عاجل: إقالة مدير مشرحة أم درمان وإحالته للتحقيق بعد إعادة تشريح جثمان (شهيد الكلاكلة)

عاجل: إقالة مدير مشرحة أم درمان وإحالته للتحقيق بعد إعادة تشريح جثمان (شهيد الكلاكلة)


12-29-2020, 01:17 PM


  » http://sudaneseonline.com/cgi-bin/sdb/2bb.cgi?seq=msg&board=510&msg=1609244268&rn=0


Post: #1
Title: عاجل: إقالة مدير مشرحة أم درمان وإحالته للتحقيق بعد إعادة تشريح جثمان (شهيد الكلاكلة)
Author: Hassan Farah
Date: 12-29-2020, 01:17 PM

12:17 PM December, 29 2020

سودانيز اون لاين
Hassan Farah-جمهورية استونيا
مكتبتى
رابط مختصر



كشفت مصادر موثوقة ل”الراكوبة” إقالة مدير مشرحة ام درمان د.جمال يوسف وإحالته للتحقيق إثر تقريره عن وفاة شهيد الكلاكلة بهاء الدين الذي أكد في تقريره الأول أن وفاته طبيعية وهو ما نفاه إعادة التشريح حيث بيّن التشريح الثاني أن الشهيد بهاء الدين تعرض لعدة إصابات كانت السبب في وفاته.

Post: #2
Title: Re: عاجل: إقالة مدير مشرحة أم درمان وإحالته لل
Author: ترهاقا
Date: 12-29-2020, 01:34 PM
Parent: #1



الخبر ده لو صحيح ، بالله كيف سمح ليهو ضميره يطلع تقرير كاذب زي ده وفي قتل نفس؟
ولا حول ولاقوة إلا بالله

Post: #3
Title: Re: عاجل: إقالة مدير مشرحة أم درمان وإحالته لل
Author: Gafar Bashir
Date: 12-29-2020, 01:55 PM
Parent: #2

Quote: الذي أكد في تقريره الأول أن وفاته طبيعية


لازالت الخدمة المدنية موبوءة
وتعمل بنفس طريقة جهاز الامن الكيزاني

ده مفروض يكون عبرة لمن يعتبر

Post: #4
Title: Re: عاجل: إقالة مدير مشرحة أم درمان وإحالته لل
Author: امتثال عبدالله
Date: 12-29-2020, 02:21 PM
Parent: #3

زي ده مفروض يشرحوهو ....هو ذاته....
ناس ما عندها ذمة!!!!!!

Post: #5
Title: Re: عاجل: إقالة مدير مشرحة أم درمان وإحالته لل
Author: عبدالعظيم عثمان
Date: 12-29-2020, 04:09 PM
Parent: #4

الكارثة دا خلف كثير من التضليل
من أحداث 2013 وحتي الشهيد يهاء
مكانه المحكمة
ليس أسوأ من القاتل الا الذي يدغمس ويحمي القاتل

Post: #6
Title: Re: عاجل: إقالة مدير مشرحة أم درمان وإحالته لل
Author: اخلاص عبدالرحمن المشرف
Date: 12-29-2020, 04:16 PM
Parent: #5

سمحتم لهم بالاستمرار من اللجنة الامنية البشير
وحتي اخر كويز ماذا تتوقعون ؟!!!!

Post: #7
Title: Re: عاجل: إقالة مدير مشرحة أم درمان وإحالته لل
Author: عبدالعظيم عثمان
Date: 12-29-2020, 05:55 PM
Parent: #6

يا إخلاص بتكتبي ساي
هسي إنتي عارفة الأقال الدكتور الكارثة دا منو؟
وهل بتخيلي الحكومة حتقدر تصل لي آخر كويز
في حالة الإنقسام دي
معقولة ناس طالعين يسقطوها وفي نفس الوقت
يطالبوها بتنفيذ مهام الثورة
طيب ما كل الناس تشتغل مع بعض عشان تتحقق الأهداف دي سريع

Post: #8
Title: Re: عاجل: إقالة مدير مشرحة أم درمان وإحالته لل
Author: Asim Ali
Date: 12-29-2020, 06:09 PM
Parent: #6

Quote:
سمحتم لهم بالاستمرار من اللجنة الامنية البشير
وحتي اخر كويز ماذا تتوقعون ؟!!!!

