إسألوني قبل أن تفقدوني كيف نصل بنطلوني

10:34 AM February, 26 2021

سودانيز اون لاين
أحمد محمد عمر-
مكتبتى
رابط مختصر

صباح اليوم في السوبر ماركت
واضطررت لرفعه عدة مرات أثناء تسوقي :)

أيوة ما لابس حزام
حزام مين يا عمك؟!!
هو أنا أساساً كنت بثبت البنطلون بي حزام العربية .. والله جد
أول ما أقعد في العربية بفك زرارة البنطلون عشان ما تطير تكسر القزاز
أصلاً بقوا عندي بنطلونين فقط - من العهد البائد - صالحات للبس . والباقي في الرقبة ما بخش
حمدت الله على البناطلين الما جدعتها، نجدتني وأبيت اشتري بناطلين جديدة كلو كلو .. ما داير اعترف بي إني رجعت أكعب من زمان :)

نصل البنطلون بعد نقيصة 5 كيلو جراء ريجيم قاطعو من راسي بدأت في تنفيذه مطلع فبراير
لكن ما حأكتبه إلا تشرئب كروشكم
وبعد ما تسمعوا حكاياتي عن جنيف والسفارة القطرية

ههههه بهزر والله :)
الريجيم العملتو بتشرح في ربع سطر :
ما أكلت نشويات ولا سكر
وبس

طيب قاعد آكل شنو؟
أي حاجة إلا الاتنين ديل
شوربة الخضار ، السلطة ، البيض ، الفول ، الجبن ، التونة ، الفواكه ، السمك ، الدجاج
لكن من يوم 1 فبراير ما دخلت خشمي عيشة ولا رز لا مكرونة لا بطاطس لا فشار ولا أي نشويات من أي نوع

شوربة الخضار:
تحمر بصلة في زيت شوية وتقطع صدر دجاج قطع صغيرة تشوحه في البصلة وبعد شوية تكب فيه ثوم وطماطم وتسيبه ينجض
تقطع فاصوليا خضراء وكوسة وبروكلي وفلفل اخضر وزنجبيل مقطع كبار وتكبهن في حلة البريستو، التوابل على مزاجك، وتقفلها زي ربع ساعة أو أكثر بقليل
بعد النضج تقطع في الحلة شمار اخضر وتطلع الزنجبيل وتخلطها بالخلاطة بي لحمتها
بعد داك تزيد ليها الموية وتكبها في باقات بلاستيك وتختها في الفريزر كل الصباح تطلع واحدة تسخنها وتحدقها بالليمون وبالهناء
الطعم بكون غريب وغير مستساغ في الأول لكن تاني بتتعود عليه وتكتشف إنها وجبة مشبعة جداً

السلطة:
خيار، فلفل اخضر، طماطماية واحدة، بصل أبيض، ملفوف، خس، بقدونس.
التوابل: ملح، فلفل، شمار، توم بودرة، خل
طريقة الأكل:
بالملعقة، بعد تكبها في صحن كبير وتطعمها ممكن تاكلها بواحدة من الخيارات التالية
1- تفت فيها جبنة وتكب فيها شوية زيت سمسم للنكهة
2- تكب فيها علبة تونة وتخلطها بالسلطة تمام .. لاحظ إنه الأكلة سلطة بالتونة وليست تونة بالسلطة عشان ما تزعل لمن تلقى التونة اختفت
3- فول مصلح عديل كدة بالبيض المسلوق والجبنة وزيت السمسم، بس الكمية تكون أقل من نصف كمية السلطة
4- لحمة مفرومة أو حتى تفتت فيها كفتة
5- شاورما دجاج معمولة في البيت
6- تحمرها بي زيت خفيف شديد في طوة تيفال وتكسر فيها 3 بيضات وتقعد تحرك لحدي ما يختلط البيض المحمر بالسلطة

اللحوم:
أنا بفضل اللحوم البيضاء، لكن من المهم إنه كل أنواع اللحوم تكون معمولة بالفرن والزيت مسحة صينية
الفواكه: تفاح وبرتقال ويوسفي وكمثرى
أبعد من الفواكه السكرية تماماً زي التمر والموز والمانجو والتين
سلطة الروب: عشاء خفيف وجميل، زبادي منزوع الدسم ومخروط فيه خيار وفلفل
المشروبات:
بشرب نسكافيه بالحليب قليل الدسم الصباح، وأثناء اليوم كباية قهوة وكباية شاي، وكلهن بدون سكر
برضو مرات بشرب الروب قليل الدسم بالليل

* ملحوظة:
لازم معجون بنكهة ورائحة نفاذة، ومسواك بعد كل وجبة. لأنه السلطة بتعمل في ريحة خشمك عمايل بطالة

جدول الوجبات والكميات:
مافي أي جدول زي ما تجي تجي
بس البعملو أنا بتجاهل الجوع لفترة .. يعني لحدي ما يقرصني شديد حتى أقوم آكل
لكن الرمرمة بتاعة زمان ديك كل شوية فاتح التلاجة وشايل حاجة ديك بطلتها نهائي

جدير بالذكر إني خلال الستة وعشرين يوم الفاتو ديل تمنعت وصمدت أمام 4 صواني بسبوسة وكيك شكولاتة شووووبش .. ودة بالنسبة لي إنجاز أكبر من ماجستير شاهين

اتخلصت من 5 كيلو ولسة باقي أكتر من ضعفها ، لكن سنعبر وسننتصر

أها السادة أصحاب الكروش خلاص أديناكم الطريقة
ممكن بعد دة نحكي عن جنيف والسفارة القطرية؟

