قبيلة مثمرة للأمل ومثيرة للجدل..وأسمج ما قرأت اليـوم.!

05:41 AM January, 27 2021

سودانيز اون لاين
HAIDER ALZAIN-
مكتبتى
رابط مختصر

يعني يافتاح يا عليم ، وبدل أذكار الصباح وحديث ابي داوؤد بسم الذي لا يضر مع اسمه شئ في الأرض ولا في السماء..
وتقرأ من حيث لا تدري قصة لا معنى لها محكية بسماجة وثقالة وبياخة وملل لا يضاهيه الا صوت امين حسن عمر ..
ولا هدف لا حكمة لا نكتة لا طرفة من وراء القصة إلا فعل زاحفي من جُغز متدوعل، عبطل متملق متزلف فاتوا القطر ويزحف ويتدرق في هباء نعمة السلطة المدحورة.
وغير الضعف والسطحية والجرجرة والفلفلة فهو لا يحمل في مخرجاته غير هراء ولزاجة الفلول والزواحف البيغرف منهم الخازوق المدعو عمــر التـاج ..
ورغم انه الواحد ليهو فترة اصبح يتخير ما يقراهو صباحا خوفاً من جنس السماجة لكن تأتي رياح الغفلة بالغثيان خميس دغشاً بدري وابوالزهور يغني ، حبيبي وين ، دندهوبي آه ..!
قيـل في الأثر :
الحذر لا يمنع القدر ..

المقصود كتابة مبدع قصة " بـار الغرد والقلوتية " :

Quote: صديقنا السر السنجك شاعر وصحفي وباحث في أدب الشايقية ، هذه القبيلة المثمرة للأمل والمثيرة للجدل ، أسرَ لي يوماً بأن لهم شفرة يعرفون بها مقدار التدين في قرى الشوايقة المتناثرة على ضفتي النيل ، فهم يقيسون هذا الإلتزام بنسبة التركيز في (شربوت البلح وعصيره)، فالقرى الملتزمة تستعمله عصيراً خفيفاً ، وبعضها تستخدمه نبيذاً وسطاً ، أما (المتساهلين) من أهل فقه التيسير والتخفيف فهم يجعلونه (منزلةً) بين المنزلتين (العرق والنبيذ). أضاف السنجك بأن له خالتين لهنَ عبقرية في المجاملات والصلات الإجتماعية وربط وشائج القربى وأواصر القرى في كل مناسبة صغيرة كانت أو كبيرة ، وقد قامت الخالتان أم الحسن وشقيقتها الصغرى محاسن بزيارة لإحدى القرى تلبيةً لدعوة زواج ميمون ، وكانت هذه القرية مشهورة بالشربوت من فئة التركيز العالي والعيار الثقيل . بالغ أهل القرية في إكرامهنَ بما لذَ وطاب من الثريد والمرق وأترعوا عليهنَ (الشراب إياه) ، وفوق ذلك فقد إستمتعنَ بفاصل من أغنيات الدليب والطنبور ، بدأه المغني الشجي بــ (مكتوب لي مقدر) وإنتهى الفاصل بـــ (بلالي) و(الريلة) ، خرجنَ من الليلةِ البهيجة وقد إمتلأت البطون طعاماً ، والعقول مزاجاً وعصف الغناء بالمشاعر الطليقةُ. كانت قريتهنَ في الوادي بعيداً عن النهر ،ولكن يبدو أن الخدر اللذيذ وأريج نسمات الشمال قد قادهنَ إلى ضفة النهر بعيداً عن القرية ، ولم ينتبهنَ وكدنَ أن يسقطنَ من شاهق لولا أن رأينَ (النيل بيلمع في الظلام ، زي سيف مجوهر بالنجوم من غير نظام) كما غنى وردي وصلاح في الطير المهاجر . فزعت محاسن من هول الكارثة وضلال الطريق فقالت في جذع بواح لشقيقتها الكبرى: يا أم الحسن نحنَ وين؟ فردت عليها في حيرةٍ وسخرية: المشكلة ما في نحنَ وين .. المشكلة في نحن منو؟ يبدو أن سؤال زمان ومكان السقوط والإنكسار في (سودان النكبة الراهن) قد أدركته خالات السنجك تماماً ، ولكن يبقى سؤال الهوية الذي سقط فيه النادي السياسي السوداني المأزوم قائماً (نحنَ منو)؟؟. حسين خوجلي مساء الأربعاء 27 يناير 2021م

نسيت .. عنوان العوارة أعلاه :