هنا دى المشكله
الناس اهتمت بازاله تمكين فى المواقع المكشوفه (الاماكن القياديه) لكن الخطر هو الناس المختفيه فى الاعصاب والمفاصل باعت الدوله وهم سبب كل شىء بيحصل من ازمات زفوضوى وحتى مظاهر الفساد الدوله العميقه باوضح معانيها

Post: #9
Title: Re: عاجل: إقالة مدير مشرحة أم درمان وإحالته لل
Author: elsharief
Date: 12-29-2020, 06:23 PM
Parent: #8

كلهم مجرمين عندما قالوا هذه الشراكة الحقيقية للثورة ونفس الاجهزة النظامية والامنية والمليشيات لنظام الانقاذ التى عذبت وقتلت واغتصبت طيلة ال 30 عاما وبل صرحوا بفض الاعتصام ووقف التفاوض هم الان فى هيمنة الحكومة وتم دعمهم بمايسمى شركاء الدم وذلك للمزيد من القتل والانتهاكات , تبا لهم وكل من شارك فى قتل المواطنيين حتى لو بالدعم للقتلة المتمثل فى نظام الانقاذ من لجنة امنية الى مليشيات

Post: #10
Title: Re: عاجل: إقالة مدير مشرحة أم درمان وإحالته لل
Author: Hassan Farah
Date: 12-29-2020, 07:56 PM
Parent: #1

كتبت راحيل ابراهيم

أعوذ بالله منك كمان بتبيع جثث حسبي الله ونعم الوكيل

كنت متدربة في قسم التحقيقات في الانتباهة .. بتذكر جيت داخلة مع الضهر كدا لمبني الجريدة أستاذتي Howyda Hamza قلت لي يا راحيل امشي الاستقبال في زول عندو قضية شوفيه .. اول حاجة ما وراني هو منو قال لي اسمعي مدير مشرحة ام درمان باع لجامعة افريقيا العالمية ٣٠ جثة مجهولة الهوية .. وبكرة بخلي ليكي المستندات في ظرف في كشك (ذكر اسم ما مستحضراه) وحاكتب في الظرف اسمك .. قلت ليهو اديني اسمك او رقمك رفض .. المهم بحب الاستطلاع بتاع المتدربين اليوم التاني مشيت وفعلا لقيت الظرف فتحتو لقيت فيهو حاجة ممكن تسميها عقد بيع ولا شنو المهم فيها استلام الجامعة كلية الطب لعدد ٣٠ جثة وانو ادفعت لجمال يوسف مبلغ ٦٠ الف .. جيت راجعة الجريدة لقيت محرر السهرة اخونا معتز محجوب وريتو قلت ليهو عاوزة اجيب خبر قبل اشتغل التحقيق طواااالي بكرة نزل الخبر رئيسي .. اليوم التاني شلت المستند (تنقش تنقش ) مشيت مشرحة ام درمان ولقيتو واديتو صورة من المستند وقلت ليهو ل شنو يعني تبيعهم عشان ما عندهم اهل😭 المهم برر لي باسباب حسيتها منطقية انهم:: بقعدوا في الثلاجة فترة طويلة مافي زول بستلهم والثلاجات عددها محدود والمواد الحافظة في شح كبيير.. عشان كدا ببيعهم عشان طلبه الطب يستفيدوا وبشتري بالقروش مواد؟وبصورهم بحتفظ بالصور لو اهلهم جوا يفتشوا.. قلت ليهو يعني انت مقر انك بعتها ؟؟ قال لي اي بعتها وقبلها بعت وتاني لو جاتني جثث ببيعها .. اليوم التالي نزلت خبر بتاع اقرارو دا .. ويلا كربت التحقيق بكلامو كلوووو واتسائلت ليه ما تكون في جهة حكومية مسئولة من مجهولي الهوية ؟؟؟
بكرة جوني ناس العدل في الجريدة اديتهم صورة من المستند ..وزير العدل كان دوسة ووقف علي الموضوع بنفسه .. وبتذكر انو تمت احالته لمحاكمات طويلة لانو البيع تم من غير علم اي جهة اخري وانو المبلغ ما اتورد لأي جهة رسمية. وبموجب التحقيق الصحفي دا تمت تحويل تبعية المشارح من وزارة الصحة لوزارة العدل .. بعد فترة مشيت لقيتو موجووود المهم بقيت اكتب واسأل وبتذكر مشيت لتابيتا بطرس في مكتبها .. قالت لي الزول دا مافي ليهو بديل لأنو لأنو المتخصصين في طب التشريح معدودين .. لكن نحن ح نختو في المراقبة ..
وكان عقيل سوار الدهب ذاااتو جابوهو شاهد اتهام ..
المهم : بقي اي زول يمش ليهو يقول انا من الانتباهة يقول ليهو اعوذ بالله من الاسمها راحيل وبس
بكل بساطة انتهت القضية هنا ..
يلا يا جماعة زول باع جثث موتي معقول مااااا يكتب تشريح مزور ؟؟؟
راحيل ابراهيم سليمان

