Post: #1
Title: ***** تقرير عن شبكات التاثير الروسية علي مستخدمي الفيسبوك في السودان *****
Author: ABUHUSSEIN
Date: 01-10-2021, 11:22 PM
10:22 PM January, 10 2021 سودانيز اون لاين
ABUHUSSEIN-السعودية الرياض
مكتبتى
رابط مختصر
البوست ده ملخص لتقرير عن شبكات التاثير الروسية علي مستخدمي الفيسبوك في السودان ، ومختصر المختصر “ ما تصدقو اي خبر منشور في القروبات والصفحات وحاولو تتاكدو من المعلومات”.
"التاثير علي مستخدمي الفيسبوك السودانيين"
قبل اسبوعين بالتحديد في ١٥ ديسمبر ٢٠٢٠م اعلن الفيسبوك عن اكتشاف وازالة ثلاث شبكات روسية من منصته تستهدف المستخدمين في عدة دول افريقية منها السودان وليبيا ، شارك الفيسبوك التفاصيل مع مرصد جامعة ستافورد للقضايا الانتزنت Stanford Internet Observatory وقام المرصد بنشر تقرير عن هذه الشبكات ، البوست ده ملخص للشبكات الروسية التي كانت تعمل للتاثير علي السودانيين في الفيسبوك وومكن غيرها يعمل الان ( رابط التقرير في نهاية البوست).
في ديسمبر 2020 ، الفيسبوك ازال 126 صفحة و 16 مجموعة و 211 ملفًا شخصيًا و17 حسابًا على إنستغرام تابعة لأفراد لديهم روابط مع وكالة أبحاث الإنترنت (IRA) الروسية ، وهي جهة مرتبطة برجل الأعمال الروسي يفغيني بريغوزين.، اللي لقبه (طباخ بوتين) واسمه مرتبط بشركة فاغنر اللي سمعنا عن نشاطها في السودان وليبيا.
دي ما المرة الاولي الفيسبوك يكتشف شبكات روسية هدفها التاثير واستهداف السودانيين في ٢٠١٩م تمت ازالة ٨ صفحات استهدفت السودانيين وكانت مواضيعها تركز حول مفاوضات السلام السودانية ، والصفحات والقروبات دي بتظهر بشكل صفحات للاخبار بالإضافة الي صفحات مفبركة تظهر كصفحات رسمية للحكومة السودانية ، يعني مثلا صفحة تكون لوزير او مسوؤل وهي في الاصل صفحة مفبركة .
الغريب انه القروبات والصفحات اللي ازالها الفسيبوك قبل اسبوعين من ضمنها صفحات تدعي انها قروبات للترفيه او مواضيع عامة زي صفحة “فكرة كوم” او”مجلة المراة” ،اضافة الي الصفحات الاخبارية ، الصفحات التي تم اكتشافها وحذفها هي:
- حوادث وكوارث
- فكرة كوم
- المرصد السوداني
- المراسل
- مجلة المرأة
- أخبار سوق عكاظ
- الكادحين و غلابه
- تطورات اقتصادية
صفحتين كانت تتم ادارتها مباشرة من روسيا ومن داخل السودان وهما صفحتي “حوادث وكوارث” و “فكرة كوم”، ٣ صفحات تم ادارتها من المغرب وصفحتين من مصر والعراق ، لتفاصيل الصفحات ( عدد المتابعين وموقع الادارة راجع الصورة المرفقة من التقرير).
ركزت الصفحات علي المواضيع التالية لمتابعيها السودانيين :
١) الوضع الاقتصادي في السودان
كان الموضوع المشترك عبر العديد من الصفحات هو استمرار ازمة الاقتصاد السوداني وهي أزمة فاقمها ارتفاع معدلات التضخم والديون الضخمة المتراكمة في ظل نظام المخلوع البشير. العديد من أعلى المشاركات في الصفحات تركز علي أبرز تدهور الأوضاع الاقتصادية في السودان.
٢) نشاط التعدين الروسي في السودان
السودان هو ثالث أكبر منتج للذهب في إفريقيا. وقع الرئيس المخلوع عمر البشير اتفاقًا مع الرئيس بوتين يضمن تزويد روسيا للحكومة بالسلاح والمتعاقدين العسكريين الخاصين ، بالإضافة إلى التوسع في مشاريع التعدين الروسية. كان التعدين موضوعًا بارزًا بين الصفحات التي تمت ازالتها ، عدد من المشاركات كان هدفها اثارة الشكوك حول الأنشطة الإدارية لوزارة الطاقة و التعدين ، لكن قصصًا أخرى شاركت أخبارًا إيجابية عن الوزارة مثل فتح قطاع التعدين أمام الاستثمار الدولي ، وتمت عرض مشاركة عن مساعدات طبية قدمتها شركة Niro Gold الروسية لمكافحة الكوفيد في السودان.
