
معظم القادة كان مقيم في الخرطوم أو درس أو عمل فيها this is not the issue

في التأريخ الأنساني، المدن مناطق قومية .. Cosmopolitans .. ودا المقصود حقت مينو؟

دا ما بيمنع أن ملاك الأرض الحقيقين أن يكونوا مالكين ..أو تنزع ملكيتهم منهم .. العكس، مفروض يتم تعويضهم علي ما تأخذه الدولة منهم لصالح القومي.

نحن الحوازمة في كردفان والجمموعية في أم درمان أبناء عمومة .. ونحن نعتبر أول من سكنا منطقة جبل أولياء .. ثم رحلنا غرباً ..

لكن هذا لا يخول للجموعية والمحس أن يطردوا بقية سكان السودان ..


وشكراً أنك ذكرتني المحس في توتي .. جزيرة توتي .. جزيرة الفنان حمد الريح .. هى من الأحياء الأثنية العريقة ..


مازال موقفي ثابت .. الخرطوم حقت مينو؟ (بالمعنى القومي للكلمة).


بريمة

أصلا لم يدعي شخص أو قبيلة إنه البلد دي حقته ....ما في دولة في العالم بيتواجد فيها مسلحون على عينك يا تاجر ...هذا وضع شاذ.. وعبدالرحيم كلامه بيعني الكثير ..
وكويس إنه اتكلم عشان الناس تفهم و تعرف..

دكتور محمد عبد الله،

Quote: أعتقد كلام دقلو الخرطوم حقت أبو منو ليست في سياقها الصحيح..لأنه ليس هناك من منع شخص من الدخول للخرطوم أو الخروج منها الاعتراض على الدخول بسلاح.. معظم القادة كان مقيم في الخرطوم أو درس أو عمل فيها this is not the issue

يا دكتور محمد، من أجمل الحوارات التى مرت بي في حياتي .. حينما أوصاني خالي .. رجل أمي لا يكتب ولا يقرأ .. ولا له أي علاقة بالمدينة والمدنية .. عايش في الخلاء .. زرته في أخر زيارة لي للسودان .. وحينما ههمت بمغادرته قلت له خالي ما معروف الموت .. بماذا توصينى: قال لي أحفظ نفسك وأولادك .. ويدك ما تبقي خفيفة .. لكن مال الحكومة مال قارون .. لو لقيته "خم" وتعال!! .. أستفسرته: خالي أخذ مال الحكومة برضو خفة يد .. ولا شنو؟ .. قال لي لا .. الحكومة حقت مينو؟ . ثم زاد مال الحكومة مال قارون!

أها نفس الفهم، العاصمة حقت مينو؟ .. يا ها المنتزهات الفيها منتزهات عامة .. الشوارع مناطق عامة .. الميادين، دواوين الحكومة .. أي مكان يتحرك فيه المواطنون بدون قيد أو شرط مكان عام .. ويصح فيها تقول حقت مينو؟ النيل الجاري فيها حق مينو؟ .. كل زول من حقه ينزل البحر يستحمي ويمرق.


بريمة

حقت الهاشماب واولاد الموردة والتهجير القسري وقليل من الحلب والترك والفلاتة والجالية الهندية والاوروبية ايضا اغاريق
وحقيبة الفن وجلسن يا حلاتن
انت جابتك الخرطوم مجانية التعليم ومكتب القبول لقيت الترابي قايلو مايكل جاكسون قشرت بيه
وكملت رز وعدس وفاصوليا البركس يا ربيتير يا ربيتر انت مكوة انت هيتر
وجايي تنظر في الهوية االلسودانية
ناسك ديل لقو الخرطوم جاهزة وخلو الحامش
جون قرنق قال ليك خلي مكانك ذى الخرطوم في فتو برنو وكرنوي واضان الحمار مش تجي الخرطوم تجاور وتخلي اهلك في النزوح
انت جيت السودان ذاتو قبل 100 سنة بس وقرررررط علي كده يا دباب الدفاع الشعبي
https://top4top.io/

السلام عليكم
اخونا الاستاذ . بريمة
بناء الاوطان ، عادة مايتطلب تضافر جهود جميع ابناء البلد ، ونبذ المشاعر السالبه ، والعمل بتجرد .
المؤسف في الامر تنامي وعلو بعض الاصوات ، خصوصا بعد الثورة وافرازاتها التي تم فهمها خطأ ، فالبعض يعتقد ان المناخ الان مؤاتي ، لاخراج الاحقاد الدفينه التي ليس لها اساس من الصحه ، الا في عقولهم هم .
المنادة بتصفيه الحسابات ، ونفث سموم البغضاء والحقد الدفين ، الذي لايوجد له مبرر سوي الشعور بالدنيويه ، وان حقهم كان مهضوما منذ استقلال السودان وحتي الان ، ويعتقدون ان هذا هو الوقت المناسب لتفريغ تلك الشحنات السالبه .
ربما يكون هناك جزء من الحقيقة في تلك المشاعر السالبه ،لكن لو تعمقنا في الدواخل نجد ان السبب هم انفسهم بذاتهم.
المناطق التي تقول انها مهمشة ، ولم تنال حظا في اي شي ، كان اعتمادهم في الدرجة الاولي علي الحكومات المتعاقبه ، وفي نفس الوقت لم يساهموا حتي ولو بجزء يسير في تطوير الذات ومناطقهم ، رغم انها من افضل المناطق من ناحيه الانتاج ،وغنيه بكل شي .
للاسف اخي بريمه ، البحث دائما عن شماعه لتعليق الاخفاقات المتوالية ، لن يكون حلا ، ايضا الاستقؤاء بالمليشيات ، لن يكون حلا.
الذي يمر به السودان حاليا ، هي مرحلة ،وسوف تعدي ، وحتي الاشخاص نفسهم سيذهبون .
من جهه اخري ، احدي ازمات السودان المزمنه ، هم ابناءه ، خصوصا المثقفين منهم ،فمهما يصلوا لدرجات علميه رفيعه ، تجد ان النعرات القبيلة متاصله داخلهم ، ويقوموا بتصديرها ونشرها بقوالب مختلفه ،توحي للناس انهم كانوا مظلومين ظلم الحسن والحسين ، والان حان وقت الحساب .
السودان بلد كبير ، وبه عدد كبير ايضا من السكان ،والجميع يعلم ساعه التمترس خلف اهله ومجموعته ، فالمعادلة متكافئه ،والخاسر هو من شالته الهاشمية في لحظات طيش .
لاتعتقد ان الطرف الاخر ضعيف او هوين كما تقول .

Quote: كملت رز وعدس وفاصوليا البركس يا ربيتير يا ربيتر

حلة اللبن في شمبات .. كنت بسوي منها الزبادي (الروب) في الداخلية ..

ناس محي الدين من عطبرة، الشيخ حمد من جزيرة نسري في الشمالية، الواثق وعادل من الجنيد في الجزيرة، ومحمد حسين من العركيين من سنار .. كلهم بجوا يشربوا روب عندي!


زمن يا عادل زمن جميل .. كل شيئ ملح!

بريمة

الاخ بريمه

لا تكابر ساكت

كلام دلقو كلام عنصري و طالع من زول لا يعرف السودان ، نحن من شندي هاجرنا الي قري الجزيره فيها كل قبائل السودان ما سمعنا زول قال الحله ده حقت ابو منو .

بريمه انت زول فارس لا تنساق وراء كلام التفرقه و الازمات .

السودان للجميع بدون سلاح .

سلام بريمة الضبع
السودان لكل السودانيين و حتى الأجانب من حقهم العيش في السودان وفق القوانين و النظم
ايام ضرب الجفاف و التصحر السودان في منتصف التمانينات كنت شغال مندوب توزيع اغاثة
في منظمة ادرا السويدية , كنت مسئول عن منطقة غرب النيل الأبيض , بنمشي باللوري مليان
مواد إغاثية عيش ريغن حق المريسة قالو مريستو سمحة , و لبن بدرة و زيت و دقيق و ساردين
بكون في اليوم عندي خمسة قرى , بلقى منهم قريتين فقط فيها عقاب ناس باقي القرى اتزربت بالشوك
و اهلها نزلو البحر و دخلو المدن الكبيرة في شكل نزوح, و الحيوانات نافقة حول القرية في منظر مؤلم جداً
المسألة دي تسببت في أريفة المدن و الى الآن.
انا بشوف ان الناس النزحو للعاصمة او المدن الكبيرة واجهو صعوبات كبيرة في التأقلم لأن الوضع مختلف
اقليم دارفور من أكبر اقاليم السودان و أغناها من كل النواحي.و مساحته تعادل مساحة فرنسا
يجب على الحكومة مساعدة النازحين و اللاجئين في معسكرات تشاد و افريقيا الوسطى و النيجر و يوغندا
الرجوع لقراهم لتعميرها و ممارسة حياتهم الطبيعية , و الأهم هو انشاء مناطق للرعي لإنتاج علف الحيوان
و مناطق للزراعة,و اتمنى للعائدين حياة جديدة في مناطقهم مع توفير كافة الخدمات من مدارس و مستشفيات
و جامعات حتى لو استعانت الحكومة بمنظمات للتمويل.

السؤال واضح
الخرطوم حقت منو
مش السودان حق منو
السودان المعاق جنوبيا حق المخابرات المصرية وادواتها الرخيسة في المركز
يا بريمة
اقعد في كردفان بس وخليها زي الخرطوم
مش تجي تقعد في الخرطوم وتخلي اهلك في النزوح وتولول وتنبذ الشماليين الاذكياء وراكباك مصر والسعودية والامارات وقطر وتركيا
درويل رخيس زي ده قايل السلاح مافي ولي شنو
وعبدالرحيم دقلو الانتخبو منو ؟؟
السودانيين بجو بي الانتخابات
بس
والحثالة بي الانقلابات والمحاصصة
زول بليد زي ده يبيع 40000 جندي للامارات و300 طن ذهب ما يعادل 16 مليار دولار
وفرحان بي مستشفي في الضعين
بفيد السودان بي شنو من الاساس
يا حليل السيد عبدالرحمن والجنسية الخضراء
انا ما عندي مشكلة مع الاحذية دي
مشكلتي مع اللبسنها مصر والامارات والسعودية وقطر وتركيا الدول الناهبة للسودان
والمحترمين في دارفور عبدالواحد نور وموسي هلال فقط واركي مناوي لو مسك في الختمية قوي

وده راي المحاميد الشجعان في ال دقلو كلهم


القبائل قالت رايها خلي يقعد في الخرطوم ان شاء الله تضوي ليه
الخرتوم الابت الجنوبيين دي عودي فيها عود مرة
اوعكم تاني تقولو الشماليين \نحن حدنا جنوبا الرويان بس

زمن يا عادل زمن جميل .. كل شيئ ملح!

ايوه يعني ماكان في تهميش ؟؟؟؟؟؟؟

يا بريمة لماذا بترت كلام دقلو ولم تأتى بحديثه فى سياقه تماماً

السياق : كان حول الرفض الشعبى الواسع لتواجد قوات الحركات المسلحة داخل الاحياء فى الخرطوم
وكان ذلك بعد احتلال قوات مناوى لدار اللجنة الاولمبية بالخرطوم وطرد الموظفين من الدار وبدل استنكار هذا الامر
قال عبدالرحيم دقلو وبكل جهل وعدم تقدير موقف :
{ الخرطوم حقت ابو منو واضاف لو علي انا بمشي حتى مروي } وليته سكت ولم يتكلم !؟
حيث ابان كلامه انه انسان جاهل وامى وعنصري بمعنى الكلمة وليته يقوم بتعيين متحدث رسمي باسمه
بدل بهدلة واسقاط نفسه الى الحضيض . وكان من تداعيات كلامه الخرب هذا ان تداعى شباب مروى فى وسائل التواصل
الاجتماعى وقاموا بتهديده " يا ريت تجينا عشان نرجعك عريان "

هؤلاء هم الذين يريدون حكم السودان بمثل هذه الكلمات الفجة والعنصرية القبيحة .

