حكموك المابشبهوك

05:00 PM January, 22 2021

سودانيز اون لاين
عمر التاج-KHT
مكتبتى
رابط مختصر

الوحيد الذي لا يريد ان يعترف ان هذه البلاد في طريقها للانهيار التام هو الدكتور حمدوك وكأن الرجل يريد ان يغالط الحقائق الدامغة التي تجري على لسان المواطن السوداني صباح مساء وكأنه يريد ان يغالط من يقاسمونه السلطة وهم كأهل مكة أدرى بشعابها والفريق البرهان من قبل اعترف بهذا الانهيار ونائبه حميدتي وحتى حزب حمدوك الذي فرخه وكان بمثابة حاضنته السياسية رضى ام أبي في بداية توليه الحكم واقصد الحزب الشيوعي ينعي صباح مساء هذه الحكومة لكن السيد حمدوك لازال مصراً علي موقفه بأننا سنعبر وهو حديث حالم لأن قوارب نجاتنا تتلاطمها الأمواج في ليلة رعدية عاصفة وللأسف الحكومة تريد ان تعبر بقارب سعته أربعة أشخاص والمتزاحمين على الركوب أربعمائة والدليل مايحدث الان من خلافات واختلافات في تشكيل الحكومة وهو خلاف يزيد من أزمات البلاد ويؤجل الوصول إلى حلول عاجلة لإنقاذ مايمكن انقاذه ودعوني أقول انني اضم صوتي وبشدة مع الأخ الإعلامي خالد الاعيسر الذي كتب امس تغريدة على تويتر ناشد من خلالها الشخصيات الوطنية لأن تخرج عن صمتها وتتبنى مبادرة عاجلة لإنقاذ البلاد من الفوضى حيث قال اعيسر ان هناك الكثير من الشخصيات الوطنية التي يجب ان تنفض الغبار عن نفسها ولاتترك الوطن مطية لأجندات المخابرات والنكرات وقال تعليقاً لامس ضمير الحقيقة انه ليس هناك ماهو مؤسف اكثر من الذي يحدث الآن للشعب السوداني من ذل وفقر تسللت فيه بعض الأحزاب الصغيرة التي لاوزن لها في الخارطة السياسية السودانية لأضم صوتي لصوت اعيسر وأقول ان هذا الشعب وهذه الأرض اعظم من الفاسدين والفاشلين الذي جمعتهم الغنيمة وهاهي تشق صفوفهم أيضاً بعد ان اختلفوا على النسب والحصص ونسوا الثورة وأهدافها ومبادئها بل نسوا ماتوافقوا عليه في الوثيقة الدستورية ان تقوم الحكومة علي الكفاءات الوطنية المخلصة ومايطرح الان من اسماء يؤكد ان الحكاية أصبحت مزاد لأعلى سعر يدفع تنازلا عن المبادئ وتخاذلًا عن الشعارات
والله أمر مؤسف ومحزن ان هذه الثورة العظيمة باسقة الطول الخضراء المروية بدماء الشباب تؤول لمجموعة عاطلين كل رصيدهم وخبراتهم معارضة اسفيرية بائسة ظلوا غرباء وبعيدين عن الغبش حتى وهم في الخرطوم محصنين أنفسهم بشلليات تخرج منها القرارات وتدار فيها الدولة بالله عليكم اي بؤس وهوان الذي وصلنا اليه بالله عليكم اي ألم يشعر به أهل الشهداء وأصدقائهم وأحبابهم بالله عليكم اي زمن أضاعه هؤلاء حتى وصلنا إلى ماوصلنا اليه ورغيف الخبز يساوي العملة الرسمية عشرين مرة بالله عليكم ياها دي كفاءاتكم التي بشرتنا بها شاعرتكم القاعدة في امريكا تأكل الماكدونالدز وتحلي بالدونات حين قالت جات كفاءاتك ياوطن جوك الولاد البشبهوك حضرت حكومة حمدوك يابتي ديل لابشبهونا لابنشبهم ديل لايشعرون بمعاناة الغبش ووجع المحرومين وأنين المرض وكسرة نفس الفقراء ديل لو عندهم عندنا ثأر لما جعلونا ندفع التمن بهذا الشكل
الدايرة أقوله ان الذي يفلت من بين يدينا وطن حدادي مدادي لم يعقم رحم حوائه أبداً ولن يعقم ان تلد الخلص الأوفياء الذين هم علي استعداد لان يفدونه بالدم والأرواح والمهج فلابد من ان يقف هذا العبث لابد من إسدال الستار علي هذه المسرحية السخيفة الملئية بعبارات الخروج عن النص والله غالب..

