نداء عاجل لوزارة الخارجية السودانية ووزارة الداخلية .. استخراج وتجديد الجواز بالامارات

09:02 AM February, 12 2021

سودانيز اون لاين
Dr. Ahmed Amin-السودان - الخرطوم 2 - أبراج النيلين
مكتبتى
رابط مختصر

منقول من الراكوبة ....

Quote: اصطف عشرات السودانيين المقيمين في الإمارات، في قنصلية السودان في مدينة دبي، لتجديد الجوازات. في وقتٍ حددت فيه القنصلية سقفًا لقبول طلبات تجديد الجواز والاستخراج، بينما يشكو مقيمون من صعوبة الدخول إلى النظام الإلكتروني الخاص بالقنصلية لحجز الإجراءات. وذكر أحد السودانيين المقيمين في الإمارات، في حديث لـ”الترا سودان”، مشترطًا حجب اسمه حتى لا يتضرر في الإجراءات، ذكر أنه يسعى لاستخراج جواز سفر لطفله، واتبع الإجراءات الخاصة بالتقديم الإلكتروني بالموقع الإلكتروني الخاص بالقنصلية السودانية في دبي، وتمكن بعد سلسلة طويلة من المحاولات من الحصول على موعد لبدء الإجراءات. ويحاول آلاف السودانيين العودة إلى البلاد لقضاء فترة العطلة عقب تخفيف قيود الإغلاق الكلي في الإمارات، ويواجهون سلسلة من المعاناة في استخراج وتجديد جوازات السفر. فيما وضعت القنصلية تكلفة إضافية على رسوم جواز السفر بقيمة (500) درهم إماراتي للكبار و(200) درهم للأطفال. وقال المقيم السوداني -وهو أب لثلاثة أطفال- إنه قرر استخراج الجواز لطفله في قنصلية السودان في دبي، ولقبول طلبه اضطر إلى الانتظار أسبوعين كاملين، وعندما تم قبول النظام الإلكتروني ذهب إلى القنصلية في دبي ومكث نحو ثماني ساعات لإنهاء إجراءات الجواز لطفله. وأضاف: “عندما نقلت لمسؤول بالقنصلية محتجًا على صعوبة الإجراءات، أبلغني أن الإجراءات أفضل من السودان. وهذه مقارنة غير منطقية، لأن الأصل في الإجراء الإلكتروني والمكتبي أن يكون سلسًا وسريعًا”. وأشار إلى أن السودانيين يتحاشون معاملات استخراج الجواز في قنصليات وسفارة السودان في الإمارات لأنها صعبة ومكلفة ومرهقة وتستغرق وقتًا طويلًا، ومعقدة وغير مرنة والتعامل في الغالب غير جيد. وأردف: “الاسوأ من ذلك عدم وجود جهة تُراقب أداء القنصليات والسفارات. حتى وزارة الخارجية في الحكومة الانتقالية لم تكن بحجم الآمال التي وضعت عليها من قبل السودانيين بالخارج”. وتواصل “الترا سودان” مع إدارة القنصليات بوزارة الخارجية السودانية، ورفض مسؤول بالإدارة التعليق على شكاوى السودانيين بالخارج من بطء وصعوبة الإجراءات، وقال إنه غير مخول له بالتصريح للصحافيين. الترا سودان

مع جائحة كرونا وتقليل أعدعد المراجعين لازم يكون في حل ..

ممكن ارسال اتيام من السودان كالسابق للمساعدة في سرعة انجاز المعاملات

وفتح قسم للجواز في سفارتنا بابوظبي حتي يقل الضغط علي القنصلية في دبي

الوضـــع أصبح صعب جدا ..
وكثيرون الآن حالهم وقف ودخلوا في مخالفات كثيرة

هذا هو حال جميع السفارات السودانية في الخارج ،والسفارة السودانية في ابوظبي
ليست بمستثنى عنها....والجاليات السودانية في الخارج كلها تعاني وتقاسي من المعاملة
السيئة وغير الكريمة..
واقترح الغاء وزارة الخارجية واغلاق جميع السفارات في الخارج والاستفادة من ملايين العملات
الصعبة التي تصرف على تلك السفارات في شراء الدقيق والخبز، وتكليف سفارات اجنبية اخرى
من اجل القيام بالمصالح السودانية في الخارج والعناية بامور المهاجرين والمغتربين السودانيين
في الخارج ولا شك انهم سيجدون افضل معاملة...

