انتو عرفتو انو رميساء الباكية اللي معها الرضيع طلعت شنو ؟

04:12 PM February, 24 2021 سودانيز اون لاين
زهير عثمان حمد-السودان الخرطوم
مكتبتى
رابط مختصر

(adsbygoogle = window.adsbygoogle || []).push({}); كل مانشكركم تطلعوا راكوبة في الخريف.... رميساء طلعت سكرتيرة سلك
الزميلة زلفة دكام
ارشح رميساء بت محاسن مديرا لمكتب خالد سلكهكذا تحكمنا عقليات لا تعرف غير التحشيدمؤسفالرفاعي عبدالعاطي حجر

هل يعقل أن ينهي عقد موظف بنك بسبب مسرحية هزلية

ابو الزهور بوستك مجوبك ...
عليك دينك ادينا كلام واااااضح و بالتفصيل الممل ...

حبيبنا زهير
كلنا منتظرين التفصيل

تحياتي

Quote: رميساء طلعت سكرتيرة سلك

ودا يعنى شنو؟ تكون زوجة سلك واللا زوجة الرئيس زاتو.. علاقته شنو بالواقعة.؟ هل الواقعة حصلت واللا ما حصلت؟ بعدين زواجها من فلان او علان دى ممكن
الناس يخلوها ليها.. وأكيد عنداه سبب للزواج منه.

زهير كلامه كلام متناقض وجايط وهو زاتو ما قادر يوضحه

Quote: . رميساء طلعت سكرتيرة سلك الزميلة زلفة دكام ارشح رميساء بت محاسن مديرا لمكتب خالد سلكهكذ

خلاصة الموضوع
المعلومة غلط

Quote: خلاصة الموضوع المعلومة غلط

ياتو معلومة في المعلومات الغلط؟
في زي خرشومية معلومة حايمة حول الموضوع دا
ممكن كلهن يكونوا غلط وممكن كلهم يكونوا صاح
عشان كدا التفاصيل مهمة.

في بوست واتسابى او تويترى حام بقول انو البنت مشت لاحد البنوك عشان تبدل دولارات. الموظف رفض, طوالي اتصلت بوزير المالية و ما عارف تانى منو. بعد شوية وزير المالية و معاهو الزول التانى حضرو البنك زى الحركة الكان بعملوها ناس يوسف عبدالفتاح و الطيب سيخة.

زهير الكوز
ينهي عقدالموظف
وبطل قصة انا سكران وانا حيران
انت كوز ومن اسوأ الكيزان

شكرا أخ محجوب

للشرح
في بوست واتسابى او تويترى حام بقول انو البنت مشت لاحد البنوك عشان تبدل دولارات. الموظف رفض, طوالي اتصلت بوزير المالية
و ما عارف تانى منو. بعد شوية وزير المالية و معاهو الزول التانى حضرو البنك زى الحركة الكان بعملوها ناس يوسف عبدالفتاح و الطيب سيخة.
والتضيح

قالت كوز أحمد الله ما عندي أنحراف اكعب من كدا
بعدين الواحد يكون كوز وليهو مبدا في حياتو أحسن من الفراغ والانحطاط اللي بشوفوا
لما اسكر ولا اموت لا بجرح زول ولا بقل أدبي عليك ولا قلت لزول اديني قرش ولا سرقت حق زول
الواحد ما يتداخل يتدخل بادب
الله انعل التعليم اللي ما بهذب المتعلم ولا بخليهو يحترم خصوصية الاخرين
والله الكيزان واضحين في خلافاتهم وأمراضهم لكين انتو العن من كلاب الشوارع
وفي بعض الاحيان يكون أهل الطيابة هم الذين يستحقون العلاج

يا وسخ المجلس يا اداء النفخة الكضابة

خصوصية شنو يا زهير وانت كل يوم بتكتب
لحدي ما قلت انت قاصد تشوه الناس ال انت منتمي ليهم
لو جئت كتبت شئ انت ما قلتو يبقي كلامك صاح

عندك باقي كلام قولو

باقي كلام شنو الكلام القبيح لما يجي من الناس اللي بنعتقد أنهم كويسيين مستغرب
وبعدين اكتب ما بدا لي هل هنا ما في سلطة اقوي من سلطة الضمير لو كان للكلاب أمثالنا ضمائر مثل العباقر
ولادا ادعاءكاذب للاخلاق والمثالية والقيم الساحة ساكت

