Post: #1
Title: القضية بتاعت دخول قوات الحركات الخرطوم
Author: محمد حيدر المشرف
Date: 02-25-2021, 06:26 AM
Parent: #0
"يحتاج السلام دائما الى طرفين لإبرامه لكن طرفا واحدا يمكنه اشعال الحربِ!!"
نيفيل تشامبرلين – بيرمنجهام 1939
الواقع السوداني الحالي ده, وما يحدث الآن من غياب تام لرؤية عامة مشتركة, ومن تشظي سياسي ومجتمعي يفاقم من آثاره الكارثية على مستقبل السودان انعكاسات الازمة الاقتصادية الماحقة التي نعيشها.. يضاف لذلك البطء الشديد على صعيد تفكيك النظام القديم بابعادو الأمنية والعسكرية والاقتصادية والإعلامية وعلى مستوى الجهاز البيروقراطي للدولة .. كل ذلك هو نتيجة تكاد تكون طبيعية جدا لمسيرة الدولة السودانية منذ الاستقلال بصورة عامة, والحقبة الأسوأ في تاريخ السودان المتمثلة في الإنقاذ على وجه الخصوص. ومنتج هذه المسيرة على مستوى الأحزاب السياسية والرؤى السياسية والعقل السياسي الخ.. كلنا نتيجة لهذه المسيرة ومعطوبين زيها.
هي نتيجة تكاد تكون طبيعية ولكنها ليست حتمية بكل تأكيد. من الممكن تغيير النتيجة بتغيير المقاربات من قبل النخب السياسية .. المقاربات الحالية كلها في مجملها ستكون مسؤولة مسؤولية تاريخية عن تمزيق هذا الوطن اذا ما استمر تعاطي النخبة او النخب مع المسألة الوطنية بهذه الانفعالات الطفولية.
في يتعلق بالعنوان
هناك 3 مسائل.
الأولى طبيعة وواقع شركاء الانتقال من الحركات المسلحة (قريبا كنا ندعوهم باصحاب النضال المسلح ابان الثورة ولكنها ذاكرة السمك) .. دي طبيعة مافي زول بقدر يغيرها .. مافي زول باستطاعتو يمسح العدل والمساواة باستيكه, او يرمي مناوي خارج شباك الواقع الوطني ... او عقار او الحلو او عبدالواحد .. في تأريخ سياسي واجتماعي متصل بصورة مباشرة بشمولية الإنقاذ هو ما افرز هذا المكون او المكونات. البقدر يمسح التاريخ ده بي استيكة ح يقدر يمسح ديل .. ف بطلو كواريك بالله.
التانية الموقف من اتفاقية جوبا لسلام دارفور والمنطقتين.
الاتفاقية بصورة عامة جيدة وتحقق الهدف في نهاية الامر على ما فيها عيوب متفرقة هنا وهناك .. وهي بصورة عامة جدا افضت لتواجد المكون النضالي المسلح (اسمها مليشيات ساي الان) في الصيغة السياسية للفترة الانتقالية عبر مجلس الشركاء وحصنت ذلك باعتبارو حالة فوق دستورية .. وفي ذلك تكريس لتواجد سياسي مستقل عن قوى اعلان الحرية والتغيير والبروسس السياسية بتاعت الاتفاق السياسي والوثيقة الدستورية التي تمثل مآل ثورة ديسمبر كثورة سلمية .. بطريقة أخرى انتهينا لصيغة سياسية فيها تمثيل للنضال المسلح, وتمثيل للنضال السلمي, وتمثيل للعسكر .. ياهو الكلام كده. وياهو ده السلام الوحيد الممكن بكون مع الجماعة ديل وهم مواطنين سودانيين زيهم زيك واحد وعندهم نضالاتهم التي يرونها اعلى من نضالاتك.. وليس متاحا استيراد جماعة تانين وفقا لمواصفات النخب السياسية الحايمه دي. يا تدير عملية سلام معاهم يا تستمر الحرب. (ما عارف ح تحاربهم بي ياتو جيش؟)
المسألة التالته دخول القوات بتاعت الحركات للخرطوم.