https://www.facebook.com/photo؟fbid=...05662296202284https://www.facebook.com/photo؟fbid=...05662296202284

Post: #11
Title: Re: عاجل: إقالة مدير مشرحة أم درمان وإحالته لل
Author: Abdelrahim Mohmed Salih
Date: 12-29-2020, 08:14 PM
Parent: #10

إذا صح الخبر فهذه كارثه اخرى ستجعل السؤال مشروعا عن مدى تغلغل نفوذ الدعم السريع (ميليشيا الرجل الواحد) فى الوسط المهنى والسياسى ..يبدو ان مخالطه حميدتى للكيزان بالاضافه لذكاء الرجل الفطرى آهلته لقراء الواقع السياسى وخرافه الثوابت الثوريه فبدأ الرجل بحزم وعزم شراء مناصرين وصنع لوبى ينافح عنه مقابل ذهب لايصدأ وبكل اسف استهل حميدتى الماكر حملته ب مرتزقه الصحافه من حملوا رايه الثوار كذبا وفى اول منعطف إنحازوا لصاحب الجبل
سؤال اخر الى المجلس الطبى هل ستتم محاسبه الطبيب الخائن؟ وهل سيتكرم علينا المجلس الموقر ب ببيان توضيحى يضع الحقائق عاريه فى شمس الظهيره
اسئله لاتبحث عن إجابه لماذا تنفرد جماعه الدعم السريع ب استقلاليه خارج نطاق الجيش ويكون لهم إستخبارات وامن واذرع اجهزه أمنيه وسيارات لاتحمل ارقام وسلاح محمول فى وسط المدنيين يخرجه نهار غائظ ومؤثرات اخرى ليسقط ضحايا ابرياء فى معارك غير متكافئه ....

Post: #12
Title: Re: عاجل: إقالة مدير مشرحة أم درمان وإحالته لل
Author: أحمد محمد عمر
Date: 12-29-2020, 08:31 PM
Parent: #11

تحقيق شنو يا جماعة!
السادة القانونيين
دحين دة ما تستر على جريمة؟!

Post: #13
Title: Re: عاجل: إقالة مدير مشرحة أم درمان وإحالته لل
Author: Yasir Elsharif
Date: 12-29-2020, 08:55 PM
Parent: #12

شايفين الزول دا؟

#دا د جمال يوسف هو الاستعانو بيه الجنجويد وطلع ليهم تقرير بقول انو بهاء مات طبيعي وبدون أي شبهة جنائية.

#الجنجويد اختاروا الزول دا لأنهم عارفين انو عندو تاريخ كعب مع تزوير الحقائق وطمثها وبسببه شهداء كتار ضاع حقهم .