Quote: هذا هو حال جميع السفارات السودانية في الخارج ،والسفارة السودانية في ابوظبي ليست بمستثنى عنها....والجاليات السودانية في الخارج كلها تعاني وتقاسي من المعاملة السيئة وغير الكريمة..

مرحب امتثال ...

بالعكس تماما .. القنصلية العامة بدبي والامارات الشمالية لها تاريخ ممتاز في التعامل مع السودانيين
والجواز استخراجه او تجديده كان يسير بافضل حال .. لكن الكرونا وما فعلته بالناس ادى الى تحديد اعداد المراجعين
مما قلل من الانتاج اليومي للحد الأدني.

نبحث عن حلول اسعافية لمقابلة الاعداد الزايدة من المنتظرين للخدمة.

وأعتقد لو تم ارسال تيم من السودان او تدريب موظفين بالسفارة السودانية بابوظبي سيقلل فترات الانتظار
بالذات الناس في الامارات يعلمون صعوبة الخروج من الامارة والعودة اليها ..

سلام دكتور أحمد

Quote: أبلغني أن الإجراءات أفضل من السودان

الإجراءات في السودان أفضل و أسهل بكتير
بتقدم للجواز و بعد اسبوع بتستلم و رسوم الجواز 3 ألف جنيه
نعم الفترة الفاتت ما كان في ورق للجواز و بياخد وكت لكن الآن الأمور طيبة
اذا كان الى الآن السفير هو محمد أمين الكارب هو شخص مهني و كان سفير في الرياض في فترة سابقة و على حسب معرفتي بيهو هو ما كوز
الحاجة القاعدين يعملوها السودانيين في السفارة هنا بقدمو للجواز و بياخدو الإيصال برسلوهو السودان لأقربائه و بمشو وزارة الداخلية بستلمو الجواز الجديد و برسلوهو ليهو باك مع اي مسافر
اقترح على وزارة الداخلية أن تكون مدة الجواز عشرة سنوات بدلاً عن خمسة سنوات
الحل التاني انك تطلب وثيقة سفر اضطرارية و تمشي تعملو في السودان بكلفك 30 درهم فقط
لازم يكون في حلول عملية عاجلة
غايتو لما استوزرت الماسورة مريم الصادق الله يعينكم :)

بالعكس يا خضر، أنا شايف مريم ستحسم الأمور لأنها عسكرية.. هى اساسا كان المفروض يجيبوها ضمن المكون العســكرى.

أبــو ريش عساك طيب ياخ ..

مريم الصادق امامها مهام كثيرة ومعقدة في التعامل مع مشاكل الوزارة المعقدة

نحن محتاجين جهاز شءون العاملين بالخارج يتحرك بقوة وبسرعة لمعالجة المشاكل قبل ان تستفحل.

تحياتي استاذ خضر

Quote: الإجراءات في السودان أفضل و أسهل بكتير

ليس بمقدور كثير من الناس السفر للسودان لاستخراج او تجديد جواز سفر لظروف كثيرة
وحتى السفر في زمن الكرونا اصبح قطعة من جحيم يا رجل

الافضل هو توفير اتيام للدعم والمساعدة في السفارات..

محتاجين جهاز شئون المغتربين يتحرك شوية .. ما شفنا ليه اي حس من تعيين الامين العام الجديد