المهم في النهاية اشكر كرم خصالك علي كتبتي في حقي وارجو شاكر أن لا يكون بيننا تداخل في أمر كان

لو كتبت ح اعلق ، انت قلت صحفي
ف ما في شئ بيمنعك تكتب ولا في شئ
يمنع اني اكتب

انا ما صحفي دي معلومة غلط
أنا كوز حايف ساي ابعدي مني الله يرضي عليك

هههه طيب

الاخ العزيز زهير
كل الاحترام و التقدير و المحبة
نشكرك مع الامتنان لرفد المنتدى بالاخبار
ايا كانت
صحيحة او مضروبة
و المضروبة معناها ان هناك من عرف او عارف الخبر الصحيح
و بالتاكيد حينزلو ف المنتدى .. و بالتالى الناس حتعرف الخبر الصحيح
و كدة تتداول المعلومة الصحيحة .. لتبنى عليها الاراء و نخلص بما يستفيد منه الوطن
..
انت و الاخت الكريمة اخلاص .. لكم من التقدير و الاحترام و المودة ما يعلم به الله
و من معظم ان لم يكن كل الاعضاء .. و متابعى المنتدى
و ما حدث اعلاه .. لا يستدعى الفراق و على عدم التواصل الاسفيرى
و التداخل و الحوار بينكم فيما تكتبون او تطرحون من اراء و افكار و معلومات ..
و لو عملنا كدة .. و كل واحد اتخذ مثل هذا الموقف .. سنجد المنتدى و بعد اشهر معدودة جزر معزولة
و سيفقد الوطن و المواطنيين .. موقع و منارة ..
...و بما عهد عندكم الاتنين .. و ما رايناه فيكم من خلال كتاباتكم
من جميل الصفات و فضائل الاخلاق و كريم الخصال
اتمنى زوال هذه الغمامة و الضباب الصباحى و خصوصا الدنيا شتاء
لتشرق الشمس و تتقتح ( الزهور ) و يعطر عبق الورود المنتدى
دمتم بخير و جمال ايا كان الحال
... انه عشم الاخوة

محبكم / بدران

السلام عليكم ،
وشكراً أخانا "بدران" محمد بدرالدين، على كلامك للأخ زهير،
ومن ذات الوِجهة الطيّبة، أدعو الأخ زهير، أن يطوّل باله وألا يتسارع
للحَمَق. ثم شكراً أخي أبوريش، محمد عثمان، في قولك:

Quote: ودا يعنى شنو؟ تكون زوجة سلك واللا زوجة الرئيس زاتو.. علاقته شنو بالواقعة.؟ هل الواقعة حصلت واللا ما حصلت؟ بعدين زواجها من فلان او علان دى ممكن الناس يخلوها ليها.. وأكيد عنداه سبب للزواج منه.

ودا كلام صااااااح مئة بالمئة.
بكل أمانة، أعضاء الحكومة الجدد، لمس الشعب منهم هِمـّة، بزياراتهم
الميدانية ولكثرة خطابهم في الطرق على الأزمات التي يعيشها المواطنون.
بالأكيد، الأخ الباشمهندس، وزير شؤون مجلس الوزراء، خالد يوسف،
يقود وزراته بروحٍ ثورية وَثّابة، وكذلك يطابق طريقته كُثر من الوزراء الجدد.
وبالطبع، لقد كانت زيارة وزير المالية والتخطيط الاقتصادي، الأخ د. جبريل
إبراهيم، للفرع الرئيسي لــ "بنك الخرطوم" استجابة لاستغاثة
"مصنوعة/أو طبيعية" هي زيارة في محلّها تماماً، تخدم غرض وطني
سامق، ألا وهو "ضبط أي معترضات" للبرنامج الوطني بتحرير سعر
الصرف آل. مَرِن آل. مــُدار، وبكل أمانة، فقد وجدت الزيارة الوزارية
واتخاذ قرارات بشأن قضيّة الزيارة، ارتياحاً في شعور غالب المتابعين
والآملين بنجاح تحرير سعر الصرف جزئيا.

أمنياتي الطيبة لهم بالنجاح، وَ الثر كمان إن شاء الله تعالى ..