#الزول دا مفترض بتحاكم كأحد المجرمين الأساسين في قضية بهاء ومفترض قبل ما بهاء يندفن باكر التافه دا يكون اتقبض عليه.

ومع قضية الشهيد بهاء يظهر مرة اخرى اسم

جمال يوسف احمد

الجامعة: أكاديمية موسكو الطبية /روسيا
العمل: طبيب شرعي مدير مشرحة امدرمان

التهمة: الدكتور جمال يوسف احمد مدير مشرحة امدرمان،في ظل جريمة دهس تاتشر طفلي السامراب النكراء مساء الثلاثاء ٢٦ فبراير ٢٠١٩ لم يملأ البيانات الموجودة في كعب شهادة الوفاة كاملة حتى يبرئ ذمته و يثبت حالة و سبب وفاة الطفل مؤيد. حتى و إن كانت المعلومات موجودة في شهادة الوفاة طالما في خانات معدة مسبقا لتكملة اجراءات إذن الدفن عليه اتمامها كاملة غير منقوصه.

السكن: بحرى المؤسسة جوار كوافير قصر فرساى.
والده رحمه الله استاذ احياء فاضل من بحري. كانوا ساكنين جمب عمك بحر سوبر ماركت فاتح فى السوق المركزى بحرى.

افادات:

- رصد اسمه منذ تقارير وفاة شهداء سبتمبر ٢٠١٣ و سجله ملان وساخة. وكما يرجح انه أخفى سجلات شهداء سبتمبر ٢٠١٣.

- لا ننسى دوره في التقرير المهزلة في المؤتمر الصحفي بخصوص اغتيال الشهيد دكتور بابكر. وكلامه السخيف السمج في المؤتمر الصحفي للطب العدلي حول تقريرهم الفضيحة.

- في قضيه نواب امدرمان زور التقرير ضد الاطباء لصالح ولد واحد من الكيزان و طلعوا النواب براءه. قال القتيل مات بي خطأ طبي عشان يغطي علي القاتل الحقيقي ولما بقت قضيه راي عام افرجوا عن نواب جراحه ام درمان.

- واحد من اقذر الكوادر الطبية في تزوير وتغيير اسباب الوفاة.

- جابوهو في جريدة الدار قبل كدا شاهد دفاع في قضية حاجة امنة زوجة مهدي شريف. وشهادته كانت في صالح المتهمة دا طبعا بعد غير اقواله بعد 10شهور من الافادة القدمها للمحكمة. ما بعيد عليه يكتب شختتين في سبب وفاة طفل!

- درسنا مادة ال forensic و زول كعب شديد بشرب الف سجارة في اليوم. ما حصل مشينا راوند ما جينا معطونين بي ريحة سجايره المقرفة، ما عنده اي أخلاقيات دكتور و كوز كبير.

- لما كنت طالبة كان عندنا راوند في مشرحة مستشفى امدرمان، كان ما عنده اي ضمير في التعامل مع الموتى و بخلي الطلبة يشرحوا حالات مجهولي الهوية. بما ان مافي زول بسأل منهم و من ضمنهم المواليد مجهولي الوالدين المتوفييين و دا غلط لان طالب طب ممنوع يهبش اي شئ في تشريح قضية جنائية.

- من شفتو بطني طمت منه بعامل الجثث في مشرحه امدرمان كأنها لعب وبشرح بكل همجيه وبتلذذ. بتذكر مره كان شرح لنا جثه طفل مولود جديد بعد ما متعاون شرحه غلط. جاء قطع الرئه شرائح صغيرة عشان يعمل اختبار فيها وقال للراجل المعاه " الغلط في التشريح الليله والله اكلك لها ام فتفت". انسان اسلوبه قاسي جدا.

- والله كرهنا في التشريح الراجل دا سفاح ما دكتور.

- راجل فقري وكريه قال لنا ما داير اشرح عشان ما اتوسخ عندي محكمه!

- جمال ده بنجح الطلبة في امتحانات الجامعة بشرط انهم يجيبو له حاجات ماديه بطلبها هو. و الله على ما اقول شهيد كذاب و مرتشي.