حليلنا نحنا ناس المواصة
فاكهتنا الوحيدة البصل الابيض
بنكدو زى الدوم
الكمثرى دى شنو

هههههههههه
قال ليهو كرشك كبرت اليومين دي ...
قال ليهو بي صوت عالي ... هرشك ...
قال ليهو مالك ومالا ... دي مصاري إنصرفت ...
غايتو برنامجك دا فيهو مشكلة مواد
صعب الحصول عليها وصرف قروش
تقيل إذا عايش عندنا هنا ...
عموما يا حليل ابو كرشولا بتاعت الورل
شيخ بته ... راحت شمار في مرقه بفضل
صدفة طريقة المعيشة في السودان ...
يعني تصحى للصبح وتشرب شاهيك
وتتخارج لي مشاغلك ... اكلك مويه
وشاي لامن ترجع البيت مع المغرب ...
تجيك صينية (الفطور والغداء والعشا)
مرات تبدع ومرات تخستك بفعل البطن
مليانه هوا ... دا ياهو إنقاص الوزن بدون
ما تقصد ... عشان كدا المعيشة في السودان
هي ريجيم طبيعي ما محتاج لي برنامج ...
هسع مره مره بفتح صورة صلاح وحميدتي
واتفرج على الذي كان ...

نسيت البنطلون ...
تعرف بناطلين الجينز من ماركandسبنسر
كانت اللبس الرسمي للموظفين السينر
في الشركة التي كنت اعمل بها ... كلو
يناير بصرفو ليك ٣ أطقم ... بديت بي
سايز 40 ولمن اتخارجت منهم بعد سنين
طويلة وصلت سايز 44 ... اللذيذه محتفظ
بي كمية من كل السايسزات بعد توزيع
الكثير منها ... وبعد حوالي سنتين من
وجودي في السودان رجعت للبس سايز 40
مع ربطة حزام كتعويده ساي ...

Quote: طيب قاعد آكل شنو؟ أي حاجة إلا الاتنين ديل شوربة الخضار ، السلطة ، البيض ، الفول ، الجبن ، التونة ، الفواكه ، السمك ، الدجاج لكن من يوم 1 فبراير ما دخلت خشمي عيشة

سلام احمد,
انت كدا ماشى في الطريق الصحيح. تحفظى علي توقفك عن الرغيف و هو خشم بيوت. نعم تتوقف عن الرغيف الابيض و لكن الالياف في الـ whole grain مهمة جدا.
لو قررت تشترى شوف نسبة الـ Fibre, اى شىئ من 20%+ معاك كويس.

الله يمتعكم بالصحة والعافية

جذبني العنوان فدخلت متعجلا ,,
لقيت الموضوع لمن يملكون تاشيرات خروج

بس عجبتني صدر الحداد
اتلفت في البيت لو في جداد عيان يحللوها قبل (تبقى الله كتله)
تذكرت ان كل الحيونات بما فيها الفئران رحلت من و ديرتنا
باستثناء الببعوض والذباب ,,,

أفو يا جلالدونا !
انتو ناس امريكا
بلاد الهنك والرنك زي ما قال ود الريس في موسم الهجرة إلى الشمال

بالعكس يا صلاح
أكل السودان هو البسمن
فتة فول، فتة عدس، سخينة، فتة سليقة باللحمة
أكل السودان كلو نشويات وزيوت، ثقافة الفاكهة والسلطة الكتيرة دي مفقودة

ياخي أنا بعد أول ريجيم في السعودية لما أصحابي عزموني في الموناليزا ملعقة واحدة من الشوربة اتبلعت لي بالرجالة وقفلتني مرة واحدة
كمية دسامة كدة عجيبة خلاص

بروكلي سئيلي الله يا عربي تاني قوزالناقة كان جاتك في ختراتك ما بترجع 😂 صدق انا محتاج لرجيمك ده بشدة عملت واحد قبل كده نزلت ١٧ كيلو لكني حنين عملت ليهم رجعنالك

طبعاً لسة بتذكر جيتي السودان بعد الريجيم الناجح داك
ياخي أنا ما صدقت ذاتو
رغم إنه أصحابي كانوا قنعانين تماماً .. بقولوا لي زيادة الوزن دي وراثية لأنك بتاكل معانا وبتسمن أكتر
والكلام دة فعلاً صحيح ساكنين سواء وبناكل نفس الأكل بل باكل أقل منهم ورغم كدة وزني ماشي زايد
المهم 5 شهور أخوك قضاها زي ما قال الكتاب نقصت فيها زي 20 كيلو وأبيت اتصور كلو كلو أثناء النقصان دة
المدام تقول لي كلم الجماعة في السودان عشان ما يتخلعوا .. قلت ليها اصحابي العواليق خليهم يتفاجأوا لكن بكلم اختي
أقول ليها عملت ريجيم ونقصت شديد كلمي أمي وهي تمشي في الموضوع ساي ما مصدقة
نزلت من الطيارة على سير العفش شايف أصحابي الاتنين واقفين في الدرابزين وانا قاشر ليك بالشكة وبنطلون وقميص ضيقات
مشيت عليهم وانا لسة جوة قبل ما أطلع عليهم ختيت ليك يدي في خصري وقبلت سيافي كدة حركات عارضات الأزياء ديك وبقيت أقول ليهم أها قلتوا لي السمن وراثة؟ هاك الوراثة دي
وبقوا الاتنين خاتين يدينهم في راسهم دة شنو دة يا زول؟ دي قدرت عليها كيف
لمن وصلت الباب بدل يسلموا علي بقوا الاتنين يهبشوا في بطني ويقلبوا في وشي البدون جضوم وشابكيني وديت الحاجات وين؟
الناس طبعاً نسوا المسافرين بتاعينهم وبقوا مركزين معاي :) وهم شايفيني مبتسم بي انتصار واصحابي مالياهم الدهشة
بنتين كدي جديداااااات لنج أحلف نازلات من طيارة ايطاليا هسة شايفن يتلاكزن أرح نتعرف عليه ونسأله
ابتسمن لي ابتسمت ليهن .. أشرن لي الابتسامة وصلت الضرس
جايات علي وواحدة من بعيد قالت لي لو سمحت ....
قبل ما تكمل كلامها أشوف ليك قوات الجنجويد بقت واقفة بيني وبينها
هادمة اللذات دي خليتها مع العفش والأولاد الجابها وراي شنو؟
جدعت ليك النقاب الجاية بيه من السعودية داك لي وراء عشان صرة الوش تظهر وكوعت ليك يدينها الاتنين وكوركت ليك فيهم: في شنو؟
البت قالت وووب علي صاحبتها جرتها من يدها وقاموا جارين
اتلفتت علي أنا ذاتي أدتني حقي وبي نهرة برضو: بتضحك مالك؟
انتبهت لي إنه الابتسامة بتاعة الضرس ديك لسة قاعدة غايتو ربك رب الخير ظهر لي أمي فكتني من المأزق
جات من بعيد تسكلب .. كر علي جاك سكري وما كلمتني :) حتى بعد داك المدام فكتني وبقت تشرح ليها
غايتو اليوم داك كنت فرجة في المطار أنا :)