٣) انشاء القاعدة البحرية الروسية في السودان
في ديسمبر 2020 ، وقعت روسيا اتفاقًا مع السودان لإنشاء قاعدة بحرية في بورتسودان على البحر الأحمر ( تم الاتفاق في عهد الرئيس المخلوع ) وستستمر هذه الاتفاقية لمدة 25 عامًا ويمكن أن يتم تمديدها لعقد إضافي. في مقابل الحصول على إذن لبناء و تشغيل القاعدة البحرية وافقت روسيا على تقديم الدعم العسكري للسودان. محتوي الصفحات كان يشيد بالاتفاقية ويعرض قصص او روابط لمواقع والصفحات اخري وقنوات Telegram تناقش أهمية هذه الاتفاقية للقوة العسكرية السودانية.
٤) دعم “قوات الدعم السريع”
اشادت الصفحات المزالة بقوات الدعم السريع وكتبت بوستات عن جهودها في إرساء السلام والأمن في السودان خلال الفترة الانتقالية - مثل استيلاء قادة قوات الدعم السريع على أسلحة غير مشروعة والاستيلاء عليها من المجرمين.
رابط التقرير الكامل هنا: https://cyber.fsi.stanford.edu/io/news/africa-takedown-december-2020
منقول من صفحة محمد البشير على الفيس بوك
https://m.facebook.com/story.php؟story_fbid=10157834918265835andid=673575834https://m.facebook.com/story.php؟story_fbid=10157834918265835andid=673575834
|
Post: #2
Title: Re: ***** تقرير عن شبكات التاثير الروسية علي مست
Author: صديق مهدى على
Date: 01-11-2021, 02:56 AM
Parent: #1
كمان
|
Post: #3
Title: Re: ***** تقرير عن شبكات التاثير الروسية علي مست
Author: HAIDER ALZAIN
Date: 01-11-2021, 07:07 AM
Parent: #2
التقريـر دا كان مفروض يختم بـ مع الإهداء لعمـر التـاج وشللوخا هولمز.،
غثانا غث باللفح والغرف الإنتقائي ؛)
دا من ناحيـة ..
من ناحية تانية التقرير قاصر إذ لم يحتوي على تصنيف لقيقراوي اللي هو الآخـر حشانا حشَ بإختراع الاسماء وطلبات الصداقة 
مع التحية لجوز اللوز الفوق دا مفترع وضيف البوست لإثراءهم النقاش ..
|
Post: #4
Title: Re: ***** تقرير عن شبكات التاثير الروسية علي مست
Author: نعمات عماد
Date: 01-11-2021, 07:56 AM
Parent: #3
Quote:
غثانا غث باللفح والغرف الإنتقائي ؛) |
😊😊😊
عدد من البوستات أتفتحت في المنبر عن المواقع و الصفحات الإخبارية المشبوهة.
سلام ابوحسين و ضيوفك.
|
Post: #5
Title: Re: ***** تقرير عن شبكات التاثير الروسية علي مست
Author: Nasser Amin
Date: 01-11-2021, 11:19 AM
Parent: #4
سلامات ابو حسين
الخم بالكوم... و اليوتيوب مليان بالقنوات المضروبة
Quote:
أكثر من ثلاثين موقعاً إخبارياً مشبوهاً تقف وراءها جهات مشبوهة في
الداخل والخارج ظهرت فجأة بعد الثورة وتكاثرت كالفطر تعمل في
التأثير على الرأي العام وسوقه نحو اتجاهات مشبوهة ، وتنتشر
روابطها في وسائل التواصل الاجتماعي كمصادر إخبارية محايدة
وهي في الواقع تنشر الشائعات وتزيف الحقائق وتخلط السم في الدسم،
نذكر منها ما يلي حتى يكون القارئ منها على حذر:
1. النورس نيوز
2. ترياق نيوز
3. كوش نيوز
4. باج نيوز
5. ميرور نيوز
6. السودان نيوز
7. بل نيوز
8. خبطة نيوز
9. نادوس نيوز
10. عاجل نيوز
11. نبض نيوز
12. فوكس نيوز
13. سري للغاية نيوز
14. الإخبارية نيوز
15. سودانية نيوز
16. الرنين الأزرق نيوز
17. كفاح نيوز
18. سودان لايف نيوز
19. برشلونة نيوز
20. باكر نيوز
21. خرطوم نيوز
22. الحاكم نيوز
23. الحرية نيوز
24. الخوارزم نيوز
25. البيان نيوز
26. السوداني نيوز
27. سكاي سودان
28. أم بدة نيوز
29. المجرة برس
30. سودافاكس
31. صحافتي
32. سودانيزهوم
|
|
Post: #6
Title: Re: ***** تقرير عن شبكات التاثير الروسية علي مست
Author: ABUHUSSEIN
Date: 01-11-2021, 03:17 PM
Parent: #5
عاذرك ......