دي جات في قروب الجالية يا دكتور

Quote: الإخوة الأفاضل.. السلام عليكم ورحمة الله وبركاته بفضل جهودِِ حثيثة لم تنقطع منذ فترة طويلة وتعاونِِ مثمرِِ بين مجلس إدارة النادي السوداني والسفارة السودانية بأبوظبي ممثلةََ في سعادة السفير/ محمد أمين الكارب وسعادة القنصل / مصطفي الحسين الشريف كُلِّلت المساعي من خلال الإتصالات المكثفة التي أجريت والجهات ذات الصلة بالسودان (وزارة الداخليه ،،،الخارجية،،، المالية ورئاسة الوزراء ) علي الموافقة بإعادة فتح مكتب الجوازات بالسفارة السودانية بأبوظبي قريباً إن شاء الله... تم بحمد الله تسمية فريق العمل وحل كل الإشكاليات الإدارية المتعلقة بهذا الشأن ،،،ويتوقع وصولهم قريباً... ونُوقِش أيضاً علي هامش اللقاء، العديد من القضايا التي تهم الجالية في لقاء الأمس المُثمر ( الثلاثاء الموافق 9/2/2021 ) والذي جمعنا بالإخوة الكرام بمجلس إدارة النادي السوداني بالعين...والسفارة السودانية بأبوظبي. نثمن عالياً الجهود المخلصة للسفارة السودانية بأبوظبي،،، وخالص الشكر والتقدير لسعادة السفير،،، سعادة القنصل وكامل أعضاء السفارة... ودُمتم في رعاية الله وحفظه.... رشدي عبد المنعم إبراهيم

سؤال بخصوص ذكر وزارتى الداخليه والخارجيه
فى اخبار عن ترحيل سوريين من السعوديه مخالفين للاقامه ليقيموا فى السودان مع التزام السعوديه بدفع تكاليف حضورهم وجراءات اقامتهم فى السودان
الخبر وارد فى صفحه لسودانيين فى السعوديه و لااعرف مدى صحه الخبر

مرحب دكتور أحمد

Quote: ليس بمقدور كثير من الناس السفر للسودان لاستخراج او تجديد جواز سفر لظروف كثيرة وحتى السفر في زمن الكرونا اصبح قطعة من جحيم يا رجل الافضل هو توفير اتيام للدعم والمساعدة في السفارات.. محتاجين جهاز شئون المغتربين يتحرك شوية .. ما شفنا ليه اي حس من تعيين الامين العام الجديد

نعم يا دكتور هذا أحد الحلول و لالحل الآخر هو اجراء عن طريق النت
في مارس العام المنصرم و نسبة لجائحة الكرونا ,اعلنت السفارة البريطانية بأن تجديد الجواز يجب ان يتم من خلال موقع ادارة الهجرة بليفربول عبر لنك ترسله السفارة في إيميل
و ارسال الجواز القديم عن طريق البريد و يتم الإجراء و استلام الجواز الجديد خلال اسبوع - 10 ايام بكل سهولة و يسر كذلك عن طريق البريد بعد دفع الرسوم ببطاقة البنك لصالح ادرة الهجرة
و من لديه ظرف طارئ للعودة لبريطانيا سيتم استخراج وثيقة سفر اضطرارية له خلال نصف ساعة فقط و يبقى مارق

الراكز خضر
ما تحاول تقارن ادارة الهجرة والجوازات البريطانية والاوربية مع جوازات الخرطوم ...مافي مقارنة!!!
في امريكا ،او بالاصح في عاصمة العالم، نيويورك، اذا عاوز تجدد الجواز ما عليك الا ان تذهب الى اي مكتب
بريد في المدينة وتدفع الرسوم وتملأ اورنيك وتسلمهم الجواز القديم وتستلم الجواز الجديد في بريدك بعد اسبوع
لكن اذا انت مستعجل وداير الجواز في نفس اليوم لانك مسافر في نفس اليوم ما عليك الا ان تذهب في مكتب
في منهاتن وتدفع رسوم زيادة شوية وتستلم الجواز بعد ساعة واحدة فقط وتسافر في نفس اليوم...
جوازات الخرطوم عشان تصل المرحلة دي عاوزة ٥٠ سنة ...
والمشكلة في الروتين الحكومي القاتل...والخدمة المدنية الاسوأ في العالم...الخدمة المدنية في السودان..
...قرأت مرة ان هتلر كان يزور محطة السكة حديد في مدينة فجاة ويسال مدير المحطة عن موعد وصول قطار الركاب
القادم واذا مثلا قال له ان الموعد الساعة ١١ و٤ دقائق ،فهو ينتظر وصول القطار، واذا وصل القطار الساعة ١١ و٥ دقائق
فهو يضرب سائق القطار طلقة في راسه ويرديه قتيلا في لحظة...