لكن هذا لا يخول للجموعية والمحس أن يطردوا بقية سكان السودان ..
-----------------------------------------------------------------------------
بريمة ديما شايت غلط...... متى حصل ان قامت مجموعة عرقية بطرد مجموعة اخرى فى العاصمة؟ امدرمان الكثير من سكانها من الغرب و تعيش فيها كل الاثنيات السودانية بالاضافة للمهاجرين من الدول المجاورة من احباش واقباط وفلاتة وغيرهم كلهم عايشين فى سلام وامان عبر عشرات السنين تناسبوا وتزاوجوا واندمجوا حتى نسى بعضهم عاداتهم القديمة يجى راعى الابل المنحط المجرم عبدالرحيم دلقو ليتحدث عن عنصرية وتجى انت لتماهيه وتردد كلامو وانت تعلم مقاصده؟ عبدالرحيم بعد ان اسال دماء الحركات انهارا رفقة اخيه عايز يخادعهم بمقولة تعالوا ننسى الماضى ونتوحد ضد الجلابة لنحكم الخرطوم والسودان كله ادخلوا بسلاحكم واجعلوا من الحدائق العامة مراحيضا ومن يقل ادبه طلقة فى الرأس
عبدالرحيم حرامى إبل تربى على السرقة والقتل لكن انت باشمهندس وتعيش فى امريكا افلا تخجل؟

عليك نور يا ول هاشم كاروري

Quote: الذي يمر به السودان حاليا ، هي مرحلة ،وسوف تعدي ، وحتي الاشخاص نفسهم سيذهبون .

مداخلتك بكاملها .. مداخلة قيمة جداً .. عندنا في أمريكا هنا، حينما يُفهم الأنسان مخاطبيه .. يصمتوا عن الرد .. ويقال أن الرسالة يجب أن to stand..
لكن ما أعجبني مداختلك أنك ملم بظروف المرحلة .. وهذه المرحلة أنا أتخيلها زي السمكة التي قبضتها في يدك .. وأنت مازلت لم تخرج بها من البحر .. تحت أي لحظة ممكن تفرفر السمكة وتتملص منك تاني في الموية .. سمكتنا المسكناها دي عضوا عليها بالنواجز .. ما تجرفنا قبلية ولا جهوية ولا أي شيئ .. رؤوسنا مرفوعة نتجاوز بها الصغائر والضغائن وسفاسف الأمور .. إلي لب الموضوع .. وهو كيفية بناء وطن يشمل جميع أبناءه .. أهدافنا تكون أسمى وأقيم من الحضيض الجاري في الساحة ..

في عرف الأمريكان أي زول يقضي دورة في أرض المعركة .. أول ما يجئ راجع أمريكا يمشوا يعملوا له فحص نفسي .. لمرض ال PTSD .. وهو مرض نفسي مرتبط برؤية المأسي والدماء والموت .. الناس الذين تروهم مدججين بالسلاح ممكن يكون نصفهم يحملون بال PTSD ..! من قام بتوفير الفحص النفسي لهم؟ .. واحد في جنوب ضرب خاله بطلقه .. لليوم خاله أخو أمه حايم بعصا ..

أراكم نصحيح to fix this situation بطريقة نحفظ لهؤلاء المحاربين شيبة وشباب إنسانيتهم .. ونتجاوز عن هفواتهم .. ح نعبر لو ختنا الكورة وطاه.

بريمة

ألف شكر يا شباب .. بجيكم بعد الدوام ..
ما زلت مصر أن الخرطوم ما حقت زول .. وينطبق كلامي علي أي بقعة في السودان ما لم تكن مسجلها بأوراق رسمية كملك خاص .. (ودا أكثر كلام بأكل مع ناس دارفور أنفسهم بالجنبة).

بريمة

عجبتني قصيدة نقلها جقود
يا ربيتو ياربيتر
انت لمبة انت هيتر
انت للوري لديتر
وللبرنسة كاربوريتر


الربيتر اوع منو
كونو انو
اصلو انو
العميد متبري منو

الربيتر كبسة زاتو
راسو طبلة ماركه كاتو
من قباحتو ومن شناتو
مافي زولا قال حلاتو


حليل ذلك الزمن الجميل حيث لم اكن اعرف ان صديقي محمد مرغني شايقي
وعرفت ذلك بعد اكثر من ثلاثين عاما وفي عهد "الحمير الخمر"
حيث قابلت امه( المشلخة) في ابها !!!!


قال قبلية قال

Quote: وأنتم عارفين .. النفوس جنود مجندة .. لو أطايبت العنقريب بشيل نفرين .. ولو تنافرت بحصل الطلاق .. البيت كله لا يسع الزوج وزوجته.

ول أبا بريمة قول يا زول أنا كلامك دا بطربني جد عن جد ...

إلا المثل عندنا بقول ...
النفس إن طابت للنفس العنقريب بشيل ألف ...
والنفس إن ما طابت للنفس الفي العنقريب بقنت علي الفيى البرش ...

شوفتا كيف ...
أها الدعوات ربنا يطايب النفوس ...

الختم، ول أبا شيخ الزبير،
سلام ..

Quote: الاخ بريمه لا تكابر ساكت كلام دلقو كلام عنصري و طالع من زول لا يعرف السودان ، نحن من شندي هاجرنا الي قري الجزيره فيها كل قبائل السودان ما سمعنا زول قال الحله ده حقت ابو منو . بريمه انت زول فارس لا تنساق وراء كلام التفرقه و الازمات . السودان للجميع بدون سلاح

كتر خير علي الأطراء .. أول مرة أزور الشمالية .. كانت في إحد أعياد الأضحي .. قضيتها مع الجعلين في جزيرة نسري .. كانت الخالة والدة زميلنا الشخ حمد .. حبتني جداً .. تسوقني نجيب معها القش للغنم والحمير .. وإنا أستغل الفرصة أي شجرة بلح قايمة بروز .. أطقع منها البلح .. لأول مرة أعرف لو البلح شلته في جلابيتك، تانى كن تسغلها بكلوركس البقع ما بتطلع .. وأنا أخم والخالة تحاحي فيني .. ما بطلع من جلابيتك .. أنا الوحيد من المجموعة الخالات لقوني من خارج معرفتهم .. الناس التانين جايين من النيل وبتكلموا نفس اللغة .. البحر والجروف .. بقيت حديث الناس ومجالسهم .. لكن أكاد أجزم كمية الخراف التى أكلناها في عيد واحد .. لم تمر علي حياتي مثلها .. الجعلين شعب سوداني كريم .. وطيب المعشر ..

نجي للمكابرة .. في أخر مداخلتك أوردت أنت ان السودان للجميع .. وهذي تطابق .. السودان حق أبو مينو؟ .. المسألة ربما أختلاف ثقافات .. وهذا شيئ متعارف عليه في لهجة البقارة بغرب السودان.

الخلاصة: ليس هناك مكابرة .. هناك حساسية مفرطة .. علي ما يبدو في الوسط النيلي ضد الكلمة .. أو الناس تحاول تخرج حديث أمثال عبد الرحيم دقلو من سياقة لكي تقلل من صورته .. والناس عارفه بتعمل في شنو وهناك الكثيرين ما داسين حتى العنصرية الفجة ..

بريمة

ول أبا خضر،

Quote: قليم دارفور من أكبر اقاليم السودان و أغناها من كل النواحي.و مساحته تعادل مساحة فرنسا يجب على الحكومة مساعدة النازحين و اللاجئين في معسكرات تشاد و افريقيا الوسطى و النيجر و يوغندا الرجوع لقراهم لتعميرها و ممارسة حياتهم الطبيعية , و الأهم هو انشاء مناطق للرعي لإنتاج علف الحيوان و مناطق للزراعة,و اتمنى للعائدين حياة جديدة في مناطقهم مع توفير كافة الخدمات من مدارس و مستشفيات و جامعات حتى لو استعانت الحكومة بمنظمات للتمويل.

يا سلام .. والله يا خضر، أنا من السهولة بمكان أستشف الجانب الخيّر في الأنسان .. مهما يتمادي .. أنت والكوكو كلكس عادل .. لما ترسوا ناس سمحين وحلوين المعشر .. المشكلة التى تواجهكم عايزين كل الناس تفكر مثلكم .. ودا في سودان اليوم والغد يعد من سابع المستحيلات .. الناس طورت نظريات مهمة في تبادل المنافع .. والناس قطعت مشوار في فهم بعضها وفهم ميولات بعضها .. أجزم منذ أن هاجرت إلي الغرب ليس هناك شخص دعاني من غير السودانين وإلا سألنى ماذا أحب أن أكل أو أشرب .. في السودان، مازلنا في قديمنا .. مثلاً أنا وقّفت أكل بطبخ بسبب المصران .. مشيت لواحد .. لقيتو عازمني تور بطيخ .. قلت ليه إلا تضبحوه أنت ومرتك .. ! من السهولة بمكان تتضافر الجهود من أجل البناء في حال تفهم الناس بعضها البعض.

عودة النازحين ممكن .. لكن إنشاء مناطق للرعي والأعلاف صعب .. أنتم كأبناء مدن تظنون أن الرعاة مترحلين بسبب عدم وجود أعلاف .. الكلام دا ما صحيح، الرعاة لهم تراث رعوي يري الناس المستقرين هم الفقراء .. والرحل هم الأغنياء .. مالم الناس تثبر غور مثل هذا التراث وتمحاول عكسه، يصعب حتى تعليم أبناء الرعاة، ناهيك عن أستقراهم ..

بريمة

NEWSUDAN
سلام

Quote: ايوه يعني ماكان في تهميش ؟؟؟؟؟؟؟

السودان فيه تهميش من خلق الله البسيطة .. وح تظل الفوارق الأجتماعية والأقتصادية ما بقيت الحياة .. الله قال وجعلنا بعضكم لبعض سخريا .. أي الخالق سخر بعضنا لبعض نتيجة للفوراق الأقتصادية وغيرها حتى يستمر دولاب الحياة.
من الجوانب المهمة في الدين هو الجانب الأنساني .. أكرمكم عند الله أتقاكم .. لا لون لا جهة ولا مكان ميلاد ولا عرق .. التقوي وبس .. التهميش والعنصرية من عمل البشر ..

بخصوص الزمن الجميل .. والله لم أذكر أحد من زملائي في الجامعة سألني إن كانت لي قبيلة أم لا .. كل التوصيف البقولوه عني من الغرب من كردفان ..كردفاني .. أنتهي ..

أكثر حاجة كنت مغرم بيها .. بنات الشرق .. بالذات الأدروبيات .. يا أخي، زينة السودان في الأدروبيات المتعلمات .. ياي ياي ..! رغم تهميش الشرق.

------------------------------------
غريبة .. نسيت حرف الدال في أدروبيات .. طلعت أروبيات .. أتاري دا السبب هن حلوات حلاوة عسل ..!

بريمة

علاء سيد أحمد

Quote: يا بريمة لماذا بترت كلام دقلو ولم تأتى بحديثه فى سياقه تماماً السياق : كان حول الرفض الشعبى الواسع لتواجد قوات الحركات المسلحة داخل الاحياء فى الخرطوم وكان ذلك بعد احتلال قوات مناوى لدار اللجنة الاولمبية بالخرطوم وطرد الموظفين من الدار وبدل استنكار هذا الامر قال عبدالرحيم دقلو وبكل جهل وعدم تقدير موقف : { الخرطوم حقت ابو منو واضاف لو علي انا بمشي حتى مروي } وليته سكت ولم يتكلم !؟ حيث ابان كلامه انه انسان جاهل وامى وعنصري بمعنى الكلمة وليته يقوم بتعيين متحدث رسمي باسمه بدل بهدلة واسقاط نفسه الى الحضيض . وكان من تداعيات كلامه الخرب هذا ان تداعى شباب مروى فى وسائل التواصل الاجتماعى وقاموا بتهديده " يا ريت تجينا عشان نرجعك عريان " هؤلاء هم الذين يريدون حكم السودان بمثل هذه الكلمات الفجة والعنصرية القبيحة .

شوف التنبل البتدق فيه دا خليه .. تعرف التنبل؟ .. دا النحاس الصغير بتاع الحرب، عندكم ممكن يكون طار طنبور وكده .. أحسن توقفوه ..
أنتم عندكم شنو من السلاح لكي تقولوا نرجعك عريان؟ .. حتى المحاربين في الشمال لا يوجودون .. كلكم حلاقيم مشروخه ..

أبتعد من الأثارة .. والله نحن نعرف قدر أبناءنا في الدعم السريع والحركات المسلحة .. الناس ديل بخوضوا النار .. ونحمد الله أن جعلهم يجنحون للسلام ..

بريمة

علاء

علاء زولك دا .. لو الدعم السريع مشي الشمالية .. أول واحد تلقاه لابد .. وخايف يكون تحت السرير !! .. الحديد يواجه بالحديد .. مش بالحلاقيم المشروخة ..

