Post: #1
Title: يا دوله عيب
Author: عبدالماجد موسى
Date: 01-22-2021, 11:11 AM
10:11 AM January, 22 2021 سودانيز اون لاين
عبدالماجد موسى-بريطانيا / لندن
مكتبتى
رابط مختصر
ناداني واحد من بعيد
قال لي تعال
ياخوي أقيف
شايفك بتكتب في الفريق
مشكلتك شِنِي؟
أو كمان مالمشكلة ؟
فجأة حسيت بالمكائد تستفيق
والدولة بالعه الناس عميق
عاينت للزمن البغيض
وقلت بالنفس الحريق
شوف هناك
عاين قريب
وكمان بعيد
لو كان تشوف حالنا الصعيب
ياهي أحلامنا الكبيرة مؤجله
والليل طويل
عينيهو ديمه
حَمَارا حي
ومزغلله
وجاي تسأل وتستشيط
أرسلت ليو لوحة حياه
يوميه يمكن يعرفا
وقلت في شبه ابتهال
فتش عيونك يا حبيب
لو كان عيونا منمله
خليك معاي
هنا في القريب
أشجان كتيره وامثله
لو كان دي أمَّك شايله هم جنيات كتار
جواها نار
تصحى الدغش
ترجع وكت نوم الجهال
مهدوده هد
مابتقدر تلم انفاسا
أو حتى ألم رجليها تغسلا
لو كان أخوك ترك الدراسه عشان رَسْمَ الدخول
أو داك أبوك راقد مريض بعد المعاش
غالبو النزول
يصحى ويردد في الدعاء المابجيب
حبة دوا
بعد الشهاب القدمو
وحرق ايديهو
وبسمتو
وامتد في ذكراه شيب
ورينى صدقك في الأخير
ما تصحى يا لون الغبش
وافرد جناحك
كن قريب
الدولة شارده من الفقير
الدوله غايبه
الدوله سايبه
ومشغوله عنك بالحمير
يا دوله عيب
✍🏽 عبدالماجد موسى/ لندن
|
Post: #2
Title: Re: يا دوله عيب
Author: اخلاص عبدالرحمن المشرف
Date: 01-23-2021, 06:11 AM
Parent: #1
توقيع حضور
اخلاص
|
Post: #3
Title: Re: يا دوله عيب
Author: زهير عثمان حمد
Date: 01-23-2021, 06:22 AM
Parent: #2
أخ عبد الماجد
سلام
نص مميز جدا
لك مني خالص الاعجاب
|
Post: #4
Title: Re: يا دوله عيب
Author: عمر التاج
Date: 01-23-2021, 09:35 AM
Parent: #3
جميل
ومعبر
أعجبني
|
Post: #7
Title: Re: يا دوله عيب
Author: عبدالماجد موسى
Date: 01-23-2021, 11:48 AM
Parent: #4
التحية ليك يا دكتور
|
Post: #6
Title: Re: يا دوله عيب
Author: عبدالماجد موسى
Date: 01-23-2021, 11:45 AM
Parent: #3
Quote: أخ عبد الماجد
سلام
نص مميز جدا
لك مني خالص الاعجاب |
حياك الله استاذ زهير
اشكرك على هذا الشعور الجميل
|
Post: #5
Title: Re: يا دوله عيب
Author: عبدالماجد موسى
Date: 01-23-2021, 11:36 AM
Parent: #2
توقيع حضور
اخلاصQuote: توقيع حضور
اخلاص[
/QUOTE]
شرفت أستاذة اخلاص بحضورك
تسلمي يا ذوق
|
|
|