د. القراي: بعض ما جآء في مؤتمر المناهج بمنبر سونا (اليوم الثلاثاء ٢٩ ديسمبر ٢٠٢٠)

05:26 PM December, 29 2020

سودانيز اون لاين
عبدالله عثمان-
مكتبتى
رابط مختصر

أبرز ما جاء في المؤتمر الصحفي لدكتور القراي مدير المناهج

👇👇👇


انا كنت حريص على هذا المؤتمر الصحفي حتى نبين للرأي العام


هناك حملة منظمة تقودها بعض الجهات

القصة حول كتاب التاريخ للصف السادس هناك صورة وردت مرتبطة بعصر النهضة في أوربا مع عدد من من اللوحات ((تم عرض الصور))

الصور الموجودة في الكتاب ليس عليها كتابة حتى تبين من الشخصيات المنشورة

هناك بتر وتشويه و لصق للصورة المعنية بالهجمة

هناك صورة خليعة تم نشرها ليس لها علاقة بالصور الموجودة بالكتاب وكان القصد منها تشويه السمعة والاستهداف

مثل هذه الصور سبق أن نشرت في عدد من المناهج السودانية


سألت الأستاذ المختص بتدريس الفنون في جامعة أم درمان الإسلامية وأكد لي بأن
هناك صورة أكثر إثارة يتم تدريسها ولم يهتم بها أحد

الطيب مصطفى تحدث عن صورة لم تكن منشورة بالكتاب


سألت لجنة المناهج ببخت الرضا حول ما أثير من تساؤلات عبر خطاب رسمي وقاموا بالرد كتابة
دكتور مجدي ودكتور الرفاعي ملخص الخطابات يؤكد بأن القراي ليس له علاقة بالصورة و التعديلات التي تمت

دكتور محمد صالح أدلى بمعلومات غير صحيحة وسوف تتم محسابته


مجمع الفقه الإسلامي قال بأن حديث الجنة تحت أقدام الأمهات حديث ضعيف يجب حذفه

مجمع الفقه الإسلامي قال إن حديث النظافة من الإيمان حديث ضعيف يجب حذفه

مجمع الفقه الإسلامي رفض وضع أحاديث مكارم الأخلاق للصف السادس بعدد أكبر

مجمع الفقه طالب بأن يكون الحفظ أكثر من الفهم وهنا اختلفنا معهم


مجمع الفقه قال بأن عدد السور القرآنية قليل ويجب أن يكون أكثر


استخدمنا بعض الأسماء لرمزية السودان وتنوعه وتم الاعتراض عليها وطالبوا باستخدام أحمد ومحمد


الجهة المسؤولة عن وضع المناهج هي إدارة المناهج فقط وليس أي جهة أخرى

دكتور حمدان ابوعنجة وبعض الأساتذة تم نقلهم من بخت الرضا مركز المناهج إلى الخرطوم و حمدان قال بأنه تم استهدافه لأنه إسلامي وقال بان القراي ابعد كل الإسلاميين


لجان المقاومة في مدينة الدويم طالبت بنقل بعض الأشخاص لأنهم مؤتمر وطني وقلت لهم بأن هذا عمل لجنة إزالة التمكين وليس من مهامي

حمدان ابوعنجة تم نقله لضعف كفاءته المهنية و الأخلاقية والدليل كتاب لغة انجليزية لمدارس تاج الحافظين قام بتأليفه

حمدان ابوعنجة كان يأخذ أموال من البرتش كانسل بصورة غير رسمية و المسؤولة أكدت لي بأنه طلب أموال بالساعة

انا لا دخل لي في اي تعديل أو إضافة

حمدان ابوعنجة ظل يردد انه إسلامي يعني كوز


الحملة يقودها فلول النظام البائد

احد الذين طالبوا بالعمل التحريضي كان يعمل في مكتب الترابي


دكتور عبد المحمود (كوز) و وزير تربية سابق يقود حملة التوقيعات وهو ساقط اكاديمين و ساقط شهادة سودانية حسب قرار لجنة إزالة التمكين وحاصل على شهادة جامعية من جامعة أم درمان الإسلامية

الكيزان يحلمون بالعودة إلى الحكم وهذا حلم

الحكم على المناهج الجديدة هو بداية العام الدراسي و اطلاع الجميع عليها والفرق


نسجل صوت لوم لوزير الأوقاف حتى يضع حد لممارسات بعض أئمة المساجد

التهديدات بالقتل وغيره لن يثنينا عن مواصلة جهدنا للتغيير الأكاديمي


الخرطوم / سونا

الثلاثاء 29 ديسمبر 2020

سلامات دكتور عبدالله

شكراً استاذ عبدالله عثمان وباش م ود البشرى

لوحة مايكل انجلو من اعظم اللوحات
وخيراً فعلوا بايرادها غير مكتملة
اجمل ما فيها رسم الدماغ البشري المختبئ
في الصورة .