|
Post: #7
Title: Re: ***** تقرير عن شبكات التاثير الروسية علي مست
Author: ABUHUSSEIN
Date: 01-11-2021, 03:20 PM
Parent: #6
Quote: مع التحية لجوز اللوز الفوق دا مفترع وضيف البوست لإثراءهم النقاش ..
|
إثراء البوست بي "كمان" ..؟؟؟؟ 😂😂😂
|
Post: #8
Title: Re: ***** تقرير عن شبكات التاثير الروسية علي مست
Author: ABUHUSSEIN
Date: 01-11-2021, 03:29 PM
Parent: #7
Quote: عدد من البوستات أتفتحت في المنبر عن المواقع و الصفحات الإخبارية المشبوهة.
سلام ابوحسين و ضيوفك. |
و عليكم السلام دكتورة نعمات
الشغلانية ما ساهلة و ما مفروض نتجاهلها او نستسهلها لانو بتقوم بي دور خبيث و مؤثر جدا
تحياتي
|
Post: #9
Title: Re: ***** تقرير عن شبكات التاثير الروسية علي مست
Author: ABUHUSSEIN
Date: 01-11-2021, 05:38 PM
Parent: #8
Quote: سلامات ابو حسين
الخم بالكوم... و اليوتيوب مليان بالقنوات المضروبة |
و عليكم السلام حبيبنا ناصر
و دا كلو بي اموال الشعب المسكين
غايتو مصيبتنا كبيرة شديد بحاربو فينا بي اموالنا ....
|
Post: #10
Title: Re: ***** تقرير عن شبكات التاثير الروسية علي مست
Author: ABUHUSSEIN
Date: 01-11-2021, 05:59 PM
Parent: #9
عن نفس الموضوع كتب اخونا مبارك على صفحته في الفيس :-
عشرٌ كاملة: بمناسبة الكشف عن شبكات روسية للتأثير على مستخدمي الفيسبوك في السودان في مواضيع الرأي العام:
هات فشارك، الموضوع حيلف راسك يا الموجود في الفيسبوك!
١. اطّلعت قبل شوية على مقال بيتكلم وبتفصيل على اكتشاف الفيسبوك ٣ منصات روسية على منصته بتستهدف المستخدمين في دول أفريقية معينة (ومنها السودان) وإزالته للشبكات دي. وهي صفحات مرات بتتم إدارتها من روسيا، ومن السودان، وصفحات بتتم إدارتها من مصر والعراق والمغرب
حأترك ليكم رابط المقال في أول تعليق
٢. الموضوع ده ما كان مفاجئ لي، وأنا العارف انو شركة كامبريدج أنالتيكا البريطانية، اللي ساعدت في اختراق الفيس أيام الانتخابات الأمريكية العام ٢٠١٦ ، وساعدت في التأثير على البريطانيين للتصويت على الخروج من الإتحاد الأوروبي، كان عندها برضو نشاط في السودان "الكلام ده قبل سقوط المخلوع البشير"
بس الشمار الحارقني كان: يا ربي حيسوقوا السودانيين في أيتو مواضيع في السوشيال ميديا؟
٣. ومن السهل في القضايا الدينية والأخلاقية في المجتمعات المحافظة انك تسوق الناس فيها وتخليهم يعتبروها مسألة حياة أو موت "وحصلت كتير في التاريخ القريب مع دولنا دي، ابتداء من استخدام المجاهدين العرب من قِبل أميركا لتصفية السوفييت"
دا لو ما خليت المجتمع كله يضرب في بعضه وينسوك يا اللي في السلطة وينسوا القضية الأساسية
ودا طبعا الأسلوب المفضل استخباراتيا، أو حتى من الحاكم للبلد، عشان يغيّر قناعة (شعب كامل) ..
٤. في زمن السوشيال ميديا، الحكاية بقت أسهل بكتير، ويكفيك انو روسيا وبشوية شغل استخباراتي، استخدمت الفيسبوك وخلّت ترامب يفوز في انتخابات (أمريكا) قبل ٤ سنين!
أعظم دولة في العالم تم توجيه (أو تحييد) ناخبيها، بالفيسبوك!
خليك من السودان دا يعني!!