نصت الاتفاقية على تواجد 320 فرد فقط من الحركات في الخرطوم واستمرار تواجد كل القوات في اماكنها لي مدة 40 شهر .. ال 40 شهر فيها فترة تسجيل ومن ثم تدريب ومن عمليات دمج وتنتهي بالانفتاح حسب التنظيم بتاع القوات المسلحة... قضية وجود قوات باعداد اكبر من المنصوص عليها مسالة مخالفة لاتفاقية جوبا (الأعلى حتى من الدستور). وقطعا عندها تبعات سياسية وامنية وعسكرية خطيرة جدا ويجب الانتباه ليها جيدا
ده ياهو الاطار الكلي للقضية بتاعت دخول القوات للخرطوم .. الناس مفروض تركز في مخالفة هذا الوجود للاتفاقية (الأعلى حتى من الدستور) اذا تجاوزت الاعداد ما نصت عليهو الاتفاقية. أي تناول جهوي او الانزلاق لرفض الاتفاقية في عضمها وحالة الرفض (المتعالي) لتولي قادة هذه الحركات مناصب سياسية دي هو مجرد تماهي مع المسيرة البائسة للدولة السودانية منذ الاستقلال.
|
Post: #2
Title: Re: القضية بتاعت دخول قوات الحركات الخرطوم
Author: Hassan Farah
Date: 02-25-2021, 08:22 AM
Parent: #1
"يحتاج السلام دائما الى طرفين لإبرامه لكن طرفا واحدا يمكنه اشعال الحربِ!!"
نيفيل تشامبرلين – بيرمنجهام 1939
---------------------------------------------------------------------------------------
الاستاذ محمد حيدر المشرف نيفيل تشامبرلين هذا الذى اعتمدت مقولته عن الحرب والسلام هو الشخص الذى بسبب تردده اشتعلت الحرب العالمية الثانية
((آرثر نيفيل تشامبرلين رئيس وزراء بريطانيا
بين العامين (1937 - 1940)
الذي أشتهر بـ(سياسة الأسترضاء) مع هتلر
والذي القي عليه اللوم في تمادي النازية وهتلر
واندلاع الحرب العالمية الثانية))
صدقنى ما نعيشه الآن من مشاكل مصدره اتفاقية سلام جوبا التى اتت مؤسسة على ترضية الجانب الآخر باى ثمن بدون دراسة وتحليل لما سيترتب عن هذه الترضية من مشاكل
|
Post: #5
Title: Re: القضية بتاعت دخول قوات الحركات الخرطوم
Author: محمد حيدر المشرف
Date: 02-25-2021, 12:17 PM
Parent: #2
الأستاذ حسن تحياتي
| Quote: صدقنى ما نعيشه الآن من مشاكل مصدره اتفاقية سلام جوبا التى اتت مؤسسة على ترضية الجانب الآخر |
ليتك تواصل في تشريح اتفاقية السلام وتوضيح كيف ان ما نعيشه من مشاكل مصدره اتفاقية السلام ..
ومن هو هذا الطرف الاخر المقصود؟
وكيف تمت ترضيته؟
هناك تحفظات عديدة على الاتفاقية ولكنها لا ترتقي لان تكون سببا في كل ما نعيشه من مشاكل في تقديري ..
...
تشامبرلين كلامو صحيح جدا .. لا تحتاج الحرب الا لطرف واحد بينما يحتاج السلام لطرفين
مودتي وتقديري
|
Post: #3
Title: Re: القضية بتاعت دخول قوات الحركات الخرطوم
Author: Salah Zubeir
Date: 02-25-2021, 08:39 AM
Parent: #1
| Quote: (ما عارف ح تحاربهم بي ياتو جيش؟) |
| Quote: يحتاج السلام دائما الى طرفين لإبرامه لكن طرفا واحدا يمكنه اشعال الحربِ!!" |
تحياتي محمد ...
معليش حا اطلع خارج سياق العبارتين أعلاه ...
أنا ما عارف مين حا يكون الطرف التاني للسلام مع المليشيات ...
أوع تقول لي قحت البتمثل الشعب السوداني ...