أحد أصدقائي من الجزيرة أبا .. حضر ضربة النميري للجزيرة أبا .. قال لما المدفع لما المدفع قال بوونق .. عنده صحبه .. قام نط في السرير .. بوونق تاني .. شت إنحشر تحت السرير !! زولك العجيز دا قول ليه يحفظ بقية عضيماته ..

بريمة

أستاذنا حسن فرح
سلام

Quote: بريمة ديما شايت غلط...... متى حصل ان قامت مجموعة عرقية بطرد مجموعة اخرى فى العاصمة؟ امدرمان الكثير من سكانها من الغرب و تعيش فيها كل الاثنيات السودانية بالاضافة للمهاجرين من الدول المجاورة من احباش واقباط وفلاتة وغيرهم كلهم عايشين فى سلام وامان عبر عشرات السنين تناسبوا وتزاوجوا واندمجوا حتى نسى بعضهم عاداتهم القديمة يجى راعى الابل المنحط المجرم عبدالرحيم دلقو ليتحدث عن عنصرية وتجى انت لتماهيه وتردد كلامو وانت تعلم مقاصده؟ عبدالرحيم بعد ان اسال دماء الحركات انهارا رفقة اخيه عايز يخادعهم بمقولة تعالوا ننسى الماضى ونتوحد ضد الجلابة لنحكم الخرطوم والسودان كله ادخلوا بسلاحكم واجعلوا من الحدائق العامة مراحيضا ومن يقل ادبه طلقة فى الرأس عبدالرحيم حرامى إبل تربى على السرقة والقتل لكن انت باشمهندس وتعيش فى امريكا افلا تخجل؟

نفس لغة علاء الدين .. تبخيس الناس .. وإهانة كرامتهم .. وتظن أنك تفعل شيئ .. بيش!!

يؤسفني أن أقول أن أغلب مثقفي الشمال .. لم يلتقطوا أهمية الظرف الذي يمر به السودان .. يكابرون ويمارسون سياسة فرق تسد .. والتلفظ بالتفاهات .. وساقط القول ..

أنا أقول ليك يا أستاذ حسن فرح، لو الشمالية ذهبت لحال سبيلها .. هل تظن أنك تكون آمن؟ .. مصر تبلعكم في ليلة وضحاها ..

والله أمامكم مساحة .. بقدر وطنا السودان .. بأن تقوده وتجنوا ثمار جهدكم .. يا أخ نحن في كادقلي، منتظرين عودة "حي الدناقلة" كما كان قبل الحروب .. طبعاً الحي أغلبه يسكنه ناس الشمال .. لكن الدناقلة أخذوا الأسم .. أهمية حي واحد مثل حي الدناقلة لولاية بأكملها لا يمكن أن يفكر فيها أحد غير متعمق في الجوانب الأجتماعية والثقافية .. نحن البقارة نعتبر أنفسنا ناقل ثقافي ما بين شمال السودان وجنوبه .. لكن الدناقلة أثبتوا أنهم ناقل ثقافي بين أقاليم السودان .. لو دخلت حي الدناقلة .. حتى الديكور في منازلهم مثل الديكور في الشمالية .. الأواني المنزلية والتطريز والملابس التى يلبسونها نساء ورجال .. فهم محاولة جادة لتقريب الشقة ما بين الشمال وجنوب كردفان.

أنتم اليوم .. تتراجعون .. وبأستمرار .. وكان المنوط بكم تتقدموا وتنفتحوا علي السودان لجعله كما تريدون .. وتستفيدوا من الموارد الهائله الكامنة فيه والخيرات غير المحدودة التى يزخر بها ..

مرمي الله ما برفع ..

بريمة

ود الشيخ،
سلام ..

Quote: حليل ذلك الزمن الجميل حيث لم اكن اعرف ان صديقي محمد مرغني شايقي وعرفت ذلك بعد اكثر من ثلاثين عاما وفي عهد "الحمير الخمر" حيث قابلت امه( المشلخة) في ابها !!!!

والله اليوم يقتلوك علي أساس سحنتك .. مش قبيلتك .. ويخلّوا سبيلك علي أساس سحنتك .. وكل هذا حصل لأهلنا بسب سحناتهم المختلفة!

في الثمانيات .. ما كنت أعرف أكثر من خشم بيت قبيلتنا .. اليوم أعرف 35 فرع من فروع القبيلة .. مشايخهم وعمدهم وأماكن تواجدهم .. ولو قلت ليك وقفت علي 150 قبيلة وفرع قبيلة داخل مجموعات البقارة .. وكلهم تعرفت علي نظارهم وعمدهم ومشايخهم والمشكلات التى تواجههم .. مثل هذا الجهد لو وجهناه لفهم قضيانا القومية كان قطعنا شوط ..

كان زمن جميل .. بحق.

بريمة

ول ابا شيخ محمد حمزة
سلام ..

Quote: ول أبا بريمة قول يا زول أنا كلامك دا بطربني جد عن جد ...

يا ول أبا السودان دا لن يكون وطن قومي لكل ابناءه ما لم تنته الملكية الجماعية للارض .. وتصير الملكية ملكية فردية ..

كون السودان .. أو الخرطوم .. أو بورتسودان .. أو دنقلا .. تبقي ما حقت أبو زول .. شيئ جميل .. لأن هناك يشعر الناس بأنهم جميعاً حقتهم أو حقهم ..

نظرياتي في تاسيس الأحياء الأثنية .. والأحياء القومية .. تمشوا كدا .. تجووا راجعين ليها .. مثلاً مثل العنصرين أستاذنا حسن فرح وعلاء الدين سيد أحمد .. نوفر لهم كل شيئ في "الكلاكلة صنقعت" لا يشوفوا غرابي ولا زول من مناطق الجنوب الجديد.
الناس القوميين يعيشوا في الوسط القومي .. أمريكا عملت كده .. هناك أحياء أو مدن للأيرش (الأيرلنديين) .. لليهود .. للصينين .. وغيرهما من شعوب الأرض .. كما أن هناك مناطق تسمى Cosmopolitans .. فيها ناس لحم راس ..

أثبتت التجربة الأمريكية .. أن سكان المناطق الكوزموبوليتانت هى المناطق الحضرية بحق .. وهى التى أخرجت الأفذاذ من الساسة والمثقفين .. ورجال الأعمال ..

وكل زول يختار الجنبه البتريحه ...

بريمة

العاصمة المثلثة حقت كل السودانيين ، عشان كده كل أهل العاصمة جايين من كل فج سوداني عميق وليست حكراً على مجموعة أثنية معينة .

مثل هذا الحديث يقال أن كانت هناك إعتراضات على وجود فئات من أثنيات أخرى ، فأ وجود قوات مسلحة سودانية في أماكن عامة لا يليق

بهم خاصة وسط الحدائق العامة أو الأحياء ، مكانهم المعسكرات الخاصة بهم داخل العاصمة أو خارجها وحسب تواجد مقرات المعسكرات

مثل هذه الأحاديث غير مجدية ولا تصلح لأنها تثير الفتن والعنصرية ولاسيما أن الكثير منا يحمل فهما مغلوطا لمثل هذه الدعوات .

السلام عليكم
جميعا
.. بريمة يا اخوى
كلام السيد عبدالرحيم دقلو .. الرجل الثانى ف الدعم السريع
و من نعتبرهم قيادات شابة لتغيير جديد
اقول : كلامه واضح .. و هو مستنكر جدا
و لانه ياتى من رجل مثله
ايه دخل مروى ب الخرطوم ( عاصمة البلاد)
..
بريمة يا حبيبنا
قال لك شيخنا الختمى : انت فارس .. و فيك فراسة ايضا
فكن كما نعتقد فيك و نتعشم
و تناول الامر ( حديث القائد عبدالرحيم)
بكافة جوانبه .. و ف سياقه الصحيح
لننال جميعا على الاقل اجر المناصحة
.. و معا لسودان جميل يسعنا جميعا كما الان
..
مودتى و تقديرى

Quote: الكثيرين ما داسين حتى العنصرية الفجة ..

الناس يا بريمة ما تاخدنا بجريرة بعض الناس
انا شخصياً اتربيت في اكتر من مدينة في السودان
الحلة الواحدة بكون فيها كتير من المكون السوداني
من الشمال و الجنوب و الشرق و الغرب
هم بالنسبة لينا نعم الأعمام و الخالات , الناس ديل ربونا
ما عندي اي عنصرية تجاه اي مكون
العنصرية دي عملا النظام البائد و ضرب النسيج الإجتماعي
و جيش الجنجويد في سياسة اضرب العبد بالعبد
انا كمواطن عادي ضد كل هذه التجاوزات
خلونا نمشي قدام السودان دا محتاج للكثير من التعاضد و التماسك
حتى يكون السودان وطناً يسع الجميع

ول ابا بريمة حبابك

شيف الجلابي اب شدوق بعيط كيف

ول أبا سماعين
الراجل دا فارس رأي .. لكن He didn't get it

ههههههاي!

بريمة

Quote: حليل ذلك الزمن الجميل حيث لم اكن اعرف ان صديقي محمد مرغني شايقي وعرفت ذلك بعد اكثر من ثلاثين عاما وفي عهد "الحمير الخمر" حيث قابلت امه( المشلخة) في ابها !!!!

يرجعو الاقاليم بتاعة العصر الذهبي بس وكل زول يقعد في اقليمو ويطورو بس
الاقاليم الخمسة
وننتخب حاكم الاقليم وبرلمان الاقليم ثم برلمان المركز ثم رئيس الجمهورية
عشان نشوف السودان ده حق منو
الدعم السريع والولايات والرقم الوطني رجس من عمل الانقاذ
الخرطوم عاصمة اهانت الجنوبيين عودي فيها عود مرة \
انا عاصمتي الجديدة كوستي والجزيرة ابا وربك ومسجد الكون
عاصمةروحية نظيفة بس
ويا بريمة
اتلم علي موسي هلال وزح من المقاطيع قبل نعمل زامل المحاميد ده نغمة موبايل
دقلو (....) ما عنده خوة

حباب ول أبا ولياب،

Quote: أن الكثير منا يحمل فهما مغلوطا لمثل هذه الدعوات .

وأبصم بالعشرة .. الناس أخرجت كلام عبد الرحيم دقلو من سياقة ..
وصدقني كل البوست .. يدور حول هذه النقطة .. أضف، أن شخص واحد يتحدث لا يمكن تحميل كل مكون غرب السودان وزر كلامه ..


بريمة

حبيبنا ول أبا بدران
سلامات ..

Quote: بريمة يا حبيبنا قال لك شيخنا الختمى : انت فارس .. و فيك فراسة ايضا فكن كما نعتقد فيك و نتعشم و تناول الامر ( حديث القائد عبدالرحيم) بكافة جوانبه .. و ف سياقه الصحيح لننال جميعا على الاقل اجر المناصحة .. و معا لسودان جميل يسعنا جميعا كما الان .. مودتى و تقديرى

حديثك من نور يا ول أبا ..
الناس ساكه أي زول يقول كلمة .. وتقوم صحف الدنيا و الواتساب وكل الميديا .. نقة لا تقدم ولا تؤخر ..

والله يا ول أبا بدران، هذا السودان جميل بأنسانه .. ومليئ بخيرات ثرواته وغني بتراثه وفلكلوره .. السودان يصلح أن يكون دولة سياحية عصرية حديثه .. وبدل أن نركز في مصادر قوتنا نحن نركز في نقاط ضعفنا ونقاط الخلاف بين مكوناتنا.
رئيس الوزراء ونستن جيرجل .. مرة قال لو عايز تحطم دولة، ما عليك إلا أن تثير فيها النعرات العنصرية .. وهذا ما يحصل سواء فهمناه أم لم نفهمه.

أمامنا خيار نكن أو لا نكن .. والناس يجب أن ترتقي لمواجهة التحديات ..

بريمة

كنا نظن أن أهل السودان قد فهموا أن المشكلة في التخلف و في انعدام التنمية و الفشل لا يرجع لشخص أو فئة أو قبيلة.

أي ليست المشكلة من يحكم ولكن كيف يحكم.. مشكلة الفساد و الفشل سببها عدم وجود القوانين التي تمنع الفساد والاستبداد و ليس لكونه من القبيلة الفلانية ..

هذا هو مربط الفرس..

اللهم إلا إذا أراد البعض أن يعيد ذكريات الفشل التعايشي (القبلي) الذي أضاع السودان و جعله لقمة للمستعمرين ...

ومن خلال الكتابات و الاجتماعات و التحالفات و أخيراً التصريحات يبدو أننا ذاهبون في طري اللاعودة و اللا التقاء.