سلام عبدالله عثمان, محمد البشرى و دكتورة اخلاص

Quote: وخيراً فعلوا بايرادها غير مكتملة

اليس كان خيرا (اكثر) ان يكون ايرادها كاملا او يكون الايراد من الاساس!

التعريف حسب الويكيبديا

Quote: It illustrates the Biblical creation narrative from the Book of Genesis in which God gives life to Adam, the first man.

هو كده يا محجوب اخوي ما ريحوهم

للتخصص زي ناس الفنون او الجامعات
و الدراسات العليا بكون عندهم براح للاستفسار
لما يكونوا مروا عليها غير مكتملة ، الكسل الذهني
عادي ، لولاحنانك القراي علي لسان
استاذ الجامعة الاسلامية واستاذ الفنون قال
التلاميذ ما سألوا ، غايتو لو ما فتشو يكونوا
بالغوا

استمعت للفيديو و عندى ملاحظتين لـ دفوعات دكتور القراى:
1. قال جاب نصف الصورة لانو الصورة الكاملة خليعة (او معنى قريب من ده). ده دفاع ضعيف في تقديرى. بقولو البرقص ما يغطى دقنو. يعنى. ما دام جبتها, جيبها كامل و اشرح مضمونها و فكرتك من وراء الصورة.
2. قال نحنا جبنا الصورة لكن ما وضعنا اى تفسير, هم (اى الناس العارضو الصورة) الفسروها علي انو (الله و ادم). الصورة ذاتها اسمها (خلق ادم), يعنى كل الناس تفسيرهم ليها واحد من دكتور القراى للناس الكتبو معارضين للصورة.

___________________
وصلتنى الصورة اول فى قروب واتساب و ما كان معاها اى تعليق.
صورة لرجل عجوز ابودقن و لابس فستان PINK , راقد علي جنب و مادى ايدو لرجل شاب ابو عضلات.
اول ما خطر في بالى انو تجسيد لحالة (شيخ من الجماعة الطيبين) جارى وراء واحد من جماعته الطيبين.

قلت في جواى, ده قروب محترم, ليه الناس بتجيب صور زى دى بدون اى اعتبارات لاعضاء القروب.

تجمعوا جميعا فى سلة البيض الفاسد واستغلالهم للمساجد لقيادة حملة لا ضد دكتور القراي وافكاره وانما ضد المناهج التى تخرج لنا شباب المستقبل لقيادة المجتمع السوداني فى كل المجالات يريدون شباب بدون تفكير للحشو والحفظ للسير فى مشروعهم الظلامي وكفى تجربة ال 30 عاما , ماهي علاقة مايسمي بمجمع الفقه الاسلامي بالمناهج والدور السلبي لوزير الشئون الدينية والاوقاف للسماح للمهوسين لقيادة حملة ضد المناهج فى المساجد مما يؤكد مشاركته فى الهوس بئس وزير الثورة , اجمل ما ذكر فى الموتمر تعرية الكيزان حمدان وعبدالمحمود , نفس الحملة التى اقالة دكتور اكرم وهاهي تكشر عن انيابها مرة اخري ضد القراي حملة ضد مجانية التعليم والصحة , لكن نثق فى وعي شعبنا وهاهو يرص صفوفه من جديد لكنزهم لكل من يقف فى حق الشعب فى حقوقه الاساسية فى حرية التعبير ومجانية الصحة والتعليم كنزهم الى مزبلة التاريخ

استمعت للتسجيل كامل, حقيقة القراي تعامل في هذا المؤتمر بعقلية اركان النقاش! وليس رجل الدولة! خاصة في تعليقه على احد الزملاء السابقين التم نقله من الادارة! صراحة كدا ما قام به اقرب لاشانة السمعة وصفه بالضعف المهني و الاخلاقي!
وتحدث عن تفاصيل لا يليق ذكرها في مؤتمر صحفي رسمي عن زميل له مهما بدر منه!

حتى ردوده في موضوع الصورة ركن للدفاع عن نفسه ضد الاتهامات التي طالته بشكل شخصي و أكثر من ذكر الادلة التي تثبت انه شخصيا ليس له علاقة بها!
انت مدير المركز يا قراي و المسؤول عن كل الموظفين و ادائهم و انتاجهم!