دا هسي مشروع تسمين ولا رجيم
في جميع انواع اللحوم البيضاء والحمراء والمفرومة وافخاذ وصدور دجاج
وجميل انحاء التوابل الكاري

هلا أحمد

الحمد لله، أما أنا أفوت وجبتين تلاتة بس.. وأرجع الحزام بوصتين.

Quote: قال ليهو كرشك كبرت اليومين دي

صاحبي اشتغل في البنك واتواصلت معاه بعد 3 سنين كدة من الجامعة بالتلفون .. بشكي ليه من الكرشة وهو يضحك فيني يقول لي بعد تشوفني بتعرف إنه لا عندك كرشة ولا شفت ليك كرشة في يوم من الأيام
قلت ليه يا عمك انت ما بتعرفني وقتين اتفرّ أفقياً
قال لي يا زول ما تقعد تنظر لي ساي المرحلة الوصلتها أنا دي مافي زول وصلها .. ياخي أنا بقيت بلبس الحزام بالمراية

Quote: تحفظى علي توقفك عن الرغيف و هو خشم بيوت. نعم تتوقف عن الرغيف الابيض و لكن الالياف في الـ whole grain مهمة جدا.

الألياف قاعدة في الخضار والسلطة
لكن الرغيف دة كان اسمر كان بنفسجي في النهاية بسمن
بيني وبينك أنا بديت أفكر في أكلات بديلة بحيث أتخلى عن القمح خالص حتى بعد أوصل للوزن العاوزه
يعني داير لي حركة كدة زي بتاعة ناس الكيتو لكن ما فيها الدهون حقتهم ديك

Quote: أول ريجيم

اول رجيم دا طبعاً غير رجيمك الهسه دا وغير رجيمك الناجح داك الجيت بعدو السودان.
بالعربي كدا، الهسه دا رجيمك الكم؟

عدم الآكشن يعلّم الـ... ريجيم!
الله يسألك هسّي دا بوست ليك!

Quote: لقيت الموضوع لمن يملكون تاشيرات خروج

ما هي الفرة الصاح بتجي مع المكيفات والرز
حقة السودان ديك ملاريا واحدة بتشيلها

Quote: اتلفت في البيت لو في جداد عيان يحللوها قبل (تبقى الله كتله) تذكرت ان كل الحيونات بما فيها الفئران رحلت من و ديرتنا باستثناء الببعوض والذباب

بالله الفيران ذاتها شردت؟ قالوا فيها حلاة أقاشي

Quote: بروكلي سئيلي الله يا عربي تاني قوزالناقة كان جاتك في ختراتك ما بترجع 😂

الغريبة مشيت سوق الخضار في مدني واحد فارش خيار قلت ليه الكوم بي كم؟ عاين لي من فوق لي تحت كدة قال هو دة شنو؟
قلت ليه دحين دة ما عجور؟
قال لي هداك العجور بهناك ودنقر على موبايله :)

برضو عندنا هنا سودانيين شغالين في السوق الصباح بعد أودي الأولاد المدارس بجي راجع البيت ألقاهم واقفين بسوقهم معاي اوصلهم بداية شارع السوق
وانا طبعاً زول سكوت ما بسأل زول عن تفاصيله وما من النوع البتعرف بالناس بسهولة .. فرغم إني بوصلهم شبه يومياً لكن الكلام بكون عبارات تحايا عادية والسودان كيف وخلاص .. باقي الطريق بنكون ساكت وهم محترمين سكوتي
اليوم داك بعد ركبوا طوالي واحد اتكلم معاي قال لي ياخي انت راجل طيب وما قاعد تقصر معانا عشان كدة لازم احذرك .. اليومين دي في كشة تقيلة وقبضوا سواق خاص من جيرانا فدحين لو اقامة السائق بتاعتك ما علي الناس السايق ليهم اعمل حسابك شديد
وحاتك الضحكة غلبتني كلو كلو وهم شغالين لي نحن عارفين الناس السايق ليهم ديل شكلهم كويسين من وقفتك لينا لكن لما تتقبض بنكروك حطب
شكرتهم وبقيت ماسك الضحكة ما فكيتها إلا بعد نزلوا

غايتو الواحد شكلو ما مقنع كلو كلو

Quote: دا هسي مشروع تسمين ولا رجيم في جميع انواع اللحوم البيضاء والحمراء والمفرومة وافخاذ وصدور دجاج

اللحوم ما بتسمن
بتسمن الفطائر والحلويات والنشويات
أقع صدور الدجاج منزوعة الجلد بالفرن ولا الإيرفلير بي مسحة زيت خفيفة والحبة ما بتجيك
بتاعين اللحوم بتلقى بنيتهم قوية ونادر ما تلقاهم سمينين على عكس ناس النشويات أجسامهم مترهلة

Quote: الحمد لله، أما أنا أفوت وجبتين تلاتة بس.. وأرجع الحزام بوصتين.