فأهلاً به و بالتأكيد سيحيق المكر السيء بأهله..

المشكلة الناس لا تتعظ و لا تستفيد من الدروس و العبر..

ومن يظن نفسه أنه يتقوّى على الآخر بالسلاح فالسلاح متاح ، وتنوء به أسواقه في كل مكان.

ول أبا دكتور محمد عبد الله
سلام ..

Quote: ومن خلال الكتابات و الاجتماعات و التحالفات و أخيراً التصريحات يبدو أننا ذاهبون في طري اللاعودة و اللا التقاء. فأهلاً به و بالتأكيد سيحيق المكر السيء بأهله..

أنت ذاتك يا ول أبا أنجريت في زفة الغاغة الواقفة .. هل تصدق، حتى توصيف المشكلة غير صحيح .. قبل أن تكون المشكلة حديث عبد الرحيم دقلو أو جيوش الحركات .. المشكلة هى مشكلة السودان .. وكيف يدير شؤونه الداخلية .. وفوق ذلك مشكلة مثقف سوداني لا ينظر إلا بما تمليه عليه زغباته ..

أراكم نعتبر المشكلة هى مشكلة السودان .. كما تحدي السودان مشكلة الحرب ويفكك فيها .. أيضاً يمكننا أن نكون قدر التحديات الماثلة .. وح نفككها .. ونستطيع فهمها .. ليس من الصعب أن نفهم أن التصريحات تصب في خانة أن هؤلاء القوم جميعاً يشعرون بنشوة .. يداب السودان بدأ يسمع لهم .. وبالتالي تحميل أي حديث ما لا يحتمل يعد قصور في الفهم .. كلمة السودان حق أبو مينو؟ أو الخرطوم أو أي مدينة .. حقت أبو مينو؟ .. أنا أعتبرها صحيحة بثقافة أهل غرب السودان .. أي شيئ يقع ضمن الحق العام بالنسبة لها ليس حق أبو زول ! .. المشكلة المثقف في الوسط يعتبر كل صحية عليه .. وعايز يفسر كل شيئ علي خلفية غبائن ودغائن وتأريخ أثني مليئ بالسلبيات .. دا كله ممكن تجاوزه إذا أعتبرنا المرحلة مرحلة أنتقالية .. وح تأتي حكومة منتخبة تفرض رؤاها ..

يجب أيضاً أن ننظر إلي ما كتبه شخصي في الأتي:

Quote: في عرف الأمريكان أي زول يقضي دورة في أرض المعركة .. أول ما يجئ راجع أمريكا يمشوا يعملوا له فحص نفسي .. لمرض ال PTSD .. وهو مرض نفسي مرتبط برؤية المأسي والدماء والموت .. الناس الذين تروهم مدججين بالسلاح ممكن يكون نصفهم يحملون بال PTSD ..! من قام بتوفير الفحص النفسي لهم؟ .. واحد في جنوب ضرب خاله بطلقه .. لليوم خاله أخو أمه حايم بعصا ..

دي أيضاً مشكلة السودان .. صدقوني .. لأنها تمس العام .. والحل لا يمكن أن يأتي من تلك الجهات المحاربة .. لازم يأتي عن طريق حل قومي ..

بريمة

عبدالرحيم دقلو .. حديث خطير على الهواء !

محمد وداعة

اى محاولة لتجاوز الوثيقة الدستورية، يعنى ان الجيوش زادت جيشآ، اسمه جيش الشمال*، لدى مخاطبته الحضور بمنزل الشيخ موسى هلال قال عضو مجلس الشركاء و قائد ثانى الدعم السريع الفريق عبد الرحيم دقلو ( من آخر حوار بتاع الشرق الاوسط، الجماعة قعدوا يتساءلوا دا شنو دا، دا جانا من وين، حميدتى بليانين بيهو، تانى جايينا واحد تانى، طيب داير اقول للناس البقولوا الكلام تعالوا اوريكم عيبكم، و الشهود موجودين، اى كلام بقولول مسجل بالتاريخ و باليوم و بالشهود، تعالوا شوفوا العيب، الغير اخلاقى بين كبار المحامين المدافعين للشيخ موسى هلال، مشى لى زول كبير، ومحترم جدا فى الدولة، قال ليه دايرين نحل المشكلة دى فيها جانب اهلي، قال ليه انت منو القال ليك نحنا دايرين نحل مشكلتهم، نحنا عاوزين يموتوا فى بعض، الاستاذ البيلى موجود وهو القالو ليه الكلام، بيان بالعمل، عشان كدة شيخ موسى فهم القضية، و حميدتى فهم القضية، اى زول داير يبلطج و داير يجى لشيخ موسى و لايجى لحميدتى خليه يشوف ليه حتة تانية، بلطجة زمنها انتهى، اللعب زمنو انتهى، الكلام الفاضى زمنو انتهى،الان فى حملة جديدة ضد الحركات المسلحة زى ما حاولوا يشوهوا صورة الدعم السريع و سمعة الدعم السريع، اسى قلبوا الصفحة للكفاح المسلح، الان قالوا كيف الحركات المسلحة تخش الخرطوم، الخرطوم حق ابو منو، الخرطوم حقنا كلنا، السودان حقنا كلنا، الحركات المسلحة تخش الخرطوم، و تمشى الشرق، و تمشى الغرب و تمشى مروى، لو على انا حا تمشى احسن حتة مؤهلة مستشفى و مدارس و مطار، عشان نكرم الناس ديل يكونوا فى مروى، السودان حقنا جميعا، و الوطن حقنا جميعآ لن نسمح لاى زول يتجرأ ويقول فلان يطلع و فلان ما يقعد، السودان ما مكتوبه شهادة بحثه فى اسم زول، عشان كدة المروجين و مروجى الفتن، و مروجى المشاكل، و سايقين الشعب السودانى بالميديا، ارجو.. ارجو .. ارجو ان تكفوا عن الشعب السودانى، ارجوا ان تخلوا الحكومة، الحكومة تشتفل تقوم بواجبها للشعب السودانى، خلو المؤسسات تؤدى دورها لحماية الشعب السودانى، كفو عن الخلاف، كفوا عن الفتن، اى كلام بنقولو و عارفنو و راصدنو ومابنقولينا كلام غير عارفنو باتلتفاصيل )،




هذا الكلام يعتبر من اخطر ما قيل فى الفترة الاخيرة بشأن ما ينتظر بلادنا، و هذا الكلام مقصود منه احداث البلبلة و اثارة الشكوك فيما بين القادة، و حتى لو كان هناك شهود فلم يكن من وجاهة فى الاشارة اليه، خاصة وان شهادة البيلى و لو كانت صحيحة فهى لا تصل لمرحلة الاثبات و قطع الشك باليقين فيما اورده من وقائع لجهة اتهام آخرين، هذا الكلام يكون قطعيآ لو كان مسجلآ، فربما انقصها او سهى عنها، و ليس مفهومآ من هو القائد الكبير الذى قصده الفريق عبد الرحيم، الشجاعة و الحكمة تقتضى من عبد الرحيم درء الفتنة باعلان اسم الراجل الكبير، بدلآ من هذا الكلام المنقول عبر شخص واحد مع كامل احترامنا للاستاذ البيلى،

فى تقدير مراقبين، فان حديث عبد الرحيم لا يعدو كونه محاولة يائسة للتحشيد، و الاصطفاف الجديد بين الحركات المسلحة و الدعم السريع، يفوته فقط عدم تقديره لحنكة و حكمة الشيخ موسى هلال، و الدليل على ذلك كلمة الشيخ هلال فى ذات المنصة فى تجاوز الغبن و نبذ الكراهية، فالامر لم يكن محصورآ فى وساطة الاستاذ البيلى، الشيخ موسى هلال شكر الادارات الاهلية و الطرق الصوفية و مبادرات من الشمال و الشرق و دارفور و عموم السودان و كل من ساهم و سعى لاطلاق سراحهم،

الفريق عبد الرحيم من دون تحديد مكانآ بعينه فى الشرق او دارفور لاقتراحه مكانآ لقوات الحركات المسلحة، حدد مروى بالاسم دون الاشارة الى الشمال، كما اشار الى الشرق و الغرب كاقاليم، و نقول لعبد الرحيم رسالتك وصلت الى اهل مروى و الشمال عمومآ، هذا الشمال الذى لم يكن يومآ ساحة اقتتال او تمرد، ولم يحمل الشماليون السلاح ضد الدولة، كما حمله ابنا الشرق و الغرب، ليس جبنآ او ضعفآ، مروى و دنقلا و كرمة و البجراوية، موطن حضارات عمرها الاف السنين،و نحن نعلم ان الحرب اولها كلام،

سؤالنا للفريق عبد الرحيم، وهو يقترح على الهواء اماكن لتواجد قوات الكفاح المسلح، هل الامر يعود لك ؟، ام يعود الى اتفاق الترتيبات الامنية الذى تم توقيعه فى جوبا ؟ وهل مثل هذه القضايا تناقش و تحسم على الهواء ؟،هذه محاولة غير مقبولة لحشد هذه القوات بجانب الدعم السريع لاضفاء شرعية لتعدد الجيوش وهو امر حسمته الوثيقة الدستورية و اتفاقية سلام جوبا، جيش قومى واحد، واى محاولة لتجاوز الاتفاق او الوثيقة الدستورية، يعنى ان الجيوش زادت جيشآ جديدآ، اسمه جيش الدفاع عن الشمال، او كما قال الجكومى،


ــــــــــــــ

يا ول أبا بريمة أنا برضه شايفك اصطفيت من قولة تيت..و نسيت الثقافة و نسيت السياسة و انبهلت..و بعد أن كنا نعهد فيك قولة الحق و لو على نفسك

لقيناك انحزت بكاملك و بقيت كما تبرر للآخرين حتى في كلامهم الغير مبرر و احتمال هو ذاته يكون ندم إنه قاله..(قبل أن تكون المشكلة حديث عبد الرحيم دقلو

أو جيوش الحركات .. المشكلة هى مشكلة السودان .. وكيف يدير شؤونه الداخلية .. وفوق ذلك مشكلة مثقف سوداني لا ينظر إلا بما تمليه عليه زغباته ..)

لا يا بريمة المشكلة تصريح عبدالرحيم دقلو لأنه ما جاء من فراغ سبقته أحداث و تصريحات و كلام ...

فعلا مشكلة السودان كيف يدير مشكلته الداخلية و ليس هكذا تحل مشاكله بل كده إنت بتعمل استقطاب و اصطفاف..

(وفوق ذلك مشكلة مثقف سوداني لا ينظر إلا بما تمليه عليه زغباته )هذا الوصف ينطبق على موقفك انت بالذات..

إذا انتو شايفين الاستقطاب بيحل المشاكل فأنتم مخطئون..

ولا نحسب كل صيحة علينا لأننا نعتبر أنفسنا جزء من الكل..و كلامك هذا ينظر لنا عكس ذلك..

ومن لم يسبق له حمل السلاح ليس عسيرا عليه أن يحمله إن وجد نفسه في موقف الدفاع..

الاخ بريمة . تحيه طيبة مره اخري .