شخصيا استمعت للمؤتمر كاملا القراي كان فيه نجم وضع النقاط فوق الحروف وذكر عدم التدخل فى المواد من قبل اهل الاختصاص وذكر وجودهم هنا فى المؤتمر وايضا لم يدخل فى عمل التشكليين ووضح بكل شجاعة الاعتراض على بعض الملاحظات وكانت موضوعية , ام الكيزان امثال حمدان وعبدالمحود عديمى الاخلاق يجب تعريتهم ولا يرحموهم فى أى مؤتمر طالما كتبوا فى اماكن التواصل واتهامهم للقراي بنقلهم لانهم اسلاميين ومن ثم قادوا حملة التامر فى المساجد برعاية وزير الشئون الدينية والسماح لهم باستغلالهم للمنابر نفس سياسة الكيزان والمتاجرة بالدين فى المساجد لابد من الشعب ان يعرف الحقيقة وهنالك اتهام للقراي ويجب تعريتهم ليعرف الشعب اكثر اخلاق الكيزان واللعنة لهم وكل من يقف معهم

برغم قوة حجته وصلابة موقفه إلا إنه ذكر تفاصيل أكاديمية على الفضاء العام - مثل نتيجة الشهادة السوانية - لأي شخص لا يجوز
بل إذا لم يثبت ورودها في محضر منشور ممكن تدينه قضائياً

نتيجة الشهادة السودانية ذكر انو نشرت من قبل لجنة التفكيك يعني ما سر يمتلكه القراي ، جيدا تم ذكرها في المؤتمر الصحفي لكشف عبث وتدني اخلاق القائمين على امر التعليم خلال ال ٣٠ عاما والتضحية ابناء وبنات الشعب السوداني الكانو ا مسؤولين منهم الفاشلين اكاديميا والساقطين اخلاقيا

سلام للجميع

شاهدت المؤتمر الصحفي أمس. أتفق مع ما أورده كل من الزملاء الكرام محجوب عبد الله ومحمد البشرى وأحمد محمد عمر. وذلك برغم الحملة الضارية والتكفير التي يتعرض لها الأخ القراي.

التحية للاحباب ..
اي نقاش يخص الدين يكون في صالح الكيزان
لم يكن من الحكمة اثارة اشياء تثير الجدل لأن الاعلام الشعبي :
التجمعات والمساجد وغيرها .. سوف تكون مطية للكيزان
أكيد سوف يبدأ شحن والتعبئة وهذه فرصة لهؤلاء الانتهازيين
موضوع المناهج كان ممكن يؤجل قليلا حتى تستقر الامور
ومثل هذه الخطابات الساخنة المتبادلة ما بينهم لا تخدم الثورة
المنهج لم يكن من الأولويات في هذه المرحلة الصعبة

لقد لاحظت حتى الطرق الصوفية ومجمع العلماء
وغيرهم اصبح لديهم مواقف ضد بعض ما ورد في الكتب

أسهل طريقة للحشد والتعبئة هي الحماس الديني ( خطب الجمعة .. وصلوات الجماعة ... إلخ)
لدرجة البعض يستسهل الروح ..

على الحكومة ان تهديء وتتجنب مثل هذه المواضيع الحساسة جداً

تحياتي الاحباب

وين الصورة

ثم فجأة أصبح السودان كله مهموم بالمناهج
زي ماكان كل السودان مهموم بالصحة أيام أكرم
لو سألت أي واحد من الناس الشغالين في القراي صباح ومساء عن مدير المناهج السابق اسمه منو ما حيكون عارف
الناس الشغالة تنتقد كلها أحلف ما فيهم واحد عارف إنه المناهج شغالين يغيروا فيها ناس الانقاذ 30 سنة ومافي زول يوم انتبه ليها
لو أولادك ما بيقروا في مدارس سودانية ما حتعرف إنه مقرر الحاسب بتاع رابعة هو نفسه بتاع خامسة بس عاملين ليه مكياج وإنه أبواب التاريخ الفي ثانية ثانوي أغلبها بتم إعادته في تالتة وإنه طالب خامسة ابتدائي عندو 10 مواد وإنه المقرر مليان فل لكن ما فيه شرح كافي لدرجة إنه المذكرات الشارحة للمقررات اصبحت لكل الفصول ما للمتحنين بس
يعني مذكرات المريح والرائد وغيرها ما لثامنة وثالثة بس بل حتى لتالتة ورابعة ابتدائي
عادي جداً ينتهي الأمر بالقراي زي ما انتهى بي أكرم ولما يجي مدير مناهج جديد حيعمل العاوزه والناس بتنسى أي حاجة عن المناهج ومجمع الفقه يرجع ينوم تاني