- في مادة الطب الشرعي كنا لما نمشي مشرحة امدرمان هو بشتغل معانا و يشرح لنا. اول شي اسلوبه زبالة ما عنده اخلاق كان مع الميت كان مع الطلاب كان مع باقي الناس. ما عنده اي احترام لي الجثه ولا لي الميت والله بتعامل مع الجثث كأنها كيس نفايات اكرمكم الله.

- الراجل المرعب لما كنا ف كورس الفرونسك لاقيناهو في المشرحه كريه ياخ قال بحب ريحه الميتين!

- لمن كنا في اولى بنقرا في قاعه جنب مشرحه ام درمان ، بطريقه ما توصيلات الفورمالين بقت موصله مع كولرات مياة الشرب. يوم من الصباح الناس بتشرب لما جاء الظهر الناس بدأت تقع و تتسمم. وحصلت جوطه ف مستشفى امدرمان، لما جو يحققوا مع جمال قال ديل الطلبه براهم كبو الفورمالين عشاان عندهم مطالب ودايرين يضغطوا على الجامعة و يحققوا أغراض شخصية. تم تكذيبنا كطلبة وسمونا دفعة فورمالين. و نحن يا يمه برالمه و مساكين اكلناها ساي!

- معروف انه بياخذ مقابل لكتابة تقارير الوفاة وعنده سابقة قبل كدا واحد ضربوه ناس الامن لما مات طلع تقرير من المشرحة أن سبب الوفاة حادث حركة. أهل المتوفي ما رضوا و عملوا مشكلة كبيرة.

- قبل كدا فصل لكن تم ارجاعه إلى الخدمة بسبب عدم وجود أخصائيين شرعيين كفاية.

رقم التلفون :؟؟؟؟

حسابه على الفيسبوك :
https://www.facebook.com/dr.gamal.yousifhttps://www.facebook.com/dr.gamal.yousif

#جرائم_الانقاذ
#كوز_مرتزق
#لن_ننسى_لن_نغفر
#تسقط_بس
#شهداء_سبتمبر
#مدن_السودان_تنتفض
🔴

و الآن يزور حقيقة التقرير الطبي بتاع المغدور الشهيد بهاء
#كوز_مرتزق
#حقير_تافه

Post: #14
Title: Re: عاجل: إقالة مدير مشرحة أم درمان وإحالته لل
Author: عبد الصمد محمد
Date: 12-29-2020, 09:03 PM
Parent: #12

التسرع في المواضيع دي مضر. الراجل طبيب تشريح ما محقق جنائي
عادي التقرير الأول بدون العلم بحيثيات الجريمة بكون ما فيه كل التفاصيل
لكن بعد ما المسألة تصبح جنائية والشرطة ترجع التقرير للدكتور طالبة إيضاحات
محددة الطبيب بيفحص تاني ويعطي التفاصيل المطلوبة

Post: #15
Title: Re: عاجل: إقالة مدير مشرحة أم درمان وإحالته لل
Author: Hafiz Bashir
Date: 12-29-2020, 09:15 PM
Parent: #14



Quote: تحقيق شنو يا جماعة!
السادة القانونيين
دحين دة ما تستر على جريمة؟!


التحقيق وظيفته إثبات أن الخطأ في التقرير الأول حدث بسبب الاخلال بالأصول والقواعد العلمية المتعارف عليها في الطب.
الطبيب لا يحاسب على خطأ النتائج التي توصل إليها ولكنه يحاسب على السلامة القواعد والخطوات التي إتخذها للتوصل إلى النتيجة.
بعد إثبات الخطأ المهني ممكن تأسيس المسؤلية الجنائية.

المهم أنا ما متفائل نهائي
والقصة دي حتحصل فيها جرجرة زي جرجرة لجنة أديب وفي النهاية المجرم الحقيقي لا حيتحاسب ولا حيتحاكم.