اعجبتني ردوك باسهاب علي الزملاء ، و تلك الحقيقة الراسخه، في شخص مقتنع بافكاره ، ورؤاءه، مما شجعني للخوض معك في نفس الموضوع .
السودان عموما يتكون من الشرق والغرب والشمال والجنوب . هذا الذي كنا نعرفه منذ نشأتنا.
ومع التقدم في العمر وتلاحق الاحداث والتغيرات التي تحدث كل ساعه ،بدأت تظهر علي السطح ، مشاعر مكبوته وسالبه .
النظام السابق له اليد الطولي في بث و ازكاء الفتن و التفرقه والشتات ،وهذه كانت استراتجيته الاساسية للبقاء طويلا ، وقد نجح في ذلك الي حد ما .
كما للغرب ابناء ،كذلك للجنوب ابناء ،وايضا الشمال والشرق ، هذا هو مكون المجتمع السوداني المعاصر ،المعترف به دوليا ،خصوصا بعد انفصال الجنوب .
ليس من المفترض ان ينفصل الجنوب ،لكن وقتها كان القائمين علي الامر ليسوا علي قدر المسؤولية .
فحدث ماحدث ، واصبح دولة منفصله ، وبما انها ناشئة، فمازالت تصارع للبقاء .
كذلك الشرق ، ظهرت اصوات تطالب بالانفصال اسوه بالجنوب ، وهي اصوات تنظر للامر من المنظور الضيق ،ولم يكلفوا انفسهم ويعملوا زووم ، لرؤية الصورة م بشكلها الكبير الاوضح ، حتي مقومات دولة لاتوجد لهم . لكن رغم ذلك... نطالب .
ينطبق الامر كذلك علي الغرب ، الغرب الذي عانا كثيرا ، نتيجه الطموحات الكبيرة لابناءه، لتكوين دولة بمفهومه الخاص وتطبيقيه علي الجميع ، دون مراعاة لاختلاف الثقافات لجزء كبير من المجتمع ، ومعها ضغائن مزمنه نتيجه الشعور بعدم الارتياح للاخر ، وانهم ظلموا ....الخ ( لو ركزوا جهودهم وعزمهم بالنهوض ، حتي لو في مناطقهم لقاموا بذلك بكل سهولة ، ونجحوا نجاحا باهرا ، سيجبر الاخرين لاتخاذهم قدوة للتغيير ، ويستنهض الاجساد النائمة للكد والعمل ) . لكن النعرات تتحكم في الشخص ، فمايلبث الا ويذكرك بما حدث له زمان ، ووقتها لم يجد العون من احد ، والان حان الوقت للانتقام والتشفي .
والمضحك والمبكي في أن واحد . ان هذا الامر ينطبق علي الجميع . اي ان المعاناة لم تسثني احد من المكون السوداني كله
فالقطر كله يعاني ، وتوجد مرارات كثيرة مدفونه .
الدول التي نهضت ، تغاضت كثيرا عن الصغائر وسفاسف الامور ،ووضعوها جانبا ، وبدؤا البناء بقلب رجل واحد .لهدف واحد ، هو النهضة للوطن وللجميع . وكثيرين نجحوا ، وكثيرين اخفقوا .
اما التي رجحت الخيار الاخر ،فتفرقت اشتاتا، كيوغسلافيا السابقة ( اصبحت فتافيت دول ، وكل واحده باسم منفصل، لكن السؤال الكبير ، هل هم افضل حاليا ،او عندما كانوا دولة واحدة ؟)
سكان الكوكب يسعوا للتوحد ، ونبذ الفرقه ، ومن نجحوا في ذلك طوروا انسانهم في البدء ، ثم انطلقوا .
لن تصل حافله لمحطتها الاخيرة ، طالما الركاب مشتبكين مع بعضهم البعض ، وحتي السائق والكمساري ، انشغلوا بمعارك جانبية .
فمن يقود الحافله ياتري ؟
السودان يابريمة في مفترق طرق ، وسينتقل لمرحلة اخري ( اين كانت ) ، اما ينجو ، واما يصبح مثله ومثل الدول التي نشاهد مواطنيهم في التلفزيون ، يلتحفون السماء ، وتطعمهم المنظمات ( قد ينزعج البعض من كلامي هذا ) لكن نحن لسنا استثناء ، فهذه الدول كانت افضل حالا منا ، لكن قدرها هو ما اوصلها الي زاك الموقع. ولم يحدث الامر فجاة ، فقد سبقته احداث .
مانراه يحدث حاليا في الساحه ، هو مجرد تفاصيل لحدث قد يحدث مستقبلا ، فنحن حاليا معاصرين وشاهدين علي الحدث، قد يكون افضل ، لكن النسبه ضئيلة وضعيفه ، ويرجع ذلك الي عدم وجود النوايا الطيبة .
الخيار الثاني هو الاوفر حظا ، خصوصا ان المناخ ملائم حاليا ، ويعمل الجميع ،كل لمصلحته، ويعادي الاخر ، دون ان يكون قد رأه حتي .
رواندا من افضل الدول الافريقية الان ، وما وصلوا لهذه المرحلة ، الا بعد غسيل شامل ، انهي فظائع الهوتو والتوتسي . وبعدها نعموا بالرفاه والسلام
في الغالب نتمني الخير والرفعه والتقدم لبلادنا ، لكن التمني والاحلام شى ، والواقع شئ اخر .


تحياتي،،،،

ول أبا دكتور محمد عبد الله

Quote: ومن لم يسبق له حمل السلاح ليس عسيرا عليه أن يحمله إن وجد نفسه في موقف الدفاع..

هذه النقطة .. أنت جايها من ناحية غبائن من الشايفه حاصل في البلد .. لكن شخصي، أثرتها منذ عام 2004م وحتى يوم الناس هذا، أن علي أبناء الشمال والوسط أن يحملوا السلاح .. وأن يتدربوا علي أستخدامه .. ليس بدافع أي شيئ فقط لحماية أنفسهم وأهلهم ومالهم وممتلكاتهم .. في أمريكا قصاد كل 100 شخص هناك 121 بندقية .. يعنى أكثر من ربع سكان أمريكا الفرد فيهم عنده بندقيتين وما فوق .. لكن الحقيقة غير كده .. لو الإحصاء للبيض فقط أغلبهم يمتلك متوسط 15 قطعة سلاح في المنزل الواحد .. 45 قطعة سلاح شيئ عادي لهواة جمع السلاح ..

مافي مكان في الدنيا بحميك ما لم تحمي نفسك .. أنتم لليوم منتظرين الحماية من الشرطة وناس الأمن .. يحلكم الحلة بله لما تبلغوا الشرطة والشرطة تجئ وتلحق بالجاني ..! ... حق الدفاع عن النفس مشروع ديناً وعرفاً .. تنتظروا من عشان يديكم الأذن بالتسلح ..؟

جاييكم مع ول هاشم كاروي ..

بريمة

كلامك ده ما صاح:(هذه النقطة .. أنت جايها من ناحية غبائن من الشايفه حاصل في البلد )

أنا بقول من لم يسبق له حمل السلاح....وده مثل عام ,..و هو شيء بديهي المضطر إذا شعرت بانعدام الأمن بتلجأ للدفاع عن النفس(حتى القانون بيراعي هذا الوضع)

بعدين ده كلام شنو يا بريمة تقول غنه من زمان تقول الناس يحملوا السلاح؟ الناس ماشة للأمام و الا للخلف؟ يعني عاجبكم الأمثلة بتاعة رواندا و البوسنة؟

ده شيء بيعجب؟ ده تخلف ليس إلا.

والله لأول مرة يا بريمة أشوفك تفارقك المنطق..

Quote: بعدين ده كلام شنو يا بريمة تقول غنه من زمان تقول الناس يحملوا السلاح؟ الناس ماشة للأمام و الا للخلف؟ يعني عاجبكم الأمثلة بتاعة رواندا و البوسنة؟ ده شيء بيعجب؟ ده تخلف ليس إلا. والله لأول مرة يا بريمة أشوفك تفارقك المنطق..

والله يا ول أبا، هذا رأي ثابت بالنسبة لي منذ عام 2004م .. وأنا مدافع شرس عن حق الناس في حمل السلاح ..
هذه الوضاعة التى تراها .. لا تنته إلا نبقوا كلنا عيال رجال .. الواحد يحمي أسرته وماله ونفسه ..

الكلام دا .. ما وصلنا ليهو بالساهل .. والعاقل من أتعظ بغيره .. أنا لا أحرض شخص ضد أخر .. لكن ما في زول شايل ليه حديد ويجئ يتحنفش علي الناس .. بنقعدوا في علبه ..

بريمة

والله لأول مرة يا بريمة أشوفك تفارقك المنطق
-------------------------------------------------------------------
دكتور محمد عبدالله الحسين يا اخى انت زول مجامل بشكل
معقول دى اول مرة تشوف بريمة يفارق المنطق؟
طيب لما كان شغال يمدح فى البشير والناس كلها تسب وتلعن فى بشة هل كان ذلك منطقيا؟

ول ابا بريمة
الله يعينك مع العقول المركزية المتحجرة

كلامك دا ما في زول بفهمو ليك الا بعد ان يحمى الوطيس.

تجربتك كبقاري فارس يمتشق الكلاشنكوف ويقاتل من اجل حماية المراح
لم يجربها ابان كروش كبيرة الراقدين تحت ضللة اشجار اللبخ

السودان المركزي يجيد فن السكلبة والبكاء وانتظار الاخر لكي يأتي اليه ليحل مشكلته
الان المعادلة اختلفت كتير
زمان هنا في المنبر دا تكلمنا عن حتمية حدوث هذه المآلات الجماعة سخروا منا ونبذونا ووصفونا بما لم يصف به مالك الخمر

عبد الرحيم دقلو قال ما هو كامن في الصدور
الحملات المكثفة بحق الجيوش التي يغلب عليها المكون الغربي مقصودة في حد ذاتها.

القيادة العامة وسلاح المهندسين وسلاح المظلات وكل الاسلحة الحفيفة والثقيلة ومصنع اليرموك كلها تتوسط المدنيين ما سمعنا جلابي رفع صوته طيلة هذه السنين.

الوضع الآن لم يكن كسابقه
بدأت تدب دابة الشراكة الحقيقية في السلطة والموارد.
وبدأ المقهور في تنسم رياح الحرية..
وسوف تتواجد هذه الجيوش وسوف تلحق بها الجيوش الاخرى
الى ان يتم حل مشكلة السودان من داخل قصر غردون
والا الجبخانة توري وشها وكل فار يدخل جحره
زمان الغتغتة والدسديس انتهى

يا فيها يا نطفيها
مجمجة مافي
ارقدوا عديل خلوا الدوا يمشي

اسماعيل عبدالله .
انتا كلامك ده كأنك ضامن الفوز ، ابدا والله يا اخونا ، لما تصل التراغي فعلا كل فار بفتش حجرو ، وكل قرد بطلع شجرتوا .
ماتفرح بالكم دوشكا وطاشر تاتشر ديل ، عند المعركة بتكون دي من اسهل الاهداف .

الله مايجيب اليوم داك ، وكان جاء الخسائر بتكون كبيرة وشامله لاتفرق بين ابيض او اسود .
ماتفسر التراخي الحاصل الان ده من بعض المتامرين الاوغاد ، فهناك الكثير من الشرفاء علي استعداد للرد علي التطاول .

ارعو بقيدكم ،،،،،

Quote: الله مايجيب اليوم داك

لو ما بطلتوا اللهجة العنصرية اليوم داك جاي جاي.

أسمع النصيحة دي كويس يا كاروري

سمعة بتجي للدواس لما يحصل ولا بتفرش فروتك في جميرة بيتش 😂

Quote: بيتش

هو زاتو بيتش

Quote: Quote: بيتش هو زاتو بيتش

العجوز المتصابي


علاقتك باللغة الانجليزية شنو؟

Quote: هو زاتو بيتش

ههههاي!! .. كلام ول أبا سماعين حرقكم .. ول أبا سماعين رجل فارس رأي ..
نحن البقارة كدي .. نقول في القلوبنا وخلاص ..


بريمة

Quote: ههههاي!! .. كلام ول أبا سماعين حرقكم .. ول أبا سماعين رجل فارس رأي .. نحن البقارة كدي .. نقول في القلوبنا وخلاص ..

يا ولدبوك الجماعة لو ما خلوا اللهجة العنصرية حيشوفوا الكتير المثير والخطير.

خلهم يجهزوا مناديل الورق لكفكفة الدموع.


عبد الرحيم كلامو صاح
الخرطوم ما مسجلة بشاهدة بحث باسم زول.


العاجبو عاجبو والماعاجبو يشرب من البحر..


بلاش مجمجمة

Quote: سمعة بتجي للدواس لما يحصل ولا بتفرش فروتك في جميرة بيتش

لا حاكون زيك كدة جاي على باخرة كتشنر.

Quote: علاقتك باللغة الانجليزية شنو؟

ذي علاقتك بالفهم و الإنسانية يا عنصري يا بليد

Quote: ذي علاقتك بالفهم و الإنسانية يا عنصري يا بليد

ماخورك محفوظ في ذاكرة سودانيز اونلاين

تبطل قلة ادب

ولا اسقيك من صديدك يا ملعون.

اخونا بريمة
بالعكس كلام اخونا اسماعيل مش حرقنا بالمعني المجازي ، الا ان لهجته كلها وعيد وتهديد واااضح ، كأنه لديه ثار مع جميع السودانيين .
اذا كان اسماعيل من غرب السودان ،فهناك اسماعيل في شرق السودان ، وهناك اخر في الجزيرة ،وهناك اخر في النيل الازرق .
الجميع بمافيهم اسماعيل صاحبنا هذا ، خرجوا من رحم هذا البلد ، وليس من بلد اخري منفصله .
ويااسماعيل سمعت المقطع ( النصيحه ) ، لكنها في الواقع ليست بنصيحه ، بل تشفي كما تفعل انت بوضوح .