استمعت لحديث القراي كاملاً

واتفق معه تماماً فى كل ماذكره ( ماعدا ايراد صورة خلق آدم لى مايكل انجلو من غير شرح وبيان )
لان الطالب فى هذه المرحلة العمرية( سادسة ابتدائية ) سوف لن يعرف شيئاً عن ماهية و الهدف من
ايراد الصورة فى المنهج .

ومن خلال متابعاتى للحملة الكيزانية الضخمة ضده منذ تعيينه وحتى اليوم اتفق مع القراي تماماً
فى كل ماقاله .

Quote: وين الصورة

الصورة عرضت في الفيديو ابتداء من الموضع 5:30 وما بعد ذلك عدة مرات.

لو كتبت "لوحة خلق آدم" في محرك البحث عن الصور ستجد الصورة الأصلية.

اول مرة على الاطلاق في حياتي احضر مؤتمر صحفي من طقطق للغلاف،
رغم الطول والعلا،
القراي فقري وشفت، وبردم براحة وبعمق، ياخ اول مرة اشوف موظف دولة متمكن من اداءة وظيفتو وبرضو بصلح ساعات،
رغم كوني معارض للحكومة دي لكن ادعم القراي بلا ادني مواربة،،
#القراي_امل_التعليم

السلام عليكم الزملاء الاعزاء
حول الحملة الضعيفة على دكتور القراي.
القراي والتيم المعاه بيشتغلوا في معالجة خراب كتييييير وعفن معتت.
هم بيرتبوا في مؤسسة دخلها قوم لا يفقهون في العلم بل يلهثون وراء المال.
ما يقدمه فريق المناهج الان هو عمل وطني صادق يهدف الى توجيه الساعات المدرسية
لوقت مفيد لتنمية عقول اولادنا (اولادنا يعني اناث وذكور).
الغرض من هذه الحملة هو التشويش وقطع الطريق على التغيير المهم الذي يجري الان والذي
من المؤكد سيفضح وعيهم المشوه المزيف. حسب خبرتي المتواضعة في حقل التدريس، اجد
ان الفرصة معنا لنستفيد من الظرف الحالي في ترتيب المناهج وتدريب المعلمين وتطوير الادارة
والجودة وتمويل البحث العلمي لتطوير التعليم لغايات وطنية طويلة المدى.
فضلآ دعونا ندعم فريق المناهج ونتجاهل هؤلاء المهاويس الذين افسدوا وضيعوا من عمرنا سنين
كتيرة وما زالوا يصرون على بعزقة المزيد.
دعونا نخطو خطوة للامام نحو تعليم بجودة ومحتوى يساهم في التقدم.
تحيا الشعوب والطغاة الى زوال.
كسرة اخيرة: التحريم حق الهي فقط، حتى الرسول صلى الله عليه وسلم لم يحرم شيء.
لكنه نهى ومنع كسلوك انساني وطبق اشياء تعتبر سنة فعلية ونتبعها. لكن كون التحريم كشيء ابدي،
اضحك لصرفه بالطريقة دي، واتعجب من جهل من يدعون المعرفة في امور التشريع والاحكام.
قال الله تعالى: " {قُلْ تَعَالَوْاْ أَتْلُ مَا حَرَّمَ رَبُّكُمْ عَلَيْكُمْ أَلاَّ تُشْرِكُواْ بِهِ شَيْئاً وَبِالْوالِدَيْنِ إِحْسَاناً وَلاَ تَقْتُلُواْ أَوْلادَكُمْ مِّنْ إمْلاقٍ نَّحْنُ نَرْزُقُكُمْ وَإِيَّاهُمْ وَلاَ تَقْرَبُواْ الْفَواحِشَ مَا ظَهَرَ مِنْهَا وَمَا بَطَنَ وَلاَ تَقْتُلُواْ النَّفْسَ الَّتِي حَرَّمَ اللَّهُ إِلاَّ بِالْحَقِّ ذلِكُمْ وَصَّاكُمْ بِهِ لَعَلَّكُمْ تَعْقِلُونَ* وَلاَ تَقْرَبُواْ مَالَ الْيَتِيمِ إِلاَّ بِالَّتِي هِيَ أَحْسَنُ حَتَّى يَبْلُغَ أَشُدَّهُ وَأَوْفُواْ الْكَيْلَ وَالْمِيزَانَ بِالْقِسْطِ لاَ نُكَلِّفُ نَفْسًا إِلاَّ وُسْعَهَا وَإِذَا قُلْتُمْ فَاعْدِلُواْ وَلَوْ كَانَ ذَا قُرْبَى وَبِعَهْدِ اللَّهِ أَوْفُواْ ذَلِكُمْ وَصَّاكُمْ بِهِ لَعَلَّكُمْ تَذَكَّرُونَ* وَأَنَّ هَـذَا صِراطِي مُسْتَقِيمًا فَاتَّبِعُوهُ وَلاَ تَتَّبِعُواْ السُّبُلَ فَتَفَرَّقَ بِكُمْ عَن سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ}(151ـ153).7