مرحب الماجدة امتثال العبد الله

Quote: الراكز خضر ما تحاول تقارن ادارة الهجرة والجوازات البريطانية والاوربية مع جوازات الخرطوم ...مافي مقارنة!!! في امريكا ،او بالاصح في عاصمة العالم، نيويورك، اذا عاوز تجدد الجواز ما عليك الا ان تذهب الى اي مكتب بريد في المدينة وتدفع الرسوم وتملأ اورنيك وتسلمهم الجواز القديم وتستلم الجواز الجديد في بريدك بعد اسبوع لكن اذا انت مستعجل وداير الجواز في نفس اليوم لانك مسافر في نفس اليوم ما عليك الا ان تذهب في مكتب في منهاتن وتدفع رسوم زيادة شوية وتستلم الجواز بعد ساعة واحدة فقط وتسافر في نفس اليوم... جوازات الخرطوم عشان تصل المرحلة دي عاوزة ٥٠ سنة ... والمشكلة في الروتين الحكومي القاتل...والخدمة المدنية الاسوأ في العالم...الخدمة المدنية في السودان.. ...قرأت مرة ان هتلر كان يزور محطة السكة حديد في مدينة فجاة ويسال مدير المحطة عن موعد وصول قطار الركاب القادم واذا مثلا قال له ان الموعد الساعة ١١ و٤ دقائق ،فهو ينتظر وصول القطار، واذا وصل القطار الساعة ١١ و٥ دقائق فهو يضرب سائق القطار طلقة في راسه ويرديه قتيلا في لحظة...

كلامك سليم هو نفس النظام في بريطانيا سواء كان اصدار جواز جديد او تجديد جواز بتم عن طريق البريد نعم
و الرسوم على حسب عدد صفحات الجواز , و في حالة الاستعجال بتستلمو من ادارة الهجرة في ساعة
ممكن تمشي استارباكس البتحبيها وتجي تلقى الواي فاي فاتح و دخلتا و ترجعي باك تستلمي و كان الله يحب المحسنين و الناس البشتغلو صاح
اصلاً الجواز بكون جاهز الحاجة الوحيدة البعملا موظف الجوازات انو بطبع استيكر البيانات مع الشريحة في الصفحة الأولى و انتهى المشوار
الحاجة دي ما معقدة و لا صعبة انها تتعمل في السودان بالسرعة المطلوبة لانو الجواز السوداني الآن جواز إلكتروني
لكن للإسف الخدمة المدنية ماتت موت الضان في زمن الكيزان
انحنا عاوزين زول ذي هتلر دا لو طخ مسئول واحد الباقين بستعدلو

بس في حاجة نسيتها في موضوع هتلر...
فاذا وصل القطار الساعة ١١ و٣ دقائق، يعني ابدر بدقيقة من المواعيد المقررة، ما بيضرب
سائق القطار طوالي لكن بيسأله عن السبب ليه وصل ابدر بدقيقة وعندما يعرف السبب ، فاذا
اقتنع انه السبب منطقي وفي مصلحة الشعب يخلي سبيله، واذا لم يقتنع فان مصير سائق القطار
طلقة في راسه،فمثلا من الاسباب الممكن يقتنع بيها هتلر اذا قال السائق انه في مواطن الماني جاته
ذبحة صدرية وهو اسرع بالقطار عشان المريض يصل المستشفى بسرعه،فهذا السبب مقنع ، واذا قال
انه عرف انه في جندي الماني عاوز يصل وحدته العسكرية بسرعة، فهذا سبب مقنع، ولكن اذا عرف ان
المريض لم يكن الماني وكان يهودي فان مصير السائق والمريض القتل..
ولكن الم يكن من الافضل ان يسأل هتلر سائق القطار الذي تأخر دقيقة عن سبب تاخيره!!؟؟ ربما يكون
هناك حادث في طريق القطار !!؟؟ ولكنه يقول لا... لا يوجد سبب لان القطار لا يجب ان يتوقف في حالة
الحادث بل يجب على السائق ان يصل المحطة في المواعيد من اجل مصلحة ركاب القطار....
...عاوزين ٥ زي هتلر في حكومة السودان، واحد يكون رئيس الوزراء والثاني والي الخرطوم، والثالث،المراجع العام
والرابع وزير المواصلات والخامس وزير الطاقة...هههههههههههه..ان شاء الله تكونوا عرفتو ليه المراجع العام ، وليه وزير المواصلات
وليه وزير الطاقة وليه والي الخرطوم...