نعتنا بالعنصرين ، وفي الواقع نحن ليس كذلك ، فتقسيم السودان الجغرافي هو الذي فرض هذا الواقع الذي لم تتقبله انت ،بل تحس بمرارة ، وتشعر ان حقوقك مهضومة ، وان الشمال النيلي هو المسيطر ، وقد يكون كذلك ، لكن الاختلاف في فهم الاهداف والمضمون ، فالنخبه الشمالية افضل بمجهودهم وتطوير ذاتهم ، علي عكس البقاع الاخري في السودان ، التي انشغلت بالقبلية والنزاعات حول المراعي وغيرها من الاشياء التي اضاعت عليهم الكثير من الوقت في اللحاق بركب التحضر والمدنية . ( الحكومات المتعاقبه لها القدح المعلي في ذلك ايضا ، وليس الشعب )
وبالتالي اسهل شماعه لتعليق الاخفاقات المزمنة ،هو الشمال النيلي، المتحضر والمتعلم نوعا ما.
وهاانت الان تقوم بصب جام غضبك عليهم ، متهمهم بالزندقة والعنصرية ، وانهم هم السبب لما تعاني منه الان .
يلزمك جلسه للتصالح الداخلي ، حتي تري الامور بوضوح وواقعيه وتجرد ، وتقتنع ان التهديد والوعيد ، لن يجدي نفعا ، فمن تعاديهم يستطيعوا الدفاع عن انفسهم ساعه الوغي والحقيقة .


تحياتي ،،،

يا هاشم باختصار شديد
ما حدث ويحدث لانسان غرب السودان معلوم في مركز البلد.
التشنجات العنصرية الصادرة عبر النخب المركزية وكم المداد الذي سكب في اللهجة الجهوية امرقوا اطلعوا انتو تشاديين ديل ما سودانيين لن تولد غير الغلواء المضادة.

وكررنا الكلام دا سنينا عددا لكن لا حياة لمن تنادي
الجهوية الصارخة التي دعت عبد الرحيم ان يقول هذا القول موجودة
وطول ما في قيامة اسمها السودان لن يصمت الناس عن حقهم.

يحلكم ويحلنا تقرير المصير

الاخ اسماعيل
ابدا ، يوجد فرق اثني بين السوداني والتشادي ، كما يوجد انصهار وتزاوج بين القبائل الحدودية المتاخمة بين البلدين ، وعادة ماترجح كفه الاقامة والعائلة ، فالمقيم بشكل دائم في السودان مثلا ، هناك شروط في قانون الجنسية تتيح له الحصول عليها بعد استيفاء الشروط القانونية ، كذلك المقيم الدائم في شاد يتمتع بنفس المزايا كما اظن .
لكن هذا هو ليس المهم في الموضوع.
لب الامر هو الاحساس بالضيم والظلم ، ومحاولة التشفي والانتقام جراء مفاهيم خاطئة ومغلوطه . يجب تصحيحها
مشاركة كل اطياف المجتمع السوداني في حكم وادارة شئون الدولة ، حق اصيل لكل من تتوفر فيه الشروط المطلوبة ، لشغل ذلك المنصب . عبر الطرق التقليدية المعروفه ، وليس عبر طرق وعره شائكة ، تؤدي في النهاية لمزيد من التشظي والانقسام ،،،


تحياتي ،،،

Quote: لب الامر هو الاحساس بالضيم والظلم ، ومحاولة التشفي والانتقام جراء مفاهيم خاطئة ومغلوطه . يجب تصحيحها مشاركة كل اطياف المجتمع السوداني في حكم وادارة شئون الدولة ، حق اصيل لكل من تتوفر فيه الشروط المطلوبة ، لشغل ذلك المنصب . عبر الطرق التقليدية المعروفه ، وليس عبر طرق وعره شائكة ، تؤدي في النهاية لمزيد من التشظي والانقسام ،،،

دا كلام رومانسي

Quote: يا ولدبوك الجماعة لو ما خلوا اللهجة العنصرية حيشوفوا الكتير المثير والخطير.خلهم يجهزوا مناديل الورق لكفكفة الدموع.عبد الرحيم كلامو صاحالخرطوم ما مسجلة بشاهدة بحث باسم زول.العاجبو عاجبو والماعاجبو يشرب من البحر..بلاش مجمجمة

ول أبا سماعين اعقلها وامرق من البوست دا ...
ول أبا بريمة عندو رؤية وسايق البوست ليحقق صفاء نية ول ابا عبد الرحيم دقلو في قومية الخرطوم والسودان عموم ...
والله يا سماعين لو قامت القايمة اليوم داك ما في زول بشوف بطن كراعنا ...
لكن سيكتب التاريخ إن آخر عهد للرخاء والأمن المتماسك هو عهد الأنقاذ ...
ياخ نحن عشمانين نمشي لا قدام ...
وقدام دي عشمانين تكون دولة القانون التي لا يهم من يحكمها ما دام القانون بقيد صلاحياته ومهامه ...
القحاطه خيبوا ظننا بفش الغبائن والفشل الملتلاحق فما تزيد جراحنا علي العلينا جروح ...
إنتهي...

بعد كلام عبدالرحيم دقلو العنصري البغيض أصبح سحب الدعم والغطاء السياسى و الدستوري من الدعم السريع فرض عين .

علاء سيد أحمد

مساكين أنت ومحمد جلال هاشم .. آل دقلو ما ح يعبروه .. يخلوه يعوعي مثل ديك العدة. دا كرت محروق ساكت.

بريمة

Quote: والله يا سماعين لو قامت القايمة اليوم داك ما في زول بشوف بطن كراعنا ...

التاريخ شهد قبل كدة بانكشاف ستر بطن كراعكم. لو داير ممكن اذكرك.

مطلوب منكم شي واحد.
اوقفوا الحملات المفرقة بين ابناء الوطن الواحد.
انتهي

Quote:

Quote: ول أبا بريمة عندو رؤية وسايق البوست ليحقق صفاء نية ول ابا عبد الرحيم دقلو في قومية الخرطوم والسودان عموم .

كمان عايزين تبقوا قضاة لمحاكم تفتيش الضماير.

دا كلام فارغ
مافي مواطن عندو حق مطالبة مواطن آخر لاثبات حسن نيته في قضية عامة هي ملك للجميع ولا فضل لأحد على آخر فيها.

الكلام واضح ماداير مجمجة (الخرطوم ما مسجلة بشهادة بحث لزول بعينه) - عاصمة السودان ومن حق اي مواطن سوداني ان يتمتع فيها بكامل حقوقه.

- يا بريمة اول من فضح آل دقلو حميدتى - وعبدالرحيم هو :
احمد الضي بشارة : وعشان ماتقول الشماليين عنصريين وماعيزين آل دقلو
احمد دا واحد من أبناء المسيرية وقبيلة المسيرية قبيلة مشهورة ومعروفة جداً
لكل السودانيين الزوال قال الحقيقة فى ان ال دقلو لهم مطامع فى السلطة والفيديو دا كان سبب فى اعتقاله وحبسه حتى الآن
بالله عليك اسمع الفيديو دا حتى نهايتة عشان تعرف وتشوف العفن والوهم العايشين فيه الرجرجة عيال دقلو .

فيديو خطير وهام يكشف طموحات اسرة دقلو فى الحكم والذى كان سبباً فى اعتقال احمد الضي بشارة


الرد على عبدالرحيم دقلو / رسالة لعبدالرحيم دقلو "تسجيل"
احد الاخوة ردّ على المقطع ادناه : " وطبعاً مفاهيم الناس تختلف من شخص لآخر والزول دا فهمه متقدم اكثر من عبدالرحيم دقلو لذلك جلبنا مشاركته

احد الاخوة ردّ على المقطع اعلاه : " وطبعاً مفاهيم الناس تختلف من شخص لآخر والزول دا فهمه متقدم اكثر من عبدالرحيم دقلو لذلك جلبنا مشاركته :

Quote: محمدايدام ال جودة أنا زاتى من أهل دقلو ولكن اختلف معه جملتا وتفصيلا اثارت العنصرية ولا نقبل هذا الكلام ابدأ فى الشمال ونحن الآن عندنا ناس في مناطق الذهب فى ابو حمد ودنقلا ما في زول قالهم عينكم فى رأسكم وأنا بقول لأهلى الشماليين فوتو الفرصة عليهم وأنتم أهل الحنكة والحكمة لا يضلكم من ضل

Quote: أنا زاتى من أهل دقلو ولكن اختلف معه جملتا وتفصيلا اثارت العنصرية

مين الأثار العنصرية الخلت عبد الرحيم يقول الكلام دا من أساسو؟


يا جلابة سيبو اللولوة.



كسرة احمد الضي بشارة لا يعتد بقوله
تابع مصالحه
بوق لمن يدفع اكتر

علا سيد أحمد العنصري مثل أستاذنا حسن فرح،
أنت مفتكر جيبتك ول أبا أحمد الضي بشارة .. يعنى خلاص جبت النجيضة .. أن آل دقلو عنصريين .. وعايزين يملأوا السودان دماء؟ .. لولا آل دقلوا ما كان أهلك يكون عندهم متجر بتاع لسلاتك يقولوا عليهم حقهم .. جت الجماعة يكونوا وزعوها غنائم ..!

ثم نوريك، أنت قايل كل بقاري ينفخ في شدوقه مثل "ول بوكا" .. هل تعرف ول بوكا؟ .. أسأل كحل الشيخات ول أبا سماعين ح يوريك .. ما أي بقاري ينفخ في شدوقة يفهم ثقافة وتراث وحتى لهجة البقارة .. شخصي الضعيف، حينما أقول ليكم كلمات مثل حقت أبو مينو؟ هى كلمات ضمن لهجة البقارة وهي لا تعنى تعدي ولا إغتصاب ولا عنصرية .. تعنى إثبات حق عام ولجميع الناس .. وأنتم هنا كلكم أكدتم أن الخرطوم لجميع السودانين .. مركز قرارهم .. لما يجئ زول من غرب السودان ويقول الخرطوم ما حقت أبو زول (يعنى نفس الكلام ..) تثور ثائرتكم ..

شخصي الضعيف، حينما أقول ليكم أن الخرطوم ما حقت أبو زول؟ .. أعرف يقيناً ما حقت أبوي ولا حقت أبوك ولا حقت أبو أحد .. هى حق للجميع ..

أخراج الكلام من سياقة وإثارت النعرات .. ح تكون وبال عليكم أنتم ولا أي أحد غيركم ..


تريثوا قليلاً ..

بريمة

علاء
وأقول ليك شيئ لا أحمد الضي ولا أي من أولادنا وبناتنا الذين نشأوا في الوسط النيلي يعرفوا عن البقارة .. تأريخياً البقارة ينتمون للقبائل الجهينية .. وهى قبائل رعوية لا علاقة لها بالحكم .. وأنا بريمة دا اليوم لو جيت ومسكت وظيفة دولة يكون يوم مثل الذي أدخل السجن .. نحن ناس أحرار في بوادينا .. وأمراء في أهلنا .. حتى مواصفات الجاه والسلطان والجمال تختلف أختلاف جذري من أي شيئ أنت شايفه أمامك في السودان .. نحن تجري في دماءنا الفروسية .. وأي أستفزاز ومحاولة إهدار لكرامتنا بنحمل سلاحنا .. وهناك باطن الأرض أفضل لنا من ظاهرها .. نحن جينا الخرطوم لأن التحدي الذي واجهناه هناك منذ أكثر من 30 عاماً أنتقل وجاءكم ببلاوي متلتلة .. وأنتم كشعوب سودانية تربطنا علائق الوطن والدم .. نقول ليكم أنتم ما قدر تلك البلاوي .. نحن السم القدر عشاها .. والموقف دا ليس ضد الحركات التى تراها .. هذه حركات جاءت تحمل غصن الزيوت .. ويجب أن تبادل بحمامات السلام .. بل نحن ضد قوي سياسية جاءت وهى تحميل تهديد مباشر وهناك وضع داخلي هش ممكن يعصف بوجود القطر برمته .. فأبناءنا جاءوا لحراسة وطن أمنوا به.