والله انت محظوظ
أنا الساهلة عندي الزيادة .. أكلت باسطة بكرة طوالي الميزان بتجنن
وعشان انقص روحي بتطلع

Quote: بالعربي كدا، الهسه دا رجيمك الكم؟

عييييييك ولا بتحسبن
أول واحد عملته في تانية ثانوي .. داك كان غريب شديد قطعته من راسي
بس بقيت آكل نص عيشة في الوجبة ونتيجته كانت خطيرة شديد
التاني قبل العرس كان مجغمس كدة لكن جاب نتيجة
أما الأول المنتظم وعندو جدول وكدة دة قبل 5 ولا 6 سنين .. داك ياهو الظبطني صاح
بعديها بقيت بكرره كل ما أحس بي جسمي زاد وبرجع أحافظ
لكن المرة الأخيرة دي أبى يشتغل كلو كلو .. استمريت فيه شهر كااااامل وما جاب نتيجة
بقولوا الجسم بتعود ولا حاجة بالشكل دة
المهم بقى ما شغال معاي عشان كدة قطعت الريجيم الفوق دة من راسي

Quote: عدم الآكشن يعلّم الـ... ريجيم! الله يسألك هسّي دا بوست ليك!

ها زول ما شايف الحالة شلش
البورد عدمان الآكشن المشجع
عشان كدة ختيت اسم البوست ظااااااااهر
الداخل كلو بعرفني حأونسه سنة وفي النهاية ما بطلع بي معلومة مفيدة

Quote: ما أكلت نشويات ولا سكر

أنتم هل الرجيم حرام ..؟ ما بال الناس الذين قال عنهم الخالق .. زادهم الله بسطة في الجسم .. !
لازم تضرب الطيبات عشان الله يزيدك بسطة وأنبساطة ..

بريمة

هههه الطيبات مع المكيفات وعدم الحركة دي بتزيد بسطة لكن مافي أي انبساطة

طبعاً عنوان البوست بوضح إنه حبوبة ونسيني
وعشان تتونسوا هاكم مسرحية البودي قارد لعادل إمام في أول عرض ليها

يا ابواحميد نتونس بى ياتو طريقة والفيديو (مبلك) من المالك
you don't have the rights or a license to redistribute this Video

تحياتي ياأحمد

أني زول بادية تربية لبن....
جيت البلد دي واليت حليبها ولبنها ايّام شوية ياخ الكرش خطمتني من قدام والكضوم إنّفخن
وبقيت بحلق بلا منضرة والعيون سوّن ليهن صريف و.....الخ
هبشت دجاج الخراب دي كمان بنفخك بلاحيل ولامروّة....ولاول مرة في حياتي أشوف ودأبنادم بعرق من دوماته!!!
أها راقدت اللحم (حاشي وغنم) دي قادر الله سريع بزايطك تب
ياخ البلد دي ألمي اللزّرق دي بشحّم ...
وشحمها بقو ساكت بلا قوّة!!!
غايتو آخر شئ أتوكلت علي وجبتين في اليوم
معزتي لك

هههههه طبعاً لازم يتحظر الرابط يا أحمد يس
المسرحية لسة ما تمت يوم من نزلت
الفتحها من قبيل بحضر عادي لحدي ما يكمل الجزء المخزن في الرام لو حظرها الموقع .. أما لو حظرها المالك من نفسه بواصل للنهاية
هسة أنا شغال بحضر فيها من الرابط دة ذاتو ما عارفها تقيف متين أهو دي الصورة تحت
لكن اصبر لي شوية أكملها وبجي أعزك بي رابط جديد

يا عبيد الطيب لو أكلت وجبة واحدة بي رز الخليج المليان زبدة وزيوت ودجاجهم المسقى دهون دة بتسمن
هنا في مشكلة عدم الحركة مافي مساسقة وجري زي السودان
المشكلة أصلو ما في كمية الأكل .. المشكلة في طبيعته
اتعلم أكل السلطات أمورك بتظبط

هاك الرابط دة
غايتو بس هي اسمها مسرحية لي عادل إمام .. وفيها عادل امام بنفس حركاته الزمان
لكن أوعك تحضرها وفي بالك الود سيد الشغال والزعيم ومدرسة المشاغبين
اتونس بيها ساي .. بتونس غايتو .. أنسخ واحد من الروابط التحت دي ولصقها في شريط العنوان فوق

vidoba.net/o7di7yuueybn.html

fembed.com/v/mmp4mh56x1k778q

بإمكانك أكل ما تشاء وإيقاف الخبز وستحصل علي حياة صحية

دة كلام سليم يا مصطفى وأنا على ذلك من الشاهدين
بس السؤال شنو البدائل؟
في الأفلام بشوف الخواجات بياكلوا بالشوكة والسكين مما يعني إنه الخبز ما أساسي عندهم زينا .. لكن بياكلو شنو بدله؟
أنا قدرت استغنه عنه شهر وحأواصل لسة شهرين، لكن بعد ما أوصل الوزن المثالي ما ظنيتني أصبر على نمط الأكل دة .. لازم وصفات صحية خالية من الكاربوهيدرات وتكون شهية بحيث تنسيك العيش والفطائر

حركات نوع ريجيـم ومراقبة الأبعاد ونيـولوك وما عارف ايـه عدسات لاصقة ونحت المسافات وحفظ السعرات الحرارية ..
حاجات كدة الواحد ما يسمعها الا عند الجكس والرمبزة وعشاق مايكل جاكسون ؛)
سألت جاري ود القاضي عن الريجيم المتابعه .. قعد يتعوذ مني تلاتة يوم .. قايلنيقلتو شئ كعب..