يعني المليشيات دي لو بتعلم إنو مافي جيش حا يحاربهم
الجابرن شنو على أخذ (جزء) من الكيكة مش أفضل ليهم
ياخدوها كلها بقوة السلاح؟؟؟
خطاب (مافي) جيش والعداء له وسط النخب السياسية
هو رصف الطريق لذهاب البلد للجحيم ...
الجميع يعلم بأن الجيش ليس هو البرهان والكباشي والعطا ...
لم يخطط البرهان وزمرته ليكونو قادة الجيش في هذه الفترة
من تاريخ السودان ... كان ممكن يكونو أي أسامي تانية ...
وبالتأكيد سوف يذهبون لحال سبيلهم حين تنتهي مهمتهم
بانتهاء الفترة الإنتقالية ...
الحقيقة الواضحة زي الشمس إنو لولا وجود هذا الجيش كانت
البلد دي راحت بفضل المليشيات والأيدولوجيات المستوردة ...
هذا الجيش هو جيش الشعب السوداني وهو الضامن لأمنه
وسلامه ... فإذا كانت قيادته لم ترتقي لتطلعات شعبه فاليذهبو
ويأتي غيرهم ... فلا قداسة في الجيش منذ إنشاءه ...
المدنية التي نحلم بها لن تكون عن طريق المحاصصات بين
أحزاب وحركات مسلحة لا داعم لها شعبيا ...
الرئيس المنتخب والبرلمان المنتخب بواسطة الشعب دي
المدنية التي تستطيع إجبار الجيش للبقاء في ثكناته ...
|
Post: #4
Title: Re: القضية بتاعت دخول قوات الحركات الخرطوم
Author: طلحة عبدالله
Date: 02-25-2021, 10:36 AM
Parent: #3
سلام محمد المشرف وبركة الطلة
................
شكرا أخونا صلاح الزبير عبرت عني
|
Post: #6
Title: Re: القضية بتاعت دخول قوات الحركات الخرطوم
Author: محمد حيدر المشرف
Date: 02-25-2021, 12:25 PM
Parent: #1
العزيزان صلاح وطلحة
تحية طيبة
ما مختلفين كتير
انا ما كتبت انو مافي جيش .. العبارة (ما عارف ح تحاربهم بي ياتو جيش؟) موجهة للنخب التي ترفض مؤسسة الجيش الحالية بصورة كلية .. فانا بسألهم ح تحاربو بياتو جيش لو لم تنجزوا السلام ؟ بالجيش الانتو رافضنو ده ؟
ده معنى كلامي ..
انا ارفض أي دور مستقبلي للجيش السوداني في ممارسة السياسة .. وادعو لاعادة هيكلة هذا الجيش وإعادة تعريف مهمتو .. واعتقد ان على الثورة وقواهو مواصلة النضال ضد تغولات العسكر على الفترة الانتقالية ولكن داخل اطار الشراكة بموجب الاتفاق السياسي والوثيقة والاتفاقيات.
|
Post: #7
Title: Re: القضية بتاعت دخول قوات الحركات الخرطوم
Author: امتثال عبدالله
Date: 02-25-2021, 12:54 PM
Parent: #6
محمد حيدر المشرف
ليس لهم اي حق في دخول الخرطوم بمليشياتهم المسلحة ويعسكروا
في الميادين العامة،،،،
ارجو ان يتفادى السودان مصيبة كبيرة في الطريق،،،
|
Post: #8
Title: Re: القضية بتاعت دخول قوات الحركات الخرطوم
Author: محمد حمزة الحسين
Date: 02-25-2021, 02:38 PM
Parent: #6
متابعه يا دكتور ...
تحياتي ...
|
Post: #9
Title: Re: القضية بتاعت دخول قوات الحركات الخرطوم
Author: محمد البشرى الخضر
Date: 02-25-2021, 10:38 PM
Parent: #8
| Quote: وهم مواطنين سودانيين زيهم زيك واحد |
سلامات يا دكتور
واتفاق كامل على فحوى البوست عبرت عن ما يدور في خلدي كأحسن ما يكون
العبارة المقتبسة هي المفتاحية في الموضوع دا, كثير من النخب ولأكون أكثر دقة أقول الجلاّبة زي زهير السراج و زملاء كثيرين ما قادرين يشوفوا الحقيقة دي!
|
|