الشاعر عمر العوض إلي الرفيق الاعلي- له الرحمة

11:38 PM December, 24 2020

سودانيز اون لاين
زهير عثمان حمد-السودان الخرطوم
مكتبتى
رابط مختصر

https://top4top.io/


إنتقل الي جوار ربه بالدامر له الرحمة والمغفرة ولذويه الصبر والسلوان
شاعر قصيدة سوداني الجوة وجداني بريدو
في بربر السلوي وفي الدامر الخلوة بريدو...

نسأل الله أن يرحم الشاعر عمر محمد أحمد العوض ويحسن إليه ويحسن في فقده عزاء الأسرة والأهل ويلزمهم الصبر

تعازينا الحارة

إنا لله وإنا إليه راجعون

الراحل شاعر قصيدة "قربان":

قربان

الشاعر عمر العوض

الدامر

جات الفكرة ياظالم
بعد ماطارت السكرة
طيوف الماتو تزحم بالك أرواحن
ويقلق نومك الكابوس
وتسكن دارك أشباحن
عليك الدنيا اكبر من خُرُم إبرة

يجيك في أول التلت الاخير محمود
متل همس النسيم براااحه يفتح بابك المسدود
وانت الصاحي لا قايم صلاة الليل
ولا حارس شمس بُكرة

يطمن قلبك المفزوع ويلمس جسمك المورود
يعاين ليك
تزاول حولك اشباحن
وخوف الدنيا في عينيك
وفي اعماقك الحسرة

يسامحك بى رضا وتحنان
ويغفر ليك مرتاح الضمير قبلان
بعيد النظرة لاشامت ولا محزون
ولا عاجز عن القدرة

حبيبنا الغالى ضل ممدود
ويلقاك بالبشاشة ودود
نغيمو الدافي طالع من وتر مشدود
وفيهو حلاوة النبرة

طيورو الراحلة في الافق البعيد رواحة
ماضمت جناحها حدود
ولافكرو السرب بى فوق مكبل بالقيود مصفود
وكان الغايب الحاضر ... يضارع قوة الموجود
فض خواتم المجهول وفك طلاسم الشفرة

أتاريك ياحبيبي جميل
مشن من جفنك الغيمات ويشرب من صفاك النيل
وتظهر روعة القمرة

جراحات الوطن نجمات ... يضوّن في إهاب جسمك
شموخ ابطالو مكتوب في حروف اسمك
يمازج رسمك المضمون جمال الصورة والفكرة

قلوبنا معاك
لحظة منحنى التاريخ وعند الملحمة الكبرى
وانت تواجه الاعدام
خُطاك الثابتة نحو المشنقة المنصوبة تخطو بيك لى قدام
ولى اجفانك المكحولة ما اختلجت ولا شعرة

كانت ساعة في عمر الزمن مشحونة بالإحساس وبالفكرة
تجسد عزة الاوطان وترفع هامة الانسان
وتجمع في كثافة اللحظة كل نضارة التاريخ
وكل مواقف الذكرى

وتتقدم
بريق البسمة في شفتيك بيرسم طعنة السكين
ويشبه كبة الجمرة
وتتقدم
سماحة وجهك الشايقني في الليل البهيم
زى طلة القمرة
وتتقدم
تهز الدنيا تتفجر شرايين الحجر بالدم
وتغلى مراجل الثورة

حبال المشنقة اللالوب تتاوق ليك
تصابح صمتك الراضى وتعاين ليك
ودين الفطرة في اخر الزمن
كيفن يسل السيف على الفكرةم