أم الحسن الشايقية آخر عضو بالنادي السياسي السوداني

والله بس ما بتدورو ساي! هسي الكلام دا مالو وفيه شنو غير نقد الحكومة الانتقالية

هاكـ يا ود البشرى جاني المنشور التالي للصديق وعضو المنبر الاستاذ طــارق جبريـل في تعليق على ورجغة حسين خوجلي السمجة المنقولة هنا دي:/


من صفحة طارق جبريل Tarig Jibreel




يا حسين خوجلي أول شي يا انت يا السنجك بتاعك كضاب.. الحكاية دي ما عندها اي علاقة بي ام الحسن حقتك دي الحكاية دي عندها علاقة بي حبوبتي انا عديل واسمها نفيسي بت البغاديد وصحبتها بت عريبي..
تاني حاجة إنت زماااان قبل كدة قلت الشايقية تربية نسوان ولمن سودانيز اون لاين كان مولع رشيناك لمن الله غفر ليك.. تاني حاجة عشان سنجكك دة (والله اعلم قصة حقيقة ولا قاطعها من راسك) تقوم تجيب لينا حكم القيمة القاطعه من راسك وتنزله علي قبيلة كاملة.. يا زول كدي ورينا انت غبينتك شنو مع الشوايقة عشان نعرف نرد عليك واحدة واحدة.. عشان أي توس نقعده في علبه.. المنتشة كلها بنعرف نرد عليها كويس..
دي الحكاية قوقلها حا تلقاها بي ضبانتها قال ام الحسن قال ولا شنو يا الـ98٪:
نفيسي رقدت خل
انت يا حبوبتي دحين قبل دة ما سكرتي مع حبوبتنا بت عريبي
- نفيسي: نان يا ولدي هو داك يوم بيتنسي
- باقيلي طشمتن كله كله
- وحاتك يا ولدي رقدنا خل
- اصلكن لقيتنو وين
- مشينا يا ولدي لي عرس بت واحدي سرنا من البركل لي مروي انا وحبوبتك بت عريبي
- اها شن سويتن
- لقينا النصيبة اليقولولا الزينة شادي العرقي للعرس
- اي هي كانت دي شغلتها في الاعراس
- اي يا ولدي عندها عرقي كافر خلاص
- نان انتن اصلكن لقيتن الجر (الزير) أليل العرقي ووقعتن فيهو
- والله يا ولدي انا السويت النصيبي
- كيفن
- قلت لي بت عريبي ونحن طالعات علي نضوق عرقي الخرابة دي قبل نمشي علي بيوتنا
- اها
- اهايا ولدي قعدنا جنبها وبقت تديني كوري وراء كوري ونحن نشرب ونتمطق
- اصلها ما قلتلكن كفاكن
- آآآبتقدر عارفاني لساني علي الحبل أليل البير
- اها
- وحاتك يا طارق يا ولدي وكتين اشوف في بت عريبي تشرب في الكوريي
وتنزل عرقي الجن دة في حلقها وتكرمش وشها علي كروق الدوم وكتين يقدم
- ههههههههههههه الله لا تكسبك كتلتيها وانت شن سويتي
- وحاتك يا ولدي الشي دة علي لبن اللبخ ينزل في الحلق علي حناضل القيزان
- باقيلي مر
- نان يا ولدي هي مرورية نصاح.. لكن الله يعلم يا ولدي بي مروريتو دي اماني ماهو طاعم
- باقيلي جغمتن لامن وقفتن علي السعن المنفوخ
- وحات جدك الصلاي داك انا اصلي بقيت علي البردة (سمكة) ان بقوا ختولم شريط رتيني
في خشمي كان باقيلي يولع من شدة الشي دة ماهو كافر
- يعني عمي الطيب دة طالعلك
- اي نان عمك الطيب كترو انا ياها فرد جغيمي في العرس دة
- اها شن سويتن
- اها يا ولدي هي تجغم وانا اجغم .. وكتين شفنا راسنا سكرنا وبقينا نلغلغ
- شن سويتن
- قلتلا يا بت عريبي قوماك نمشي انا راجلي يصلي بالناس في خلوة القرونة
- راجلك امام وانت تطشمي
- نان يا ولدي هو كان عارفني دايري امشي اطشم في العرس هههههه
- اها
- قلتلك قلت لي بت عريبي نمشي من تالا التمُر لامن نصل قصاد بيوتنا ونطلع جري ننوم
- اها
- يا ولدي بقينا ماشين ماشين لامن رحنا
- الله يقلعكن اها
- قامت بت عريبي قالتلي: انت يا نفيسي نحن وين
وانا قمت قلتلا: انت في نحن وين ولا نحن ذاتنا منن (من نحن)



كوز ومتحامل وسمج وحرامي...