وردني إتصال من نيابة الصحافه والمطبوعات للمثول امامها وبرفقتي ضامن بخصوص بلاغ موجه ضدي من مجلس السيادة الانتقالي مفوض فيه عزمي جمال الدين محمد صالح من قبل السيد رئيس محجلس السيادة وقوات الدعم السريع بخصوص قصيدتي التي قدمتها من خلال قناة سودانية 24 قبل شهر او اكثر/ نفس الزول الكاتل ولدك شال لي روحو الفاتحه وقلدك حاكم بلدك رمز سيادة نفس كتائب الظل والغل نفس جهاز الأمن والخوف هم بي أمرك فضو قيادة..
اعتذرت لعدم تواجدي بمدينه الخرطوم للمثول امهامها..
وبقول الحمدلله الذي اذهب عنا نظام الانقاذ الذي أعتقلنا بسجونه حين صدحنا بالحقيقه وقتها..
ودي المدنيه الدايرنها.. لحدي ما نصل للحديقه كلها.. ويذهب ماتبقى من اوجه الانقاذ..
وبالنسبه لي فض الاعتصام: يعني في زول ماعارف..؟؟
Post: #2 Title: Re: البرهان والجنجويدا يفتحون بلاغ ضد شاعر Author: زهير عثمان حمد Date: 03-05-2021, 00:12 AM Parent: #1
· 📌مجلس السيادة الانتقالي يفتح بلاغ ضد #الشاعر_يوسف_الدوش بسبب قصيدة عن مجزرة فض إعتصام القيادة العامة..!! نص القصيدة __________________________ نفس الزول الكاتل ولدك شال لي روحو الفاتحه وقلدك حاكم بلدك رمز سيادة نفس كتائب الظل والغل نفس جهاز الأمن والخوف هم بي أمرك فضو قيادة... اعتذرت لعدم تواجدي بمدينه الخرطوم للمثول امهامها.. وبقول الحمدلله الذي اذهب عنا نظام الانقاذ الذي أعتقلنا بسجونه حين صدحنا بالحقيقه وقتها.. ودي المدنيه الدايرنها.. لحدي ما نصل للحديقه كلها.. ويذهب ماتبقى من اوجه الانقاذ.. وبالنسبه لي فض الاعتصام: #يعني_في_زول_ماعارف..؟؟ #الشاعر_يوسف_الدوش
Post: #3 Title: Re: البرهان والجنجويدا يفتحون بلاغ ضد شاعر Author: خضر الطيب Date: 03-05-2021, 06:01 AM Parent: #2
سلام ابو الزوز ياخ الدوش دا دوش النظام العسكري الفاسد كلو و ختاها ليهم طااااخ و بكل بساطة لخص كل الحصل في هذه القصيدة الرائعة البوست دا مفروض يكون فوق لو تكرمت يا حبيب أمس انا رفعتا الفيديو في قروب الإتحاد و اتناقشنا حول مساندة هذا الشاعر الجميل كامل التضامن مع هذا الراكز حتى نفوت الفرصة على عساكر السجم القتلة حميدتي و البرهان و غيرهم من الطفابيع
Post: #4 Title: Re: البرهان والجنجويدا يفتحون بلاغ ضد شاعر Author: أحمد محمد عمر Date: 03-05-2021, 08:42 AM Parent: #3
الراكز دة ما خاف من نظام الإنقاذ في عز بطشه ما بخوفوهو الجنجويد والعسكر القصيدة التحت دي بتاريخ 2015
Post: #5 Title: Re: البرهان والجنجويدا يفتحون بلاغ ضد شاعر Author: نعمات عماد Date: 03-05-2021, 09:03 AM Parent: #4
سلام زهير كامل التضامن مع الشاعر الصنديد الدوش. برهان و حميدتي يحاكموا مواطن في قصيدة، و الأولى أن يحاكموا هم على قتل المواطنين.
Post: #6 Title: Re: البرهان والجنجويدا يفتحون بلاغ ضد شاعر Author: أحمد محمد عمر Date: 03-05-2021, 12:08 PM Parent: #5
القصيدة اتعرضت قبل شهر وما شدت انتباه زول ولا تمت مشاركتها على نطاق واسع الآن بسبب غباء العسكر لم يعد في الفيسبوك موطئ قدم إلا وفيه صورة الشاعر والقصيدة وبعد الموضوع بقى ترند ما حيقدروا يعملوا ليه حاجة
Post: #7 Title: Re: البرهان والجنجويدا يفتحون بلاغ ضد شاعر Author: Ahmed Yassin Date: 03-05-2021, 01:11 PM Parent: #6
تضامنا الكامل وبكل الوسائل مع الدوش اصحاب الكاكي هزتهم قصيدة
Post: #8 Title: Re: البرهان والجنجويدا يفتحون بلاغ ضد شاعر Author: خضر الطيب Date: 03-06-2021, 09:59 AM Parent: #7
الشاعر عبدالقادر مروي في تضامنه مع الشاعر يوسف الدوش , الذي أرق مضجع العسكر القتلة الفاسدين
نفس الزول........ الحابس نفسك نفس الزول الشالك وحبسك نفسو هو نفسو العامل حرسك!!!
* اهديناك يايوسف وردة وحُب.... والغنوات متوالي تَصُب... لو يرموك.... يايوسف جوه الجُب ح تمر القافلة... وباقة الشعرا.... ونصبح ليك غيمات وسُحُب.... * كَمِّل نَصَّك.... وافتح باب الغنية وقول.... شَيِّد بيت بيتين وتلاتة وعشرة وزيد في الطول.... ما اصلو الغنية سلاح للطقمة.. وحصة وطلبة... ودار وفصول... * قول يايوسف.... وارمِ قميصك نار وحروف.... خلي الوطن العينو بياض... يتعافى يشوف.. قول وكل القافلة ح تهتف ليك.. وتقوم القافية الحان وكفوف
عبدالقادر مروي 5/مارس 2021
مهداه للشاعر يوسف الدوش
Post: #9 Title: Re: البرهان والجنجويدا يفتحون بلاغ ضد شاعر Author: منتصر عبد الباسط Date: 03-06-2021, 11:00 AM Parent: #8
بالمناسبة هل يملك أحد وثيقة أو اي كلام صوتي أو مكتوب أو موقف معلن من قحت طالبت فيه بحل جهاز الامن والمخابرات ؟؟؟؟؟ من أخيب خيبات قحت هي تمكينها وابقائها ودعمها غير المباشر لأمن الكيزان وللدعم السريع لولا قحت لما استمر جهاز أمن الكيزان والدعم السريع حياً فاعلاً في المشهد السوداني مشكلتنا ما بحلها الشعراء والناسجون نسيجهم من خيوط العاطفة والخيال بل يحلها علماء وخبراء وباحثون وليس نشطاء احزاب فاشلة بليدة عقيمة صانعة للبؤس والشقاء للشعب السوداني منذ الاستقلال ولا زالوا