فلقصة عروب الجزيرة وقت تضربهم الطراوة امانة ميي صعبة ؛)

عاوز اجيكك برواقة للبوست بس القى الوقت

قالوا ليه ياخي انت كبرت حقو (الموضوع ) دة تخليه
قال ليهم أنا جني وجن الما جرب الحاجة ويقول ليك خليها

كان عندي 3 زملاء عرب بس ما يتلموا في مكتب إلا ويدوروا موضوع زراعة الشعر
يناقشوا كل الحلول والكريمات الجديدة ويستعرضو فيديوهات الزراعات الناجحة وكدة
أنا طبعاً بتمعط منهم شديد واقول ليهم لو واحد فيكم في السوق بنعذره لكن كلكم متزوجين وبي أولادكم تاني دايرين بالوجاهة شنو؟
قدر ما حاولوا يشرحوا لي الأثر النفسي بتاع الصلعة غلبني أتفهم وصوله لدرجة عملية في تركيا ومصاريف قدر الضربة
الأيام دي بعد ما الجلحات بدت تكشر عن أنيابها بوضوح بقيت بعاين في المراية واقول الآن فهمتكم

فااااا شنو .. كان ما مر عليك يوم لزيت ليك جنا 7 قدامك يا ود الزين ما بتفهم أزمة الوزن دي :)

بللاي طلعت دبدوب هههههههههه

في نظام اسمو الكيتو دا قريب من نظامك دا بس الفرق فيهو انو يبعدك من الزيوت النباتية تماماً عدى زيت السمسم والزيتون
وينصحك بالطبخ بالزبدة او السمنة ويقولك اكل اي دهون حيوانية تطالها يدك بس ابعد من الزيوت النباتية والنشويات

ياخي القراصة والرغيف ديل لا بتخلن لا شي والعجب الشطة بالدكوة

انا شغال مشي بس في اليوم بمشي 6 كيلو متر وذلك اضعف الايمان

ههههه أبداً وحاتك أصلاً من يومي بزيد وانقص وبقيت استايل وسمبتيك لي 6 سنوات .. لكن بس مع حبسة العروس بتاعة الكرونا دي اتبهدلنا شديد
الكيتو قريت عنه كتير لكن موضوع الزيوت الكتيرة دة ما ريحني بالإضافة لكمية الممنوعات الفيه .. يعني معقول الفواكه كلها ما تاكل منها غير فروالة؟!
كذلك عرفت إنه نظريته تعمل على قلب المكنة عشان الجسم يستهلك الزيوت بدل النشويات ولا حاجة بالشكل دة .. وكمان مفروض تستمر فيه مدى الحياة
لا لا ياخوي نحن ما دايرين نهبش المكنة :) بس ننقص السعرات الحرارية الداخلة الجسم لفترة معينة وخلاص
وكمان وحاتك البسبوسة لا بتتخلى ولا حاجة :) بس نستعدل الوزنة ونرجع نظبط الباسطة البلدية في البيت :)
ترجع الكرش نرجع الرجيم .. تمشي الكرش نمشي الفرن .. ويا كديسة سكي الفار

الكيتو سمعت بيهو ز تابعت بعد الحلقات و النصائح عته
بس ما اطمنيت ليهو ابداً لانه يتوقف على اشياء عدة
منها الخوف الجوانا من الدهون وكونها نصائح
حمالة اوجه لان ما كل الناس بينفع معاهم الكيتو
عشان بعض المرات الهرومونات تلعب دور كبير
في طبيعة اجسام الناس وما عاوز ادخل في تحليللات
وتشريحات طبية عشان ليس بصاحب مجال يعتد بكلامه
وممكن قد تكون بعض النصائح ضرر للاخرين من حيث لا ندري.

بالنسبة ليك يا احمد انت شغال تاكل بصورة طبيعية
لان كل المواد البحتاجها الجسم ما وقفت منها والخوف
انك قاعد تنقص موية او عضلات لانك ما ذكرت
اي شئ متعلق بالرياضة في برنامج اللي ذكرته

انا بسبب قناعات جاْت عكس ما اتوقع طبيا
بدات برنامج قاسي في الاول وكان بصورة
غير مدروسة نقصت بسببها خلال شهر او اقل
تقريبا حوالي 20 كيلو واكان ضررد علي كبيرا
بس اتجاوزات مشكلة عدم القناعة للوضع الطبي
والصحي وبعدها اتعلمت تماما ودخلت في برناج
يكاد يكون شبة ثايت ومستديم قللت تناول الطعام
بصورة ما عادي وعدد مرات الاكل بحيث اتوقف
عن الاكل يوميا عند وجبة الغداء مساءا الى اليوم
التالي افطار ولحد ما الاكل متنوع لكن قليل ويمكن
فيها الحد الادنى من احتياج الجسم و الرياضة
بصورة تكاد تكون ثابتة
يوميا من ستة الى عشرة كيلوة جري ومشي والحمدلله
استطعت بحول الله وقوتهالمحافطة على وزن ثابت
خلال عامين متواصلين ازيد او انقص منه كيلو