Post: #16
Title: Re: عاجل: إقالة مدير مشرحة أم درمان وإحالته لل
Author: خضر الطيب
Date: 12-29-2020, 09:35 PM
Parent: #15

Quote: الطبيب لا يحاسب على خطأ النتائج التي توصل إليها ولكنه يحاسب على السلامة القواعد والخطوات التي إتخذها للتوصل إلى النتيجة.
بعد إثبات الخطأ المهني ممكن تأسيس المسؤلية الجنائية.

ممكن توضح النقطة دي اكتر؟
لأني بشتغل في مجال ما ليهو علاقة بحياة البشر لكن لو أخطأت بتحاسب على الخطأ

Post: #17
Title: Re: عاجل: إقالة مدير مشرحة أم درمان وإحالته لل
Author: Hafiz Bashir
Date: 12-30-2020, 00:00 AM
Parent: #16



سلام يا خضر
قريت تقرير لجنة الطب الشرعي التاني في بوستك
وبحسب التقرير التاني الصادر يوم 29-12-2020،
توجد فروقات جوهرية بينه وبين التقرير الأول الصادر يوم 20-12-2020.
التقرير التاني وضح وجود علامات على الجثة لم تتم كتابتها في التقرير الأول، وأستدل التقرير الثاني بها على أن الموت كان بسبب نزيف في المخ بسبب الارتطام بجسم صلب.
وهذا التقرير كافي كبينة على جريمة القتل وكافي لإثبات خطأ النتيجة المضمنة في التقرير الأول.
ولكنه غير كافي لإثبات مسؤلية الطبيب الذي كتب التقرير الأول عن الخطأ.
لجنة التحقيق عليها التحقق من أن النتيجة الخاطئة التي توصل إليها الطبيب الأول كانت بسبب تقصير منه و ليس بسبب عدم إمكانية الكشف عن هذه العلامات بالسبل المتاحة والواجب إتباعها وقت كتابة التقرير الأول او أن النتيجة الخاطئة كانت بسبب وجود تفسير علمي آخر للعلامات
فمثلاً ربما أن اللجنة إستخدمت تكنلوجيا لم تكن متاحة للطبيب الأول او ليست موصى بإتباعها في ضوء البيانات المتاحة في وقت التقرير الأول.
لجنة التحقيق هي التي تقطع مثل هذه الشكوك وتثبت مسؤلية الطبيب عن الخطأ في التقرير الأول وتشير إلى مسؤلية الطبيب وتقصيره بلغة واضحة ومباشرة في تقريرها..

قد يبدو لك خطأ الطبيب واضحاً في هذه القضية وكذلك يبدو لي أنا أيضاً ولكن إجراءات التحقق وتقديم الدليل ضرورية.


Post: #18
Title: Re: عاجل: إقالة مدير مشرحة أم درمان وإحالته لل
Author: خضر الطيب
Date: 12-30-2020, 00:10 AM
Parent: #17

مرحب مولانا حافظ

انا ما بفهم اكتر من اللجنة
تعال اكتب كلامك في البوست المعني
Quote: سلام يا خضر
قريت تقرير لجنة الطب الشرعي التاني في بوستك
وبحسب التقرير التاني الصادر يوم 29-12-2020،
توجد فروقات جوهرية بينه وبين التقرير الأول الصادر يوم 20-12-2020.
التقرير التاني وضح وجود علامات على الجثة لم تتم كتابتها في التقرير الأول، وأستدل التقرير الثاني بها على أن الموت كان بسبب نزيف في المخ بسبب الارتطام بجسم صلب.
وهذا التقرير كافي كبينة على جريمة القتل وكافي لإثبات خطأ النتيجة المضمنة في التقرير الأول.
ولكنه غير كافي لإثبات مسؤلية الطبيب الذي كتب التقرير الأول عن الخطأ.
لجنة التحقيق عليها التحقق من أن النتيجة الخاطئة التي توصل إليها الطبيب الأول كانت بسبب تقصير منه و ليس بسبب عدم إمكانية الكشف عن هذه العلامات بالسبل المتاحة والواجب إتباعها وقت كتابة التقرير الأول او أن النتيجة الخاطئة كانت بسبب وجود تفسير علمي آخر للعلامات
فمثلاً ربما أن اللجنة إستخدمت تكنلوجيا لم تكن متاحة للطبيب الأول او ليست موصى بإتباعها في ضوء البيانات المتاحة في وقت التقرير الأول.
لجنة التحقيق هي التي تقطع مثل هذه الشكوك وتثبت مسؤلية الطبيب عن الخطأ في التقرير الأول وتشير إلى مسؤلية الطبيب وتقصيره بلغة واضحة ومباشرة في تقريرها..