سلام د.أحمد
مبدئيا كده أقول ليك حيكون فى مكتب جوازات قريب جدا فى السفارة فى أبوظبى .
برسل ليك حاجة فى الواتس تورى الكلام ده وممكن تجيبها هنا فى البوست .
طبعا العرقلة دى كلها عملا الكوز شاور لما نقل الأجراءات دى للقنصلية فى دبى أيام هو كان قنصل.
هل موضوع الجواز يحتاج لى كل الجيش العرمرم اللى بيجوبوهو للشغلانة دى.
مهم جدا مراعاة موضوع الرسوم والفروق الواضحة بينا وبين فى الخارج

دكتور أحمد أمين
ان شاء الله طيب زمن طويل
بختكم عندكم جوازات بتطلع واجراءات بي 500 درهم
نحنا عشان نجدد الجواز بندفع 300% من قيمة الجواز البتعادل 10$ اقل شي تدفع ليك 3000$ تذكره سفر لخرطوم ومصاريفك
لمدة 10 آيام في السودان عشان تصور بس اصلاً بياناتك وبصمتك موجودات
ياهو ده السودان
الله المستعان
تحياتي للاسرة الكريمة

سلام عليكم صاحب البوست وضيوفه الكرام
أنشالله ربنا يسهل الامر
حقيقى للتاريخ انا مشيت السفارة جوازي منتهي قالوا هم عندهم التزام اخلاقي ما يجددوا للمهاجرين الغير شرعيين

والله ما زعلت منهم
حسي قاعد بدون اوراق ثبوتيه سارية المفعول الحمدلله

Quote: حقيقى للتاريخ انا مشيت السفارة جوازي منتهي قالوا هم عندهم التزام اخلاقي ما يجددوا للمهاجرين الغير شرعيين والله ما زعلت منهم حسي قاعد بدون اوراق ثبوتيه سارية المفعول الحمدلله

الف تحية ليك استاذ زهير واسال الله ان ييسر لك كل امر عسير.

Quote: بختكم عندكم جوازات بتطلع واجراءات بي 500 درهم نحنا عشان نجدد الجواز بندفع 300% من قيمة الجواز البتعادل 10$ اقل شي تدفع ليك 3000$ تذكره سفر لخرطوم ومصاريفك لمدة 10 آيام في السودان عشان تصور بس اصلاً بياناتك وبصمتك موجودات ياهو ده السودان الله المستعان تحياتي للاسرة الكريمة

اووووو م.محمد ود بابكـــر يا زول وين قطعت من البلد دي .. شكلها نواكشوط وقعت ليك تمام هاهاهاهاهاها
الشناقيط ديل اهلنا ياخ ..

ياخ ربنا يعين بس .. لكن الجواز ده مما عملوه الكتروني بقت مشكلة عويصة والله
زمان ختم وانت ماشي

والأن كمان بقت كرونا ... ظلمات بعضها فوق بعض

سلام سلام حبيبنا م. عباس ..

أخبارك مفرحة جدا لكل المقيمين في امارة ابوظبي ..

المهم ما نصل دبي مع الفحوصات الكتيرة هههههههه

تسلم ياخ

باشمهندس ودالبشـــرى ياخ بشرك الله بالخـــير دوما..

خبر جميل وهذا هو الحــل الذي تم انتظاره طويلا ..

الآن نتمنى أن يصاحب هذا الأمــر نظام حجوزات متطور عشان ما يكون في خيار وفقوس
وتجمعات كبيرة ومشاكل كما حدث سابقا...
الإدارة الناجحة لأي عمل هي السبب الأساسي في بلوغ الأهداف.

شكرا سعادة السفير
شكرأ سعادة القنصل
شكرا لأدارة النادي السوداني