بالنسبة ليك ذكرت الملفوف والبروكلي وبرغم
انهم من الالياف او غنيين به الا ان المشكلة
في امتصاص الجسم لهم فيحصل تاخير
لهما في الامتصاص لبعض الناس اللي
عندهم مشاكل متعلقة بتأخر عملية الايض
لذا قد لا يكونان مناسبين مع كل الاشخاص عشان
كده قلت لك ليست كل الوصفات تصلح مع كل
الاشخاص فطبيعة الجسم و الهرمون عند
الشخص تلعب دور كبير ودي طبعا عن طريق
التحليلات والذي اصبحت اهرب منه وانفر منه كما ينفر
الصحيبح من الاجرب.

لي عودة

هللويا.
مبروك احمد.
الانتصارات الصغيرة ، تمنح حيواتنا بهجة.
وجدت عند الوالد كتابة على صفحة كراس تعود للعام ١٩٨٠ ، يقوم بتهنئة نفسه فيها على مرور عام كامل على توقفه عن التدخين.
كانت الورقة مشحونة بالفخر ، وبقدرة الانتصار.
مبروك عزيزى ، واللى معركة اخرى جديدة.

مرحب أديبنا شاهين
زارتنا البركة
الانتصار على النفس شعور لا يقاوم .. وفكرة تعديل القناعات أو طريقة الحياة مبهرة
أي زول ممكن يمسك قلمه وينتقد أي زول ويطلع عيوبه .. لكن نادر جداً البنجح في ممارسة الدور دة على نفسه

هلا أحمد عمر
حاولت أجري 6 كيلو في اليوم لكن غلبتني الاستمرارية
أجري يوم وافط اسبوع
موضوع الصيام المتقطع دة عندو مثالب كتيرة زي ما حأحكي في المداخلة الجاية

أمس عديت سهرة في الجحيم
أصلاً كنت جاري طوال اليوم واتعودت أهمال الأكل في الفترة الفاتت عشان أنقص
لكن يوم أمس كان فيه جرعة لقاح الكورونا
بالليل شعرت بي برد شديد جداً ورجفة وهلاويس .. غلبني النوم كلو كلو .. كلما أغمض عيني بصحى بي كابوس
المدام مصرة إنه الموضوع نقص جلوكوز وحاولت تديني بسكويت لكن رفضت وواصلت كدة للصباح أكلت فواكه لكن ما عملت شئ
الصباح استسلمت وعملت لي سندويتش بي قطعتين بيرقر بالبقسماط أكلته ساخن كدة طوالي البرد راح مني وحسيت بي إني شايل حيلي
بلعت بندول ونمت عااااادي
صحيت مرتاح زي كأنه ما كنت مساهر أمس
فيما يبدو إنه ديمومة نظام انعدام النشويات دة مستحيل. فكرة إنه الواحد يخليه نمط حياة ما بتبقى
فشكل كدة لازم وجبة واحدة على الأقل تكون زي باقي البشر

Quote: فيما يبدو إنه ديمومة نظام انعدام النشويات دة مستحيل. فكرة إنه الواحد يخليه نمط حياة ما بتبقى فشكل كدة لازم وجبة واحدة على الأقل تكون زي باقي البشر

هههههههههههههههههههههههههه

ياخي قول الروب .. عادي ما فوكا شي

هيييييع
أففو !!!
أنا الصعب المتكل بالشوربة :)
لايف من مطبخنا .. يحدث الآن
اتفضل فطور :)

ممكن يا احمد الموضوع يكون نظام حياة بس محتاج
منك تقتنع انه ده الانسب لك والبيت ليه دور كبير
وده ما بمنع انك مرات كده تجرب الممنوع بس ما يكون
ضار مثلا تبعد عن مطاعم الرفاهية القاتلة ناس ماكدونالدز
واقرباءه
الغالبية العظمة يعتقدوا انك تلتزم بغذاء محدود صعب لكن
مع الوقت يصير الامر ممكن.
موضوع الجري او المشي والخلط بينهم يكاد يكون صعب
في البداية لكن مع الوقت اذا استشعرت كمية الشعور الايجابي
اللي يزرعه فيك حتتمسك بيه بصورة ما عادية وممكن بقوة
عزيمتك تصل الى مسافات كبيرة في الجري وهذا يحتاج
رفع كفاءة عضلة القلب وهذا تمرين مستمر تتعود عليه حتى
تشعر بسهولة المهمة.
عن نفسي كنت اعجز في مرحلة من عمري الجري لامتار تتعدى
ال ١٠٠ متر لكن مع الوقت اصبح في المقدور الجري لمسافات مفتوحة
واحيانا طبيعة المدينة ليه دور متى ما كان بها متنفس في كل
مكان ومجهز فده يديك دافع

Quote: ماكدونالدز واقرباءه

الأقرباء ديل كان طلعت منهم البيك بنتفق
دة وحاتك لا بتخلى ولا حاجة :)

يا زول شغلك ده ياهو زاتو الكيتو ..... أصلاً بيعتمد على الإبتعاد عن الكربوهايدرات ... لكن الخبراء قالوا بيودي التوج.