قد يبدو لك خطأ الطبيب واضحاً في هذه القضية وكذلك يبدو لي أنا أيضاً ولكن إجراءات التحقق وتقديم الدليل ضرورية.

Post: #19
Title: Re: عاجل: إقالة مدير مشرحة أم درمان وإحالته لل
Author: Asim Ali
Date: 12-30-2020, 00:30 AM
Parent: #18

Quote:
نيابة الجرائم الموجهة ضد الدولة تلقي القبض على د.جمال يوسف مدير مشرحة امدرمان بتهمة تضليل العدالة على خلفية تقرير تشريح جثمان قتيل الكلاكلة بهاء نوري الذي لقي حتفه لدى الدعم السريع

المصدر: صفحه داليا الطاهر

Post: #20
Title: Re: عاجل: إقالة مدير مشرحة أم درمان وإحالته لل
Author: أحمد محمد عمر
Date: 12-30-2020, 05:40 AM
Parent: #19

اتفاءل يا حافظ
الراجل جوة نيابة أمن الدولة
لو مجموعة محامين رفعوا فيه قضايا بخصوص شهدء 2013 وشهداء سبتمبر بإذن الله يفتو قديم وجديد

Post: #21
Title: Re: عاجل: إقالة مدير مشرحة أم درمان وإحالته لل
Author: Hafiz Bashir
Date: 12-30-2020, 08:07 AM
Parent: #20



Quote: Abubakr Ahmed Abbas
كدي قول لينا يا حافظ، وين الخطأ بتاع دكتور جمال؟
التقرير الثاني كاذب ولا يستطيع أن يصل لهذه النتيجة
تقرير دكتور جمال أيضاً يدين الدعم السريع
أعجبني · رد · منذ 1 س
المكون الإضافي للتعليقات من فيسبوك

هسه دا شنو دا؟
وين أنا قلت إنو دكتور جمال غلطان؟
أنا قلت في فرق بين التقرير الأول والتاني.
وأن الراجح هو صحة التقرير التاني وخطأ النتائج التي توصل إليها التقرير الأول
خطأ دكتور جمال او عدمه ومسئوليته او عدمها عن الخطأ في التقرير الأول تحدده لجنة التحقيق المكونة.

التقرير التاني يستطيع أن يصل للنتيجة التي توصل إليها.
ويمكن للطبيب العدلي إثبات وجود نزيف داخل الجمجمة وتحديد ما إذا كان سبباً راجحاً للموت أم لا.
ويمكنه التفريق بين ما إذا كان النزيف داخل الجمجمة حدث بسبب أذي عنيف او بسبب مرضي.

إنت بعضمة كيبوردك قلت ما قريت التقرير الأول ويبقى كلامك عنو كلام هردبيس ساي.
التقرير الأول قال إن الوفاة حدثت بسبب طبيعي وبالتالي ينفي وجود جريمة القتل أساساً.




Post: #22
Title: Re: عاجل: إقالة مدير مشرحة أم درمان وإحالته لل
Author: Hafiz Bashir
Date: 12-30-2020, 08:16 AM
Parent: #21


إتفائل كيفن يا أبوحميد والدكتور توجهت له تهمة تضليل العدالة.
الزول دا ممكن يكون شريك عديل في جريمة القتل ومفروض يتحاكم على هذا الأساس.

والشي التاني الخوف من إنو إلقاء القبض على الدكتور او حتى محاكمته وإدانته تكون سبب في إمتصاص الغضب الشعبي وننسى المجرم الأساسي.
ياخي حان وقت محاسبة آل دقلو على جرائمهم.