نحن لا ننسي الشمال كشعب، له فضل علينا جميعاً .. شعبنا في الشمال من أكثر الشعوب السودانية التى أمتازت بالسلم الأجتماعي .. وكذا الفور والمساليت والنوبة في الجبال .. الشعوب المسالمة هى التى تعرضت لأكثر المضايقات والأستفزاز علي طول تأريخ الحرب .. وصارت كالذي عضاه الديب يخاف من جر الحبل .. ونحن هنا نحاول أن نطمأنكم .. مهما رأيتم من سوء .. فإن الأهداف أسمي مما تتصورون ..

جاييك تاني لحكاية أولاد دقلو .. دايرين يحكموا ..

بريمة

علاء

Quote: فيديو خطير وهام يكشف طموحات اسرة دقلو فى الحكم

ثم من أنت لكي تحدد للناس سقف طموحاتها ..؟ والله عيب منك. أبناء هذا الوطن كيف يكونوا متساويين في الحق العام إذا نحرمهم حتى حق التطلع ..؟


بريمة

Quote: ثم من أنت لكي تحدد للناس سقف طموحاتها ..؟

ومن أنت حتى تصادر حقه فى التعبير !؟

احمد الضي بشارة انا اختلف معه فكرياً وسياسياً ولكن من حقه وحسب الوثيقة الدستوريه ان يعبر عن رأيه !
حيث انّ الوثيقة الدستورية كفلت للجميع حرية الرأي .
وبأي صفة قام عبدالرحيم دقلو بحبس احمد الضى بشارة !؟
سلطة الاعتقال والحبس من صميم عمل النيابة والقضاء !؟ مادخل الدعم السريع فى ذلك - نفس تغول النظام البائد فى السلطات .
الوضع الرمادى دا ما ح يستمر كلو كلو ان شاء الله السودان دا ينقلب لى لبنان او صومال تانى .!؟

سقف الطموحات يا سيد يحددها صناديق الانتخابات لا رفع السلاح فى الوجوه .

Quote: حينما أقول ليكم أن الخرطوم ما حقت أبو زول؟ .. أعرف يقيناً ما حقت أبوي ولا حقت أبوك ولا حقت أبو أحد .. هى حق للجميع .

يا ولدبوك الناس ديل احسن يسمعوا كلامي وكلامك.

خوفي عليهم من الناس الكاضمين.

كاضمين بلهجة اهلنا البقارة معناها (كاظمين)
الكاظمين الغيظ.


على رأي صديقي ابن الأبيض المستنير
قال لي في ذات يوم حافل بالأنس الفكري

السودان دا محتاج لصدمة كبيرة عشان يعاد ترتيبه..

اهلنا الجلابة عاشوا زمان طويل تحت ظلال افكار ومفاهيم مغلوطة حتى عن السودان.
لا يمكن أن يفيقوا من هذه الأوهام الا بحدوث الصدمة - وهي ليست مثل صدمة معتز موسى بالضرورة..

الكلام القالو عبد الرحيم كلام بسيط وعادي ومن حق اي سوداني يقوله

الخرطوم حقت الجميع


المشكلة وين؟؟؟؟؟؟؟؟؟؟؟؟



لكن الفي بطنه حرقص بقوم ويرقص..


النفوس مشحونة برواسب وترسبات الماضي البعيد
ما تسمع فصاحة البعض وحديثه عن الاستنارة والفهم والرقي وادعاء التسامح
كلهم رهائن لحكاوي الحبوبات والجدود
ما تسمع لي النفخة الكضابة
في المحكات الصعبة تظهر الحقيقة

Quote: علا سيد أحمد العنصري مثل أستاذنا حسن فرح،

ههههههه بريمة ونظرية رمتنى بدائها وانسلت . وألصقت بى تهمة فيك أنت .
بريمة بطّل لولوة واثبت التقيل ورا .

الخرطوم حقتنا وبنحوم على راحتنا






من أقوال أحد الذين نصلت بناطلينهم

علاء
هنا النجيضة .. جابها لك ول أبا سماعين

Quote: الكلام القالو عبد الرحيم كلام بسيط وعادي ومن حق اي سوداني يقوله الخرطوم حقت الجميع

عايز تشيل هذه الحقيقة شيلها .. عايز تخليها أرميها وطاة .. أنت وول أبا أحمد الضي وأمثالكم لو عايزين تكابروا وتلووا عنق الحقيقة .. أفعلوا ما تشاءون.

نحن هنا لا نكابر ولا نزايد علي وطن ربانا وعلمنا .. نحن نقول الحقيقة بيضاء .. لا فيها دغمسة ولا دسديس ..

أنا سألتك هل سمعت بكلمتي: ول بوكا؟ .. هل سألت زول بقاري؟ .. أمشي أسأل ول أبا أحمد الضي قول له ماذا تعنى ول بوكا!

كأي جزء من السودان له لهجته ومفرداته في اللغة .. كلمة حقت أبو مينو؟ ..هو سؤال أستنكاري يفيد النفي .. ليس لأحد .. أي للجميع .. الصعوبة شنو أن تفهم مثل هذا القول؟


بريمة

علاء

Quote: ومن أنت حتى تصادر حقه فى التعبير !؟ احمد الضي بشارة انا اختلف معه فكرياً وسياسياً ولكن من حقه وحسب الوثيقة الدستوريه ان يعبر عن رأيه ! حيث انّ الوثيقة الدستورية كفلت للجميع حرية الرأي . وبأي صفة قام عبدالرحيم دقلو بحبس احمد الضى بشارة !؟ سلطة الاعتقال والحبس من صميم عمل النيابة والقضاء !؟ مادخل الدعم السريع فى ذلك - نفس تغول النظام البائد فى السلطات . الوضع الرمادى دا ما ح يستمر كلو كلو ان شاء الله السودان دا ينقلب لى لبنان او صومال تانى .!؟ سقف الطموحات يا سيد يحددها صناديق الانتخابات لا رفع السلاح فى الوجوه .

من الذي صادر حق أحمد في التعبير ..؟ أنت بصحك؟ هل تعرف الفرق ما بين مصادرة الرأي والأعتراض علي الرأي؟ نحن هنا قدمنا رأي في كلمة "حقت أبو مينيو؟" .. جزمنا لك بصحة ما نقول .. وأنت مازلت تكابر في الفارغة .. كان بأمكانك تأتي بمعنى مضاد .. ولو ما عندك فكرة أسأل هناك بقارة كثر في المدينا .. أسأل رئيس الوزراء ذتو لو قال غير كده .. أسأل الصحفي ول أبا عوض الله نواي .. ليه تحاول تكذبنا ولا تملك حتى ما تقدمه ..؟

ثم نسألك آل دقلو ..أنا لم أقابل فيهم أحد .. وليس ناطق رسمى بأسمهم .. فقط أنا أتحدث عن شيئ عام .. "حقت أبو مينو؟" .. لو قالها أي شخص .. بفهمه بنفس الفهم .. وحتى لو جاءت منك أنت .. بفهمها بنفس طريقة فهمي أنا إلا تقول لي غير هذا الفهم بالنسبة لك .. مثل هذا القول يندرج تحت المسألة الثقافية .. وأهل الثقافة أولي بتفسيرها .. ذات مرة واحد شافنى نصلي .. سألني: لماذا تقبل الأرض؟ .. قلت له يا زول أسألني ماذا أفعل .. بدل تنجر ليك حاجة من عندك!! ..

وبعد كل مناتلتك أنت وأستاذنا حسن فرح .. نسألكم ما هو المثبت ثقافياً في الشمال تجاه كلمة: الخرطوم حقت أبو مينو؟ .. قول لي رأي ثقافي .. أنا منتظر منك إجابة.

بريمة

الذي صادر حقه الدعم السريع سجنوه عديل يا بريمة

Quote: الذي صادر حقه الدعم السريع سجنوه عديل يا بريمة

شكراً يا منتصر
المشكلة فى بريمة انه ماقادر يستوعب ان كتاباتى كوووولها هنا فى هذا الخيط ضد اقوال وتصرفات
العنصري الفج القبيح عبدالرحيم دقلو ..
بريمة بيعتقد اننى اكتب هنا فى هذا البوست ضده هو شخصياً ..

Quote: "حقت أبو مينو؟"

يا بريمة
حقت أبو مينو ؟ كلمة حق أراد بها العنصري القبيح عبدالرحيم دقلو كسب ود
الحركات المسلحة والمناسبة التى قيلت فيها بالتحديد مباشرة بعد :
دخول و احتلال قوات مناوى لدار اللجنة الاولمبية بالخرطوم بقوة السلاح وطرد الموظفين من الدار
والمتخلق عقلياً عبدالرحيم دقلو بدل استنكار تلك الفعلة الشنعاء ( قام يكحلها عماها ) وبارك لقوات مناوى فعلتها الشنيعة .

الخرطوم حقت جميع المدنيين ومحرمة على كل الحركات المسلحة وحتى الجيش السوداني وكنت ولازلت من المطالبين
باخراج القيادة العامة الى خارج المناطق المأهولة بالسكان واخراج جميع الاسلحة والقوات من المناطق السكنية .

Quote: وكنت ولازلت من المطالبين باخراج القيادة العامة الى خارج المناطق المأهولة بالسكان واخراج جميع الاسلحة والقوات من المناطق السكنية .

نقل مقر القيادة العامة وكافة مقرات الوحدات العسكرية والامنية الى خارج المدينة

علاء
تاني ح أسألك

Quote: يا بريمة حقت أبو مينو ؟ كلمة حق أراد بها العنصري القبيح عبدالرحيم دقلو كسب ود

سألتك عن الرأي الثقافي، ماذا تعنى لكم حقت أبو مينو؟ ليه ما قادر تجاوب؟ ..
في ثقافة عبد الرحيم .. تعنى ما حقت زول .. حتى هو نفسه ينفي ما حقته .. حق للجميع .. حق عام.

معقول ما فيكم في الشمالية .. زول يقول الشيئ دا (مثلاً البئر دا ) حق أبو مينو؟ والناس كلها تكون فاهماه يتكلم في شنو؟؟

ود بوكا الزازيتك بها تعنى "الحمار" بلهجة البقارة .. وما ح تلقي بقاري يقول ود بوكا تعنى جمل أو حصان .. وهكذا كلمة حقت أبو مينو؟


أنا أفتكر "أي رست ماي كيس" .. وأنت وبصارتك.

بريمة

Quote: سألتك عن الرأي الثقافي، ماذا تعنى لكم حقت أبو مينو؟ ليه ما قادر تجاوب؟ .. في ثقافة عبد الرحيم .. تعنى ما حقت زول .. حتى هو نفسه ينفي ما حقته .. حق للجميع .. حق عام.

وأنا جاوبتك يا بريمة

انتا الظاهر عليك ما قريت المشاركة بالكامل انا كتبت :

Quote: الخرطوم حقت جميع المدنيين ومحرمة على كل الحركات المسلحة وحتى الجيش السوداني

يحلكم ويحلنا تقرير المصير


إذا هذا هو الهدف يقولوا عاليا وليست تجربة جنوب السودان ببعيدة

هي ويني الخرطوم وناس الخرطوم؟
الكلام دا كان ممكن يكون معقول وليس مقبول قبل جانحة الجفاف الاولى في عهد نميري
وعيش ريغان
اسا لافي خرطوم ولا حاجة
مدينة شاخت وترهلت واكتنزت شحما ولحما واصبحت معاقة الحركة بسبب ترهلها
اوساخ في كل بقعة حتى داخل المصحات الطبية
فوضى في كل ركن
شئ فريشة وشي ستات شاي وشي حرفيين وشي هائمون في الارض بدون هدف
وما اكثرهم وهي ظاهرة تبرز العطالة في السودان
يزحمون الشوارع حتى لمن اراد ان يسير راجلا
فما بالك ومن يمتطي حتى دراجة
الخرطوم لم تصد حتى المستعمر
فما بالك بابناء وطنها؟
بالمناسبة اولاد الغرب ضربو على الحتة الريفة
وهم في ادنى السفينة باختيارهم
ولو تركوا على هذا النحو ستغرق السفينة بكل من فيها

أخي علي الكنزي سلامات

Quote: هي ويني الخرطوم وناس الخرطوم؟

الخرطوم التي اعنيها موجودة
ممثلة في صحفها وكتاب اعمدتها وورثة عرشها
فهي موجودة وتعمل في كل الاصعدة.