بعدين أشك إنك تكون صبرت على أي نوع بتاع ريجيم ... لأنك من قولة تيت فكيت آخرك وانتهيت من عنوان البوست ... يعني لا مطوحتنا ولا مشيت جينيف ولا بيتك في أمدرمان ولا شهاداتك ... أقنعنا، صبرت على ريجيم كيف؟

أيوة يا محمد أنا ذاتي قريت عن أضرار الكيتو عشان كدة ما اتقيدت بنظام الكيتو نفسه لأنه بملاك زيوت وبحرمك من عناصر كتيرة بحتاج ليها الجسم
يعني ماخد راحتي شديد في الفواكه والسلطات والخضار بشكل عام وما بتناول الزبدة والزيوت الكتيرة بتاعة الكيتو ديك

أما بخصوص العنوان وحاتك فكرت أتجرجر لكن طلع الموضوع محتاج تقلة دم دايرة مهارات وسنين من التعليم المستمر على فقع المرارة

فلقصة عيال بلاد برة 😀😀😀شنو ريجيم وام فتفت
هههههه ما حاسد بس كمان الحنك دا نحن ما ناسو
لو عاوز الريجيم انزل شهر ٧ وارح معاي المشروع ٣ اسابيع بس ارجعك ككو بس 😀
على العموم احمد عمر شالوم وللمعاك
وزي ما قال ود البشرى اخلق لينا بوست اكشن انشاء تعنونو بي (تبا للباشكانب عادل امين ومعاه حيدر الزين)😀

أول مرة طلعت من السودان عديت في السعودية سنتين وراء بعض حتى جيت راجع
تالت يوم لي في السودان راكب مع أصحابي اتنين في السوق العربي قالوا عاوزين ينزلوا كراسي مكتب من الطابق التالت يرحلوها مكان مكتب أجروهو في مكان تاني
قالوا لي انت خليك في العربية نحن بننزل الكراسي دي ونجيك .. قلت ليهم مستحيل طبعاً عاديني ضيف ولا شنو؟
قالوا لي ما ضيف لكن انت لسة نازل جديد لازمك زمن عشان تتأقلم على الشقاوة
ضحكت بي سخرية وقلت ليهم والله دة كلام! هو أنا الوحيد فيكم الاشتغلت طُلبة خرصانة تقولوا لي شقاوة وبتاع؟
عملت ليك تمارين إحماء واسترجعت أيام حفر المقابر لما الناس كلها ترقد سلطة وأخوك يكون مدور زي الطلقة
طلعت المكتب شيلوني كرسي كبير لكن ما بتاع جلوس وهم شالوا الكنبة رغم إصراري على إني الأكثر مروة ومفروض يسيبوا لي المكتب كلو
وحاتك لما وصلت العربية تحت كان جسمي كلو كابي موية ونفسي قايم والكلام ذاتو غالبني والعواليق نازلين وراي بالكنبة ويضحكوا
ختيت الكرسي في العربي وقلت ليهم دة شنو دة؟ قالوا لي مااا قلنا ليك! رطوبة مكيفات الخليج دي دايرة ليها شهر عشان تطلع من الدم
قلت ليهم لكن انتو عارفين! بي حالتي دي لو اتشاكلت لي مع كمساري بضيعني :)
صاحبي قعد يضحك قال لي كمساري شنو يا عمك؟ شفع الحلة بجيهوك

Quote: لو عاوز الريجيم انزل شهر ٧ وارح معاي المشروع ٣ اسابيع بس ارجعك ككو بس ...

😃😃😃😃
السنين الأولى من الألفية جيت مع البت (عندها ٣ بنات الآن) عشان
الجامعة ... اليوم الراجع فيهو لي شغلي جمعتها مع من يتولاها
في غيابي وكان فيهم أخوي العسكري (صاحب الورل) ... أها
بعد خلصتا كلامي معاها مسكا العسكري وقال ليها شوفي ما
عندنا معاك شغله إذا شفتي شغلتك واجتهدتي في قرايتك لكن
أي خستكا خليل قاااااااعد ... (خليل دا ودعمتها وما بتعرفو)
قال ليها بتعرفي خليل؟ .. قالت ليهو لع ... قال ليها خليل دا
مزارع في البلد زول شين وقبيح ورجلينو مشققات والشق
الواحد ممكن يلبد فيهو الضب ... علي الطلاق أي خستكا
حا أعقد ليك عليهو .. ولا حا أكلم ابوك .. ونرحلك البلد هناك
فطورك قراصه بي روب وغداك قراصه بي ملاح كراره
وعشاك قراصه بي لبن ني ما مفور ...
البت ما شاء الله لامن اتخرجت ما ووجعت راسي ...
مشروعك دا يا علي ياهو خليل زاااتو ... عربي الجزيرة
دا هو اااي من الجزيرة لكن ما بكون تيرب ولا نورق ...

يا علي دفع الله من الان متبرع باجازتي مع
زارع الحقل في البكور عيشك الدهر اخضر
٢١ يوم كافية الواحد يعمل ريكفرينغ

Quote: أما بخصوص العنوان وحاتك فكرت أتجرجر لكن طلع الموضوع محتاج تقلة دم دايرة مهارات وسنين من التعليم المستمر على فقع المرارة

أراك تقول ..... إلخ.
يا زول دي ما فيها أي تعليم ... لا مستمر ولا غيره .... دي طبيعة ........ تقلة الدم بوافقك عليها.

