Post: #1
Title: القهوة بكم في ستاربكس ؟
Author: عبدالحفيظ ابوسن
Date: 01-03-2021, 06:21 AM
Parent: #0
05:21 AM January, 02 2021 سودانيز اون لاين
عبدالحفيظ ابوسن-no where
مكتبتى
رابط مختصر
الزوج قال
هو يهتم بالقضايا الكبرى . زي الاحتباس الحراري العالمي وقضايا القومية العالمية . وتمدد النفوذ الامريكي والصيني العالمي
ولكن زوجته تهتم بصغائر الامور
كيف يأكلون
ماذا يلبسون
كيف يربون اولادهم وهكذا 😅😅
|
Post: #2
Title: Re: القهوة بكم في ستاربكس ؟
Author: عبدالحفيظ ابوسن
Date: 01-03-2021, 06:24 AM
Parent: #1
نحن عايشين في نعيم
قالوا فنجان الجبنة في ستاربكس بي عشرة دولار مايعادل 2500 ج سوداني
وعندنا بي 30 ج في القهاوى وعند ستات الشاي ب 50 ج
|
Post: #3
Title: Re: القهوة بكم في ستاربكس ؟
Author: عبدالحفيظ ابوسن
Date: 01-03-2021, 06:58 AM
Parent: #2
تعود المغتربون بشكل لا ارادي بمقارنة الاسعار ببلد اغترابهم
وهو سلوك طبيعي ولكنه لا يخضع سوى لقيمة النقود المجردة
شوال السكر عشرة كيلو ب1500 ج . طوالي شغل الالة الحاسبة الداخلية . عندنا هناك بي كذا ريال سعر الريال بي كدة والله انتو ارخص مننا كتير
ولا مشى اكل سمك في البحر حاسبوه بي ألف ج طوالي حسبها ولقانا ارخص
دة كلو مقبول من مواطن بجي زيارة 3 اسابيع وبسافر قبل يقبض ماهيتو الجديدة ولا تنتهي قروشو
لكن الكارثة انو يكون عقلية زول حاكم
بذات ذهنية الاغتراب ويجي يحكم ويقرر . لانو لسة آلتو الحاسبة مبرمجة علي بلد اغترابو
|
Post: #4
Title: Re: القهوة بكم في ستاربكس ؟
Author: محمد المسلمي
Date: 01-03-2021, 07:30 AM
Parent: #1
Quote: نحن عايشين في نعيم
قالوا فنجان الجبنة في ستاربكس بي عشرة دولار مايعادل 2500 ج سوداني
وعندنا بي 30 ج في القهاوى وعند ستات الشاي ب 50 ج |
المفروض هو يشوف مستوي دخل الفرد في امريكا كم ويقارن بمستوي الدخل حقنا ويشوف الحكومة هناك بتقدم خدمات للمواطن قدر شنو. ويقارن حكومته هنا ..وبعدين الدولار وغيره من العملات في دولها لاتقارن بدول اخري ..اها العيشة الواحدة في كوريا سعرها يعادل 2 دولار ويعتبر اكل العيش دخيل علي المجتمع اها هل تقارن بالعيشة بتاعت ال 10 جنيه ولو تمت المقارنة بتاعت ال 2 دولار تساوي 5 رغيفات من حقنا المهم علي الحكومة ان تحارب البطالة وتوقف التضخم وانهيار الاقتصاد
———-
سندوتش الشاورما في البيت السوري بحري 400جنيه 😡سالته ليه الغلاء دي قال لي الدولار بكم ..رديت عليه انت هنا في. دولة اسمها السودان العملة حقتها اسمها الجنيه وقاعد تشتري الدجاج انت بالجنيه والرغيف بالجنيه والسلطة بالجنيه والغاز بالجنيه مافي سبب يخليك تقارن ..فبهت السوري 😡😡يجب ان تكون في لجنة لمراقبة الاسعار وضبط السوق السندوتش ده بكلف كم العيشة + الفراخ +الغاز لايمكن يكلف 100 جنيه ..الباقي ده جشع لاغير
|
Post: #5
Title: Re: القهوة بكم في ستاربكس ؟
Author: عبدالحفيظ ابوسن
Date: 01-03-2021, 07:36 AM
صدقت يا مسلمى
دى فوضى ماحصلت
سمكنا الجوة بحرنا رابطنو بالدولار
مافي رقابة لا ضبط لا ربط
بالمناسبة في طبيب تذكرتو بي 5 مليون للمقابلة ما عارف حسب الدولار حقو كيف
|
Post: #6
Title: Re: القهوة بكم في ستاربكس ؟
Author: حسن ادم محمد العالم
Date: 01-03-2021, 08:12 AM
Parent: #5
ود ابوسن تحياتي يا جميل وكل سنة وانت بخير
انسي عقلية المغترب وبؤس النخب الحاكمة
وشوف توكيل استاربكس في كوستي مع عودة الامريكان
وكلو بالدولار وتسقط بس
|
Post: #7
Title: Re: القهوة بكم في ستاربكس ؟
Author: امتثال عبدالله
Date: 01-03-2021, 08:25 AM
Parent: #5
ود ابو سن
تعليقك في السطر الاخير:-"لكن الكارثة انو عقلية زول حاكم بذات ذهنية اغتراب
وجاي يحكم ويقرر......... ""
تعليق اوسكار بدون شك..