٥. لاحظوا معاي كل ما تظهر قضية ممكن تهيّج الرأي العام على ناس معينين "المعجا مثلا" .. زي قضية قتل الشهيد بهاء، مباشرة معاها بيتم إثارة قضية خلافية ليها علاقة بالدين، إسلامية علمانية، أو قضايا أخلاقية يعني (وتتربط مباشرة بالوضع المعيشي)
ركزوا فيها حبتين كدا .. وحتلقوها نمط متكرر
ودي بعتبرها نوع من "توجيه الرأي العام" في السوشيال ميديا، من جهة معينة، بعيداً عن الملفات العندها علاقة بالسلطة ومن فيها وحلفائهم وملفاتهم الحساسة المخفية!
٦. والغباء المستحكم في بعض مَن في السلطة الآن، بيساعد وبسهولة في جهود "توجيه" الرأي العام بعيداً عن القضية الأساسية.
الغباء اللي بيخليك تقع في فخ الخلاف الإسلامي/علماني وينسّيك قضايا كتيرة بإمكانك تجمع فيها كل السودانيين باختلاف مشاربهم حولك وحول البلد ككل!
٧. انت ك حكومة، حدد وبوضوح أهداف ما بتثير المجتمع ضد بعضه، وحاول نفذها في الفترة الإنتقالية، بمشاركة المجتمع ده ومكاشفته بالواقع كما هو.
واعمل حسابك يا الفي الحكومة لو لسة جاهل بعوالم السوشيال ميديا والذكاء الإصطناعي والإختراق (zero click)، إنو في شبكات استخباراتية عندها أجندة غير أجندتك الشغال عليها، اعرف كيف تواجهم وكيف تكسب غالب الرأي العام لصفك "في فترتك الإنتقالية الحالية"
وأي زول فيك يا حكومة بيثير الإنقسام في الرأي العام؛ شيله!
٨. أجيبها ليك بوضوح وتصدقني فيها يا صديقي الفيسبوكي؟
انت زاتك في الفيسبوك ده ممكن يسوقوك ناس معينة في نقاش عن أمرٍ محدد راسمينه سلفاً، عشان تساعد في تكوين (تريند) يبعد الكل من موضوع خطير هم ما عاوزينك تفكر فيه!!
٩. وبصراحة، ما قادر أصفي النية في بوست فارس النور (بمنصبه كمستشار لقائد الدعم السريع) عن إزالة القراي، في الوقت اللي ثارت فيه قضية مقتل بهاء في مركز اعتقال استخبارات الدعم السريع
لكن النتيجة جات عكسية عليهم، في التعليقات!
#من_قتل_بهاء؟ :)
١٠. أختم يا عزيزي
مهم جدا وانت بتتصفح الفيسبوك انك تكون محتفظ بتركيزك، ما تنساق كتير وراء التريند، وما تصدق أي خبر يتقال حتى لو كان ضد قحت والمعجا والكيزان وعبد الحي يوسف زاتو، ما تصدق يرحم أبو أهلك واعرف كيف تتحقق من المعلومة!
اختر معاركك بعناية، إن أردت أن تكون محارباً، ولا يغرنك كثرة المتحدثين عن أمرٍ ما فيجعلك تعتقد بصوابيته، لكثرة من تحدث عنه
وإن أردت نصيحتي، فلا تأخذ الحياة الإفتراضية بمجملها على محمل الجد، ارفع رأسك للحياة؛ اضحك وتابع الأنيمي واصرخ بلا سبب واسترخ واكتب قصائدك الرومانسية لحبيبتك، وافعل ما تريد
وقبل ما أودعك؛ بقترح عليك تحضر وثائقيين عشان تقع ليك:
1. The Great Hack
2. The Social Dillema
و #هاك_فشار بالكراميل.. لو وصلت للنهاية يا عزيزي!
تلك عشرٌ كاملة ❤
تصبح على خير
Mubarak JA
https://m.facebook.com/story.php؟story_fbid=10221003232204096andid=1040736213https://m.facebook.com/story.php؟story_fbid=10221003232204096andid=1040736213
|
Post: #11
Title: Re: ***** تقرير عن شبكات التاثير الروسية علي مست
Author: HAIDER ALZAIN
Date: 02-28-2021, 01:07 PM
Parent: #10
فوق
|
Post: #12
Title: Re: ***** تقرير عن شبكات التاثير الروسية علي مست
Author: MOHAMMED ELSHEIKH
Date: 02-28-2021, 05:11 PM
Parent: #11
هسي انا حسابي في الفيس كان هكروه ولا سجمو
طعمو شنو؟
|
Post: #13
Title: Re: ***** تقرير عن شبكات التاثير الروسية علي مست
Author: HAIDER ALZAIN
Date: 05-10-2021, 09:19 AM
Parent: #12
وتاني فوق
|
|