الاخ محمد بدر الدين والاخ محمد ابوجودة
لكم عاطر الحيا وكل التقدير
والله ان كنت كاذب فهذا بيني وضميري ومصدقيتي يعلمها اخوة كرام وان كنت سكير فاسق فهذا شأن خاص وانتم تعلمون انا لا اتطاول علي الاخوات بالمنبر
ولكن ما كتبت حقيقة تجريح ولا اقبله ولكن تمنعني اخلاقي كاخ لبنات ان ان ارد بسافل القول او الانحطاط لذلك طلبت بادب
ان لا يكون هنالك رد وتعقيب بيننا وهذا حقي
أين ما اخطات فيه انا
وعليه لا اود أعتذرمن أحد او تطيب خاطر منكم هذه هي طبائع الجائلين في حوش بكري
لكم وكل الود واشكركم

شكرا يازهير لترفعك عن الصغائر هذا شئ لايستطيع الكثيرين منا فعله..انت رجل تستحق كل الاحترام

زهير قلنا ليك ما تهبش ابو هاشم برميك في الشوك .

الليله احلك الحله بله .

الاخت اخلاص المشرف ما تشتغلي كتير باخونا زهير ده خلاص نشبوا ابو هاشم تاني ما بتقوم ليه قايمه .

عجبني و سره بالي زنقه و تشرشحت ابو الزوز .


الزبير الختمي

Quote: ياتو معلومة في المعلومات الغلط؟

ههههههه
deniability
زي صاحبنا زهير

مش كان ممكن تكتب الانكار دي بالعربي ولا ثقافتك انجليزية
وهنالك انواع من الانكار ربي ابعدني من الانكار المرضي

لك كل الود والتقدير اخي محمد ابراهيم
وما سطرته هذا جزء من اخلاقك الكريمة
متعك ربي بالعافية

سلام يا جعفر

Quote: ههههههه deniability زي صاحبنا زهير

هو أصلاً مافي معلومة رسمية عشان يكون في deniability إلا من عند الوزير😜

هسه كدي شوف الخبر النشرته الصيحة وأضيق ليه خبر زهير وفنط لينا المعلومات الصاح من الغلط
او إنضم لإخلاص في حملتها لتكويز زهير😂

Quote: إبعاد موظف ببنك عقّد انسياب بيع وشراء العملات الأجنبية 2021/02/25 التزم بنك الخرطوم بشراء العملات الأجنبية من المواطنين دون تعقيد، وحدد نافذتين في كل فرع لإكمال المعاملات، واستثنى الراغبين في بيع العملات الأجنبية من الوقوف في صف العملاء. فيما أكدت مصادر مطلعة أن البنك أبعد موظفاً في أحد فروعه عمل على تعقيد شراء عملات أجنبية من مواطنين. وكانت إحدى العميلات قد طالبت عبر صفحتها بـ(فيسبوك) بتدخُّل عاجل بعد تعقيدات واجهتها عند مُحاولة بيعها عملات أجنبية لبنك الخرطوم، وقام أحد الموظفين بمطالبتها بملء فورم والحضور غداً لإكمال معاملتها. وتزامنت رسالة العميلة مع زيارة كان ينفذها وزير شؤون مجلس الوزراء خالد عمر يوسف، ووزير المالية جبريل إبراهيم، ومحافظ بنك السودان محمد الفاتح زين العابدين للمرور على بعض البنوك، فكان أن لبُّوا نداءها وحضروا لفرع بنك الخرطوم وتم إبعاد الموظف من موقعه في الحال. وأصدر بنك السودان أمس، مُوجِّهات لجميع فروعه لاستقبال وشراء العملات الأجنبية تنفيذاً لسياسة بنك السودان التي قامت بتوحيد سعر العملات الأجنبية مع السوق الموازي. وأوضح السيد محافظ البنك المركزي في تصريح صحفي، أن الزيارة التي قاموا بها لعدد من البنوك اختصت بتطبيق الإجراءات الجديدة المتعلقة بسعر الصرف والتعرف على مشكلات الجمهور، وأشار إلى أن العمل ينساب بطريقة ممتازة باستثناء بعض المشكلات البسيطة والتي صدرت بشأنها توجيهات من بنك السودان بحلها فوراً، وتضمنت المعالجات العمل المسائي وتبسيط الإجراءات والتعاون مع الجمهور لإنجاح السياسات الجديدة. صحيفة الصيحة