ولذلك انا ضد تعيين واحد عايش حياته كلها مغترب او مهاجر في منصب وزاري ليه
علاقة بتسعيرة المواد الاساسية ....لانه دائما حيشوف الاسعار رخيصة لانه عقليته
المبرمجة في دولته الكان هو مقيم فيها لسع ما انفكت منه،،وما فضل ليهو الا يقول: "
الناس دي جنت ولا شنو ...ما لهم بيكوركو عيش مافي ..رغيف مافي ...ما ياكلوا كيك وجاتوه،،
زي ما قالت امبراطورة فرنسا انطوانيت للشعب الفرنسي، واغضبت الفرنسيين واشعلوا اعظم
ثورة في العالم...
|
Post: #8
Title: Re: القهوة بكم في ستاربكس ؟
Author: Abureesh
Date: 01-03-2021, 10:12 AM
Parent: #7
كرونا حرمنا من ستاربكس تايمس سكوير.. قبالة كشك تذاكر برودواى. وبالمناسبة الفنجان بدولارين ونصف فقط ما 10 دولار. (الحد الأدنى للأجور للعمالة غير الماهرة 15 دولار فى الساعة) أى 120 دولار فى اليوم.
الأيام الأولى من زيارتى للسودان بعد عقود، كنت أدفع لسواق الركشة قريب من ضعف ما يطلبه.. بعدين شوية شوية نقصتها وفى الأيام الأخيرة بقيت أفاصله!!!
|
Post: #9
Title: Re: القهوة بكم في ستاربكس ؟
Author: عزالدين عباس الفحل
Date: 01-03-2021, 10:41 AM
Parent: #8
الأخ الفاضل Abureesh
عندما يجيء الإمارات ،
أهاتفه عبر الهاتف الخلوي :-
- أها ي أبوالريش نتقابل وين ؟
يرد علي ع سرعة الريح
- تعال لي ف Starbucks Coffee
ستاربكس شارع حمدان ، ابوظبي ،
،،،،،،
عزالدين عباس الفحل
ابوظبي
|
Post: #10
Title: Re: القهوة بكم في ستاربكس ؟
Author: Hafiz Bashir
Date: 01-03-2021, 11:24 AM
Parent: #9
يا أبو سن ام العروس منزعجة جداً وتورجغ ورجغة هستيرية "الضيوف ما أكلوا والأكل ما كفا والناس ديل جعانين ما أكلو ورجغ ورجغ ورجغ"
واحدة من النسوان جابت ليها صحن مدنكل وحلفت على أم العروس تقعد تاكل معاها. أم العروس ضربت ولبعت الصحن بمزاج وقالت "الحمد لله الضيوف كلهم أكلوا وشبعوا"
دا حال وزراءنا، قبل التوزير ثائر ومتظاهر يردد هتافات "سقطت بس حكومة الذل.. سقطت بس حكومة الجوع" و "يا بوليس ماهيتك كم، رطل السكر بقى بكم "
بعد التوزير يقول ليك كيلو السكر بأقل من دولار وأرخص من أي بلد تاني.
|
Post: #11
Title: Re: القهوة بكم في ستاربكس ؟
Author: محمد أبوالعزائم أبوالريش
Date: 01-03-2021, 11:54 AM
Parent: #10
سلام عبدالحفيظ،
السمك في بحرو مافي سبب يتحسب بالدولار ... وكل المنتجات المحلية.
لكن في سلع (الوقود مثلاً) مربوط بالسعر العالمي ... عشان يكون في متناول المواطن البسيط، مطلوب من الدولة تدعمو ... ورغم إنه ده فعلاً حاصل، لكن برضو أكتر من مقدرة المواطن .... الحل شنو؟
|
Post: #12
Title: Re: القهوة بكم في ستاربكس ؟
Author: عبدالحفيظ ابوسن
Date: 01-03-2021, 03:29 PM
Parent: #11
يا حسن انا داير ناس هوليوود . اعمل لي مكتب اكتشاف نجوم وبي سعر السودان بكونو ارخص
ستاربكس مافي ليها سكة بتكون خاشة مع الجماعة في الاتفاقيات التحت التربيزة
|
Post: #13
Title: Re: القهوة بكم في ستاربكس ؟
Author: Abureesh
Date: 01-03-2021, 03:51 PM
Parent: #12
| Quote: ستاربكس شارع حمدان ، ابوظبي |
يا سلام عليك يا عزالدين، ذكرتنى ستاربكس شارع حمدان. كانت مكتبى الرسمى.. للترابيز شبه الخاصة والإنترنت السريع المجانى.. الخصوصية مثلها ما عندنا هنا.
هل ستاربكس عندكم فتحت للجلوس واللا شيل وإتخارج؟ غايتو الكرونا ما عمل فينا معروف أبداً
|
Post: #14
Title: Re: القهوة بكم في ستاربكس ؟
Author: عزالدين عباس الفحل
Date: 01-03-2021, 04:20 PM
Parent: #13
سلاااااام صديقي العزيز ابو الريش
Starbucks Coffee
الجودة والإتقان والخدمة الرفيعة
بمتعة الراحة والإنترنت المجاني.