وحاتك موظف ود موظفين :)
حتى الشغلات البشتغلها في الإجازة بي مرتب ولا يومية
طلعت مع الغنم كم مرة لكن ما زرعت

هوي يا علي، أحمد القال ليك ماشي معاك الخلا دة ما أنا دة أحمد التاني
رحم الله رجلاً عرف قدر نفسه :)

الناس دي حاسدنك علي النصلة
قلت لي ساكيك 😂😂😂

Quote: فيما يبدو إنه ديمومة نظام انعدام النشويات دة مستحيل. فكرة إنه الواحد يخليه نمط حياة ما بتبقى فشكل كدة لازم وجبة واحدة على الأقل تكون زي باقي البشر

يا احمد
فكى كلامى ما بقع الواطة

اوعى يكون أحمد عمر بتاع الزمام ابو رشمة😀😀😀😀

اخي احمد

و الله انا معاك الحجل بالرجل بس عندي مشكله لا اصمد امام عسل النحل الصافي الاصلي او حتي المضروب ياخي لم اشوف العسل بتسوحر و انسي نفسي .


الزبير

Quote: عسل النحل الصافي الاصلي او حتي المضروب

العسل ده حمال اوجه خاصة حق السوق ما تقدر تضمنه
ابدا.
العسل المضمون والمفحوص و تقدر تعتمد عليه هو
عسل المانوكا.
اما لو عسل تاني وعسل جيد في المملكة الكيلو الواحد
يصل الالف ريال ومنه انواع كتيرة في السوق تترواح بين
250 الى 300 ريال وطبعا نسبة الضمان فيها ممكن 50 بالمائة
والبائع يقول ليك امشى افحص لانه عارف الفحص اغلى من ثمن
الكيلو حيث ان فحص العينة ذات الكيلو بقيمة 650 ريال تقريبا.

عموما لو العسل من منحل خاصة بيك او من شخص تسق فيه
نعمة غير كده لو بقى في زسادة سكر و ملوص والواحد ماخد
كعلاج ممكن باللعكس يضرك اذا كثر لانك بتاكل سكر
ولا ملوص وليس عسلاً.

عموما ركز مع المانوكا ممكن لمن توصي واحد جاي
من الخليج تقول ليهو جيب لي معاك عسل ملنوكا كيلو
بس في عبوتين وكلها بي 650 ريال تقريبا ودي انا اشوفها
افضل هدية يقدمها المغتربين لمن يحبون

يا عريبي بمناسبة الكرسي النزلته وعرق مكيفات الخليج قال ليك عمك اولاده في السودان وهو في الخليج زي عمك صلاح صاحب الصورة ده المهم نهاية النكتة المرة كبست الديك بالشبشب وقالت ليه انت يا يابا أريتك بي رطوبة الخليج التكسر ضهرك

فووووق عشان خاطر كاروري
أنا أحمد بتاع الريجيم والتاني أحمد بتاع الدكوة

Quote: الناس دي حاسدنك علي النصلة

ليهم حق يحسدوا
وحاتك شعور لا يقاوم
ياخي الناس البقولوا ليك بنزيد وننقص بي سرعة ديل يبغروا
أنا بزيد بي سرعة لكن النقيصة ولادة عديل

Quote: اوعى يكون أحمد عمر بتاع الزمام ابو رشمة😀😀😀😀

يا حليلك ما حضرت معانا أيام بوستات أبو زمام
وحاتك أحمد عمر التاني كل ما يلقى بوست بتكلم عنه يقعد يتجرس يا اخوانا دة ما أنا

Quote: عندي مشكله لا اصمد امام عسل النحل

والله يا الزبير دي مشكلتي الكبيرة
لكن موش العسل بس .. السكريات كلها
أنا بالمناسبة ما أكال .. يعني مستحيل أكمل عيشتين في وجبة .. عوجتي كلها في السكريات
عادي ممكن آكل 3 وجبات حلويات
هسة موش مبطلها شهر ونص؟ بس أنزل للوزن العاوز بقع فيها أعمى

Quote: كبست الديك بالشبشب وقالت ليه انت يا يابا أريتك بي رطوبة الخليج التكسر ضهرك

ديشااااااك وحاة الله ياداب اتذكرت النكتة
العواليق أتاريهو قصدهم ما شريف

Quote: فكى كلامى ما بقع الواطة

هي انا ما كلمتك!
الموضوع ما طلع من لقاح اكسفورد
والله جد
لقاح انجليز ظبط الأمة دي كلها .. أخير أنا ساهر بي يوم واحد عندي اصحابي اتطعموا بعدي رقد بيهم 3 يوم
رجعت تاني لي زيرو كارب
نعم هو ما بصلح نظام ثابت وانا خاتي في برنامجي بعد نهاية الريجيم تكون وجبة واحدة بتاعة بني آدمين ووجبتين سلطات وفواكه بدون نشويات

يا ود محمد عمر افرز عيشك بحق الريجيم
والدكوة كان تبقى علامة مسجلة طرفي منها
عشان ما تبقى علي حكاية نحن بتاع الاتوبيس

انت بالمناسبة عامل الدكوة بالطريقة العجيبة ديك مالك؟
أقرب بقالة اشتري منها زبدة الفول السوداني وخلاص
في منها ناعم وخشن اختار الخشن ياها دكوة السودان ذااااااتها .. البرطمانية بي 11 ريال

حاوريك السبب عشان تستفيد في ريجيمك ده
الفول السوداني امتصاصه متاخر جدا لذا لا يوصى
عموما انا اتحاشاه فربما كان مثبط لعملية حرق الدهون
وعشان كده لجات للفكرة ديك علما انني تحصلت على المكسرات
بسعر منخفض بكثير اقل مما ذكرت امتثال في امريكا
ممكن بنسبة واحد الى عشرة لمن فكرت اشتغل فيه
بيزنس ومن هنا الواحد يستغل بوستك ويبدا بالتسويق
ممكن بربمة يخش معانا شريك

السلام لاحمد وضيوفه الكرام

أتيتُ فقط لأشيد بالإبداع والفكاهة في اختيار عنوان البوست.