كلمة عزيزة..
في فترة من الفترات كان مقبولا ومنطقيا ان نبلع حديث بعض القادة والزعماء السياسين عن الفشل خاصة في أيام الثورة الأولى وقد كان توجيه اللوم لحمدوك وحكومته كأنه خيانة للثورة أو هكذا سعى البعض لتعميق هذا الفهم لكن بعد اليوم لانقبل النواح والشكية بل ننتظر الحلول على أرض الواقع

كلمة اعز..
والله بلدنا مابتستاهل البحصل ده
أم وضاح

نورا شافت في رؤاها
حيطة تمتطي وتفلق في قفا الزول البناها

الان اعتصامات
و لن يستبينوا الرشد الا ضحي الغد

تحياتي يا دكتورة ..
هل قدمت حكومة الثورة في اي موقع قيادي
شخصية مقنعة تعمل بجد واخلاص من اجل احلام الوطن؟
شخص كادح يعمل ليل نهار بجد ..يشارك المواطن همومه ويقف معه في محنه
يتنازل عن المرتب الضخم ويضحي بالسيارة الفخمة والبيت الحكومي الراقي من اجل المواطن
الاجابة لا ؟
أغلبهم عمل على تكديس الاموال وفائدة اهله واصدقاءه .. يوظفهم في المناصب الرفيعة..

عمر اخوي دي ضنب ككو

الان في مظاهرات وقطع طرقات
والقائم بها مفروض يكون من ضمن الحكومة
وطبعاً لا احجر علي احد انما هو رأي
صراحة قول الحق ما بخلي الزول صاحب
بس لو ما قلناه الان لا ينفع بعدها

قولها وبس

غايتو يا ود التاج عقدتك دكتور حمدوك
ملحوظة:-
مالك عميت من استقبال دكتور حمدوك لكبار الخواجات ولا حسدا من عند نفسك ناس البشير حاكمين ثلاثين عاما ما استقبلوا الا خواجات الاعانات ههههها

استقبال حمدوك لكبار الخواجات عيش ما أكلنا ليه يا صديق ..
بتذكر زمن .. حتى الطير بيجيها جيعان .. من أطراف تقيها شبع
اسه حتى الزول البيجي جعان ممنوع يأكل من خبزها المدعوم

يا ود التاج المقصود بغير المواطنين
سكان المنطقة، كل منطقة عندها مخبزها
وكل زول فيها عندو نصيب ، قصة امشي
محل القي في فرنواشتري وناس البيت مشترين
ما بتنفع ، مشيت محل اشتري من المطاعم او كمان
اكل في البيت وشيل معاك سندوتش ، الزمن صعب
يا ود التاج ، اسع لو جاءك ضيف تتضارير ومع
الكورونا ما في داعي للزيارات .

حاجات كثيرة مع الكورونا والفلس ح تتغير

Quote: يا ود التاج المقصود بغير المواطنين سكان المنطقة، كل منطقة عندها مخبزها

معقولة يا دكتورة؟
وطيب لو طلع المقصود الاجانب ، حا يكون موقفك شنو؟

يا ود التاج اسع في زول بشتري الرغيف
بالباسبورت ؟!!! الكلام واضح كل منطقة
اللجان عارفة ناسها وحقهم كم ، وده نظام
مجرب من زمن نميري

Quote: يا ود التاج اسع في زول بشتري الرغيف بالباسبورت ؟!!! الكلام واضح كل منطقة اللجان عارفة ناسها وحقهم كم ، وده نظام مجرب من زمن نميري

عليك الله يا دكتورة إشكال السودانيين دي دايرة ليها باسبورت
اذا كان في بلد الغربة المليانة اجناس دي، واحد يشوفك يقول لك يازول
ما حيبقى التمييز السلبي صعب في بلد مافيه أجانب غير السوريين والحبش والخواجات وبعض افارقة.
ثم ان سياق الخطاب واضح تماما ان المستهدف هو الاجنبي وليس ابن المنطقة الأخرى..

اللجان والمخابز عندها اسماء الاسر
وعدد افرادها. حتي الاجانب مفروض بتسجلوا
في محلات سكنهم، ننتظر ونشوف