بصدق ي ابو الريش.
كلما ممرت بالسيارة بشارع حمدان
وعند ستاربكس
اذكر ذاك الوجه الصبوح
والمشرق الباسم
ابو الريش
عزالدين عباس الفحل
ابوظبي
|
Post: #15
Title: Re: القهوة بكم في ستاربكس ؟
Author: عبدالحفيظ ابوسن
Date: 01-03-2021, 08:57 PM
Parent: #14
مرحب امتثال
مش كدة
يفترض كان يختارو الناس اللصيقين بالواقع وبعرفو المزاج العام
|
Post: #16
Title: Re: القهوة بكم في ستاربكس ؟
Author: النذير حجازي
Date: 01-03-2021, 09:26 PM
Parent: #15
سلام يا شيخ العرب أب سن،
يا أبو الريش، حليلك ستاربكس زادوها وبقت $2.92
وفي السعودية أغلى وصلت 16 ريال
|
Post: #17
Title: Re: القهوة بكم في ستاربكس ؟
Author: Mahjob Abdalla
Date: 01-03-2021, 09:33 PM
Parent: #15
| Quote: يفترض كان يختارو الناس اللصيقين بالواقع وبعرفو المزاج العام |
سلام عبدالحفيظ و ضيوفك.
برضو من الاشياء الكتبتها عنها في ايام التعيينات و الخم الكتير الكان حاصل, انو التركيز يكون علي ناس الداخل.صحيح اغلب ناس الداخل طالتهم ايادى الانقاذ عطاءا او حرمانا و لكن بقي الصامدون (القلة).
ناس عاشو في الخارج 25 سنة او اكثر و هرولو نحو الداخل لخطف ثمار الثورة و هو ما حدث و الان بانت حقيقتهم و بانت لكم انتم ناس الداخل حقيقتهم و لكن بعد الساعة 12 و هذا افضل قليلا من الساعة 25.
|
Post: #18
Title: Re: القهوة بكم في ستاربكس ؟
Author: عبدالحفيظ ابوسن
Date: 01-04-2021, 01:07 AM
Parent: #17
مرحب ابوالريش والنزير وحجازي
النصيبة دي انا زاتي مابعرفها واكيد ماشفتها ومااظني شفتها
لكن بسمع بيها
نحن قوم غاية شهوتنا في متعة الشراب . نشرب جبنة مع الصحاب في منزل صاحب ونستمتع بالونسة اكتر من طعم الجبنة السوداء لافيها رغوة ولاطعم نعجز عن ادراكه
غايتو انتو عايشين في نعيم يوجب الشكر والاستغفار
|
Post: #19
Title: Re: القهوة بكم في ستاربكس ؟
Author: عبدالحفيظ ابوسن
Date: 01-04-2021, 01:14 AM
Parent: #18
نحن يامحجوب اخوى ركب فينا عود عشر . لو قمنا انكسر ولو قعدنا انحشر
قالو ما جوا عشان الرغيف كقول مدني . ومنو داك قال بتاعين فيس بوك قرب يقول شذاذ آفاق وكتلة حرجة ولا طاقة مابعرفها
غايتو ذكروني الكيزان القالوا ما جو عشان الدنيا جو يسوقنا للاخرة والحديث عن الغلاء كفر
اها ديل جو وعملو الكنا رافضنو من زمن نميري . انفاذ مقررات صندوق النقد الدولة ونادي باريس وساقونا لقمة سائغة لي وين كدة ماعارف
الغاز معدوم اشترينا مواقد كهربا زادو سعر الكهربا
|
Post: #20
Title: Re: القهوة بكم في ستاربكس ؟
Author: Asim Ali
Date: 01-04-2021, 02:06 AM
Parent: #19
سلام عليكم ابسن وضيوفو
حكام جونا من برا يحاكمونا بمعايير البلاد الكانو فيها والعالم الاول بعيدين تماما عن تفاصيل الواقع وتعقيداتو ناهيك عن واقع اهم ان انسان الداخل مقاتل يعرف النظام القديم واخبر بالتعامل معاهو واكثر قدره على التعامل معهم
Quote:
الغاز معدوم اشترينا مواقد كهربا زادو سعر الكهربا
|
سامع اشاعه تحت تحت قالو الغازذاتوو زاد وحيبقى بين 600 -750 ماعارف صحى ولا كلام واتساب ساى
|
Post: #21
Title: Re: القهوة بكم في ستاربكس ؟
Author: عبدالحفيظ ابوسن
Date: 01-04-2021, 02:57 AM
Parent: #20
ماتستبعد عاصم
كلو جايز
تزداد الحياة قسوة مابعدها قسوة
الناس عايشة وبتباصر في حياتها
الشغل كلو في الشعب مافي مشاريع انتاجية واحدة ماشة ولا نقاش حولها ولا خطط
ولا كلام حول الزراعة والانتاج زاتو
|
|