Post: #1
Title: وزارة التجارة الأمريكية رفعت القيود عن تصدير المنتجات الامريكية للسودان
Author: Osman Musa
Date: 01-15-2021, 11:30 AM
10:30 AM January, 15 2021 سودانيز اون لاين
Osman Musa-
مكتبتى
رابط مختصر
تُرحب وزارة المالية والتخطيط الاقتصادي بقرار مكتب الصناعة و الأمن بوزارة التجارة الأمريكية الصادر اليوم بتعديل لوائحها برفع القيود عن تصدير المنتجات والخدمات الأمريكية إلى السودان، بما في ذلك البرمجيات و أجهزة الكمبيوتر والاتصالات والطائرات، والذي صدر في إطار تنفيذ قرارات الولايات المتحدة بإزالة اسم السودان من قائمة الدول الراعية للإرهاب.
هذا القرار سيُزيل كافة القيود أمام التجارة والمنتجات والاستثمارات الامريكية للسودان والتي منعت قطاعات عديدة مثل الصحة والصناعة والزراعة والنقل والبنى التحتية والاتصالات من الحصول على المنتجات والتكنلوجيا وقطع الغيار الامريكية.
سيسمح هذا القرار بالاستفادة القصوى من مذكرة التفاهم المبرمة مؤخراً بين وزارة المالية والتخطيط الاقتصادي وبنك التصدير والاستيراد للولايات المتحدة لدعم تمويل الصادرات والاستثمارات الأمريكية بالسودان بقيمة مليار دولار في مجالات البنى التحتية والزراعة والطاقة والتعدين والاتصالات والرعاية الطبية.
وأكدت الدكتورة هبة محمد علي أحمد وزيرة المالية والتخطيط الاقتصادي المكلفة على أهمية هذا القرار للعلاقات الاقتصادية والتجارية بين السودان والولايات المتحدة والتي ستدعم استقرار الاقتصاد السوداني،
وأشارت الى ان هذا القرار سوف تُثمر نتائجه في مصلحة المواطن السوداني على المدى القريب.
.. الحمد لله
|
Post: #2
Title: Re: وزارة التجارة الأمريكية رفعت القيود عن تص
Author: Nasr
Date: 01-16-2021, 04:39 PM
Parent: #1
ممكن يا عثمان
أو أي واحد تاني
تدونا فكرة إنه السودان ممكن يستورد شنو من أمريكا؟؟؟؟؟؟؟؟؟؟
(حاجة كدا تكون الصين ما بتصعنها!!!!)
|
Post: #3
Title: Re: وزارة التجارة الأمريكية رفعت القيود عن تص
Author: علي عبدالوهاب عثمان
Date: 01-16-2021, 05:39 PM
Parent: #2
الاحباب الكرام والحبيب عثمان صاحب الاخبار السارة
أهم حاجة الطائرات بوينج
قالوا كمان بالاقساط المريحة
وتشغيلها سوف تجلب ارباح هائلة للوطن
فقط ما بين جدة والخرطوم
تحياتي الاحباب
|
Post: #9
Title: Re: وزارة التجارة الأمريكية رفعت القيود عن تص
Author: Osman Musa
Date: 01-16-2021, 08:52 PM
Parent: #3
الأخ أستاذ علي
سلام
مافي تاني قيود على التجارة بين بلدنا وأمريكا .
اخبار حلوة والحمد لله
|
Post: #4
Title: Re: وزارة التجارة الأمريكية رفعت القيود عن تص
Author: محمد البشرى الخضر
Date: 01-16-2021, 06:07 PM
Parent: #2
Quote: تدونا فكرة إنه السودان ممكن يستورد شنو من أمريكا؟؟؟؟؟؟؟؟؟؟
(حاجة كدا تكون الصين ما بتصعنها!!!!) |
تعرف يا نصر في الفترة بتاعة العقوبات و القائمة نشا بزنس كبير بتاع سمسرة في دبي لاستيراد المنتجات الامريكية المحظور تصديرها للسودان و اعادة تصديرها
في مجالي القريب منه في معدات وقطع غيار اكبر شركات التبريد و التكييف المركزي و العادي زي carrier, york, trane وديل اجهزتهم راكبة في أغلب عمارات الخرطوم كلها بطلبوها من دبي!
عندك المعدات الزراعية و الآليات و المولدات. ناس دال لازم يستوردوا معدات كاتربلر و قطع غيارها باستثناءات و تكلفة زيادة, زي ما قال ليك علي طائرات البوينج وقطع غيارها
كل او اغلب التطبيقات و السوفتوير لوما امريكي مدرج في البورصة الامريكية و تسري عليه القوانين, التكنلوجيا الطبية و اجهزة الفحص و التحليل و الاشعة في براندات امريكية ما سمعنا بيها في السودان لسة كتر خير سمنز الالمانية
وعلى حس سيمنز عندك اكبر شركة في العالم في مجال انتاج الكهرباء جنرال الكترك امريكية
دا غير الفرانشايز الامريكية و شركات الخدمات و الاستثمار, السودان في مجال التعدين و البترول لسه ارضه بكر و محتاجة اكتشاف و الشركات الامريكية عايزة السوق الكان مقفول عليها.
|
Post: #5
Title: Re: وزارة التجارة الأمريكية رفعت القيود عن تص
Author: Nasr
Date: 01-16-2021, 06:17 PM
Parent: #4
شكرا يا شباب علي المعلومات المفيدة
نقول نعافر وندافر نشوف لينا وكالة بتاعة حاجة صغيرونة كدا
كاتربلير أظنه عندها وكيل في السودان
ولا شنو؟
|
Post: #6
Title: Re: وزارة التجارة الأمريكية رفعت القيود عن تص
Author: محمد البشرى الخضر
Date: 01-16-2021, 06:26 PM
Parent: #5
كاتربلر وكيلها شركة التركترات السودانية التابعة لمجموعة دال
|
Post: #7
Title: Re: وزارة التجارة الأمريكية رفعت القيود عن تص
Author: Osman Musa
Date: 01-16-2021, 06:50 PM
Parent: #2
أخونا ناصر
سلام
في نيويورك بس في 250 شركة بتصنع للعالم احتياجات نادرة .
السودان محتاج للكتير منها .
|
Post: #8
Title: Re: وزارة التجارة الأمريكية رفعت القيود عن تص
Author: Nasr
Date: 01-16-2021, 06:54 PM
Parent: #7
عليك نور يا عثمان
كدي قوم كدا وفك لينا آخرك
(كما هنا في الخاص...حقك محفوظ)
|
|