علاء

Quote: وأنا جاوبتك يا بريمة

لم تجاوبني .. أبديت رأيك الشخصي .. وأنا ما عايز رأيك الشخصي، أنا عايز فهم ثقافي .. رأي ثقافي للشمال لكلمة: "حقت أبو مينو؟"

Quote: أسألك عن الرأي الثقافي، ماذا تعنى لكم حقت أبو مينو؟ ليه ما قادر تجاوب؟ .. في ثقافة عبد الرحيم .. تعنى ما حقت زول .. حتى هو نفسه ينفي ما حقته .. حق للجميع .. حق عام.

بريمة

ول أبا شيخ الكنزي
سلامات .. وحبابك ..

Quote: بالمناسبة اولاد الغرب ضربو على الحتة الريفة وهم في ادنى السفينة باختيارهم ولو تركوا على هذا النحو ستغرق السفينة بكل من فيها

توسع لينا في الحتة دي .. الفهم شنو؟ .. الحتة الرحيفة؟

بريمة

الفهم واضح

لاداعي لوجود مسلحين داخل المدن الا الشرطة وبالذات القيادات التابعة للجيش .

في الاقاليم الحكاية تقريبا مطبقة اذ توجد الحاميات خارج المناطق المدنية كما رايت في عطبرة
وشندي والابيض والدمازين وبورسودان .
مافي زول بيمنع مدني من التواجد في اي بقعة سودانية
عمنا الياس كان تاجر في قلب الجنينة
وعثمان وليد دارفور بقضي ايام راحته من التنقيب على الذهب
في فتوار نواحي بربر وكمان داخل منزلنا .
اي زول عايز يزايد نكون له بالمرصاد


العم الياس : والد الزعيم حاتم عضو المنبر

ول أبا محمد الشيخ

Quote: لاداعي لوجود مسلحين داخل المدن الا الشرطة وبالذات القيادات التابعة للجيش .

كلامك دا في حال أوضاع طبيعية ..

لكن زول قضي زهرة شبابه في الغابة .. لا يركن لقانون غير قانون القوة .. ما الذي يمنع ممارسته للاقانون؟ .. كيف تعيد إنسان للمدنية وحكم القانون وهو عاش و أصبحت الحياة بالنسبة له غالب ومغلوب .. و ما فيها أي حلول وسط؟

هذه اسئلة كبيرة .. ويجب بحثها .. وأسباق الحكمة والعقل علي أي فعل قبل الإقدام إليه أمر لا مناص منه .. كل النعرات الحاصلة والله إن لم تعقد الأمور لا تحلها ..

عشان كده أنا قاعد أقول خرجنا من تحدي الحرب .. إلي تحدي السلام .. وإذا لم نرتفع بأنفسنا فوق الصغائر ونواجهوا تحدي السلام .. ح نفشلوا تاني .. وح ننتكس ..


بريمة

يا بريمة دقلو جونيور سحب كلامه اها انت كيف

Quote: مافي زول بيمنع مدني من التواجد في اي بقعة سودانية عمنا الياس كان تاجر في قلب الجنينة وعثمان وليد دارفور بقضي ايام راحته من التنقيب على الذهب في فتوار نواحي بربر وكمان داخل منزلنا . اي زول عايز يزايد نكون له بالمرصاد العم الياس : والد الزعيم حاتم عضو المنبر

اللهم ارحم عمنا الياس موسي واكرم منزلته وانزل البركة في ذريته ...
آمييين

Quote: التاريخ شهد قبل كدة بانكشاف ستر بطن كراعكم. لو داير ممكن اذكرك. مطلوب منكم شي واحد. اوقفوا الحملات المفرقة بين ابناء الوطن الواحد. انتهي

ول أبا سماعين أنا طلبت منك واتس اوصلك حملات التفرقه والعنصريه عشان تعرف البروج ليها مينو اديتني حبال بلا بقر ...
أما التاريخ فقد فقد سجل إن أخوتنا لنا كانو معنا في 57 و2005 فعلوها ولم ينجح أحد ...

سمعة أخوووي أبرد ...

التحايا والود لأرشيف الذاكرة القريبة جدن من الحدث..!

في ناس عندها كانت ممسحة بالأدب ، تتدثر بالوسطية والمنطقية والمحبة الشاملة والاخوة والمساواة .. تنظر الغد يحمل مستقبل غير..

بينما كانت هنالك نفوس ملؤها الحقد والغل وشياطينها عنصرية وتفرقة وشتات..
وجلهم أدعياء كذبة!

وقعت الطآمة وتفرقت القلوب وتغيرت القناعات وتبدلت الادوار .. ولم نعد نعرف من المتهارجين إن كانوا في وسط الخرطوم الماعندها سيد أم يستلقون في مهاجرهم ومخابئهم تحت ظلال الأشجار وبيتش الخلايج بعيدا عن ازيز الدانات وهدير الطائرات؟
ونحن هنا ننتظر لنعرف الخرطوم حقت ابو ميـنو.. لان مروي أبوها اتعرف !!!!

ربنا يصلح الحال

بارك الله فيك أخي حيدر الزين

Quote: • فليذق أهل الخرطوم طعم الحنظل .. الذين أذاقونا له عقوداً .. تشريداً .. وتقتيلاً .. وتخريباً. ولا يظن أحداً إننا أحقد علي قبائلنا التى تسكن الخرطوم .. ولا إلي أهلها الطيبن الذين لا شأن لهم بعذابات أهل .. هناك من قال أن الخرطوم بها 70% من أبناء هوامش السودان .. فليكن. • • كما جاء في حديث أم المؤمنين .. • (حديث أم المؤمنين أم عبد الله عائشة -رضي الله عنها- قالت: قال رسول الله ﷺ: يغزو جيش الكعبة، فإذا كانوا ببيداء من الأرض يُخسف بأولهم، وآخرهم، قالت: قلت يا رسول الله، كيف يخسف بأولهم وآخرهم وفيهم أسواقهم ومن ليس منهم؟ قال: يخسف بأولهم وآخرهم، ثم يبعثون على نياتهم[1]. متفق عليه، وهذا لفظ البخاري.) • هذا الحديث .. أشكل علي أم المؤمنين عائشة .. وكانت تسأل رسول الله .. أن هذا الجيش فيه أناس ربما لم يأتوا بنية غزو مكة .. وفيه أناس جاءوا بغرض زيارة مكة ذات نفسها .. وليس لهم نية بتخريبها .. وقد أجاب عليها المصطفي ص .. أن يخسف بأولهم وأخرههم ثم يبعثون علي نياتهم .. • • • اللهم أخسف بأهل الخرطوم الأرض .. ثم أبعثهم علي نياتهم .. • • بريمة • • • ----------------------------------- • "أبقوا عشرة يا عيال أبا .. يربطكم حبل .. وتقطعكم سبيبة" مثل بقاري .. • • بريمة

السلام على صاحب البوست بريمة ومن تداخل في بوسته اسمحوا ان اوجه سؤال للاخوين حميدتي ودقلوا :-
من الذي اتى بكم الى ولماذا ؟
سؤال اخر موجه لكل سكان دارفور وعلى راسهم بريمة واسماعيل في اي عام تم انضمام دارفور الى السودان ؟
سؤال اخر لكل سكان دارفور وعلى راسهم بريمة واسماعيل :-
هل دارفور انضمت الى السودان عن طريق ارادت اهلها او مهزومة ؟

أين ول أبا سمعة عساك بخير

الجنجويدي، سليل المراحيل، بريمة اتلما.

سلام للجميع،

ول أبا حيدر يا أخي شعللت النار في الهشيم التى هى أصلاً مشتعلة .. كان تجئ تسألنى عن موقفي من الحرب المدورة .. أنا أدعو الله ليل نهار أن يحقن دماء الشعب السوداني.

الأخت هدي أخرجت البوست من سياقة .. تصطاد في الماء العكر .. نقلت من بوست أخر وله سياق أخر يختلف عن هذا البوست.

بخصوص الخرطوم حقت أبو مينو؟ .. ما زلت متمسك بتحليلي في البوست ..


بريمة

ما فى أى صيد فى الماء العكر, انها نِعم الإنترنت 😀
الفكرة وما فيها صيد "النوايا السؤ…"
*الجاية دى لطيفة شديد حيث الأثنين الأنت زعلان من أجلهم مدورين الشكلة ضد بعض فى "نص الخرطوم"

بريمة آدم كتب فى بوست سابق:

Quote: • أخي العزيز، الخرطوم تقوم قيامتها .. لأن أثنين من أبناء غرب السودان .. الجنجويد حميدتي كما يقولون .. والغراب كباشي كما ذكرت أنت في حديثهم عنه ..

هدي
بأمكانك تفتحي بوست منفصل .. وتنقلي ما تريدين نقله في سياقة .. حسي كدي خبربت هذا البوست ..


بريمة

بشاشا،

Quote: الجنجويدي، سليل المراحيل، بريمة اتلما.

قرقرقرقر .. يا أخي رغم المآسي ضحكتنى .. وشر البلية ما يضحك ..

حسي أنت ظهرت متناقض .. هل تعرف أن قوات المراحيل حرستكم منذ 83م، قيام تمرد د. جون قرنق .. تانى حراسة ما في!

بريمة

بشاشا،

Quote: الجنجويدي، سليل المراحيل، بريمة اتلما.

قرقرقرقر .. يا أخي رغم المآسي ضحكتنى .. وشر البلية ما يضحك ..

حسي أنت ظهرت متناقض .. هل تعرف أن قوات المراحيل حرستكم منذ 83م، قيام تمرد د. جون قرنق .. تانى حراسة ما في!

بريمة

أين ول أبا سمعة عساك بخير

Quote: هدي بأمكانك تفتحي بوست منفصل .. وتنقلي ما تريدين نقله في سياقة .. حسي كدي خبربت هذا البوست .. بريمة

وجهة نظر مفيدة…

Quote: • • الشعب السودان عليه بالهبة .. نحو الخرطوم .. فهي عدونا الأول الأن .. والحرب يجب أن تكن في الخرطوم وليس في غيرها .. • • ويتواصل الغضب .. حتى تعد الخرطوم إلي رشدها .. وشكراً لأبن فاشر السلطان أبو زكريا .. الأخ محمد أدم فاشر .. • • ------------------------------------------------------------ • ن "أبقوا عشرة عيال أبا .. يربطكم حبل وتقطعكم سبيبة" مثل بقاري • • بريمة

###دى شهادة كاملة ممكن تُقدم مع وثائق "التحريض للحرب"

هدي

تعبت يا خيه .. هونى علي نفسك ..

بريمة

Quote: فلو كنت في مكان بطلنا القائد دكتور خليل أبراهيم .. ونجحت مثل ما نجح خليلاً في غزو الخرطوم .. قسماً لقصفت دار مؤتمر الخريجين بصواريخ كروز حتى تتطاير أشلاءً .. • • • ويتواصل الغضب .. حتى تعد الخرطوم إلي رشدها .. وشكراً لأبن فاشر السلطان أبو زكريا .. الأخ محمد أدم فاشر .. • • ------------------------------------------------------------ • ن "أبقوا عشرة عيال أبا .. يربطكم حبل وتقطعكم سبيبة" مثل بقاري • • بريمة

###توثيق يُقدم التحريض للحرب، والعداء والارهاب

Quote: تعبت يا خيه .. هونى علي نفسك .. بريمة

- أبداً ما فى تعب…

Quote: - أبداً ما فى تعب…

كويس ..

بريمة

القاتل دقلو 2
قال ندمانين …
هههها

سلامات ول ابا بريمة ولك التحية

وقت رفعت البوست دا للمعلومية يعني ما فتنة ولا عاوز اضعك في وش المدفع
ابدن ..
فيهو مداخلات وقراءات من الزمن داك اثبتت الان صحتها وفيهو كلام في وقته كان بيتشاف خيال الان اصبح واقع

بالاضافة لانه كلمة ( حقت ابو مينو ) ما بتعني اكتر من الاستنكار لأنه الجواب المتوقع عندنا مباشرة بعد سؤال زي دا تقول ما حقت زول
او حقت الناس كلها..
وفعلا الخرطوم ما حقت زول..
هي حقت السلطة والحيكومة ليس غير لانه اساساً تم انشاءها بواسطة السلطة والحيكومة لتكون مقراً للحكم وللسلطان
وهي من المدن الحديثة في السودان التي تمت صناعتها صناعة بواسطة المستعمرين لتحل مكان المدن التاريخية وعريقة ولتغير هندسة حكم السودان المعروف الذي استمر لآلاف السنين الي هذا المسخ المشوه الذي اصبح عليه في ال200 سنة الخيرة..

ونعيد ونكرر
فعسى أن تكرهوا شيئا ويجعل الله فيه خيرا كثيرا ..


تحياتي