مكرر

طالما انهم يرفعون عقائرهم صراخاً هذا يدل على انّ القراي فى الطريق الصحيح
مافى ليكم مكان تانى فى الحكم يا كيزان حتى ولو تعلقتم فى من توهتم انه منقذكم الكوز جبريل ابراهيم .

Quote: ياداب سمعت تصريح القرّاي بخصوص الشهادة الثانويّة لمواطن؛ تصريح ما مسئول وما مقبول إطلاقاً؛ وانا بدعم حقّ المواطن في مقاضاته، وبشجّعه على ذلك، لأنّه أسوأ حاجة هي تعدّي الدولة على المواطنين؛ لمن زول يستغل سلطة ملايين المواطنين في مواجهة مواطن واحد؛ ياها دي قضيّة احمد الخير مع صلاح قوش، وبهاء نوري مع حميدتي، ومعمّر موسى مع صلاح منّاع؛ مظنّة إنّه الطرف المتضرّر كوز ما ح تمنعني من الوقوف معاه؛ لا يجرمنّكم شنئان قومٍ على ألّا تعدلوا؛ لو سمحت للدولة بالتعدّي على مواطن شان كوز، بكرة بفرموك انت، وما بتلقى البيقيف معاك، لأنّه ماف زول ح يسمع بيك ذاته؛ ولنذكر في هذا المقام إنّه الشهيد احمر الخير نفسه كان كوز، في حدود المعلومة العندي، وأرجو التصحيح لو انا غلطان؛ يعني هل ح ننتظر لامن يكتلوا معمّر موسى بالخازوق شان نقيف معاه؟! دي ما الحاجة الطلعنا عشانها قبل سنتين، لمن كان شعارنا "حرّيّة سلام وعدالة"! رجوعا للقرّاي، نفصّل أوجه الغلط في تصريحه، شان ما يبقى الموضوع مع ضد وكبر حلاقيم؛ (١) فيه استغلال صريح للمنصب في الحصول على وثيقة تخص مواطن، واستعمالها في غرض شخصي؛ قصّة إنّه الشهادة طلّعوها ناس لجنة تفكيك التمكين ما بتغيّر حاجة غير إنّها بتضيفهم هم ذاتم في قائمة استغلال النفوذ؛ لتقريب الفكرة، تخيّل إنّه لجنة طبيّة تعمل فحص DNA لمواطن لغرض ما، ليه أو عليه، والفحص يظهر إنّه الفرد دا ما سليل والده، هل مقبول نتيجة الفحص دي تظهر للعلن أبدا؟! (٢) فيه إمعان في التشفّي بتلاوة اسم المواطن في مؤتمر صحفي؛ ياخي في الفيسبوك دا، في صفحاتنا المحدودة دي، لمن نحكي عن ناس أساءوا لينا، بنقول "زول"، وبنمسح الاسم لمن نجيب سكرينشوت، لأنّه القصد العبرة مش أذيّة الزول التاني؛ لو هدف القرّاي يدّي فكرة فكفاية جدّا يقول فيه واحد من المعترضين على المنهج هو ذاته كان ساقط شهادة سودانيّة والخ؛ لسّة ما مقبولة، لكن على الأقل مسئولة؛ لكن تصريحه بالطريقة القالها دي فيه تشهير صريح؛ (٣) فضلاً عن استغلال السلطة في الحصول على بيانات مواطن، فيه استخدام للنفوذ الإعلامي؛ الليلة لو المواطن المذكور عنده رد مجزي على كلام القرّاي دا، ح يقدر يقوله وين؟! متاحة ليه ياتو منصّة عشان يدافع عن نفسه؟! أنا غايتو بتيح المنصّة المتواضعة اللاقيها في صفحتي دي للدفاع عنّه، وتفنيد مرافعة القرّاي، في النقاط التالية؛ لأنّه القصّة زي ما قلنا، ما نزاع بين مواطن اسمه القرّاي والمواطن المذكور، بل تغوّل الدولة على مواطن فرد؛ (٤) تعيير مواطن برسوبه في لغة أجنبيّة؛ قول ساقط انجليزي، ايه يعني؟ من هنا، ولأوّل مرّة، بحيّي الجامعة الإسلاميّة على قبولها لمواطنين دون اشتراط إجادة اللغة الانجليزيّة — إن كان دا الحاصل؛ وإلّا فبطالب يكون فيه جامعات و\أو كلّيّات بتقبل الناس بدون اشتراط لغة أجنبيّة؛ (٥) تعليق القرّاي كان انتقائي؛ ما ممكن نحصل منّه على خلاصة بشأن الكفاءة العلميّة للمواطن المذكور؛ أنا عن نفسي، ما زول تاني، في تانية ثانوي جبت في امتحان الفرنسي ٩ من ٦٠، وكنت أوّل المدرسة! القرّاي داير يفرض الفرنسي في المقرّرات، عشان خاطر الفرنسيّين ما السودانيّين؛ لو كان مسئول وكتها كان انا لي حسّة أكون قاعد في الثانوي! (٦) القصور في اللغات مسألة تتعدّى التحصيل الأكاديمي؛ بعرف زول كان أوّل الشهادة السودانيّة، وجايب في العربي ٥٨؛ جد والله، ولو أذن لي بسمّيه ليكم، لو ما هو براه جا سمّى نفسه في التعليقات؛ (٧) عدم المرور في محطّة معيّنة كذلك ما بيحمل خلاصة كافية؛ بعرف زولة كانت أولة الشهادة السودانيّة، عايدة السنة؛ جد والله؛ وانا عن نفسي، في رابعة جامعة رسبت في ٤ مواد؛ ما لم تعرف الملابسات ما ح تطلع بخلاصة كافية؛ (٨) الشهادات عموما ما معيار وحيد للرجاحة العقليّة؛ المثال الجميل هو Norain، امتحن الشهادة السودانيّة وجاب كم وسبعين، وباع القراية مشى اشتغل فنّي بصلّح مكيّفات؛ ورجع امتحان بعد سنتين، وجاب كم وتسعين، ودخل كهربا الخرطوم، أعلى قسم في البلد، ووصل لحااادّي ما اشتغل في شركة أبل، أجعص شركة في العالم؛ فماف ما يمنع فنّي مكيّفات يكون أشطر من حامل دكتوراة؛ الخلاصة: شهاداتك الأكاديميّة دي تبروزها وتعلّقها في حيطة بيتكم، وتمشي تقدّم بيها للشغل؛ لكن في الشأن العام، المواطنون سواسية، صوتهم واحد؛ لا فضل لذكرٍ على أنثى، ولا لعاملٍ على عاطل، ولا لجامعيّ على أمّي، ولا لمحتكٍّ بالخارج على قابع بالداخل! بعد كدا داير اختم بتعليق عن أداء القرّاي؛ في فتيل: الحاجات الداير يعملها ما متناسبة مع التفويض الممنوح ليه! المفروض يتذكّره هو، وصلاح منّاع، ونصر الدين، وأيّ مسئول حاليّا، إنّه موظّفين في حكومة انتقاليّة، ما بيملكوا صلاحيّة حكومة منتخبة؛ التفويض العندهم إنّهم يمشّوا الحال [٢]؛ فحدّهم يعطّلوا سياسات التمكين الايديولوجي بتاعة الكيزان؛ لكن ما ادّيناهم تفويض يفرضوا قناعاتهم هم، بالأخص المثيرة للجدل؛ والقرّاي مدخّلنا في معارك وجدل لا ناقة لنا فيه ولا جمل؛ عبد الله جعفر

السؤال الملح عندي
لماذا المؤتمر للقراي فقط!!!؟
ولم نرَ تربوي واحد من قسم المناهج يرد؟
بمعنى يهمنا أن يكون مع القراي علي الأقل أربعة مختصين من قسم المناهج لنسمع منهم الدفوعات التربوية لمناهجهم
بدل القراي
تحياتي وسلامي لكم جميعا وربنا يكرمنا بعام كله خير ورزق وعدل وسلام ومحبة وتوفيق